Exodus 34 - Ohiatonhseratokénti

Ná꞉se Osténras Kaweienenhtáhon

¹ Ne Roiá꞉ner wahawénhase ne Mahís, “Tékeni senenhiakwétar tsi ní꞉tso thónhne ne tsotieréntons, Tánon thóh enkhiáton nowenhnasónhas tsi nikahiátonhkwe ne tsotierénhtons osténras, netesharíhtons.

² Shaʼthatewehienénhta noronhkène, tánon tasehnonhtárah tsi ionónhthe Sinai thóh nónhwe natahiʼtsiatátken ohnothoharahkénhiate.

³ Tó꞉sa ónhka entesehiaténhawe; kwáh ne tó꞉sa ónhka ahiontátken ne tsi ionónhthe; tánon iáh ne teiotinakaronhtónʼa iáh ó꞉ni ne tionhnónskwahrons ne akonhtihóntake ne tsi iononhtaientáhon.”

⁴ Káti ne Mahís tèkeni waenstenhrakwétaron, tánon oronhkéhstsi nó꞉ia sahiórenhne iahá꞉hawe tsi tionónhthe ne Sinai, kwáh kíʼ tsi niháwen ne Roiá꞉ner.

⁵ Ne Roiá꞉ner otsathàke nónhwe tsi tahátsʼnenhte, skátke thóh nónhwe natníhtane, tánon wahatró꞉ri ne raosenhnatokénti, né Roiá꞉ner.

⁶ Ethóne ne Roiá꞉ner rahohénton wahatohétsthe tánon iahanáton, “Í꞉i, ne Watiá꞉ner, kení꞉io titkáhere wá꞉tien ne kenténrat ó꞉ni nathaniténron, iáh tewatiésen nahonkenákwen tánon kenéstha ne kanoronkwáhtsera ó꞉ni kariwatokéntshera.

⁷ Kateweiéntons nakararáhtshera né꞉ne niwenhniaweʼhetsheráhsen níkon tewateresehrásere tánon sewakerikónhrens ne kariwahétken ó꞉ni ne kariwáneren; ók iáh kíʼ tahonkeriwanó꞉ron naʼkheréwathe ne ratiksaokónhas ó꞉ni ne ronhwaʼnaterehokónhas né asénhaton tó꞉ka ó꞉ni ne kaieríhaton niatewatereserásere né꞉ne ronwatihiohokónhas raotiriwanerahákʼtsheras ahorihóniat.”

⁸ Ne Mahís kasterihénhken onhwenhtsáke watatʼtsákete tánon wahaterénhnaien.

⁹ Wahénron, “Saiá꞉ner, tó꞉ka kwáh tókenske serientí꞉ios nakonhàke, Konriwanonhtónhnis nahitewaʼteró꞉shen. Kíʼ onkweshón꞉a ne rotinonhtsistanírons, ók shaʼsanikónhren nonhkwariwahetkénsera tánon nonhkwahriwanerenháktshera, tánon takwahiéna tsi í꞉se shonkwéta akénhake.”

Nateriwasheʼronhniátshera á꞉se Shón꞉hton

¹⁰ Ne Roiá꞉ner wahawénhase ne Mahís, “Ó꞉nen kíʼ watsianerensehrónhni tsi nó꞉kwah ne Israerʼró꞉nons. Ne rahotihénton iorihowánens tsi nenhtieránion né꞉ne kwáh iáh kaʼnèka nonhwénhton ne tsi ionhwenhtsáte thóh teiawénhʼen nonhkwéhʼne. Onhkwetakwékon enhiontkátho nahó꞉ten ne iorihowánens Ní꞉i, ne Watiá꞉ner, nenkʼkwéni, tsioríwa tsi natehiotenonhiaʼníton tsi nénhtiere ne sariwá꞉ke.

¹¹ Satewénhnarak ne kaianerénseras né tkonhiáwis nónhwa wenhniseràte. Enkhehiarékwahthe ne Amorʼró꞉nons, ne Canaanites, ne Hitró꞉nons, ne Perizró꞉nons, ne Hivró꞉nons, tánon ne Jebusites, tsi nienhénse.

