Ephesians 2 - Ohiatonhseratokénti

Rawení꞉io Sonkwariwaseronniénni Tsi Ahitiónʼnheke Tahionkwateriwasóntereke Ne Kerístos

¹ Tsi nithisènon kwáh tsi shíken ní꞉ioht nahisenhéion tioríwa tsi iáh tesatewenʼnarákwakwe tánon waseriwánerake.

² Neh thóh sontakaháwi neh í꞉tshereskwe ne tsi ionwentsiáte ahoriwahetkénʼtseras; neh wasatewénʼnarakwe ne kanikonrahétken, ne kanikonrákʼsen tsi neh tsakoniarótaron nonkwesónha tsi niháti ne iáh tehonwahwenʼnarákwa ne Rawení꞉io.

³ Ne kwáh oriwihioʼónwe tewakwékon thóh nihiotón꞉ne ó꞉ni thóh tiónʼnhekwe kwáh tsi nihiorenʼnáhonne ne thènen ahitewaskáneke, kwáh tsi nentsioʼiánerase nonkwaierónta ó꞉ni nonkwanikónras. Tsi ónkweʼíken ó꞉ni tsi nitewaweienʼnhótens tsi ní꞉ioht nakorénson, nók ionkwarárek nahionkwaronhiákente ne Rawení꞉io rahonakwátsera.

⁴ Nók kíʼ ne Rawenni꞉io rahoténrat tsi nikowánen, tánon tsi naʼtehiotenonhianíton sonkwanorónkwa,

⁵ shé꞉kon kíʼ nonʼné꞉e nó꞉nen karihwanerahaktsherákon nónwe naionkwenhéionke, thonʼtashónʼtion nahtónnhets nó꞉nen sonshahokétsko ne Kerístos ne kenheiátʼne. Kwáh nek khók wahkarihónni tsi Rawenni꞉io thóh nontahanónwehne nahonshahianiákenthe.

⁶ Tsi tehionkwateriwasóntere ne Kerístos Ié꞉sos shesonkwakétskwen nahonsahionkwariwiʼiosthóntake tsi ahitsitiónʼnheke skátne ne rahónha ne karonhiáke tiohontsiáte.

⁷ Neh aoríwa thonihoiéren ne Rawení꞉io ne naréneste kwáh tiókonte ohiatʼtíʼio tsi nikowánen ne rahoténrat, kanoronkwatserákon nónwe nihsonkwenestʼtén꞉ni rahonháke ne Kerístos Ié꞉sos.

^8-9 Asèken nehne Rawenni꞉io rahoténrat tsi saniakénton teiahonkóthon ne tewetákwen. Iáh neh tehiorihonʼníʼon tsi nahisahiotén꞉en, nók ne tsi Rawení꞉io sakówis, neh káti ne tóhsa ónka ahiontatóharakwe.

¹⁰ Rawení꞉io thesonkwáwi tsi nitionʼnhóten, tsi tehionkwateriwasóntere ne Kerístos Ié꞉sos neh akarihónʼni iohiánere tsi naietʼthiʼhiatiérase nonkwesónha kwáh tsi nitiónʼnhes, neh káti ónenk ehnihowathákwen neh nahitewáiere.

Skátne Íken Ne Kerístos

¹¹ Í꞉se ne iáh tesewasitaeʼró꞉nons tesewathó꞉ten tsi sewanakeráton—tsi niháti né ronwatiwaʼrakwétaron né nahonhnéneste tsi Rawenni꞉io rahonkwetashón꞉ʼa í꞉ken ní꞉se né ietsinatónkwah iáh tetsisewaientéri ne Rawenni꞉io—seweʼhiá꞉re tsi nisewaʼhiathó꞉tenʼne tsi nitsawé꞉non.

¹² Né sontakahá꞉wi í꞉non tesewáʼterekwe ne Kerístos. Thí tsionʼhontsiáteʼkwe tánon ó꞉ni iáh í꞉se tèken ne Rawení꞉io sakoʼiatarákwen. Kwáh iáh othé꞉nen tesewaʼiátare nateriwahseronniatseráʼkon, tsi nón꞉we nikarahtás꞉thon tsi nisakorahrástenni ne Rawení꞉io rahotió꞉kwa, tánon kén tsi ionwentsá꞉te nón꞉we nitsonnhétie tánon kwáh iáh othé꞉nen tesewáʼraʼre ne othé꞉nen ahisewaʼhianerás꞉ten tánon iáh ó꞉ni tesewaʼkwé꞉kon ne Rawení꞉io.

