Deuteronomy 8 - Ohiatonhseratokénti

Ne Ionhontsí꞉io Nahiehiaʼtakweʼní꞉ioke

¹ “Iaʼtesewatatsáhat tsi sewatewénhnarak norihwakwé꞉kon ne kaianerénhseras né꞉tho takwahion nón꞉wa wenhniserá꞉te, ne káti nahitsónhnheke, nahisewentiohkowáhna, ó꞉ni nahisewatié꞉nawatste nohóntsa ne Roiá꞉ner shakorahratstén꞉ni ne ietsisoʼthonkonhkén꞉en.

² Sewehiárak tsi ní꞉ioht ne Roiá꞉ner sewaNí꞉io tsi waʼtsisewahéntenhse ne kí꞉ken iohá꞉hes ne iathitsótkaʼwe ne iahonwentsathèn꞉ke ki ne kaié꞉ri niwáhsen nihioserá꞉ke iotohétston, iatsisewateniéhten nahisewariʼwanorónhsten ne natsisewateʼniénte, ne nahónton nahoterienʼtarà꞉ne onhnahisewátiere tánon kaʼshí꞉ken ensewatewén꞉naraʼkwe kén ne rahoriwatà꞉tsheras.

³ Tsi nió꞉re tsi waʼtsitionhkarià꞉the, tánon ethò꞉ne kákhwa thatsí꞉tson nahí꞉sewake, né꞉ne kákhwa ne ietsisoʼthonkonhkén꞉en iáh nonhwénton tehoné꞉kon ne tiotierénhton. Ne ki aorí꞉wa thóh nahá꞉iere ne naʼtsisewarihón꞉nien né꞉ne tó꞉sa ki kákhwa kók sewaniahesénhak nahitsónhetste, ók né꞉ne kwáh orihwakwé꞉kon tsi nahoʼténhsons ne Roiá꞉ner ratón꞉nions.

⁴ Tsi náhe ne kaié꞉ri niwáhsen nihioserá꞉ke ne sewahtserón꞉nia iáh tehioriwenhtàhon, iáh ó꞉ni tesewarahshí꞉to.

⁵ Sewehiárak né꞉tho Roiá꞉ner sewaNí꞉io shariwakwarihsíennis ó꞉ni iarewátha kwáh ki tsi ní꞉ioht ne iakowí꞉raien shakotirihwakwarihsíennis ne shakotihioʼokónha.

⁶ É꞉tho káti, thóh naʼsewá꞉ier tsi nitsisewahró꞉ri ne Roiá꞉ner: thóh nón꞉we nashahténti ne tsi iohatátie ne Rawenni꞉io iahahonién꞉ni tánon tsewén꞉narak.

⁷ Ne Roiá꞉ner saNí꞉io thóh nón꞉we waʼiaiatenhá꞉wi ne tsi tiohontsí꞉io—ne iohontsá꞉ien kaniaʼtarónhnions ó꞉ni ionaweró꞉tons, tánon ohné꞉kanos iorihonní꞉hon ne tsi tsik nonwéhsons tionekó꞉tons ne tsi ionontahrón꞉nions.

⁸ Nonhóntsa ne tkáhas nonátsa ó꞉ni ne tehiotiʼkonhstónhres, onénhare, tionionwarontonhakó꞉wa, wé꞉so iotenénha káhik, iakeniewáhtha, tánon notsinaʼkontahkwà꞉ne otsikhé꞉ta.

⁹ Thóh nón꞉we iáh nonhwénton tiahisewatonkhá꞉riaʼke iáh ó꞉ni ne thé꞉nen tahontesewatót꞉thase, naonenhiasónhas karístatsis nahoténsons íken, tánon ne ionniarónhnions ní꞉se otsínekwar karístatsis enshókwahte.

¹⁰ Tánon kwáh ensathonhón꞉hake, tánon tentienonhwerá꞉ton ne Roiá꞉ner saNí꞉io ne ionhontsí꞉io thiá꞉wi.