¹² Tó꞉sa thènnen sewatianerensehrónhni nonhkweshón꞉á tsi kanakeraseráien tsi nónhwe niahisenonhá꞉tie, tsioríwa nonhtiérenk né꞉ne kenhéion tsi enhesaterístaien.

¹³ Khèʼkenk, shaʼsehrishión꞉ko ne rahonáwenk ientienharákwas, tèsrit ne iotokéntis ronatenawaható꞉tons, tsi né rónstha tsi konhwasénhnaiens ne raotiníio Asherah.

¹⁴ “Kwáh tó꞉sa tsénhnaien ne ó꞉ia niʼiohokónhas, asèken ne Roiá꞉ner, raosénhna iotekéffen, kwáh rotekéffen Ní꞉io.

¹⁵ Kwáh tó꞉sa sehwatsianerenhserónhni nonhkweshón꞉ʼa ne tsi kanakeraseráien, tsioríwa nó꞉nen enkonhwatisénhnaien ne iáh tekónhnonhnhe raotiní꞉ios tánon enkonhwanateskóntʼthase, eniesahónkaron nasehiatsiátarahse, tánon entishaʼnikonhratihéntʼto ná꞉sehke ne káhkhwa konwatitáti ne raotiní꞉ios.

¹⁶ Né sehienhokónhas nonhtiérenk ne enhotíniake thíken tiʼhiononhontsátes konhnónhkwe, né enhonwanasárihne ne iáh tahonsahotiriwatokénhake tsi nó꞉kwah ní꞉i tánon né enkonhwatisénhnaien ne iáh tekonhnónnhe niʼiohokónhas.

¹⁷ “Tó꞉sa karístatis nahó꞉ten tsiónhniat ne niʼiohokónhas tánon né asehsénhnaien.

¹⁸ “Sewakhwaʼhérak ne iáh tewatʼtenhkwáhton kanátaro. Tsi kíʼ nikonhró꞉ri, né sehnátarak ne iáh tewatʼtenhkwáhton kanátaro né꞉ne tsáta nónhta nikaríwes né Abib wenhnítare, tsioríwa tsi thóh niwenhnítarahkwe ne shaʼthontesewahiákenhne ne Egypt.

¹⁹ “Nentewatiérenhte raksáʼa enrenhnákerate tánon nenhtewatiérente ne rátsinn katshénen enhrenhnákerate Í꞉i akáwenk,

²⁰ ók kíʼ ensehsenaskwahnínonh nenhtewatiérenhte enhrenhnákerate ne tewahóntes né ensehtáʼtse ne teiotinakaronhtónʼa owíra ne rahonakʼtáke. Tó꞉ka iáh tahonsaʼsnínon, teʼsheniáriak. Saʼsnínon nenhtewatiérente enrenhnákerate ne raksáʼa. “Iáh ónhka nakʼkhénton tahontáien ne iáh othènen tahionkawíre.

²¹ “Iáh꞉iak nónhta sáien nahisahióten ne sahioténsera, ók tó꞉sa kíʼ sahióten ne tsatákhaton niwenhniserakéhaton, iáh ó꞉ni tsi niʼietarahkaráthos nikaháwi khés niʼieientóhkwas.

²² “Sewanónstat tsi niʼieieʼtwákwas ne tehiontenónhwerons nónen entesatásawenh nashiéntʼthoko nenhtewatiérenhte kaienton ne sanahtsia, tánon sewá꞉nonhstat tsi natehiontenónhwerons ne wateweiénton ne kanenahkene nó꞉nen ensaiaróhroke.

²³ “Áhsen nihioriwáhke ne tsiósera ratikwékon ne shonkwetasónhas ó꞉nenk tsi enʼthónhne nahiontsénhnaien, ne Watiá꞉ner, ne Khení꞉io NʼIsraerʼró꞉nonhs.

