Ezra 3 - Ohiatonhseratokénti

Thontahonthásawen Nahonsahonterén꞉naien

¹ Tsi nió꞉re ne tsatá꞉khaton shiwenhnitakéhaton nonhkweshón꞉as Nisraerró꞉nonhke ó꞉nen ratikwé꞉kon shisatinákeres ne rahotináthakons. Ethò꞉ne ó꞉nen ratikwé꞉kon tsi wahonhnitsiokwahró꞉roke ne Jerusalem nón꞉we,

² tánon ne Joshua né roʼní꞉ha né꞉ne Jehozadak, né꞉ne skátke ronaterihón꞉te tsi tenitsihénsthatsi, tánon ne Zerubbabel ne roʼní꞉ha né꞉ne Shealtiel, ratikwé꞉kon ne ronhthatenónkwes, sahonhnón꞉ni ne ratsienharáhkwa ne Sakoní꞉io ne Israerró꞉nonke, ne káti nahónton é꞉tho ahonsahonteskónhten tsi entsohianénhawe tsi nikahiá꞉ton ne Mahís rahohianerenhserá꞉kon, ne Rawenni꞉io rahonkwè꞉ta í꞉ken.

³ Iawerohátien; ne sóhti ne ronanahkerá꞉kwenhne tsi sakothitsá꞉niskwe ne thóh nón꞉we nihiohontsá꞉ien nihatinákereʼkwe, sahonhón꞉ni ne ietsienharáhkwa tsi ki nón꞉we nikahióthakwe ne orihwaká꞉ion. Ethò꞉ne ki thontahontháhsawen sahonteskónhten tsi nihiorenhnahón꞉ne noronhkeʼné꞉ha ó꞉ni noʼkarasné꞉ha nikahá꞉wi.

⁴ Wahonteʼnikonhró꞉ri tsi nikakhwáhere ne iothasehtháhkwa ne tahioianénhawe tsi nikaianerenhseró꞉tens; sehwenhniserákʼtsons tsi tahatiiesthánion nahonteskónhten tsi nikariwanónhtons ne niatewenhniserá꞉ke;

⁵ tánon ne iehiowénhte tahatí꞉ieste ne tsi nihiorenhnáhon tsi ronhteskónhtha ne kahiathakwé꞉kon tánon tsi niká꞉ien nahontahatí꞉iesthe ne orahkwáhse aorìhwake tsi akakhwárake tánon norihwakwé꞉kon noiáhsons nikarihoʼténhsons tsi nihiorenhnáhon nahontsataró꞉rohke tsi nenhonwashén꞉naien ne Roiá꞉ner, tánon nakwé꞉kon tsi nikhaiesthánion tsi nithonwá꞉wi ne Roiá꞉ner tsi ehʼnihiakonhnikonhró꞉tenskwe.

⁶ Ethosà꞉ne nonhkweshón꞉as tsi iáh aré꞉kho tethonatáhsawen nahonsahontenonhsón꞉ni Nononhsatokentihkó꞉wa, né꞉ne tiotenhniseratserénhton ne tsatá꞉khaton siwenhniʼtakéhaton nahonwateskhonthá꞉se ne Roiá꞉ner.

Tsi Enskanonhsonhní꞉hake Nononhsatokentihkó꞉wa Thonhtháhsawen

⁷ Nonhkweshón꞉as tahiontkawánion nowístas nahonwatikháriakse ne tehatitstenhró꞉thas tánon ne ratiskwenhkarakétas tánon ó꞉ni kákhwa tahontkawáhnion, nienekiráhthas, tánon ne iakenhiewáhtha kénhies ne iahonteniéhthonhke tsitkaná꞉thaiens ne Tyre tánon ne Sidon ne tahonthatawí꞉heke ne onenhthakwénhte okhonré꞉tsas ne Lebanon nón꞉we nahonthakónhne, né꞉ne kaniatarakheʼkó꞉wa nón꞉we nahontahatíhawe tsi nió꞉re ne Joppa. Orihwakwé꞉kon kí꞉ken thóh nahá꞉wenhne tsi ki nihoriwanonhwéhon ne rakó꞉ra Cyrus ne Persia nón꞉we.