Tóhsa Tsiataʼnikónhren Ne Roiá꞉ner

¹¹ “Orihwí꞉io sónhni ne tó꞉sa ahtsataʼnikónhren ne Roiá꞉ner saNí꞉io; tó꞉sa sariwanó꞉ron nasatewenhnaráhkwe ne thé꞉nen raoianerenhseraʼsónhas ne tkwá꞉wis nón꞉wa wenhniserá꞉te.

¹² Nó꞉nen nakwé꞉kon sá꞉ien tsi nahoʼténhson iséhre nasé꞉ke tánon satenonsonhniá꞉nions ne kanonsí꞉ios ne thóh ashiʼterónhtake

¹³ tánon nó꞉nen ne satshenenhó꞉kons tionónhskwaron tánon ne teiotinaʼkarontón꞉a, tánon ne sáwenk kawistará꞉kens ó꞉ni nowistanó꞉rons, tánon akwé꞉kon noiáhson nahoʼténhsons ne saientátsheras iotehiá꞉ronhon,

¹⁴ ioriwihióhak ne tó꞉sa ahshená꞉ieʼne tánon ahtiataʼnikónhren ne Roiá꞉ner saNí꞉io tsi raónha shianiakénton ne Egypt nón꞉we, tsi nón꞉we tsesanaskón꞉niskwe.

¹⁵ Wahiahéntenhse iatesótkawe ne wathonhontsowá꞉nen ó꞉ni ioʼteronʼón꞉we nonhwentsathèn꞉ken thóh nón꞉we nikonhtinákere ne kaniaráksens ó꞉ni ne takwaré꞉res. Né꞉tho iostà꞉ten ó꞉ni iáh othé꞉nen tehioneká꞉ien nohóntsa wahrón꞉ni nahontakanekó꞉ten notstèn꞉rakes ne sarihwá꞉ke.

¹⁶ Ne iahonwentsathèn꞉ken nón꞉we wahiá꞉nonhthe, né꞉ne kákhwa ne iáh nonhwenton ne ietsisotʼthonkonhkenʼen tehó꞉nekon. Thatsisewatenié꞉then ne karonhiá꞉kensera natsisewatenién꞉ten, ne káti ne tsi ieiotót꞉the nahónton natsisewahiathatéristhe né꞉ne kwáh ioiáneres nahoténsonhs íken.

¹⁷ Ethóh káti, kwáh tó꞉sa nonhwénton né꞉ne ahisewanonhtón꞉nionʼwe ne í꞉se kók sewashatsténhsera ó꞉ni tsi wesewahiò꞉ten tsi wesehwakwaʼtshéne.

¹⁸ Sewehiá꞉rak tsi Roiá꞉ner sewaNí꞉io tetshisewá꞉wis ne kaʼshatsténhsera nahisewakwahtsè꞉ne. Thóh ki nihaié꞉ra tiorí꞉wa tsi shé꞉kon roriwató꞉ken nón꞉wa wenhniserá꞉te ne nateriwaʼseronhniá꞉tshera ró꞉shon skátke ne ietsisoʼthonkonhkén꞉en.

¹⁹ Akwáh tó꞉sa nonhwénton tsisewahiataʼnikónhren ne Roiá꞉ner sewaNí꞉io tó꞉ka ó꞉ni ne tahisewatkaraté꞉ni tsi nokwáh ne oiáhson nihioʼokónhas naietsisén꞉naien tánon naieʼtsihiótenhse. Tó꞉ka thóh nenhsewá꞉iere, ó꞉nen ki wakwaronhkà꞉ten nón꞉wa wenhniserá꞉te tsi kwáh oriwihioʼón꞉we tsi ensewahiathá꞉ton.

²⁰ Tó꞉ka iáh thatsisewawén꞉naraʼkwe ne Roiá꞉ner, ethò꞉ne ki kwáh thóh ní꞉ioht tsi ensewahiatá꞉ton tsi ki ní꞉ioht ne ronatià꞉kes tsi enshakothónte tsi nienhénsewe.