Exodus 2 - Ohiatonhseratokénti

Shaʼrennákerahte Ne Mahís

¹ Kí꞉ken tsi nikahá꞉wiʼkwe rónhkwe né꞉ne Levi raotiʼtárahkon nónhwe nithaʼwé꞉non wahotíniake ne iónkwe né꞉ne sahotiʼtára,

² tánon wahotiʼwiraién꞉tahne ráksaʼa. Nó꞉nen sahóken tsi nikawirí꞉io, áhsen niwenhníthake wahohiaʼthásehthe.

³ Ók nó꞉nenh iáh tetsotónhon né sénha isiʼnónhwe niaʼhióha nahohiaʼtásehthe, iatewathé꞉rahkwe né꞉ne Oʼiónwi nahó꞉ten ionhniá꞉ton tánon kanhetahóntsi wakaʼrós꞉the né꞉ne tó꞉sa tahontʼnekóhetsʼte. Thóh wahohiaʼtítha ne owirà꞉a tánon èthone thóh iahotheráhien tsi nónhwe ne iáh tetshonhótes tánon kwáh tsohóntes ne atsatákʼtha.

⁴ Tánon nowirá꞉ʼa sahkotsíha iáh ahʼínon nióre tetiéthakwe nahiaʼkothó꞉kenʼse onhʼnenhoʼhiá꞉tawen.

⁵ Ne Ronhnonhtí꞉io sahkoiénha atsáktha nonhtáien nahiontáhwen, tsi niʼkaríwes nakonhátsehras tehonahtekhahakwenháties natsatákʼtha. Thonʼtaiawénhsʼtsi wahóntʼtoke àthere tsokèrah tsi nónhwe tsohóntes tánon iakonhwató꞉ri nakonhátshera niaʼièko.

⁶ Ne iakononhtí꞉io wahenonhtékshi tánon wahonwàken owirá꞉ʼa raksá꞉a. Tehasén꞉thoskwe, tánon tsi nahonwénhtenhre. “Né kíʼ꞉ken ne énska Hebrew raksá꞉ʼa,” wakénron.

⁷ Ethóne ne sakotsíha wakonhwariʼwahnónhtonhse, “Katònhʼken iakínonhke ne Hebrew iónhkwe tahosniéne nowirá꞉ʼa ne sarihwáhke?”

⁸ “Asatʼthontáʼtsheke thóh nátsier,” wakʼkariwahsehráko. Sók kíʼ né kaksá꞉ʼa tahioʼiá꞉ténhawe ne kwáh owirá꞉a roʼnisténha

⁹ Ne iakononhtí꞉io wakonhwaró꞉ri ne iónhkwe, “Iaʼtsiaténhaf kíʼ owirá꞉a tánon tètsnieh nakeriwáhke, tánon enkonhkáʼrhiakʼse.” Sók kíʼ iahohiaʼténhawe ne raksá꞉ʼa tánon wathóʼsnieʼneh

¹⁰ Onahkènhke, nónenh ne raksá꞉ʼa iaʼtekahiéri tsi nithóhionkwe, iahonwahiaʼténhaʼwe ahohénton ne Ronhnonhtí꞉io sakoién꞉ʼa, ahónha onhtewirahráko tsi shí꞉ken ní꞉ioht ne kwáh ahónha roiénha. Wahawénhase, “Awènhke wahiskóhko, tánon káti Mahís wahináhtonkwe.”

Ne Mahís Wahatéko Ne Tsi Wathonwenhtsá꞉ien Ne Egypt.

¹¹ Nónen ne Mahís sihotehiá꞉ron, thóh niaháre washaʼkonahtenhrehsèhra ne rahonkwetashón꞉ʼa, né꞉ne Hebrews, tánon wahatkátho tsi nihonwenhnonhniénhnis nahotiʼhióten ne iohiotensehrahnírons. Iekaníhare wahó꞉ken ne Egyptró꞉non wahononhwarhiákon ne Hebrew nahahiaʼtóten, né꞉ne kwáh Mahís rahonkwéta.

¹² Ne Mahís waʼtatkatónhnionʼwe, tánon nónenh iáh ónhka teshaʼkóken, wahó꞉nonhwarhiákon ne Egyptró꞉non tánon wathosteríhen oneʼsaronhkwàhke wahaʼsonhiónhni tsi wahá꞉sehte nohierónhta.