²⁴ Né nó꞉nen enkheʼhiatinekénhʼen ne onhkweshón꞉ʼas ne iesahiotátis tánon ensekʼkówanahthe ne sanakerásehra, kwáh iáh ónhka tahionteniénten nakonhwasénhni ne sanahkerásehra tsi nikaríwes kí꞉ken áhsenh nihioriwáhke tehiontenonhweráhtons.

²⁵ “Tó꞉sa séhtats ne kanátaro ne ionttenhkwáhtha ionhniáton nónen enskateskónhtʼthase ne katʼtshénen. Tó꞉sa thènnen sateweiénton tsi nióre noronhkéne né thènen akénhake ne katshénen ne konhwárhio ne èneken watohetsthákwa tehiontenonhwerahtónhkwa.

²⁶ “Iatehiosehráhke Roiá꞉ner rahonónhskon tásaf nenhtewatiérenhthe onátsia enshientʼthó꞉ko. “Tó꞉sa ènsehrithe ne kentiʼthohiónha teiotinakaronhtónʼa tó꞉ka ó꞉ni ne kahiatákeras né꞉ne konwanisténha ahonónhta áhsasthe.”

²⁷ Ne Roiá꞉ner wahawénhase ne Mahís, “Shiá꞉ton kíʼ ken owenhnasónhas, tsioríwa tsi né kí꞉ken owenhnasónhas tkanonhkonhniáton tsi watsiaʼnerenseronhnihátie níʼseke ó꞉ni nIsraerʼró꞉nonhs.”

²⁸ Ne Mahís thoʼienhenterónhtakwe skátke ne Roiá꞉ner né꞉ne kaiéri niwásenh niwenhniseráhke ó꞉ni niwasonhtàhsen, iáh othènen tehawékon iáh ó꞉ni tehonekíren. Ostenráhke wahahiatónhnion nowenhnasónhas nateriwasehronhniátshera—né꞉ne oiéri niioríwake nʼatiawenrátshera,

Ne Mahís Ionsahaʼnonhtátsnienthe Tsi Ionónhte Ne Sinai

²⁹ Nó꞉nen ne Mahís ionhsahaʼnonhtátsnenthe tsi ionónhthe ne Sinai rahawinónhtie ne Oiéri Nihaʼwénhnake, né rakonhsáke teiostharátʼthe tsioríwa tsi Roiá꞉ner tehothithárahkwe; ók iáh kíʼ tehoteriéntarahkwe.

³⁰ Ne Aaron tánon nonhkweʼtakwékon Mahís wahonwakenhénhion tánon wahontkátho ne rahkonhsáke tsi nateiostharáʼthe, tánon rahtitʼtsániskwe ne rahiaʼtákʼta niahónʼne.

³¹ Ók ne Mahís iashaʼkónonhke, tánon ne Aaron ó꞉ni ratikwékon ne sakotiʼhenténhse ne kanakerasehrákon rahonhá꞉ke niahón꞉ne, tánon ne Mahís washaʼkothárahse.

³² Ethòne, onhkwetakwékon ne Israerʼró꞉nonhke rahiatákʼta wahonteróhroke, tánon ne Mahís akwékon tashaʼkáwen ne kaianerénseras ne Roiá꞉ner thó꞉wi ne tsi tionónhte ne Sinai.

³³ Nónen ne Mahís sahá꞉sa tsi shaʼkotaraníhaʼkwe, oniataʼráʼa wahtatheniataráhnake.

³⁴ Ne nónen kátke ne Mahís raothohserákon niénre ne Roiá꞉ner tsi nónhwe níres ne tanithá꞉ren ne Roiá꞉ner, enharíhsi noniatará꞉ʼa. Nó꞉nen tetthahiákenhne, enshaʼkoró꞉ri nʼIsraerʼró꞉nons oriwakwékon tsi nihonwaró꞉ri nahatróri,

³⁵ tánon enhontkátho ne rakonsáke tsi nateiostharátʼthe. Ethòne kíʼ tensahteniataráhnake tsi nióre nóia ienskáhewe thóh niahonsáre ne iathahonsahnitháren ne Roiá꞉ner.