Exodus 24 - Ohiatonhseratokénti

Ne Ateriwasehronhniátshera Ne Tekahneʼtohʼrará꞉kon

¹ Ne Roiá꞉ner wahawénhase ne Mahís, “Káts akonhàke nonhtáse kènʼen tsi iononhtáhere, íse tánon ne Aaron, Nadab, Abihu, tánon ne tsáta niwáhsen niháti ne sakotiʼhentènhse ne lsraerʼró꞉nons; tánon tsi ioʼtiesáonʼk shé꞉kon kwáh kén nióre théses, teshaʼtsháket saterénhnaien.

² Shonʼhaʼáhkok, tánon iáh ónhka ne ronáhtsiakes, né tsiatáktha nahontahónʼne. Nonhkweshón꞉á iáh nònhʼne tehiówenk nahontahatinonhtárahne.”

³ Ne Mahís iashaʼkoró꞉ri nonhkweshón꞉ʼa akwékon tsi nahó꞉ten wenhénron ne Roiá꞉ner tánon oriwakwékon ne kaianerenserasónhas, tánon ratikwékon nonhkweshón꞉ʼa tsi wathatiriwasehráko, “Kwáh akwékon thóh nenhiakwáhiere tsi nahó꞉ten ne Roiá꞉ner wahénron.”

⁴ Ne Mahís oriwakwékon wahaʼhiáton tsi nahoténson ne Roiá꞉ner wahénron. Oronhkéstsi nʼóhia sahiórenhne waʼrónhni ne ientsienharáhkwa tsi ionhnonhtoʼtáhon tánon tekeniʼiawénhre nikanénhiake wahanenhiotónhnion, né꞉ne skentaráʼtsions rahotiriwáke ne lsraerʼokónhke.

⁵ Ethòne kén nithoʼtihiónsas iasakoténienthe, tánon wahonwenhtienkwaronhniáten ne Roiá꞉ner ó꞉ni tó꞉ka niháti wakonhwanatsaʼtaʼtsa꞉áhte ne tsionónskwarons né tsi sahotiríwa íken tsi iahatíthate.

⁶ Ne Mahís asénhnon tsi níkon wahatinékʼkwah ne kaʼtshénens iahá꞉hawe tánon kaʼtsétakons waharónhnion; tánon ne asénhnon wahotátere tsi ietsienharakwáʼke né iahó꞉ti.

⁷ Ethòne wahatʼtháwa ne kahiatónhsera nateriwasehronhniátshera, tsi nónhwe nikaiatónhnion ne Roiá꞉ner tsi nihotatíhon, tánon tahakwísron tsi wasakowenhnaʼnhóʼthase nonhkweshón꞉ʼa. Wahonníron, “Kwáh enshakwawénhnarahkwe ne Roiá꞉ner tánon thóh nenhiakwáhiere tsi niháwen.”

⁸ Ethòne ne Mahís waháʼthawa né kátshe ne kanekwénhsare tánon wasakonekwenhsóhiake nonhkweshón꞉ʼa. Wahénron, “Ne kí꞉ken nonekwénhsa ne kanakentó꞉rens nateriwaseronhniátshera né tsi nihóson ne Roiá꞉ner nónen shontatshí꞉tson akwékon kí꞉ken kariwatáʼtsheras.”

⁹ Mahís, Aaron, Nadab, Abihu, tánon tsáta niwáhsen niháti ne sakotiʼhentènse ne Israerʼró꞉nons iahatiʼnonhtárahre

¹⁰ tánon wahonwá꞉ken ne SakoNí꞉io ne lsraerʼró꞉non. Ne tsi nónhwe niháʼrahte tsi í꞉ken ní꞉ioht ne akanetakwentáronke ne ohrónhia niwashoʼkóten ne kanenhianóron sapphire konwanatónkwa, kwáh ohrónhia ní꞉ioht tsi ní꞉ioht ne tsi iotsíkerahre.

¹¹ Ne Rawenni꞉io iáh tesakoʼkarewáhthon kí꞉ken sakotiʼhentènse ne lsraerʼró꞉nons; wahonwáken ne Ní꞉io, tánon ethòne skátke wathónthonhte.

Ne Mahís Tsi Tioʼnonhtáhere Ne Sinai Iéhres

¹² Ne Roiá꞉ner wahawénhase ne Mahís, “Thasehʼnontárahk akonháke nonhtáse, tánon tsi iotiesáonʼk kènʼen íhses, kwáh entkónhion tèkeni tekenstenrakwente, né kaháwe ne kaianerénseras tsi niwakʼkhetonhnion tsi nahiakorihónhnien nonhkweshón꞉á.”

¹³ Ne Mahís ó꞉ni ne roʼsniénons Joshua wahiaʼthatewehienhnenhthàne, tánon Mahís tahatásawenh niahanontárahne.

¹⁴ Mahís wahshakawénhase ne ohénton iehonhnéton, “Kénʼen thakwatheráhrat nathohsehráhkon tsi nióre thentsiáʼkwe. Aaron tánon ne Hur kénʼen sewakwékon; tánon káti nónhka tehiakoriwatíronhthe nakariwaʼsehronhníhake enwáton roʼnónha iaheʼtsihiatʼkhetóʼthas.”

¹⁵ Ne Mahís iahanonhtárahne tsi ionónhthe ne Sinai, tánon kwáh íken tsi tehiotʼtsátaien.

^16-17 Tsi natehioʼkaráiakt ne kaswatʼthétshera ne tsi thóh íres ne Roiá꞉ner tsi thontahanonʼtátsnenhte. Né lsraerʼró꞉nons ne kaswatʼthétshera kwáh thóh ní꞉ioht tsi shí꞉ken ne ótsire iotékkha onontakéniaʼte. Nʼotshàta ne iorókthon ne tsi ionontáhere ne iáiak niʼwenniseráke, tánon ne tsaʼtákʼhaton shiʼwenhniseraké꞉haton oʼtshá꞉takon ne Roiá꞉ner thahonáton ne Mahís.

¹⁸ Ne Mahís iahanonhtárahne iatatsaʼtaháwehiasthe. Thóh nónhwe iehenterónhtaʼkwe né꞉ne kaiéri niwáhsen nónhta tánon kaiéri niwáhsen niwasónhthake nikaríwes.