¹³ Ók kí ó꞉nen, né tsi tesewateriwaʼsón꞉tere ne Ié꞉sos Kerístos, í꞉se tsi niká꞉ien ne ahí꞉non nió꞉re tesewáʼtereʼkwe, né ák꞉ta sewaʼhiatenhawí꞉ton ne Kerístos raʼonekwén꞉sa.

¹⁴ Asèken raʼhonhatsíʼwa ne Kerístos shonkwahriwahsehronhniénhni ne skén꞉nen akénhake ne ne skentió꞉kwaht akenhá꞉ke tsi nahtehón꞉tereh ne Sitaeró꞉nons tánon ne iáh tehatisitaeʼró꞉nons. Kwáh rahónha roshontienénton ne teiaʼkokʼkhá꞉shionsʼkwe ó꞉ni ne ionnís꞉kwe ne tahontát꞉tson.

¹⁵ Tsi raʼhierónke nón꞉we naʼhariwáhthonthe ne Sitaeró꞉nons rahotiʼianerén꞉sera keʼnikweʼkonhátie natsawenrá꞉ʼtseras ó꞉ni tsi nihotiʼianerenserótens, ne nahón꞉ton ne tekentiókwake nénskat khók á꞉se ahonshasakotsiokónnien tsi tahonateriwaʼshón꞉teraʼke ne rahónha, ne kí enkakwé꞉ni ne skénʼnen ahón꞉ton.

¹⁶ Tsi kaiasáke rawenhé꞉ion ne Kerístos rohriwathón꞉ton ne tahiontatswénseʼke; tsi nihió꞉son ne kaiá꞉sa waʼshakowenónhni ne tekentiókwake skenʼtió꞉kwak khók iaʼhón꞉ton tánon Ní꞉io꞉ne nòkwah nionshasakohiaʼténhaʼwe

¹⁷ Ká꞉ti Kerístos thawé꞉non tánon wasakoteriwanhóthaʼse ne kariwí꞉ios nonkweʼtaʼkwé꞉kon—ó꞉ni ní꞉se ne iáh tesewasitaeʼró꞉nons, tsi aíhnon nió꞉re tesewátereʼkwe ne Rawení꞉io, nók ne Sitaeró꞉nons rahiaʼták꞉ta ne rónhneskwe.

¹⁸ Kwahse iatekakonte ne iorihonhniʼon ne Keristos tsi nioieren kwáh tewakwé꞉kon, tetsá꞉ron ne Sitaeró꞉nons ó꞉ni ne iáh tehatisitaeʼró꞉nons, enwá꞉ton ne rahiaták꞉ta ne Kaní꞉sera niaʼí꞉tewe kwáh ne shanihiáta ne Ronikonriʼióston.

¹⁹ Ne káti, í꞉se ne iáh tesewasitaeʼró꞉nons iáh seh thitsonhontsáte tèken khés ó꞉ni ne kakʼnón꞉we thaonthesewé꞉non; ó꞉nen ne skát꞉ne sewaʼnákeʼre ne Rawení꞉io raʼotió꞉kwa ó꞉ni sewahiá꞉tare ne Rawenni꞉io raʼowatsíraʼkon.

²⁰ Í꞉se, ó꞉ni, sewaiátare ne tsi kanónhshote tsi ní꞉ioht tsi teʼthotitsténrote ne ratikweʼkón꞉ne ó꞉ni ne iehatirihwákensʼkwe, ne tsi tekahió꞉saien nonén꞉hia ne wátston né꞉ne kwáh rahonhatsíʼwa Ié꞉sos Kerístos í꞉ken.

²¹ Rahonháke ne kanonhsakwé꞉kon tsi tehionahthatienahwahkhón꞉nion tánon watehiá꞉rons nahionnonhsatokentíʼke né nahonwahthonnahérahse ne Roiá꞉ner.

²² Tsi tehionkwateriwahshón꞉tere ne keristos í꞉se ó꞉ni skát꞉ke sewaʼtón꞉on naʼkorén꞉shon nénskat khók tsi nón꞉we iehiotón꞉ʼon ne ne tsi nón꞉we nihénteron ne Rahonikonriʼiosthóntshera ne Rawenni꞉io.