Deuteronomy 33 - Ohiatonhseratokénti

Ne Mahís Washakohiaʼtaté꞉riste Tsi Ratiʼtá꞉raiens Ne Israerʼró꞉nonhke

¹ Ne kí꞉ken ne kaiataterí꞉tsheras ne Mahís, ne Rawenni꞉io rahonkwè꞉ta, wasakorihowanáten nonhkweshón꞉as ne Israerʼró꞉nonhke nohénton sharenhéie.

² Ne Roiá꞉ner tsi ionónhte ne Sinai nón꞉we nonhtá꞉re; thóh ní꞉ioht tsi tahoké꞉tote tsi ní꞉ioht ne tahiorakwinekenhenhátie é꞉neken ne tsi ionónhte ne Edom tánon tsi tionónhte ne Paran nón꞉we thontashakoswaʼthé꞉ten ne rahonkweʼtashón꞉as. Oié꞉ri tewenhniaweheʼtseráhsen niháti ratironhiakeró꞉non ratikwekonhátie, iotsiró꞉te ne saweienthethákwen.

³ Ne Roiá꞉ner sakonorónhkwa ne rahonkweʼtashón꞉as tánon teshakónes tsi niháti ne raónha rahonkweʼtashón꞉a. Káti watiakwatsakè꞉te ne rasitákta tánon wahakwatewénhnaraʼkwe ne rahoriwatà꞉tsheras.

⁴ Wahakwatewénhnaraʼkwe ne kaianerénhseras ne Mahís teshonkwá꞉wi, ne nonhkwentióhkwa naonhà꞉a tkanó꞉ron ionkwá꞉ien.

⁵ Ne Roiá꞉ner raónha washakotenonhtí꞉ioste nonhkweshón꞉a ne Israerʼró꞉nonhke nó꞉nen ne rahotiʼtarashón꞉as ó꞉ni ne sakotihéntenhse skátke wahontiaʼtaró꞉roke.

⁶ Ne Mahís tsi washakotháhraʼse ne tsi ratiʼtá꞉raien ne Reuben: “Aiá꞉wens ne Reuben tó꞉sa nonhwénton ahonhnitiohkwátonse, Iawerohátien nahonkweʼtashón꞉a tsi kenhnihatí꞉ha.”

⁷ Tsi nokwáh tsi ratiʼtá꞉raien ne Judah wahèn꞉ron: “Saiá꞉ner, satahónsatat tsi natehonsèn꞉thos nahonwatihiaʼthakéhna; Iathonshaséiest shé꞉kon nó꞉hia kentaraʼshón꞉as. Sehiaterí꞉ios, Saiá꞉ner, Tánon taséhne tsi nokwáh ne tehontà꞉tsons.”

⁸ Tsi nokwáh tsi ratiʼtá꞉raien ne Levi wahèn꞉ron: “Í꞉se, Saiá꞉ner, serihothásen tsi nishaʼnikonhró꞉ten né꞉ne Urim ó꞉ni ne Thummim í꞉ken, Thóh nítewe rononhà꞉ke ne sannhátsheras Levites; Tsi tesheiátkenhse ne Massah nón꞉we Tánon waseriwarirà꞉tse ne tsi tsoné꞉kothe ne Meribah nón꞉we.

⁹ Sénha kowá꞉nen wahonhné꞉nesthe tsi rothiriwató꞉ken ne shonhà꞉ke tsi ní꞉ioht ne ronwatihiohokón꞉as, rontatekenhokón꞉as, tó꞉ka ó꞉ni ne shakotihienhokón꞉as. Ronatewenhnaráhkwen ne sariwatà꞉tsheras Tánon rotirihwató꞉kenʼne tsi nokwáh ne saterihwaʼseronhniá꞉tshera.

¹⁰ Enhonwatirihón꞉nien ne shonkweʼtashón꞉as nahontewénhnaraʼkwe ne saianerénhsera; Enhonteskónthake ne tsi tienharáhkwa.

