Exodus 7 - Ohiatonhseratokénti

¹ Ne Roiá꞉ner wahénron, “Thóh nenh konhiaʼtótensʼthe tsi shíʼken ní꞉ioht ne Rawenni꞉io á꞉kenhake rahonhàke ne Ronhnonhtí꞉io, tánon ne iatsíha Aaron rahónʼa tennhitháren tsi ní꞉ioht ne sonhkwéta rotó꞉kenʼse aʼkénhake.

² Kwʼah tsró꞉ri ne Aaron oriwahkwékon tsi nakonhrihónten, tánon kwáh enhoró꞉ri ne Ronhnonhtí꞉io nashaʼkorihon ne lsraeró꞉nons nahonnakeráhko ne raonahkerahʼserákon.

^3-4 Ók kíʼ kwáh enhihiónhnien ne Ronhnonhtí꞉io nahatenontsisthaʼniráhthe, tánon kwáh kíʼ iáh thahiatahónsahthate, iáh tewasterístha tohʼníkon ne ioteriwákʼtherons tsi naihshaʼtieráhnion ne Egypt. Ethòne kíʼ èntsien ne kwáh tehiothenonhianí꞉ton karewahtátshera ne Egypt nonwe tánon enkhehéntenhse tsi ratiʼtarahiéntons nakonkwetashón꞉ʼa nahatihiákenʼne tsi ionhwénhtsaien.

⁵ Tánon ne Egyptró꞉nons thó꞉ne enhoʼnateriéntharaʼne tsi Í꞉i ne Watiá꞉ner, nónenh ènkatsʼte nʼakeshatsʼténshera roʼnonhàke ne Egyptró꞉nons tsi tenthekhehiaʼtínekenhʼwe lsraeró꞉nons ne raotiʼnahkerahserákon.”

⁶ Ne Mahís ó꞉ni ne Aaron thóh naʼnhíʼiere tsi kíʼ niʼsakoríhonte ne Roiá꞉ner.

⁷ Né sahtatiʼtháren ne Ronhnonhtí꞉io, né Mahís 80 sahtehaʼhoserihiá꞉kon, ók ne Aaron 83 satehaʼhosehrihiá꞉kon.

Ne Aaron Tánon Ne Raotenʼnhitsheró꞉thakwa

⁸ Ne Roiá꞉ner washaʼkawénhaʼse ne Mahís ó꞉ni ne Aaron,

⁹ “Tó꞉ka ne Ronhnonhtí꞉io enhaʼriwahnónhton né꞉ne ahisehniʼriwahníratʼtshe ne ioriwaneráhkwat tsi nahisení꞉iere, Sró꞉ri ne Aaron né raoténʼnhits ètʼthake ró꞉ti raohénton ne Ronhnonhtí꞉io, tánon óniare iatenwakté꞉ni.”

¹⁰ Káti ne Mahís ó꞉ni ne Aaron Ronhnonhtí꞉ioʼke niaʼháne tánon kwáh ètho naʼnihiere tsi kíʼ nisakoró꞉ri ne Roiá꞉ner. Ne Aaron èhʼthaʼke wahó꞉ti ne raoténʼnhits raohénton ne Ronhnonhtí꞉io ó꞉ni ne rahonkwetashón꞉ʼa, tánon oniare iatewatʼtheni.

¹¹ Ethò꞉ne ne Ronhnonhtí꞉io iasakononhke ne rahonkweʼtashón꞉ʼa ne ronhteniʼkonhraʼtó꞉kahs ó꞉ni ne tehontierónhnions, tánon tsi nathaʼteieronhnionháton kwáh nónhne ètho nahatí꞉iere.

¹² Ètʼthake wahoʼnáti ne raonahténʼnhits, tánon naténʼnhits óniare iatewakʼté꞉ni. Ók kíʼ ne Aaron raoténʼnhits iahonʼnhékwahne ne raonahténʼnhits.

¹³ Ne Ronhnonhtí꞉io, tsi nihiótha, roʼtenonhtsisʼtaniráhton tánon kwáh kíʼ tsi niháwen ne Roiá꞉ner, ne Ronhnonhtí꞉io iáh kíʼ tesakoʼtahonsatá꞉ton ne Mahís ó꞉ni ne Aaron.

Ne Kakaronhniátshera Wahaʼkóienthe Ne Egypt Onekwénhsa

¹⁴ Ethóne ne Roiá꞉ner wahawénhase ne Mahís, “Ne Ronhnonhtí꞉io kwáh í꞉ken tsi rotenonhtsisʼtakʼsá꞉ton. Tánon iáh tehaʼthóntats nahonsahsakótʼkaʼwe nonhkweshón꞉ʼa.

