Deuteronomy 28 - Ohiatonhseratokénti

Ne Kaiataterí꞉tshera Ne Iontewenhnaráhkwa

¹ “Tó꞉ka entiewenhnaráhkwe ne Roiá꞉ner saNí꞉io tánon ahóskon tewethákwen tsi enshatié꞉nawatste ne rahoriwatà꞉tsheras ne tkwawí꞉hons nón꞉wa wenhniserá꞉te, sénha í꞉se enhiashatstenhserowanáhthe tsi ní꞉ioht nakorénhsons ne tsi ionwentsá꞉te.

² Eʼtiewénhnarak ne Roiá꞉ner saNí꞉io tánon akwé꞉kon kí꞉ken kaiataterí꞉tsheras ensawenhkón꞉weke:

³ “Ne Roiá꞉ner kwáh enhaiaʼtaté꞉riste ne sewariwaʼshón꞉as ó꞉ni ne tsisewaienʼthótha enhiokwáston.

⁴ “Ne Roiá꞉ner kwáh enhaiaʼtaté꞉riste ne wé꞉so ahisawiraiéntaʼne, ahiowátstonke ne saienʼthó꞉tsheras, ó꞉ni ne wé꞉so ahisanaskwaiéntake ne tionónhskwarons tánon ne teiotinakaronhtón꞉a.

⁵ “Ne Roiá꞉ner kwáh enhaiaʼtaté꞉riste ne sanátsa ne saiéntʼthon ó꞉ni tsi ne shatekhonhniátha.

⁶ “Ne Roiá꞉ner kwáh enhaiaʼtaté꞉riste ne kwáh tsi nahó꞉ten ahisahiò꞉ten.

⁷ “Ne Roiá꞉ner enshakoshén꞉ni ne ieshá꞉sons nó꞉nen ieniesatiaʼtón꞉ti. Énskak tsi nón꞉we nenʼthón꞉ne tsi ieniesatiaʼtón꞉ti, ók ki tsík nón꞉we nienhatitátke nenhontè꞉ko.

⁸ “Ne Roiá꞉ner saNí꞉io enhaiaʼtaté꞉riste ne sahioʼténhsera tánon ne tsi sehnekeraienthákwa, kwáh thenʼthárasthe nonátsas. Kwáh enhaiaʼtaté꞉riste ne tsi ionhontsá꞉ien ne thiawì꞉re.

⁹ “Tó꞉ka entiewénhnaraʼkwe ne Roiá꞉ner saNí꞉io tánon orihwakwé꞉kon thóh nénhshienre tsi nihatró꞉ris, kwáh ki raónha rahonkwè꞉ta enhionton, tsi ki nihorahrátston.

¹⁰ Ethò꞉ne ki kwáh ohontsakwé꞉kon enhiontkátho né꞉tho Roiá꞉ner tsi í꞉se tsisewahiaʼtarákwen ne rahonkwè꞉ta ahisewá꞉ton, tánon káti enietsitshaʼní꞉sheke.

¹¹ Ne Roiá꞉ner wé꞉so énthion nahisawiraiéntaʼne, ionatiohkowá꞉nen tionónhskwarons, tánon ienkaié꞉rike ne kaienʼthótsheras ne tsi ionhontsá꞉ien ne shakorahratstén꞉ni ne ietsisoʼthokonhkén꞉en tsi enthetsí꞉tion.

¹² Enʼthaténiehte nokenhnorésehras tsi natehiotonhotsó꞉hon tsi nénhtewe ne iokwats ne tsi rathakweniaientáhkwa ne tsi karonhià꞉te ó꞉ni enhaiaʼtaté꞉riste akwé꞉kon ne sahioténhseras, ne káti nahónton ne iakotiohkowá꞉nen asehnihásehke, ók iáh ki ní꞉se thatehiotonhontsóhon ne thé꞉nen aiesáhni.

¹³ Ne Roiá꞉ner saNí꞉io ne enhión꞉ni nasehéntenhse nonkwehshón꞉a tánon iáh nashé꞉sere, kwáh tió꞉konte tsi enshahianerastén꞉ni ó꞉ni iáh nonhwénton tahisariwanó꞉ron tó꞉ka enhioriwatokénhake tsi enshatewénhnaraʼkwe akwé꞉kon ne rahoriwatà꞉tsheras né꞉tho tkwawí꞉hons nón꞉wa wenhniserá꞉te.

