Exodus 37 - Ohiatonhseratokénti

Ronhnónhnis Ne Ateriwasehronhniátshera Oneró꞉kwah

¹ Ne Bezalel warónhni nateriwasehronhniáʼtshera oneró꞉kwah né꞉ne acacia nikaientó꞉ten 45 nihionkárake níhions, 27 nihionkaráke natewathakáron, tánon 27 nihionkaráke nitiótʼthe.

² Owistanoronhtsheróskon waharoróks꞉te ó꞉ni ne kanoróhkwahkon tánon owistanó꞉ron onhtsiatáhnakte watewakwahtáse.

³ Kaiéri níkonhs wahronhniánion ne iehástha nokakwenhtasónhas né nowistanó꞉ronh warónhniathe tánon wahatsʼthánion ne kaiéri níkonh tewashiʼtónhtons, tekenísons noʼkakwenhtasónhas ne skatísonhs nokwáhti.

⁴ Wahatenawahathonhniánion ne iehástha né꞉ne acacia nikaientó꞉tens, owistanó꞉ron waharoróks꞉the,

⁵ tánon watʼrohetstánion ne tsi iokakwenhtónhtons ne skatísonhs nokwáhti noneró꞉kwah.

⁶ Ne waharónhni ne watenonhtetʼtha né owistanoronhtsheʼróskon, 45 nihionkaráke níhions tánon 27 nihionkaráke natewathakáron.

⁷ Tékeni warónhni ne tiʼninerahóntʼtshonhte né꞉ne tehnhonnhe, tanon wahanekónreke owistanóron

⁸ skátʼtsons ne tsi ieiotʼtónhnions natenonhtéktha. Thóh ní꞉ioht tsi warónhni tsi ní꞉ioht nénskat khók iakénhake.

⁹ Né tininerahóntʼtshonhte tehnhónhnes tehiaʼtatkánere ne iatehiohiaiákʼthon natenonhtékʼtha, tánon né tsi tehonatehonnonhtsakwahráwen né iororóks꞉ton natenonhtékʼtha.

Ronhtekwahratsherónhnis Ne Kanà꞉taro Ahoriwáke Ne Nahonwátatʼtshe Ne Rawenni꞉io

¹⁰ Acacia nakaientó꞉ten wahonhnónhniaʼthe natekwáhra, 36 nihionkaráke níhions, 18 nihionkaráke natewatakáron, tánon 27 nihionkaráke nitiótʼthe.

¹¹ Owistanoronhtsherós꞉kon waharoróks꞉the tánon owistanó꞉ron wahahiatáhnake watewakwatáhse.

¹² Áhsen nihionkaráke waʼthakwataséhthe wathasahtáron tánon owistanó꞉ron wahaʼhiathánake wathakwahtaséhthe ne tsi tehiosahtaráhtie.

¹³ Kaiéri níkons wahaʼkakwenhtonniánions né nowistanóron íken tánon tsi tekahiósahiens nónhwe nahakwathakwenháton ne tsi tekashinónhtons.

¹⁴ Né tehiotkakwenhtaʼkwenonhniánions né nahontiénawasthe nonawahatesónha né nahatíhawe nathekwáhra ákta tsi tehiosahtharátie nónhwe nahatinihiontónhnion.

¹⁵ Nonawahatesónhas né꞉ne acacia nakaientóten wahonhnónhniathe tánon owistanó꞉ron wahatiroróksthe.

¹⁶ Naʼkerahsónha aòskon owistanó꞉ron wahakʼsonhniánion natekwáhrahne ahó꞉wenk: nakerasónhas, ne kátshes, ne katʼtshesónhas, tánon noweró꞉kwas kátshes né꞉ne enwátsʼtonhke ne onenharataʼsehtserákeri iahiéthate.

Wahonnónhni Ne Watʼthaseranihiontákwa

¹⁷ Owistanorontsheróskon warónhniathe ne watʼthaseranihiontákwa. Warónhni tsi nónhwe nenkarátane tánon né kanawahathakweʼní꞉io né꞉ne kanekònhre nowistanó꞉ron tsi ionhniáton. Tsi tekaieronhnionháton notsitsashónhas, ó꞉ni ne tsi ioskwehiónton tánon nahotsitsashónhas, énskak iéken.

¹⁸ Iá-iak nihionatóntons iehiokethó꞉tons naktóntie, áhsen níkon ne skatísons.

¹⁹ Skátsions ne iá-iak nikahátaʼkes áhsen níkonhs ne karasestánions otsítsas thóh nikatsiʼtsótens tsi ní꞉ioht ne almond ohsóhkwa iotsíʼtsonhte né ioskwehiónte tánon ionerahthóntons.

²⁰ Ne tsi naoronta ne wathaʼserotáhkwa kaiéri níkon karaséston notsítsas thóh nikaieronhtó꞉ten tsi ní꞉ioht ne almond osóhkwa ne iotsítsonhte tánon ioskwehiónte tánon ioneratóntons.

²¹ Énska ioskwehiónte é꞉take ne tsi ionatóntons ne áhsen níkon ionáthonte.

²² Noskwéhias, ne onathasónhas, ó꞉ni ne watʼthasehranihiontákwa skátsons íken ne tsi kanekónhre nowistanó꞉ron.

²³ Tsáta nikahasehrákes waʼronhniánion nahonthaseranihióntaʼkwe, ó꞉ni warónhni ne tekatsirohraráktha tánon ne wathakenraráhkwa aòskon owistanó꞉ron íken.

²⁴ Tsáta niwáhsen nikakonhtsheráke wáratste nowistanóron tsi warónhni ne watʼthaseranihiontákwa tánon tsi niwatsʼthasónha.

Wahonhnónhni Ne Ientsenharáhkwa Tsi Nón꞉we Nennenwátren Ne Kaienkwarakónhons

²⁵ Ne ientsenharáhkwa acacia nakaientó꞉ten wahonhnónhniaʼthe, ne wahontsaháthake ne kaienkwarakónhons. Tehiotekerónhte, 18 nihionkaráke nihions tánon 18 nihionkarahke natewathakaron, tánon 36 nihionkaráhke nitiótʼthe. Nahonikónharas ne tsi tekahiósaiens énskak iéken.

²⁶ Waharóroke ne éhneken, akwékon ne kaiéri nakatónties, tánon kakasthorókton ohwistanorontsheróskon íken tánon ohwistanóron hiotiatháʼnhakte teiokwatáse.

²⁷ Tékeni ohwistanó꞉ron waʼhakakwenhtónhni né iehástha tánon ehthàke ne tsi hiotsathanen nónhwe nahanihiontónhnion né tékeni nokwáhti skatísons, né nahontiénawasthe nonawahatesónha tsi enhatíhawe.

²⁸ Ne onawahatesónhas acacia óienthe warónhniathe tánon ohwistanó꞉ron waharóroks꞉the.

Waʼhonhnónhni Ne Iontatsiatokástha Kénhie ó꞉ni Ne Iontsienkwahronhniatákwa

²⁹ Kwáh ó꞉ni warónhni ne iotokénti iothatsiathakonhionstákwa kènhie tánon ne wenhserákon iontsienkwahronhniatákwah, tekaiéston ne iotsiatakonhionstákwa.