¹⁵ Káti wáhs tánon tesawahtátʼken nonhronhkeʼné꞉ha nenhkaháʼwiʼke nó꞉nen kaniataʼráhke ne Nile nenhénren. Iahá꞉saf ne iontennhitsheroʼtákwa tsi niʼkáien ne óʼniaʼre iatehiotʼténion, tánon thóh kaniatarákʼtha tsiateráhrat.

¹⁶ Ethòne tshiénʼhaʼse ne Ronhnonhtí꞉io, ‘Ne Roiá꞉ner, ne SakoNí꞉io ne Hebrews, tahaʼkatóri nakonhró꞉ri nasehiátʼkaf ne rahonkwetashón꞉ʼa, né káti nahónton ne kahentaʼkekó꞉wa niahónʼne tánon niaʼhonwasénh꞉naien. Ók kíʼ tsi nióre nónhwa iáh tesahtahonʼshá꞉tats.

¹⁷ Nónhwa, Sanonhtí꞉io, ne Roiá꞉ner ráton tsi ensehriwahtsénhri ónhka nènhʼne ne rahónha tsi nenháiere. Satkátho, èhʼneken ne kaniataráhke enkenonhwàhrehʼke kí꞉ken kánia, tánon ne tsi kaniátare onekwénhsa iatenwatʼténi.

¹⁸ Ne kénʼtsions enkonhníheʼie, tánon ne tsi kaniátare toʼnióre tsi enwenhseráksenhʼne ne Egyptró꞉nons iáh táhonton ne thóh ahonsahatinekiráhʼteʼke.’”

¹⁹ Ne Roiá꞉ner wahawénhase ne Mahís, “Tsró꞉ri ne Aaron ieháhaf ne rahó꞉nia tánon iehátat èhneken ne tsi kaniatarénion, tsi kanatseratáʼtie, ó꞉ni ne tsi kaniataréhnions né Egypt nónhwe. Nonékanos onekwénhsa ienwáhton, tánon kwáh ohontsakwékon tsi onekwénhsa enwáhton, iekaníhare ne iontawenhsʼtákwah kaná꞉kons ó꞉ni onenhiaʼsónhas kátʼtshes.”

²⁰ Ethòne ne Mahís ó꞉ni ne Aaron kwáh ètho nanhiéʼre tsi kíʼ nisakorí꞉honte ne Roiá꞉ner. Rahoʼhénton ne Ronhnonhtí꞉io ó꞉ni ne rahonkwetashón꞉ʼa, ne Aaron wahahaʼráhtaʼthe ne rahó꞉nia tánon ètho èhʼneken ne kaniaʼtaráhke wahaʼnonhwàhreʼke, tánon kaniaʼtarahkwékon onekwénhsa iatewatʼténi.

²¹ Ne kentsionshón꞉ʼa wahkonʼníheʼie, tánon thóh nióre tsi wahensehrákʼsenhʼne ne Egyptró꞉nons iáh teshoʼtikwénion nahonsahothʼiʼnikiráhtonʼke. Kwáh tsit nonhwéson ne Egypt tsi wahʼkanekwensóhten.

²² Ethóne ne Ronhnonhtí꞉io rahonkwetashón꞉ʼa ne tehontierónhnions kwáh nónhne ó꞉ni ètho nahatíʼiere tsi wahthontierónhnion, tánon ne Ronhnonhtí꞉io kwáh sènha wahatenonhtsistaʼnírahʼthe. Kwáh kíʼ niʼniháwen ne Roiá꞉ner, ne Ronhnonhtí꞉io iáh tehoʼthonʼtáton nʼasakotahonsatáton ne Mahís ó꞉ni ne Aaron.

²³ Khèkok, sahá꞉kheʼte tánon rahoʼnónhskon nionhsáhre kwáh iáh othènhnen karíwah tehaʼhónhni iekaníhare kí꞉ken.

²⁴ Ratiʼkwé꞉kon ne Egyptró꞉nons atsatʼtákʼtha wahaʼtishionʼhionniánion ne ienekiráhtha, tsioríwa tsi iáh tesehwátonskwe nahonsahaʼtinekírah ne kaniaʼtaráhke ahʼonéka.

²⁵ Tsáta nónhta onhtoʼhetsʼte tsi náhe ne Roiá꞉ner raiénthon ne tsi kaniaʼtarahtáʼtie.