Deuteronomy 32 - Ohiatonhseratokénti

¹ “Tsi ionhontsá꞉te ó꞉ni tsi karonhià꞉te sewáronk nakewenhnahó꞉kons, ákta tsi sewatahónsatat tsi nahó꞉ten ká꞉ton.

² Nakerihonhnienhní꞉tshera thóh ní꞉ioht tsi entewasénhne tsi ní꞉ioht ne iostharathénions nenhiokén꞉nore tánon thóh nenhiá꞉wenhne nonhontsà꞉ke tsi ní꞉ioht ne iohawé꞉ien. Nakewenhnahó꞉kons entewasénhne tsi ní꞉ioht ne iotsatharátses nenhionatstaraté꞉ni ne ohonwá꞉rahses, tsi ní꞉ioht ne skenénha tsi ní꞉ioht tsi iokenhnó꞉ron ne ohonthásehke.

³ Kwáh eksenhnakaráthate ne raoshén꞉na ne Roiá꞉ner, tánon ne rahonkweʼtashón꞉as kwáh enhontró꞉ri tsi nihoshatstenhserowá꞉nen.

⁴ “Ne Roiá꞉ner se ne roshatstenhserowá꞉nen thiá꞉nes, toriwaié꞉ri tánon rohiá꞉nere akwé꞉kon tsi nihaweienhnó꞉tens; Ne sewaNí꞉io roriwató꞉ken tánon orihwí꞉io í꞉ken; eʼnihaié꞉ra nahó꞉ten ne tkariwaié꞉ri ó꞉ni ioiánere.

⁵ Ók ní꞉se iáh tesewariwató꞉ken, iáh shatekéna théken ne raónha rahonkweʼtashón꞉a akénhake, sewariwanerahákson tánon sewanekonhrátha tsónhkwes.

⁶ Thóh ken ki ní꞉ioht tsi natsisewatié꞉raʼse ne Roiá꞉ner, tisewathonhnókthe, iáh tesewatotkhatsherá꞉ien? Raónha tsisewaní꞉ha í꞉ken, tsi sewahiatí꞉son, raónha tsi sewenhtiokonhnién꞉ni.

⁷ “Hionhsasewanonhthón꞉nionf, ne wahón꞉nise tkénhne; ientsihienhokón꞉a ietsiriwanónhtons naieʼtshiró꞉ri tsi nihiawénhen, ietshiriwanónhtons ne rotikstenhokón꞉as naieʼtshiró꞉ri ne tiotohétston.

⁸ Nó꞉nen ne Rawenni꞉io ne naonhà꞉a tháshatste tsi ní꞉ioht nakorénhson nihiohokón꞉as, wasakahontsawí꞉hons ne niaʼteiakahontsà꞉kes. Waharakwenhá꞉ton tsi nonwéhson nahienákereʼke. Thasakowí꞉hon ne sohthitiokwà꞉tsons nahotinihioseraién꞉take,

⁹ ók ki ne Jacob tsi nitotwatsirí꞉non raónha nénhne wahathonkweʼtará꞉ko.

¹⁰ “Washakohiataʼtshénri rothinatenháwis ne iahonwenhtsathèn꞉ke, iahontsaieshá꞉hon, iahó꞉the karakonhkó꞉wa. Thashá꞉kone tánon washakoteweiénton, kwáh tsi ní꞉ioht ne raónha tsi enhathatenhnikónhrare.

¹¹ Ne Roiá꞉ner kwáh ne teshátieren ne akwekskó꞉wa kaʼnikónhrare nahotsinákwa, tánon è꞉neken káties tsi ratì꞉teron nakohiohokón꞉a, Ne Roiá꞉ner kwáh tió꞉konte tsi rothatewenienhnenhtà꞉on ne tahatenerahontsakwáhrite tánon nashakoié꞉na ne rahonkweʼtashón꞉as nó꞉nen enthatihiá꞉tenhne.

¹² Ne Roiá꞉ner raonhatsí꞉wa washakohéntenhse ne rahonkweʼtashón꞉as iáh othé꞉nen tehonwaié꞉nawaʼse nakó꞉renh ne ní꞉io akénhake.

¹³ “Washakorí꞉hon nahontkorásthe tsi nón꞉we tiothonhontsaténions ne Canaan nón꞉we tánon ne wahón꞉neke tsi nahó꞉ten tkánios ne kahentà꞉kes. Wahatitshénri ne otsinaʼkontahkwà꞉ne otsikhé꞉ta ne tsi teiosthenhrénion; ne rahothironhthashón꞉as ne iakeniewá꞉thas wahotiianerásten nónhne tsi natekanenhiothárons nonwenhtsà꞉ke.