¹⁴ Ók kwáh tó꞉sa nonhwénton ne iáh thashatewénhnaraʼkwe ne tsík nahonthahiotserá꞉ton, tó꞉ka ó꞉ni nasehshén꞉naien ó꞉ni nasehioʼténhse nó꞉ia nihioʼokón꞉as.

Tsi Nienhiáwenhne Ne Iáh Tehiontewenhnaráhkwa

¹⁵ “Ók Tó꞉ka iáh thatiewénhnaraʼkwe ne Roiá꞉ner saNí꞉io tánon iáh tewethakwenhtserá꞉kon tsi ashateweiénton akwé꞉kon ne rahoriwatà꞉tsheras ó꞉ni ne raoianerénhseras né꞉tho tkwawí꞉hons nón꞉wa wenhniserá꞉te, niaʼtékon kí꞉ken kariwahétkens tsi nenhsaiathawénhseron:

¹⁶ “Ne Roiá꞉ner enharé꞉wahte ne sewanatá꞉kons ó꞉ni ne sewenhéntakes.

¹⁷ “Ne Roiá꞉ner kwáh enharé꞉wahte ne sewanátsas ó꞉ni ne sewaientó꞉serons ó꞉ni tsi ne sewathekonhniatáhkwa.

¹⁸ “Ne Roiá꞉ner kwáh enharé꞉wahte tsi kénk niháti énthion nahisawiraiéntaʼne, kénk ní꞉kon entkáhawe nenshientwáko, tánon iáh thahionatiohkowanénhken ne tionónhskwarons ó꞉ni ne teiotinaʼkarontón꞉a.

¹⁹ “Ne Roiá꞉ner kwáh enharé꞉wahte ne tsik nahoʼténhsons ahisahiò꞉ten.

²⁰ “Tó꞉ka kariwahétken enshahiò꞉ten tánon atiatewénhthete ne Roiá꞉ner, kariwaieshá꞉tshera enhiahérase, thahisaniʼtón꞉nien, ashaʼnikonhrók꞉ten, tánon enwatheriwenhtó꞉reke ne kwáh tsík nahoʼténhsons ashateriwaténtiaʼte, tsi nió꞉re ne kwáh iostó꞉re ó꞉ni kwáh í꞉ken tsi enhiesathón꞉te.

²¹ Tsienhionhnonterátseson ne kannratariné꞉tsheras tsi enʼthaténieten tsi nió꞉re ne kwáh iáh ónhka tsiatahonsehsewathaténhronke ne tsi ionhontsá꞉ien ne ó꞉nen thóhwa iahisewatié꞉nawatste.

²² Ne Roiá꞉ner ne enhiaiénte ne iohnrarátskons, ó꞉ni nashatiáto ó꞉ni nahisenhtonhkwárho, enthaténiethe nahionhontsà꞉then ó꞉ni ne kwáh ioweratharí꞉hen nakariwaiéshathe ne saienʼthótsheras. Kí꞉ken kariwaieshátsheras ensehnikwekonhátiesehke kwáh tsi nió꞉re ienshathonhnókten.

²³ Iáh thahiokén꞉nore, tánon ne sonhontsà꞉ke thóh nenhioní꞉ra tsi ní꞉ioht ne karístatsi.

²⁴ Tsi ní꞉ioht nahiokén꞉nore, ne Roiá꞉ner kek ne enhtaténiete nahonkenrakétsko ó꞉ni nakanesaronhkwahkétsko tsi nió꞉re ne kwáh ieniesathón꞉te.

²⁵ “Ne Roiá꞉ner kwáh enteshaká꞉wen ne ieshá꞉sons naiesashén꞉ni. Énska tsi nenhteshiérate tsi iensehiatiaʼtón꞉ti ók ó꞉ia natenhteshiérate tsi ensehsatéko, ók kwáh tsík nenhteshierathánion tsi ensehiatekwenhátonhse, tánon akahontsakwé꞉kon enhiakoteronhiénten nó꞉nen enhiontkátho tsi nesahiathákwen.

²⁶ Ne nó꞉nen ensíheie, notsitenʼokón꞉as ó꞉ni ne konhtí꞉rios entkón꞉ne nakón꞉nheke ne saierón꞉ta, tánon kwáh iáh ónhka nakonwatiʼterón꞉kwen nakonhwanatékwahte.

²⁷ Ne Roiá꞉ner enhtathéniete nahisatkarotakwaronhthásehron, tsi nishakoié꞉raʼse ne Egyptró꞉nons. Ne enrón꞉niate ne tierón꞉ke nahishakararénhseron. Tsathakwé꞉kon ensenhstaronhniónhne, tánon ensharónhkwen, ók kwáh ki iáh othé꞉nen thakanonhkwahtseraiéntake.