¹³ Tsi ó꞉ia sahiórenhne thóh sá꞉rethe tánon wasaʼkóken tenihiá꞉se Hebrew ronaterí꞉io. Wahawénhase tsi nikáien ne tehaterienʼtawénhries, “Onhʼnihiotiéren tsi ehʼtsenonhwenhsehrhários né꞉ne sehseniʼhiá꞉tha Hebrew?”

¹⁴ Ne rónhkwe waʼthariwasehràko, “Ónhka ní꞉se iesariwáhwi ne nastiaʼtkórasthe tánon ó꞉ni ne taskenihiaʼtórehtase? Enskenonhwaʼrhiákon kén kwáh tsi ní꞉ioht tsi etʼtsenonhwarhiá꞉kon ne Egyptró꞉non?” Ethòne ne Mahís wahoʼteronhniénten tánon rahonhá꞉ke khók tsi wahénron, “Nonhkweshón꞉ʼa waheriwatʼtsénri tsi niwakatiéren.”

^15-16 Nónen ne Ronhnonhtí꞉io sahariwáhronhke tsi nihiá꞉wenhʼen, wahaʼteniénhten nahonwaʼnonhwaʼrhiákon ne Mahís, ók ne Mahís wahaʼtéko tánon tsi tsohóntsaien ne Midian nónhwe ionsaʼhátsien. Eskawenniserá꞉tekwe, nó꞉nen ne Mahís onaweratʼta renskotakwe, tsá꞉ta nikón꞉ti ne Jethro sakoiohokónhas, ne ratsihénstatsi ne Midian, takontinekotsénha tánon wakontinekananonkʼkon nonarhiotashónhas ne kontinihkiratʼtha ne ronwaʼní꞉ha raotsenenhó꞉kons teiotinaʼkaronhtónhas tánon ne kahiatakéras.

¹⁷ Ók thò꞉ka niháti ne teiotinakaronhtónʼa sakoʼtinikònhrahre sakonhwanatékwahte ne Jethro sakohiohoʼkónha. Ethóne ne Mahís saʼshakohiataróhroke ne konhtitʼtshénen tánon raónha wahsaʼkonékanonhtenʼhon nahoʼtitshenenhókon.

¹⁸ Shionʼsakónhnewe ne ronwaʼninéha, wasakoriwaʼnónhtonse, “Onhʼniʼiohtiéren tsi nihiostóre tonhtésehwe nónhwa wenhnisehráʼte”

¹⁹ “Egyptró꞉non saʼshonkwahʼniáʼkente tsi nónh nihónhnes ne teiotinakaronhtón꞉ʼa sakotinikónhrahre,” watkonhtiriwaʼseráhko, “tánon ó꞉ni raónha wahanekótsienthe tánon waʼsakonékanonhthe nonhkwatshenenhó꞉konhs.”

²⁰ “Kanónhwe níres?” waʼsakoriwanónhtonhse ne sakohiohoʼkónhas. “Onhʼnonhtiéren tsi ékʼthonthatsisewátkaʼwe nètho rónhkwe? Wáhs etʼtsisewenhnónhksa tánon etʼtsisehwahónkaron ne tahitewátonte.”

²¹ Káti ne Mahís iathoʼriwaiénthase né nónhwe nahonsahanáhkereke, tánon káti ne Jethro iasakótʼkaʼwe ne sakoiénha Zipporah nahotìniake ne Mahís,

²² tánon raksá꞉ʼa wahotiwirahiéntahne. Ne Mahís rahonhàke khók tahataténhase, “Thiʼwakonhwenhtsáte tsi kènʼen íkes, tánon káti né enhináhtonhkwe ne Gershom.”

²³ Tó꞉ka nihiosehràhke onahkènke ne Ronhnonhtí꞉io ne Egypt wahrénheie, ók né lsraeró꞉nonhs shé꞉kon nihonnonhsèhnahne tsi nihonwatinaskónhni tánon wahthotihén꞉rete nahonwaʼthiʼhiatakèhna. Tsi tehonséntʼthos Rawenní꞉ioʼke niaháhe,

²⁴ rahónʼha wahothón꞉teʼne tsi nihoʼnonhsèhna tánon waʼrehiá꞉rahne ne raonateriwasehronhniátshera ne Abraham, lsaac, ó꞉ni ne Jacob.

²⁵ Wasakóken ne lsraeró꞉nonhs tsi nihotironhiàken tánon watiátʼtoke tánon nasakohiaʼtakèhna.