Exodus 16 - Ohiatonhseratokénti

Ne Kanátaro Tánon Ne Ohkwesentarí꞉waʼse

¹ Rahtinaʼkerahserakwékon ne lsraerʼró꞉nons Elim nónhwe tahonténhti, tánon ne wískʼkhaton iawénhre shiʼwenhniseraké꞉haton né tekeníhaton shiʼwenhnítaʼre ónenh shitoʼnahténtion ne Egypt, kahentaʼkekoʼwàhne hiahónhneʼwe né꞉ne Sin nónhwe, né꞉ne tsi nʼatetiátere ne Elim tánon ne Sinai.

² Thóh né kahentaʼkekó꞉wa wahonwariʼwakátahʼtse ne Mahís ó꞉ni ne Aaron,

³ tánon wahonwanénhase, “Iaʼkwaʼskáneks ne Roiá꞉ner ahontashonʼwanonhwaʼriákonʼke ne Egypt. Ne thóhʼnon kwáh nènhneʼe ahiotónhʼon ahionʼkwahtsiénʼtake tánon ahionʼkwahwaráhkonke tánon ó꞉ni nohiàsons nakakhó꞉tens tsi ahiaʼkwéʼrehke. Ók kènʼen taskwahiatén꞉haʼwe kahentakeʼkowàhne nastsionkáʼrhiakʼte tsi ahiaʼkwénheʼie.”

⁴ Ne Roiá꞉ner wahawénhase ne Mahís, “Ónenh kíʼ entkaténieʼthe ne ká꞉khwa tsi ní꞉ioht nenhiokénh꞉nore ne karonhiá꞉ke nènhtewe ne sewahkwékon sewariwá꞉ke. Nonhkweshón꞉ʼa ónenk tsi niatewenhniseráke ienhatiʼhiákenʼen nahonhnonrónhko ne iathahoʼtiʼiérise ne tsi niwenhnísehres. Thóh nènhtewe tsi enkhehiaʼteniénhten nahkeriwatʼtshénri tó꞉ka ken ratísehre nakerihonʼnienhnítsheras.

⁵ Né niaʼteiaiakʼseràke ne iaʼiákʼkhaton niwenhniseraké꞉haton nó꞉nen enhatiʼkwatáko tsi nahó꞉ten enthatíhaʼwe, kwáh tenkahiaʼsehráke tsi nihoʼnorónhkwen ne sewenhnisehrátʼtshons.”

⁶ Káti ne Mahís ó꞉ni ne Aaron wahonwaʼnénhase ratiʼkwékon ne lsraerʼró꞉nons, “Kènʼen waʼshontàte kwáh ensewateriéntarahne tsi Roiá꞉ner seh theʼtsisehwahiaʼtinekènʼen ne Egypt.

⁷ Nʼoronkène kwáh ensehwatʼkhátho ne tehioʼkaráhiat kaswatʼthétshera tsi nón níres ne Roiá꞉ner. Wahoʼthónteʼne tsi nʼisehwariwahʼkátenʼen tsi nòkwah ne rahónʼa—hen, tsi nòkwah ne rahònʼa, tsoríwa tsi nék khók nʼíi tsi iaʼkeniriwenháwi ne rahoʼrihonhniennhítsheras.”

⁸ Ethòne ne Mahís wahénron, “Kwáh seh Roiá꞉ner enteʼtshítion nowáhron nahísehwake nʼokarasnéha tánon kwáh tsi níkon tesewatonwenhtsóni ne kanátaro noronhkène, tsoríwa tsi wahoʼthóntene tsi nisewariwakátenʼen tsi nókwah ne rahonhàke. Nó꞉nen ensewariwakathate nonhkenonhàke, kwáh seh rahonhàke ne Roiá꞉ner sewariwaká꞉tats”

⁹ Ne Mahís wahawénhase ne Aaron, “Seró꞉ri kanakerahʼserahʼkwékon ne kénʼen nithónʼne tánon rahohénton ne Roiá꞉ner tehatítan, tsoríwa tsi wahoʼthónteʼne tsi nihoʼthiriwakaténʼen.”

¹⁰ Ne Aaron tsi nasakothá꞉raʼse ne ratiʼnakeraʼserakwékon, kahenthaʼkekówa nòkwah niahontiérahʼte, tánon thontahiaʼwénstsi ne tehiokarahiákt kaswatʼthétshera né꞉ne Roiá꞉ner wahaʼthotási tsi iotʼtsáthare.