⁸ Káti ne tekeníhaton siwenhnitakéhaton ne shihioséhrate ne sonhsahón꞉newe tsi nón꞉we nikanonhsóh꞉thakwe Nononhsatokentikó꞉wa ne Jerusalem nón꞉we, tahonthásawen wahothihiò꞉ten. Né꞉ne Zerubbabel, Joshua, tánon ne ronátiaʼkes ne rahononhkweʼtashón꞉as, ne ratitsihénstatsis, ne Levites, tsi nahá꞉wenhne ratikwé꞉kon ne ronanahkerá꞉kwenhne ne sóh꞉ti ne Jerusalem, wahontsatáren tsi wahonsnié꞉non ne kahioʼténhsera. Ratikwé꞉kon ne Levites né tewáhsen natehonosehrihià꞉kons khés ne sénha thotí꞉ions ne wahonwatirihónten nahothihiò꞉ten ne kahioʼténhsera tsi enskanonhsonhníhake Nononhsatokentihkó꞉wa.

⁹ Ne Levites ne Jeshua tánon ne sakohioʼhokón꞉as ó꞉ni ne roinhthatenónhkwes, tánon ne Kadmiel ó꞉ni ne sakohioʼhokón꞉as (ne rahothitióhkwas ne Hodaviah) wahontsatá꞉ren tsi wahonhterihón꞉ten tsi enskanonsonhní꞉hake nononsatokentikó꞉wa. (Ne wahonwatisnié꞉nion ne rahothitióhkwa ne Henadad.)

¹⁰ Nó꞉nen ne ratinonhsón꞉nis tahontháhsawen nahonhnón꞉ni tsi wahatitstenhrakwenhtháro tsi nón꞉we nenhkonhwénhskwahre Nononhsatokentihkó꞉wa, ne ratitsihénstatsis wakóses ronátstons wathatí꞉taʼne tánon iehonrawátstas ratihawánion, tánon ne Levites né꞉ne tsi ratitióhkwaien ne Asaph thóh wathatí꞉taʼne tehiotwashakwenón꞉ni ratí꞉hawe. Wahonwashén꞉naien ne Roiá꞉ner né tahiohianénhawe ne waterenhnothasónhas tsi nithonwaná꞉wi ne shihotenhniserathénionhkwe ne Ronhnonhtí꞉iokwe Táwit.

¹¹ Wathonwarihwá꞉kwahse ne Roiá꞉ner, tethonthasháf꞉fa ne iorenhnawénhthe: “Ne Roiá꞉ner tsi nithorihwaié꞉ri, tánon ne rahononhronhkwáhtshera tsi nokwáh ne Israerʼró꞉nons né꞉ne tsi nén꞉we enkénhake.” Onhkweʼtakwé꞉kon tsi nihatiwénhna tsi wathotihénrethe, tehonwanonhweriónhnions ne Roiá꞉ner, tiorì꞉wa ne tsitkenskwáhere Nononhsatokentihkó꞉wa tsi thontháshawen.

¹² Ronahtiohkowá꞉nen ne thotí꞉ions ratitsihénstatsis, ó꞉ni ne Levites, ne ohén꞉ton iehonhnétons ne tsi ratitióhkwaiens ronatkáton ne tkanonhsohthákwe Nononsatokentihkó꞉wa, tánon tsi nahonteró꞉roke tsi nahatinenhiakwenhthá꞉ro kí꞉ken Ononsatokentihkó꞉wa, tehonsénhtos tánon tehotihenréhtha. Ók ne ronátiaʼkes ne thóh ronhnéskwe tehotihenréhtha tsi nihonaʼtsenhnón꞉ni.

¹³ Iáh ónhka thaiekwé꞉ni nahieienhtérehne tsi natetsiatʼtí꞉hen tsi nihiakokʼtsenhnón꞉ni tsi tehiakohenréhtha tánon ne tehionhtséntʼtos, tiorì꞉wa tsi nihiotʼtsaró꞉kwen ahí꞉nonh nió꞉re iehioronhrónhka.