Deuteronomy 31 - Ohiatonhseratokénti

Ne Joshua Ne Thonsahonaʼthákwen Ne Mahís

¹ Ne Mahís iahakónhtaʼkwe washakotháhraʼse NʼIsraerʼró꞉nons,

² tánon wahèn꞉ron, “Ó꞉nen énska tewenhniáwe tánon tewáhsen naʼtewakoserihià꞉kon tánon iáh ó꞉nen tahonsaʼkwéni nahonshakwenhéntenhse. Tánon thíkate kí꞉ken, ne Roiá꞉ner rakró꞉ri né꞉tho tsi iáh tsiathatiahiáke ne Jordan.

³ Ne Roiá꞉ner sewaNí꞉io rahonhatsí꞉wa sewahénton nienhénre tánon enshakothón꞉te nonhkweshón꞉as ne nón꞉we niʼienákere, ne káti nahónton nahisewatiaʼtakwehní꞉ioste ne rahononhóntsas; tánon Joshua nenhtsisewahéntenhse, tsi nihá꞉wen ne Roiá꞉ner.

⁴ Ne Roiá꞉ner kwáh enshakothón꞉te thí꞉ken onhkweshón꞉as, kwáh ki tsi ní꞉ioht tsi rosénh꞉nion ne Sihon tánon ne Og, ne ronhwatinonhtí꞉ios ne Amorʼró꞉nons, tánon waharihwéntho ne rahotinakeráhseras.

⁵ Ne Roiá꞉ner kwáh énthion nathesenhnié꞉tshera tsi nokwáh ne ronónha, tánon kwáh é꞉tho nahitsihié꞉ras tsi nikwahró꞉ri.

⁶ Kwáh iasewanikonhrakónhtat tánon sewaʼnikonhranirón꞉hak. Tó꞉sa ietshitshà꞉nisek. Ne sewaNí꞉io, ne Roiá꞉ner rahonhatsí꞉wa, ensewakwekónhake. Iáh thatsisewaʼnikonráhthe iáh ó꞉ni thatsisewatiaʼthonthakwáse.”

⁷ Ethò꞉ne ne Mahís iahonónhke ne Joshua tánon wahoró꞉ri rahotihénton nonhkweshón꞉a ne Isaerʼró꞉nonke, “Iasenikonhrakónhtat tánon saʼnikonhranirónhak; í꞉se kók enhshehéntenhse kí꞉ken onhkweshón꞉a niahontié꞉nawatste ne tiohontsá꞉ien né꞉tho Roiá꞉ner shakorahratstén꞉ni ne shakotisoʼthonkonhkén꞉en.

⁸ Ne Roiá꞉ner rahonhatsí꞉wa enhiahéntenhse tánon entiateróhsen. Iáh tathahiaʼnikonriákten iáh ó꞉ni tahiatehwenhthéte, iáh thashaʼnikonhrókten iáh ó꞉ni taeshateronhní꞉sehke.”

Ne Kaianerénhsera Ne Nakawenhnahnó꞉take Tió꞉konte Ne Tsá꞉ta Nihioserá꞉ke Natekáron

⁹ Káti ne Mahís wahahiatón꞉nion ne Rawenni꞉io raoianerénhseras tánon né꞉ne Levitical rotikhá꞉res thashaká꞉wen, ne tsi ronónha ratiʼnikónhrare ne nonerówa Roiá꞉ner raoteriwaʼseronhniá꞉tshera í꞉wa, ó꞉ni ne shakotihéntenhses ne Isaerʼró꞉nonke.

¹⁰ Washakorihónten, “Ne tsi ienwatésha tió꞉konte ne tsá꞉ta nihioserakéhaton, nó꞉nen né꞉tho ioseráte ienkáhewe ne iakotʼkaró꞉tons tsi tenskaná꞉konhke, iorakarení꞉hak kí꞉ken tsi sewenhnahnó꞉ten né꞉ne tsi nihiekwáhera ne ionhtekwasenhthákwa.

¹¹ Sewenhnanótas nonhkweshón꞉as nʼIsraerʼronónke nó꞉nen enʼthónhne nahonwashén꞉naien ne Roiá꞉ner sewaNí꞉io né꞉ne tsi nón꞉we nihionterenhnaientáhkwa.

