Deuteronomy 29 - Ohiatonhseratokénti

Ne Roiá꞉ner Raoteriwaʼsehronhniá꞉tshera Tsi Nòkwah Ne Isaerʼró꞉nons Ne Tsi Watonhontsá꞉ien Ne Moab

¹ Ne kí꞉ken tsi nikawenhnó꞉ten nateriwaʼseronhniá꞉tshera né꞉tho Roiá꞉ner rohró꞉ri ne Mahís nahonhnón꞉ni ne Israerʼró꞉nons ne tsi wathonhontsá꞉ien ne Moab; ne kí꞉ken ne iehiowénhte nateriwaʼseronhniá꞉tshera tsi niká꞉ien ne Roiá꞉ner rotíson ne tsi tionónhte ne Sinai.

² Ne Mahís washakohiaʼtaró꞉roke ratikwé꞉kon ne Israerʼró꞉nons tánon washakawénhase, “Kwáh í꞉se sewatkáton ne Roiá꞉ner tsi nihoierà꞉se ne ronhnontí꞉io ne Egypt nón꞉we, ó꞉ni ne rahonkweʼtashón꞉as ne ronaterihóntons, tánon ne tsi nihonakeráhsera.

³ Sewatkáton ne tehiotenonhianì꞉tons kannratarihnétsheras, ne iorihwanerakwahténions, tánon ne kowá꞉nens ionerákwas ne Roiá꞉ner tsi nihoieránion.

⁴ Ók tsi nió꞉re nón꞉wa wenhniserá꞉te iáh thetsisewarihwá꞉wi nahisewaʼnikonhraiéntaʼne tsi nisewahiathawénhon.

⁵ Ne kaié꞉ri nihioseráhsen ne Roiá꞉ner watsisewahéntenhse ne iahonwentsiathénke, tánon ki ne sewaʼtsherón꞉niat ó꞉ni ne sewátas iáh nonhwénton tehioriwenhtà꞉hon.

⁶ Iáh tesewanatharaiéntaʼkwe nahisewáke tó꞉ka ó꞉ni nonenharataʼsehontsherákeri tó꞉ka ó꞉ni nonenʼtákeri nahisewahnekí꞉ra, ók ki ne Roiá꞉ner watsisewaié꞉riʼse tsi natahisewathonhontsó꞉nike ne káti naónton natsisewarihón꞉nien tsi raónha se ne sewaNí꞉io í꞉ken.

⁷ Tánon nó꞉nen setewáh꞉we ne ken nón꞉we niwatená꞉taien, Ronhnonhtí꞉io Sihon né꞉ne Heshbon tánon ne Ronhnonhtí꞉io ne Og né꞉ne Bashan nón꞉we tahiaténhti nahitewaterí꞉io. Ók ki wahitisén꞉ni,

⁸ wetewatié꞉nawatste ne rahononhóntsas, tánon wahithihiakhónhase ne tsi ratiʼtaraiéntons ne Reuben ó꞉ni ne Gad, tánon ne satekanenhrí꞉hen ne Manasseh.

⁹ Iorihwatokénhak tsi sewatewénhnarak kí꞉ken owenhnaʼshón꞉as ne kí꞉ken ateriwaʼseronhniá꞉tshera, ne káti noriwakwé꞉kon ahisahianerásten tsi nenhshá꞉tiere.

¹⁰ “Nón꞉wa wenhniserá꞉te rahohénton ne Roiá꞉ner sewaNí꞉io isehwá꞉te, sehwakwé꞉kon—ietsihéntenhse ó꞉ni ne ronaterihóntons, tionhkweʼtashón꞉as,

¹¹ konhnónkwe, ratikshaokónhas, ó꞉ni ne tihononhontsá꞉tes ne skátke sehwanákeres ne teieshaientsiákse ó꞉ni ne ieshanekakareniénhnis.

¹² Kén꞉en í꞉sewes nón꞉wa wenhniserá꞉te nahisewatiaʼtáren nateriwaʼseronhniatserá꞉kon né꞉tho Roiá꞉ner sewaNí꞉io rahonhnihátie skátke ní꞉se tánon nahisewaié꞉na tsi nihioterihwaiénhni,

¹³ ne káti ne Roiá꞉ner natsisewarihwaní꞉raʼtse tsi í꞉se ne rahonkweʼtashón꞉as ó꞉ni sewaNí꞉io í꞉ken, tsi ki nitsisewarahratstén꞉ni ní꞉se tánon ne ietsisoʼthonkonhkén꞉en, nʼAbraham, NʼIsaac, ó꞉ni ne Jacob.

¹⁴ Iáh ki tionháhak kók tesewarihwá꞉ke ne Roiá꞉ner tsi rahonhnihátie kí꞉ken ateriwaʼseronhniá꞉tsheras ó꞉ni tsi nihiorihó꞉tens.

¹⁵ Tewakwé꞉kon onhkwarihwà꞉ke tsi rahonhnihátie tsi nítson ne kén꞉en rahohénton í꞉tewate nón꞉wa wenhniserá꞉te ó꞉ni tsi nienhtewatwatsiríhne ne iáh á꞉reʼkho tehonahnakerá꞉ton.

¹⁶ “Sewehiá꞉re tsi ní꞉ioht tsi tionhnékwe ne Egypt nón꞉we tánon tsi nihiotonhthon꞉ne tsi wathitewathawénhre nakorénhsons rahotinakerahserá꞉kons.

¹⁷ Wesewatkató꞉serons ne ioteriwatehashón꞉as rahotihiatonhniʼshón꞉as né꞉ne ó꞉iente ó꞉ni onén꞉ia ionhniátons, kawistará꞉kens, tánon nowistanoronhshón꞉as.