¹¹ Saiá꞉ner, seienáwas tsi ratiʼtá꞉raien nahatishátstenhne; Serenhtí꞉io tsi nenhotihiò꞉ten. Tesehnénhstsiat ratikwé꞉kon ne ronhwatí꞉sons; Kwáh tó꞉sa nonhwénton shé꞉kon tahonthahontkétsko.”

¹² Tsi nokwáh tsi ratiʼtá꞉raien ne Benjamin wahèn꞉ron: “Ne kí꞉ken ne kentá꞉raien ne Roiá꞉ner shakonorónhkwa ó꞉ni teshakónes; Shakohiaʼtanonhnáties tsi niwenhniseréhsons, Tánon rahothinenhrí꞉hen rèn꞉teron.”

¹³ Tsi nokwáh tsi ratiʼtá꞉raien ne Só꞉se wahèn꞉ron: “Aiáwens ne Roiá꞉ner ahahiaʼtaté꞉riste ne rahononhóntsa ne nahiokén꞉nore Tánon ne nahiokén꞉nore ne nà꞉kon nahóntawe ne tsi ionhontsá꞉te.

¹⁴ Aiá꞉wens ne rahononhóntsas ne akahiaʼtateristónke né꞉ne karáhkwa ahonhiáriste, Ahiokwátstonke ne kwáh tewahí꞉ios ne tsi niekáhes nahonhiári.

¹⁵ Aiá꞉wens ne rahonà꞉kwenk norihwaká꞉ions ne ahiothahionhní꞉hake ne niatewahiákes.

¹⁶ Aiá꞉wens ne rahononhontsá꞉kes ne ahontakarà꞉ke ne ioiánere, Rohiatateríston ne tsi nithoriwaié꞉ri ne Roiá꞉ner, Raónha rothatí꞉hon ne tsi iokwiratékʼkhakwe. Aiá꞉wens ne kí꞉ken kaiataterí꞉tsheras iahónhwe tsi ratiʼtá꞉raien ne Só꞉se, Tiorì꞉wa tsi raónha shakohentenséhakwe ne ronhtatekenhokón꞉as.

¹⁷ Ne tewenhniaweheʼtseráhsens niháti ronhterí꞉ios ne tsi ratiʼtá꞉raiens ne Ephraim ó꞉ni ne Manasseh ratikowá꞉nens tánon ratiʼshátstes tsi ní꞉ioht ne tionhnónskwaron rátsinn. Kwáh tsi ní꞉ioht ne karahkónha tehonakáres rahonakáre rátstha tsi tenshakotenakarotsiénthe ne tehontà꞉tsons, káti kwáh tenshakotinakarotsiénthe ne tehontà꞉tsons tánon ienshakotí꞉reke ne tsi iehiontohontsiokʼthaní꞉hon.”

¹⁸ Tsi nokwáh ne tsi ratiʼtá꞉raien ne Zebulun ó꞉ni ne Issachar wahèn꞉ron: “Aiá꞉wens ne Zebulun ahotihianerásten tsi nihontkérons ne kaniatarakheʼkowá꞉ne, Tánon aiáwens ne Issachar rahothikwahsétsheras ahontehiá꞉ron ne tsi rathinákere.

¹⁹ Shakotihonkará꞉wis ne thihononhontsá꞉tes ne tsi ronatenonhtáhere iahón꞉ne Tánon iehathítats ne tkariwaié꞉ri kariwihiosehokón꞉as ne nón꞉we. Kaniatarakheʼkowáhne nón꞉we nithatíhas ne rahothikwahsétshera Tánon ne tsi tekanesharonhkothárons ne atsakthónties.”

²⁰ Tsi nokwáh tsi ratiʼtá꞉raiens ne Gad wahèn꞉ron: “Tehonwanonhwerá꞉ton ne Rawenni꞉io, tsi raónha wahakowanáhthe ne rahotinakeráhsera. Ne Gad thóh ní꞉ioht tsi tehionénraien tsi ní꞉ioht ne kénreks Nashakonenʼtsióskare tó꞉ka óni ashakononhonrahráko.