¹¹ Ne Roiá꞉ner wahawénhase ne Mahís,

¹² “onhkatʼthónteʼne tsi nihoʼtiriwahkaʼténʼen ne lsraeró꞉nons. Seró꞉ri tsi nentsokarahonʼhátie enhoʼtiwahraiéntaʼne nahónʼneke, tánon tsi ienʼhiórenhne kwáh tsi níkonh tehoʼnahtonwenhtsóni tsi enhotinahtaʼraiéntahne. Ethòne kíʼ enhoʼnahteriéntaʼraʼne tsi Í꞉i, ne Watiá꞉ner, kheʼNí꞉io.”

¹³ Nokarasʼnéha ioʼnahtiokwatʼtsáni ohkwesenʼtarì꞉waʼse wakʼkhontáʼsenhthe, iatekaiéri ne tahionahwénhro ne waʼthenátaien, tánon nʼoronhkéne kwáh tehiokwahtaséhton tsi ioʼáhweien tsi nónhwe nihoʼnahtenátaien.

¹⁴ Shonʼsonhaweiáʼthen, knahó꞉tenk kénk nikátens tánon ohkèra tehiothàron é꞉neken ne ohontsàkes ne kahentakeʼkówa. Thóh ní꞉ioh nètska tsi ní꞉ioht ne ioshaʼkenseráien.

¹⁵ Nónen ne lsraerʼró꞉nons sahontkáto, iáh tehonahteriéntare nahó꞉ten nènhneʼe tánon wathontateriwanonhtónhaʼse, “Nahó꞉ten thí꞉ken?” Mahís wasakawénhaʼse, “Né kí꞉ken ne káʼkhwa ne Roiá꞉ner thaʼtsition nahisewá꞉ke.

¹⁶ Né Roiá꞉ner rotró꞉ri ne tsi sewahiaʼtáʼtshons ahiʼtionrón꞉ko kwáh tsi níkon ahisewahkwéni tsi naʼtesewathonwenhtsóni, tewaʼthérahkes ne tiehiá꞉tashon ne skawá꞉tsira.”

¹⁷ Né lsraerʼró꞉nons kwáh kí toʼnahatíʼiere, òtiakes sénha wéso wahakonhrón꞉ko òtiakes karón nahakonhrónh꞉ko.

¹⁸ Nó꞉nen né sahontenienténhon, tsi nihiákon ne sótsi wéso iakonrónh꞉kwen iáh wéso tehiakoientáhon, tánon tsi nihiákon ne iáh wéso tehiakaʼhonrónhkwen iáh kí kenk níkon tehiakoʼientháhon. Né shaʼtihiatáʼtshons wahonnonhrón꞉ko kíʼ tsi níkon tehó꞉nathonwenhtsóni.

¹⁹ Ne Mahís washaʼkawénhaʼse, “Iáh ónhka né thènen ahionteweiénton ne enhiórenhne aoriwàhke.”

²⁰ Ók otiake kíʼ iáh tehonwaʼtahonsatáton ne Mahís tánon kíʼ ostónha wahenónsthate. Nʼóia sahiórenhne kwáh tiʼtkatsinonhwá꞉here tánon tsi niwenhseráksen iótkens, tánon kíʼ ne Mahís tsi nasakonáhkwenhse.

²¹ Iatehioronʼkhetseràhke ne tsehiá꞉tatʼtshons wahakonhrón꞉ko tsi níkonh tehiaʼkotonhwenhtsóni; tánon nó꞉nen enhiorahkwataríʼhenʼne, tsi nahó꞉ten nonhwenhtsàke kaʼkéron waʼkawisthaʼnáhwenhne.

²² Né iáʼiákʼkhaton niwenhniserakéhaton tenhaʼtiʼhiásere tsi níkonh enhonhnonrón꞉ko, kaiéri niʼwatheràhke ne shaʼtihiatátʼtshons. Ratiʼkwékon ne sakotihéntenhse ne kanakerahserákon tahónhne Mahís wahonwaró꞉ri ne Mahís.

²³ Tánon waʼsakawénhase, “Ne Roiá꞉ner rotró꞉ri nenhiórenhne tsi iawenhtatoʼkènti né nahiontoʼríhsen, rahónʼa ronwaʼhiathatoʼkentíston. Ónhwa sewatenahtarón꞉ten tsi nahó꞉ten tesewathonwenhtsóni nahisewatenahtarónhten ó꞉ni tesewanenónhtsiet tsi nahó꞉ten tesewaʼthonwenhtsóni ne tahisewanekonhtiéte. Tsi nahó꞉ten nenhiotátere ahó꞉wenk nákte nakaiénthake tánon nahontewehiénthonhake nenhiórenhne aoriwàke.”