¹⁸ Iorihwihió꞉hak iáh ónhka ne rónhkwe tó꞉ka ó꞉ni ne iakónhkwe, kahwá꞉tsire, tó꞉ka ó꞉ni ne kentióhkwa ne kén꞉en rónhnete nón꞉wa wenhniserá꞉te nahonsahonwatkaraté꞉ni ne Roiá꞉ner Onhkwaní꞉io né꞉ne ahonshakonhwatiʼshén꞉naien nakorénhsons rahotinihioʼokón꞉as. Ne ki thóh nenhiá꞉wenhne tsi ní꞉ioht nó꞉tera ne tkánios tsi natehioterahiótsis ó꞉ni ne iakorhiótha iohnióte.

¹⁹ Kwáh iorihwihióhak iáh ónhka ne kén꞉en í꞉iete nón꞉wa wenhniserá꞉te ne iakoʼthón꞉te kí꞉ken karihwanirà꞉tsheras kariwatà꞉tsheras tánon ki shé꞉kon ahathateʼnikonhraní꞉rate tsi akwé꞉kon tienhiohiánereʼke ne rahonhà꞉ke, iawerohátien tsi tiehotenonhtsistaní꞉raton raónha tahathatenóntonhse. Né꞉tho kwáh sewakwé꞉kon ensewahiatáton, thóh nahioianeréhake tó꞉ka ó꞉ni ahonhetkénthake.

²⁰ Ne Roiá꞉ner kwáh iáh tahonsahonikónhrenhse ne nihionkwetó꞉ten. Khékok, ne Roiá꞉ner ne iotékha rahonakwáhtshera kwáh enkenhtonhkowanáthe ne raonhà꞉ke, tánon akwé꞉kon ne karihwaiesáhtsheras ne kahiatónhnion ne kén꞉en kahiatonhserá꞉kon kwáh enhosénhne tsi nió꞉re ne Roiá꞉ner kwáh thokén꞉en enhothón꞉te.

²¹ Ne Roiá꞉ner kwáh ne thenthoteniéntenste rahothihéntons ne tsi ratiʼtaraiéntons ne Israerʼró꞉nonhke tánon entháhawe ne karihwaieshá꞉tsheras raonhà꞉ke tsi nikaianerenhseró꞉tens nakwé꞉kon ne karewathá꞉tsheras ne kahiatónhnions nateriwaʼseronhniá꞉tshera ne kén꞉en kahiatonhserá꞉kon ne tsi nishakorihonhnién꞉nis ne Roiá꞉ner.

²² “Ne wahatinekwenhsatátie ne shawá꞉tsires ó꞉ni ne thihononhontsá꞉tes ne ahí꞉non nió꞉re thatinahkerénions kwáh enhontkátho ne kariwaieshá꞉tsheras ó꞉ni ne karonhiakénhseras né꞉tho Roiá꞉ner thó꞉has ne sonhontsà꞉ke.

²³ Ne kahenthakésons kwáh kaiáse enkénhake, ne entsioró꞉ronhke ne iontenatentásta tánon tioiótsis; iáh thahó꞉ten thakaienʼthónke, tánon shé꞉kon ne kahontátsens iáh ki tahonthakánio ne nón꞉we. Ne sonhontsà꞉kes ne tenskaieronhthárake ne tsi kanatowá꞉nens ne Sodom ó꞉ni ne Gomorrah, né꞉ne Admah tánon ne Zeboiim nón꞉we, tsi niká꞉ien ne Roiá꞉ner rorihwénktons nó꞉nen ne kwáh sihotenakwenhráti.

²⁴ Ethò꞉ne akahonwenhtsakwé꞉kon enieriwanónhton, ‘Onhnontié꞉ren ne Roiá꞉ner tsi thóh ki nahá꞉iere ne rahononhontsà꞉ke? Nahó꞉ten wakarihón꞉ni tsi nahotenakwawenhrátie?’

²⁵ Tánon tsi tenkariwahserákwen, ‘Ne tiorì꞉wa ne Roiá꞉ner rahonkweʼtashón꞉as wathatihiá꞉ke nateriwaʼseronhniá꞉tshera ne skátke rothí꞉son ne raónha, ne Sakoní꞉io ne shakotisoʼthonkonhkén꞉en, nó꞉nen shathontashakohiatí꞉nekenhwe ne Egypt.

²⁶ Thikanihiohseraténion shakotihiotenhséhakwe né꞉ne iáh nonhwénton tetkonhwatishén꞉naien ne tiotierénhton, né꞉ne nihioʼokón꞉as ne Roiá꞉ner shakoriwastén꞉ni nakonhwatishén꞉naien.

²⁷ Tánon káti ne Roiá꞉ner washakonakwáhse ne rahonkweʼtashón꞉as tánon ne taháhawe ne rahononhontsà꞉kes akwé꞉kon ne kariwaieshátsheras ne kahiatónhnion ne kén꞉en kahiatonhserá꞉kon.

²⁸ Tánon káti ne Roiá꞉ner wahotenakwawenhráʼtse, tánon ne kowá꞉nen rahonakwáhtshera é꞉ren washakohiaʼtenhá꞉wite ne rahononhontsá꞉kes tánon thihiohontsá꞉te nón꞉we iashakohiatón꞉ti, tánon tho nón꞉we nihatinákere nón꞉wa wenhniserá꞉te.’

²⁹ “Tokára nikarihoʼténhsons ne Roiá꞉ner onhkwaNí꞉io roriwaséhtons; ók ki rorihotháshions ne rahohianerénhseras, tánon onhtsionhá꞉ʼa ó꞉ni tsi wetewawatsiratátie tsi entewatewénhnaraʼkwe né꞉ne tsi nén꞉we.