¹⁴ Ne rahotitshenenhó꞉kons tionónhskwarons ó꞉ni ne kaiaʼtákeras wé꞉so tsi wakonhtinonhtáthane; ronónha tshiahonhà꞉a thotinastwí꞉ios ne teiotinakaronhtón꞉a, kaiaʼtákeras, ó꞉ni ne tionónhskwarons, ne kwáh tkanatsí꞉ios, tánon ne kwáh tkanekí꞉io onenharataʼsehontsherákeri.

¹⁵ “Ne Roiá꞉ner rahonkweʼtashón꞉as wahothikwahtséne, ók wahonwatewéntete; kwáh í꞉ken tsi wahonré꞉senh tánon wé꞉so rothikhwá꞉ien. Wahonwatewénthete ne Rawenni꞉io ne shakohiathí꞉son tánon wahonwakénron ne roshatstenhserowá꞉nen shakhoniakéntha.

¹⁶ Ne rahotihiatonhniʼshón꞉as wakarihón꞉ni ne Roiá꞉ner tsi wahathekéfa; ne kariwahétkens tsi nihonatieránion wahonakonhniáthe.

¹⁷ Ne wakonhwanateskónthase ne nihiohokón꞉as ne iáh othé꞉nen tekonhnónhne, oniiosehráses ne shakotisoʼthonkonhkén꞉en iáh nonhwénton tethatiienté꞉rihne, né꞉ne nihiohokón꞉as ne Israerʼró꞉nons iáh nonhwénton tekonhwatiwenhnarákwen.

¹⁸ Wahonwahiathanikónhren ne Rawenni꞉io, ne rahonáwenk shakohiathákwas, tsi niká꞉ien ne teshakó꞉wi natónnhets.

¹⁹ “Nó꞉nen ne Roiá꞉ner sahatkátho kí꞉ken, wahoná꞉kwen tánon washakokénhron ne sakohiohokón꞉as rotiskenrakéhte ó꞉ni ne tsonaʼthonhwí꞉sens.

²⁰ ‘Kwáh ó꞉nen iáh nonhwénton tahonshakheié꞉nawaʼse; éhtho ki enkatkátho tsi nenhothihiatá꞉wen, thí꞉ken rotinonhtsistaʼní꞉rons, iáh tehothiriwató꞉ken onhkweshón꞉as.

²¹ Né꞉ne rahothihiatonhniʼshón꞉as wahonkenakón꞉ni, atekhefá꞉tshera né꞉ne akénhake konhwatinaʼtónhkwa ní꞉ios, nihiohó꞉kons né꞉ne iáh tokenskethé꞉ken tsi niiohokón꞉as í꞉ken. Káti tsi ronwatinhathónkwa onhkweshón꞉as enkhehiáste nakhenakón꞉ni; kwáh tonathonnókthe nonhkweshón꞉as enkhehiáste ne enhkonhniáthe nahshakonatekhéfʼfase.

²² Nakhenakwáhtshera kwáh tenwanitonkwahnékare tsi ní꞉ioht nó꞉tsire tánon enwaʼtsaháthe akwé꞉kon ne tsi ionwenhtsà꞉te. Ienhwá꞉we nó꞉thake tiohontsá꞉te tánon enwatsaháthe ne tsi katerahthénions ne tsi iononhtarón꞉nions.

²³ “‘Kwáh enkheiénhase ne iáh tsehiótok꞉the ne kariwaieshá꞉tsheras tánon akwé꞉kon enkhehiásthen natsienkwí꞉res.

²⁴ Kwáh ne enhothirió꞉the ne athonkarià꞉kons ó꞉ni tsi enhonthithonkwáhro; kwáh ne enhothiriò꞉te ne tehiotenonhianì꞉ton kannrathariné꞉tsheras. Kwáh konhtí꞉rio ienkhehiaʼténiehte niahonwanatiaʼtón꞉ti, tánon ne kanhniaratʼsenhs nahiakotikarí꞉kon.

²⁵ Naterihiósera entkáhawe ne kenhé꞉ion ne tsi tekanahtokenhá꞉tons; ne sewanonskónhsons tho nió꞉re tsi ensewaterónhsehke ne ensewarhiò꞉the. Ne kenʼnithotiʼiónsa óni kenʼnitiotiʼiónsa enhonníheʼie; iáh ne owirá꞉a tó꞉ka ó꞉ni ne iakostenhokón꞉as tsiatahiakothátere.