¹² Iaséhnonhk sehiatharó꞉rok ratikwé꞉kon ne ronhnónkwe, konhnónkwe, tánon ne ratikshaokón꞉a, ó꞉ni ne tihononhontsá꞉tes ne sewaná꞉takons ratiʼterón꞉ton, ne káti nonhkweʼtakwé꞉kon ahiakothónhteʼne tánon nahatiweientéhtaʼne nahonwakwénienste ne Roiá꞉ner sewaNí꞉io ó꞉ni nahontewénhnaraʼkwe ne rahorihonhnienhní꞉tsheras ahioriwatokénhake.

¹³ Thóh ki ní꞉ioht ne tsi iensatwatsí꞉rine ne iáh nonhwénton tehiakothonté꞉hon ne Roiá꞉ner sewaNí꞉io raoianerénhsera enhiakothóntheʼne. Tánon káti kwáh enhatiweientéhtaʼne nahonwawénhnaraʼkwe né꞉ne tsi nikarí꞉wes enhatinákereʼke ne tsi ionwenhtsá꞉ien ne ó꞉nen thó꞉wa iahisewatié꞉nawatste né꞉ne í꞉se nokwá꞉ti ne Jordan.”

Né꞉ne Onahkénhkha Ne Roiá꞉ner Sahorihónten Ne Mahís

¹⁴ Ethò꞉ne ne Roiá꞉ner wahawénhase ne Mahís, “Iáh ó꞉nen sóhtsi tekarí꞉wes tetsishathaténron nasónnheke. Iatsínonhk ne Joshua tánon atosehrá꞉kon nonhtaʼtiaténhaf, ne káti nahónton nahontahihiawí꞉hon ne rahohioténhseras.” Mahís tánon ne Joshua atohserá꞉kon niaháne.

¹⁵ Tánon ne Roiá꞉ner washakothotháshien thóh tsi ioʼtsikerote tsi ní꞉ioht ne kanawaható꞉the ne thóh í꞉kate kanohákta tsi watohseróthe.

¹⁶ Ne Roiá꞉ner wahawénhase ne Mahís, “Kwáh iostó꞉re enshí꞉heie, tánon nó꞉nen ensenheiónhke nonhkweshón꞉a iáh tahonsahothiriwatokénhake nakonhà꞉ke tánon tenhatihiáke nateriwaʼseronhniá꞉tshera ne watʼson skátke ne ronhnónha. Enhionkatewenhthéte tánon ne enskonhwatishén꞉naien ne thikáhiont nihioʼokón꞉as ne tsi ionhontsá꞉ien ne ó꞉nen thóhwa thoniahón꞉ne.

¹⁷ Nó꞉nen ne nenhiá꞉wenhne, kwáh ki enkhenákwase; kwáh enkhehiatewenhthéte, tánon kwáh enhonwatinonhwarià꞉kon. Wé꞉so ioriwákes ne kariwaieshá꞉tsheras enhotí꞉rahne, tánon nó꞉nen enhónhthoke kí꞉ken tsi nihotihiathawénhserons ne tiorì꞉wa Ní꞉i ne Raotiní꞉io, tsi iáh ó꞉nen tetiakwakwé꞉kon.

¹⁸ Tánon kwáh iáh takatʼthóntate nakheié꞉nawaʼse ne thó꞉ne, tiorì꞉wa tsi nikariwahétken tsi nahóntiere tánon ó꞉ia nihioʼokón꞉as sakonhwatishén꞉naien.

¹⁹ “Ó꞉nen, shiá꞉ton kí꞉ken karén꞉na. Sehrihónhnien nonhkweshón꞉as ne Israerʼró꞉nonhke, ne káti ne kwáh thaká꞉taʼne tsi enhiakoriwaní꞉ratse tsi nokwáh ne ronón꞉ha.