²⁸ Ne Roiá꞉ner enhiónhnien nahishá꞉ti ne saʼnikónhra; kwáh ne enhiaiénhte ne tekaronhwékon ó꞉ni ne tahisaniʼtón꞉nien.

²⁹ Kwáh enshonsehrón꞉ko nó꞉nen kwáh tehioswáthe nenhtsékene tsi ní꞉ioht ne teierón꞉wekon, tánon iáh thaskwé꞉ni naseʼtshén꞉ri kaniahisenonhátie. Kwáh iáh thahó꞉ten tahisahianerásten tsi nenshá꞉tiere. Kwáh ienhionkonhtaʼkwénhake tsi enhiensaronhiákente ó꞉ni enhiesanenskwenhá꞉ton, tánon iáh ónhka tahonteʼtshén꞉ri nahiesasniénon.

³⁰ “Kwáh entiateriwaʼserón꞉ni ne ken nitiakoión꞉a nahisenihniáke—ók ónhkak akó꞉ren enhotiʼniáke. Kwáh enshatenonhsón꞉ni—ók iáh ki nonhwénton thóh tashá꞉tien. Kwáh ensehnenharaièn꞉to—ók iáh ki nonhwénton thasáhiake ne ahó꞉hik.

³¹ Ne shatshenenhó꞉kons tionhnónskwarons kwáh sahénton tsi enkonwaná꞉tsowe, ók iáh ki thahó꞉ten thasehwárahke. Ne shatshenenhó꞉kons tewahòn꞉tes enkonwatihiaʼthísere tsi ienhkonhwatihiaʼténhawe tsi nikarì꞉wes teskánere, tánon iáh tathahontakonhwathihiaʼténhawe. Ne shatsheʼnenhó꞉kons teiotinakarontón꞉as né꞉ne tesewatà꞉tsons enhonwatinaskwawí꞉hon, tánon iáh ónhka tahonteʼtshénri nahiesasnhiénon.

³² Ne shanekenteronhtieraʼshón꞉as ó꞉ni ne shahiathasehtieraʼshón꞉as né꞉ne ienhonwatihiaʼténhawe ne thihononhontsá꞉tes nahonwanatenaskonhniáthe né꞉ne tsi nikarì꞉wes teskánere, Kwáh niatewenhniserá꞉ke tsi ensatkharakwísron, tsehiorihwákon nashaterá꞉rahte ne sheienhokón꞉as ne tahonthahón꞉ne.

³³ Thiʼiakahóntsate akwé꞉kon ieniéhawe ne saienʼthótsheras né꞉ne tsi nisaronhiakén꞉en ne saièn꞉thon, ne tsi iáh othé꞉nen thashié꞉na ók ienhiokonhthákwen ensharonhiakénhake ó꞉ni enieshateniakatstà꞉tie.

³⁴ Ne sharonhiakénhsera ne enkarihón꞉ni tsi ensáti ne saʼnikónhra.

³⁵ Ne Roiá꞉ner ne enharoró꞉the ne tsiʼnákes ne iáh othé꞉nen tekanonhkwatsherá꞉ien, iononhwaʼténions tsi nenhwató꞉we; kwáh tiathakwé꞉kon ensatkwarothakwarontháseron né꞉ne senonhtsí꞉ne tsi nió꞉re ne shasithákes.

³⁶ “Ne Roiá꞉ner ieniahiaʼténhawe ó꞉ni ne sanonhtihiótshera nákte nón꞉we tionhontsá꞉ien, ne nón꞉we ní꞉se tánon ne sesoʼthonkonhkén꞉en iáh nonhwénton tsesewanákereʼkwe; tho nón꞉we ne tensehriwásniese ne niʼiohokón꞉as ne oiénte tánon onénhia nahó꞉tens ionhniáton.

³⁷ Ne tsi kanakerahseraké꞉rons tsi nón꞉we ne Roiá꞉ner iatenhiaréniate, nonhkweshón꞉as entionhtonhnékhon tsi nisahiaʼthawénhen; tenhieshaiéron tánon enieshatsté꞉riste.

³⁸ “Kwáh wé꞉so enshiéntho nonenhaʼshón꞉as, ók kentní꞉kon enshientwá꞉ko, tiorì꞉wa ne tsistá꞉rare ne enhonteʼkwí꞉sa ne saienʼthó꞉tsheras.