²⁶ Ne Rawenni꞉io wahèn꞉ron, “Kwáh ratikwé꞉kon akhehiatónhtonke, ne káti ne kwáh iáh ónhka tahonsahonwenehiá꞉rake.”

²⁷ Ók iáh tewakéron né꞉ne tehontaʼtsons tahonthaterensarónhkwe ne tsi ronhwatishén꞉nion nakonhkweʼtashón꞉as, ne tsi Í꞉i iatetsiáti tekheskwasehrónhkwen.’

²⁸ “Mahís wahèn꞉ron nʼIsraerʼronónke ne nonkweshón꞉a ne iáh tsiatehonhnonthón꞉nions; kwáh iáh thahó꞉ten ne thé꞉nen ahonteʼnikonhraʼthó꞉khake.

²⁹ Iáh tehathikwénies nahontkátho nonhtié꞉ren tsi ronhwathishén꞉nion; iáh tehathikwénies nahotinikonhraiéntaʼne tsi nihiá꞉wenhen.

³⁰ Saiáta ne tehontà꞉tsons raterí꞉ios washakoshén꞉ni ne énska tewenhniaweheʼtseráhsen niháti Israerʼró꞉nons, tánon oié꞉ri natewenhniaweheʼtseráhsen niháti Israerʼró꞉nons tehnihiásek kók ne tehontà꞉tsons wahonwathishén꞉ni? Ne ki aorì꞉wa ne Roiá꞉ner, Raotiní꞉io tsi shakotiathónthakwe; ne roshatstenhserowá꞉nen Raotiní꞉io tsi shakotiakwarí꞉shion.

³¹ Ne tehontà꞉tsons ronaterièn꞉tare ne raotiní꞉ios tsi rothitsihióhas, iáh é꞉tho tehothishatstenhserowá꞉nen tsi ní꞉ioht ne Israerʼró꞉nons Raotiní꞉io.

³² Ne tehontà꞉tsons, eh nihotiriwanéren tsi ki ní꞉ioht ne Sodom tánon ne Gomorrah; tsi ní꞉ioht ne watenenharíhseres ne wahianihióntha ne wahiákʼsenhs ó꞉ni iakoriótha,

³³ tsi ní꞉ioht ne onenharataʼsehontsherákeri né꞉ne kanekonhniáton ne iakoriòtha noʼniáre iotkárion.

³⁴ “Ne Roiá꞉ner rehiáre tsi nihonatiéren ne tehontà꞉tsons; rorá꞉re ne kwáh entkaié꞉rike tsi nenhiowistáheke nenhsakorewáthe.

³⁵ Ne Roiá꞉ner kwáh se enshakarià꞉ke tánon enshakorewáthe; ienkáhewe nó꞉nen enhatihiatiénenhne; ne raonenhnísera táwe nahonnateraswáksenʼne.

³⁶ Ne Roiá꞉ner kwáh ki tensakohiatorete ne rahonkweʼtashón꞉as, kwáh ki enshakoténhre tsi nihiá꞉kon ne ronhwahiò꞉tenhse, nó꞉nen enhatkátho ne rahotishatsténhsera tsi iehiotsaháton, nó꞉nen enhatkátho tsi iáh othé꞉nen tehatístha.

³⁷ Ethò꞉ne ne Roiá꞉ner enshakoriwanóntonhse ne rahonkweʼtashón꞉as, ‘Kanihón꞉nes thí꞉ken ratiʼshátstes niiohokón꞉as ne ietsiniahesénhne?

³⁸ Ne wahetsinónhthe ne ioserénsens ne sewateskón꞉te tánon onenharataʼsehontsherákeri wahetsitaʼtse nahatinekí꞉ra. Tánon ó꞉nen káti thón꞉ne naieʼtsihié꞉nawaʼse; teʼthonrátat naieʼtsiniakénthe.

³⁹ “‘Í꞉i, tánon akonhatsí꞉wa kók, ne Wakení꞉io; iáh ónhka nakò꞉ren ne Ní꞉io narónhneke. Khenonhwarià꞉kons tánon tekhehiá꞉wis natónnhets, khekarewátha tánon sehkhetsiéntha, tánon iáh ónhka thaiekwé꞉ni nahiehiotháthe tsi nakátiere.