²⁰ Kwáh ki ienkhehiaʼténhawe ne tsi tiohontsarénhse ó꞉ni iohontsí꞉io, tsi ki nikhehiararatstén꞉ni ne shakotisoʼthonkonhkén꞉en. Thóh nón꞉we kwáh tsi ní꞉kon tehonathonhontsó꞉ni tsi enhothikwahiéntake, tánon ionhwénhsen tsi ní꞉ioht tsi enhonhnón꞉neke. Ók ki tenhontkaraté꞉ni nó꞉ia nihioʼokón꞉as enkonhwatishén꞉naien. Kwáh enhiontkénron tánon tenhatihiáke nakateriwaʼseronhniá꞉tshera,

²¹ tánon ki wé꞉so ne tehiotenonhianì꞉tons ne kariwaieshá꞉tsheras enhotí꞉rahne. Ók kí꞉ken karén꞉na shé꞉kon ki tenhkariwá꞉kwen, tánon ne enhiakoriwaní꞉ratse tsi nokwáh ne ronónha. Iekaní꞉hare nón꞉wa, nohénton iakhehiaʼténhawe ne tsi tsohontsá꞉ien né꞉tho kehiararatstén꞉ni nahontatkhé꞉ion, wakhaterièn꞉tare tsi nahó꞉ten ronhnonhtón꞉nions.”

²² Kwáh ne sahenhní꞉sera ne Mahís wahahiatón꞉nion ne karénna tánon washakorihón꞉nien nonhkweshón꞉as ne Israerʼró꞉nonhke nón꞉we.

²³ Ethò꞉ne ne Roiá꞉ner wahotháhraʼse ne Joshua ne roiénha ne Nun tánon wahohró꞉ri, “Shaʼnikonhranirónhak tánon thashaʼnikonhrakontaʼkwénhak. Enhshehéntenhse nonhkweshón꞉a ne Israerʼró꞉nonhke niasehiaʼténhawe ne tsi tsohontsá꞉ien né꞉tho khehiararatstén꞉ni, tánon entenikwekónhake.”

²⁴ Ne Mahís wahahiatón꞉nion ne Rawenni꞉io raoianerénhseras ne kahiatonhserá꞉kon, kwáh wahatenhnikónhraren ne tó꞉sa othé꞉nen ahonikónhren.

²⁵ Ne nó꞉nen shahása, washakawénhase ne Levitical rotikhá꞉res, tsi ronónha ratiʼnikonhrahrákwe noneró꞉kwa ne Rawenni꞉io Raoteriwaʼseronhniá꞉tshera thoí꞉wa,

²⁶ “Iaʼsewáhaf kí꞉ken kahiatónhsera né꞉ne Rawenni꞉io Raohianerénhseras tánon kanerokwákta sehwá꞉ien ne Ateriwaʼseronhniá꞉tshera aoneró꞉kwa né꞉ne Roiá꞉ner sewaNí꞉io, rahó꞉wenk, ne káti ne é꞉tho akaiéntake nakariwaniraʼtseke tsi nokwáh ne rahonkweʼtashón꞉a.

²⁷ Wakaterièn꞉tare tsi nihotinonhtsistaʼní꞉ron ó꞉ni iáh tehontewenhnaráhkwa. Iáh tehonatewenhnaráhkwen tsi nokwáh ne Roiá꞉ner tsi nikarì꞉wes konhnhétie, tánon sénha iáh tahontewénhnaraʼkwe nó꞉nen enwakihé꞉ion.

²⁸ Ietsihiaʼtaró꞉rok ratikwé꞉kon ne tsi sewatharaiéntons shakotihéntenhse ó꞉ni ne rathiriwakweʼní꞉ios natkénton, ne káti nahónton akheró꞉ri kí꞉ken oriwaʼshón꞉as; Ienkhená꞉ton ne tsi karonhiá꞉te ó꞉ni ne tsi ionhontsá꞉te nahionkeriwaníratʼtse tsi nokwáh ne ronónha.

²⁹ Wakaterien꞉tare nó꞉nen enwakihé꞉ionhke nonhkweshón꞉as kwáh enhatiriwanérake tánon enhatiriwáhson tsi nahoʼténhsons kherihonhnién꞉ni. Tánon ienkáhewe ne enhatihié꞉na ne kariwaieshá꞉tsheras, tiorì꞉wa tsi wahonwanaʼkón꞉ni ne Roiá꞉ner tsi ne kenh niahatí꞉iere tsi nahó꞉ten ne roriwáston.”

Ne Mahís Raorenhnaʼshón꞉as

³⁰ Ethò꞉ne ne Mahís tontahatnanétha kwáh akwé꞉kon ne karén꞉na tsi ná꞉he nonhkweshón꞉as Nʼiaraerʼró꞉nonhke iakotahónhsate.