Ecclesiastes 11 - Ohiatonhseratokénti

Tsi Nihatiè꞉ra Ne Ratenikonhratʼthókha

¹ Thóh nónhwe iaskarahthéniat ne sawíhsta ne ákthe nónhwe tionhontsáien, tánon katʼkesónha ensahianerásthen.

² Tóh꞉ka nihiokwénrahre nónhwe iasathakweʼniáien tsi nisakarahtheniáton ne sahwísta—wéso iokwénhrahre ahkénhake—asèken iáh nónhwenhton tesateriéntare onhʼní꞉ioht nateraswakʼsénhtshera nenhshèna kíʼ kénʼen ionwenhtsáte.

³ Iáh tewatsʼterístha kah niahiotseráhthonke nenhkaronhtsénenhne, thóh enkaiénhthake tsi nónhwe kahkariénienhne. Nónenh tetsoronhiá꞉karas hiokenhnóres.

⁴ Tó꞉ka né ensateráhrate ne tsi iahó꞉the tánon tsi niwenhtó꞉ten né kwáh ahontakariwahiérike, iáh kíʼ nonhwénhton ne thé꞉nen tsiashiéntʼtho iáh ó꞉ni nonhwénhton thé꞉nen tashientwáhko.

⁵ Rawenni꞉io oriwahkwékon rosahánion, tánon iáh taskwéni ne sénha ahisateriéntahrahne tsi nihatiérah tsi ní꞉ioht tsi sanikonhraiéntas onhʼní꞉ioht tsi tewathaʼsáf꞉fa natónnhets né tsi watewirahrákwa ne iónkwe káhawe nahiowirahiéntahne.

⁶ Ohronhkéne tánon ohkarasnéha nikaháwi tsentʼtóhsehron. Iáh nonhwénhton tesateriéntahre thóh káken akwékon entkánio iáh ó꞉ni taskwéni nasatró꞉ri kanikáien sénha iohianeráston.

⁷ Kwáh íken tsi ioiánere naiekwéni nahionthonhnáren tsi nihionwésen tsi teioswátʼte nenhtiékeʼne

⁸ Tesewatenonhwerahthónsek niaʼtehiosehráhke nenh tiónnheke. Iáh tewatsʼterístha tonikaríwes ashón꞉nheke, sehiá꞉rak kwáh sénha karíhwes nenhsíheie. Kwáh iáh othé꞉nen tekáien nahionskanéksehke.

Ronwanatenikonhrá꞉wis Ne Kenʼnithotihíon꞉sa

⁹ Nitisewahiónhsa, sewathonhnárak tsi ken nitiʼsewahiónha. Sewatʼtsenonhníhak tsi shé꞉kon ken nitiʼsewahiónha. Thóh nahsewáhier tsi nísewehre, tánon sehwáhser tsi nitewaskáneks ne sehwerhiá꞉ne. Ók sehwehiá꞉rak tsi Rawenni꞉io tentsisewahiatórehthe kwáh tsi nenhsewáhtsere.

¹⁰ Kwáh tó꞉sa ne thé꞉nen tahisehwathatenikonhráhren tó꞉ka ó꞉ni ne thé꞉nen ahisewahnonhwakʼtáten. Iáh seh tekaríwes kénk tahitesehwahiónhake.