Deuteronomy 6 - Ohiatonhseratokénti

Naonhà꞉a Tiorihowá꞉nen Ne Kariwatà꞉tshera

¹ “Ne kí꞉ken nakwé꞉kon ne kaianerénhseras ne Roiá꞉ner sewaNí꞉io rakró꞉ri nakwarihón꞉nien. Sewatewénhnarak ne tsi tiohontsá꞉ien ne ó꞉nen thó꞉wa thóh niahísewe tánon nahisewatiaʼtakwehní꞉ioste.

² Tsiniʼkarì꞉wes enshón꞉nheke, ní꞉se tánon tsi nienhsatwatsí꞉rine natsisewakweniénstake ne Roiá꞉ner sewaNí꞉io tánon akwé꞉kon sewatewénhnarak ne raoianerénhseras né꞉tho tkwáwis, ne naónton ne karí꞉wes ne thóh nón꞉we niʼionwénhtsaien nahitiónheke.

³ Sewatʼthónthe, O Israerʼró꞉nons, tánon sewatewénhnarak! Ethò꞉ne ki akwé꞉kon tsiensewaianerásten, tánon ensewenhtiokwashátsteke tánon thó꞉nonhwe nenhtiónheke ne ionhontsá꞉ien ne tentkonhtì꞉rake ne kontiʼtshé꞉nens ó꞉ni ne iaweʼtowá꞉nen kaienʼthó꞉tsheras, kwáh ki tsi ní꞉ioht ne Roiá꞉ner ne Sakoní꞉io nonkwasoʼtsheraokonhkén꞉en, tsi rorahrátston.

⁴ “Israerʼró꞉nons, Sewehiárak kí꞉ken! Kénh ká꞉ien tkonwakowá꞉nen: Ne Roiá꞉ner nene Okwaní꞉io íken, ne Roiá꞉ner rahonhatsíwa khók íken.

⁵ Hentsenorónhkwake ne Roiá꞉ner Rawení꞉io tsi sónnhe, akwáh seriasakwé꞉kon, satonhnetsherakwé꞉kon, ó꞉ni sasatstenhserakwé꞉kon.

⁶ Akwáh tó꞉sa nonhwénton sasewaʼnikónhren kí꞉ken kariwatà꞉tsheras ne tkwá꞉wis nón꞉wa wenhniserá꞉te.

⁷ Tánon sewatsteniáron ne ietsirihón꞉nien ne ietsihienokónha. Ne sewathará꞉kwak ne sewanonskónhsons ó꞉ni nó꞉nen kák nón꞉we niesewè꞉non, ó꞉ni nó꞉nen sewatorí꞉shen ó꞉ni nó꞉nen sewahiò꞉te.

⁸ Onakenshà꞉kes sewahiatón꞉nion tánon sewanentsaʼkéhsons sewawanerénhkons ó꞉ni sewakwenhkarà꞉kes sewahiatón꞉nion ne nahisewehiaraʼkwenhníhake.

⁹ Thóh sewahiatón꞉nions tsi iesewataweiaʼtákhwa ne tsi sewenhteróntons ó꞉ni ne tsi sewentenhenrakarón꞉tons.

Mahís Washaʼkoronkáten Nonhkweshón꞉as Ne Tó꞉sa Ahonwawenhnónhti Ne Rawenni꞉io

¹⁰ “Akwáh ki ne Roiá꞉ner sewaNí꞉io tsi nishakorahratstén꞉ni ne sewasoʼtsheraokonhkén꞉en, nʼAbraham, Isaac, tánon ne Jacob, entsitsonhóntson skátke ne iókwats kanatowá꞉nens ne tsi niká꞉ien ne iáh í꞉se tesewatenatón꞉ni.

¹¹ Ne tsi kanonhsó꞉tons tentkà꞉rake ne iohiáneres né꞉ne iáh í꞉se thóh tesewahiónhton, tánon enhionaweró꞉tonkes né꞉ne iáh í꞉se tesewanaweronhniánion, tánon ne kanenharaienʼthóserons ó꞉ni ne iakohiewénhthas karontaienʼthóserons né꞉ne iáh í꞉se sewarontaienʼthóserons. Nó꞉nen ne Roiá꞉ner entetsisewahiaʼténhawe ne kén꞉en ionhontsá꞉te tánon akwé꞉kon niesewá꞉ien tsi naʼtesewatonhontsó꞉ni naié꞉sewake,

¹² orihwí꞉io tsónhni tsi iáh thatsisewahiaʼtanikónhren ne Roiá꞉ner tsi raónha setsisewaniaʼkénhton ne Egypt nón꞉we, tsi thóh nón꞉we ietsinaskónhniskwe.