²⁴ Tsi nahatró꞉ri ne Mahís, wahonteweiénton nahó꞉ten ne wahoʼtáʼtere tsi nióre wahó꞉renhne; iáh kíʼ tehiohetkénʼen iáh ó꞉ni notsinónhwa tehonáhtsien.

²⁵ Mahís wahénron, “Tesehwaʼtskáhon nónhwa wenhniseráthe, tsoríwa tsi iawenhtaʼtoʼkénton, né wenhnisehronʼtákwen nahiontoʼrísen ronʼwahiatatoʼkentíston ne Roiá꞉ner, tánon iáh thahó꞉ten tahisewakʼkhwaʼtsénri nʼáhste tsi watenáhtaien.

²⁶ Ónenk tsi entionrón꞉ko ne kahkhwa ne iaʼiákʼkhaton niwenhniserakéhaton, ók ne iawenhthatoʼkentíke, wenhniseronʼtákwen nahiontoʼrísen, iáh kíʼ othènnenh tahisewakʼkhwaʼtsénri.”

²⁷ Ne tsaʼtákʼhaton niwenhniserakéhaton ótiake nonhkweshónha iahaʼtihiáʼkenʼne nahathikonhrón꞉ko, ók iáh kíʼ othènnenh tehotitʼkhwatsénrionh.

²⁸ Ethòne ne Roiá꞉ner wahawénhase ne Mahís, “Tó꞉sehkon nikaríwes ne tiónkwe ensewaterahiáthaʼkwe nahisewaʼtewénhnahraʼkwe nakeriwahtáttsera?

²⁹ Sewehiá꞉rak tsi Í꞉i, ne Watiá꞉ner, tkwáwi nawenhnísera nahisewathoʼrísen, tánon ne káti aoríwa ne iaʼiákʼkhaton niwenhniserakéhaton kwáh tiókonhte tsi iatekaiéri tsi níkonh èntʼtshion ne ká꞉khwa niaʼtahisewaié꞉riʼse ne tewenhniseràke nikaríwes. Kwáh niatehionkwétake tsi thoʼnónhwe nihatiʼterónhtak tsi nónhwe nenhonʼnésehke ne tsaʼtákʼkhaton niwenhniserakéhaton tánon tó꞉sa ètren írek ne rahoʼnónhskon.”

³⁰ Káti nonhkweshón꞉ʼa iáh othènnenh tehoʼtiʼhiótenʼen ne tsaʼtákʼkhaton niwenhniserakéhaton.

³¹ Nonhkweshón꞉ʼa nIsraerʼró꞉nonke ne ká꞉khwa kaná꞉taro wahaʼtináhtonkwe. Kwáh né꞉ne ká꞉nen aʼkénhake, tánon thóh nihiaʼwekonhontseró꞉ten tsi ní꞉ioht nʼorahwístha né꞉ne ionhniáton ne otsinaʼkonhthakwá꞉ne otsiʼkhéta.

³² Mahís wahénron, “Ne Roiá꞉ner shón꞉kwa ró꞉ri ostónha ahitewanónsthate ne kaʼnátaro, né naʼietʼthiʼiénraʼse tsi nientewatwatsiríne, né nahónton nahontkáto ne kákhwa ne teshonkwáwi nahítewake ne kaʼhenthaʼkekówa nó꞉nen saʼthontashonʼkwahiatí꞉nekenʼwe ne Egypt.”

³³ Ne Mahís wahaʼwénhaʼse ne Aaron, “Iasehtseténhaf, tewaʼtheràke tsi níkon isènann, tánon rahohénton ne Roiá꞉ner itien né nahonteweientónhaʼke tsi nienteʼwatʼwatsirí꞉ne.”

³⁴ Kwáh kíʼ tsi nihó꞉rori ne Roiá꞉ner ne Mahís, ne Aaron ohénton ne ateriwahʼseronhniátshera kaneroʼkwáhien waháien, né nahónton ahonteweienʼtónhake.

³⁵ NʼIsraerʼró꞉nons né꞉ne kaiéri niwáhsen niioseràke nikaríwes né wahonhné꞉ke, tsi nióre iahónhneʼwe ne tsi wathonwenhtsáʼien ne Canaan, tsi nónhwe nahonthaʼtíteron. (

³⁶ Né iostáthen aiekonhtserihá꞉ren né é꞉ne tewá꞉sen niwathéraʼke saʼtèkena.)