²¹ Né꞉ne kwáh tiohontsí꞉io ne wahonthaterakwáhse; Ne shakohéntenhse tsi nihioterihwí꞉son nahaié꞉na ronónha ronhwatihiaʼtharákwen nahatiráhko. Wahontewénhnaraʼkwe ne Roiá꞉ner rahorihonnienhní꞉tsheras ó꞉ni ne kaianerénhseras Nó꞉nen ne ohén꞉ton iehonhné꞉tons ne Israerʼró꞉nonhke skátke wahontiaʼtaró꞉roke.”

²² Tsi nokwáh tsi ratiʼtá꞉raiens ne Dan wahèn꞉ron: “Ne Dan ken nitsionaskwaiónha kénreks; Enʼthanitionhkotháko ne Bashan nón꞉we.”

²³ Tsi nokwáh ne Naphtali wahèn꞉ron: “Ne Naphtali kwáh í꞉ken tsi iokwáts tsi shakohiaʼthateríston ne Roiá꞉ner, ioiáneres; Ne rahononhóntsas iéwas ne entiè꞉ne né꞉ne Galilee nón꞉we tsiothásawe.”

²⁴ Tsi nokwáh ne Asher wahèn꞉ron: “Ne Asher sénha wé꞉so tsi ronhwatihiaʼtateríston tsi ní꞉ioht nakorénhsons kentióhkwas. Aiáwens ne sénha ashakonorónhkwe tsi ní꞉ioht nó꞉ia athateʼkénhseras. Aiáwens ne rahononhóntsas ne ahioteronhtón꞉nikes ne iakeniewá꞉tha.

²⁵ Aiáwens ne rahothinathákons ne ahioiatanónsthate ne karistátsis iotenhenrenthón꞉nions, Aiáwens tió꞉konte tsi ahiorihwí꞉ioke tsi ahotenhniserathénionhke.”

²⁶ Tsónhkwe ne Israerʼró꞉nonhke sewanákere, iáh nó꞉ia ne ní꞉io teká꞉ien ne thóh nahahiatoténhake tsi ní꞉ioht ne sewaNí꞉io, kwáh iorá꞉se tsi ní꞉ioht tsi rohonwí꞉seres ne tsi karonhiá꞉te, tsi iotsikerarón꞉nions nón꞉we nenhthonhonwí꞉sere nahonthahiaiathakenásera.

²⁷ Ne Rawenni꞉io kwáh tsi tió꞉konhte raónha thiá꞉nes; ne ionheón꞉we ranenhtià꞉kes ne tiahánes. Washakotekwáhthe ne ieshá꞉sons tsi niahí꞉sewe, tánon watsisewahró꞉ri ne ratikwé꞉kon aieʼtsihiatónhthe.

²⁸ Káti tsi nienhatwatsí꞉rine ne Jacob skén꞉nenk tsi ronhnónhnhek, ioriwí꞉iot ne rahononhontsà꞉kes ne ahiotón꞉nike ne kwáh wé꞉so onátsa ó꞉ni ne onenharataʼsehontsherákeri, ne tsi iohaweieiástha né꞉ne tsi karonhiá꞉te ionekanóntens nonhóntsa.

²⁹ Israel, tsi nisaʼtsenhnón꞉ni! Iáh nó꞉ia teká꞉ien nahonsaieshaiérenhke, ne nonhkweshón꞉as ne Roiá꞉ner shakoniakénthon. Rahonhatsí꞉wa ne Roiá꞉ner ne satrenhosthákwa ó꞉ni ne shasarekó꞉wa, ne nahonthaniáhne ó꞉ni nahontháhion natesenhniéntshera. Ne tesewatà꞉tsons kwáh enʼthónhne naieshanéken nataniténron, tánon kwáh tensenenstsiáke.