¹³ Skweniénstak ne Roiá꞉ner saNí꞉io, raonhà꞉a kók hentsewenniióstake, tánon sharahratstánion ne raonhà꞉a kók raoshén꞉nakon.

¹⁴ Iáh tehiówenk nó꞉ia nihioʼokónhas hasehsén꞉naien né꞉ne tihononhontsà꞉tes konhwatisén꞉naiens.

¹⁵ Tó꞉ka ensehsén꞉naien nakorénhsons nihioʼokónhas, ne Roiá꞉ner raonakwátshera enthishatiaʼtónhti tsi ní꞉iot nó꞉tsire tánon kwáh thokén꞉en tsi enshathónhte, tiorí꞉wa ne Roiá꞉ner saNí꞉io, ne senikwé꞉kon, iáh teshakoteʼnikonhrihióstha ne ronwáhsons.

¹⁶ “Tó꞉sa thonátser ne Roiá꞉ner saNí꞉io ne tatseʼnikonráhseren, tsi nisewaié꞉ren ne Massah nón꞉we.

¹⁷ Orihwí꞉io tsón꞉ni akwáh sewatewénhnarak akwé꞉kon ne kaianerénhseras ne tetshisewawíhon.

¹⁸ Tóh naʼsewáier tsi nahoʼténhsons ne Roiá꞉ner ratónhnions asè꞉ken tkaié꞉ri ó꞉ni ioiá꞉nere, tánon orihwakwé꞉kon tshiensewaianerásten. Ensehwateriwaʼténtiase nahisewatié꞉nawatste ne iohontsí꞉io né꞉tho Roiá꞉ner shakorahratstén꞉ni ne sewasótsheras,

¹⁹ tánon enietsihiaʼtínekenhwe ne tesewatà꞉tsons, akwáh ki tsi nihorahrátston.

²⁰ “Tsi niénhenwe ne ieʼtshihienʼokónhas enietshiriwanóntonhse, ‘Ohnontié꞉ren ne Roiá꞉ner Onhkwaní꞉io sonhkwaró꞉ri nahitewatewénhnaraʼkwe kí꞉ken kaianerénhseras?’

²¹ Ethò꞉ne ietshiró꞉ri, ‘Shonkwanaskón꞉niskwe ne ronhnonhtí꞉io ne Egypt nón꞉we, tánon ne Roiá꞉ner shasonhkwaniákente ne wà꞉ratste ne raosatstenhserowaná꞉tshera.

²² Akwáh í꞉i iakwakarà꞉kes washakwá꞉ken wahoiò꞉ten ne ioriwanerakwaʼténions tánon iaʼté꞉konhs ne ioteriwahté꞉rons tsi nashakoiéraʼse ne Egyptró꞉nons ó꞉ni ne raotinonhtihió꞉tsheras ó꞉ni ratikwé꞉kon ne ratiriwakweʼní꞉ios rahonkweʼtasónhas.

²³ Shasonhkwaʼniá꞉kenhte ne Egypt nón꞉we né꞉ne kén꞉en ahontasonhkwahiaʼténhawe tánon nahontashón꞉kwahion kí꞉ken iohontsá꞉ien, tsi nishakorahratstén꞉ni ne onhkwasó꞉tsheras tsi thóh nenhá꞉iere.

²⁴ Ethò꞉ne ne Roiá꞉ner Onhkwaní꞉io washonkwahró꞉ri nahiakwatewén꞉naraʼkwe kí꞉ken kaianerénhseras tánon nashakwakwénienste. Tó꞉ka thóh neniakwá꞉iere, akwáh ki tió꞉konte tsi enshonkwaʼnikónhrahrake nonkwentióhkwa tánon ienkakónhtaʼkwe tsi enhionkwaianerásten.

²⁵ Tó꞉ka enhionkwariwatokénhake entewatewén꞉naraʼkwe orihwakwé꞉kon tsi nisonhkwahró꞉ri ne Rawenni꞉io, kwáh ki entetsitewaʼnikonhraié꞉rihte.’