⁴⁰ Kwáh tsi nihiorihwí꞉io tsi konhnhehónwe Ní꞉io, kanenʼtsakará꞉tats tánon karahrátstha

⁴¹ káti kwáh enthiotí꞉ie ne tehiokaráiat akasharekó꞉wa tánon enkatkátho né꞉tho karihwakwahrishiónhtshera tsi thóh nenhiá꞉wenhne. Kwáh Í꞉i enshekhekarià꞉se ne iónkshions tánon enkheré꞉wahte ne iónhkshions.

⁴² Natsienkwéris kwáh ne enwaʼtsánon ne rahotinekwénhsa, tánon nakasharekó꞉wa kwáh enhotinonhwarià꞉kon ratikwé꞉kon nenhiontsiotà꞉tse. Kwáh iáh ónhka takhenónhstate nónhka nahiakwahterí꞉io; iekaníhare ne ronatkarewátons ó꞉ni ne rathinó꞉tons tsi enhonhníhieie.’

⁴³ “Tsónhkwes, ó꞉nenk tsi thenieʼtsinonhwerá꞉ton ne Rawenni꞉io rahonkweʼtashón꞉a— shakorewátha ratikwé꞉kon nónhka enhonwatinonhwarià꞉kon. Shakháriks tsi nokwáh ne ronhwáshons tánon shesakorikonhrénhse ne raotirihwanerahà꞉tsheras ne rahonkweʼtashón꞉a.”

⁴⁴ Mahís tánon ne Joshua ne shakohiohokón꞉as ne Nun thontahiatnanétha kí꞉ken karén꞉na, ne káti ne Israerʼró꞉nons nahonaʼthónhthene.

Ne Mahís Né꞉ne Onakénkha Raorihonhnienhní꞉tsheras

⁴⁵ Nó꞉nen ne Mahís shahása tsi teshakowí꞉hons ne Rawenni꞉io rahorihonhnienhní꞉tsheras nonhkweshón꞉a,

⁴⁶ wahèn꞉ron, “Iorihwí꞉iot tsi sewatewénhnarak akwé꞉kon kí꞉ken kariwatà꞉tsheras ne tkwawí꞉hons nón꞉wa wenhniserá꞉te. Ne ieʼtsirihón꞉nien ne ietsiienhokón꞉as, ne káti naónton nahiorihwatokénhak tsi ahontewénhnaraʼkwe akwé꞉kon ne Rawenni꞉io rahorihonhnienhní꞉tsheras.

⁴⁷ Kí꞉ken karihonnienhní꞉tsheras iáh owenhnóskon kók té꞉ken; né꞉ne kwáh sehwathonnétstha. Sewatewénhnarak tánon enhión꞉nise entsónnheke ne tsi ionhontsá꞉ien ní꞉se nakaniatharáti ne Jordan ne ó꞉nen thówa iahisewatiaʼtakwehní꞉ioste.”

⁴⁸ Ne senhenhní꞉sera ne Roiá꞉ner wahawénhase ne Mahís,

⁴⁹ “Thóh niaháse tsi tionónhthe ne Abarim né꞉ne tsi tiohontsá꞉ien ne Moab né꞉ne tehiothinátha ne Jericho; iasehnonhthára ne tsi ionónhthe ne Nebo tánon iasatketóten ne tsi tiohontsá꞉ien ne Canaan ne ó꞉nen thówa ahontatkhéhion NʼIsraerʼró꞉nons.

⁵⁰ Thóh ne tsi ionónhte nón꞉we nenhsíheie tsi ki ní꞉ioht ne tsathateʼkén꞉a Aaron tsi rawenhé꞉ion ne tsi ionónhthe ne Hor,

⁵¹ ne tiorì꞉wa tsi tesehnitsáron iáh tetsateriwatokénston nakonhà꞉ke ne rahotihénton nonhkweshón꞉as ne Israerʼró꞉nonhke. Ne nó꞉nen ne tsi tsoné꞉kote ne Meribah nón꞉we shesenéskwe, ákta tsi kaná꞉taien ne Kadesh né꞉ne karakonhkó꞉wa ne Zin, iáh thesekweniénston rahotihénton nonhkweshón꞉a.

⁵² Kwáh ahí꞉non nió꞉re tsi iensatkátho ne tsi iohontsá꞉ien, ók iáh ki é꞉tho tsiáse ne tsi tiohontsá꞉ien ne tekhehiáwire nonhkweshón꞉as ne Israerʼró꞉nonhke.”