³⁹ Enshienthó꞉seron ne onenharaʼshón꞉as tánon ensatkwirasehronhniánion, ók iáh ki tashahiá꞉ko iáh ó꞉ni tasnekí꞉ra nonenharataʼsehontsherákeri, tiorì꞉wa tsi otsinónhwa enkónhnheke ne watenenharíhseres.

⁴⁰ Iakenhiewá:tha karonhtaʼshón꞉as enwatón꞉ni ne sonhontsá꞉kes ók iáh ki othé꞉nen tahisaiénhtaʼne ne iakeniewá꞉tha kén꞉ie, tiorì꞉wa ne iakenhiewá꞉tha kahíks tsi enwasénhne.

⁴¹ Enshanekenhterontsheraientháseron ó꞉ni enshahiaʼtasetsheraientháserons, ók ki enshá꞉tonhse, tiorì꞉wa tsi ienhonwatihiaʼténhawe nahonwatinó꞉ton tsi waterí꞉io.

⁴² Akwé꞉kon ne sarontaʼshón꞉as ó꞉ni ne saienʼthó꞉tsheras otisnonwaʼshón꞉as enhonteʼkwí꞉sa.

⁴³ “Ne thiʼhononhontsá꞉tes ne sonhontsá꞉kes ratinákeres kwáh sénha enhatishatsténhne, ók ní꞉se kwáh skenenhaʼshón꞉a enshashatstenhserón꞉ti.

⁴⁴ Enhotiwistaiéntake naieshawístani, ók iáh ki ní꞉se tahishaiéntake naséhni. Ne tsi iehiotók꞉the ne eniesatkórasthe.

⁴⁵ “Akwé꞉kon kí꞉ken kariwaieshahokón꞉as enshanitonhwaró꞉rokse, tánon kwáh ensehwakwekónhake tsi nió꞉re ne kwáh enieshathón꞉te, tiorì꞉wa tsi iáh thetsewenhnaráhkwen ne Roiá꞉ner saNí꞉io ó꞉ni nahishatshenawastónhake ne kaianerénhseras ne thiá꞉wi.

⁴⁶ Né꞉ne rahoriwanirátsheras ne Rawenni꞉io tsi iariwénhton ó꞉ni tsi iensatwatsirì꞉ne ne tsi nén꞉we.

⁴⁷ Ne Roiá꞉ner kwáh iahiatateríston ne tsík nahontahiotsheratónhake, ók iáh ki tetsioténhse nahisaʼtshenhnonhní꞉hake ó꞉ni nahiotonhnárake ne serhiáne.

⁴⁸ Káti ethosà꞉ne, kwáh ne ensehioʼténhse ne tesewatà꞉tsons né꞉tho Roiá꞉ner enteshakoténiehte ne iaieshatiaʼthón꞉ni. Kwáh ki enshathonkariákseke, enshaniataʼténhseke, tánon sanehéskonk thenkénhake—kwáh tsík nahoʼténhson tsi tenshathonhontsoníheke. Ne Roiá꞉ner kwáh enhiaronhiákente ó꞉ni enhiatnirátʼtse kwáh tsi nió꞉re enieshathón꞉te.

⁴⁹ Ne Roiá꞉ner kwáh enteshakohiaʼtenháseron ne tsi iehiotonhontsoʼthaní꞉hon nonhkweshón꞉a ne iaieshatiaʼtón꞉ti, ne nonhkweshón꞉as ne rahoronhkhátsheras iáh teshaʼnikonhraién꞉tas. Kwáh tenhieshathaséhthe tsi ní꞉ioht ne á꞉kweks.

⁵⁰ Kwáh iáh othé꞉nen tehothí꞉ien ne kakweniensthátshera ó꞉ni nathanitén꞉ron ne tsík ónhka akénhake, nitiakoión꞉a tó꞉ka ó꞉ni akoksténha akénhake.

⁵¹ Kwáh enkonhwatiwá꞉rake ne saʼtshenenhó꞉kons ó꞉ni enhón꞉neke ne saienʼthó꞉tsheras, tánon athonkarià꞉kon ensarhió꞉te. Iáh othé꞉nen taiesénhrase nonátsa, ne onenharataʼsehontsherákeri, iakenhiewátha kén꞉ie, tionónskwarons, ó꞉ni ne teiotinaʼkarontón꞉a; tánon enshí꞉heie.

⁵² Kwáh kanatakwé꞉kons tsi ienskonwanatiaʼtón꞉ti ne kanathaiéntons ne tsi ionhontsá꞉ien ne Roiá꞉ner saNí꞉io thiawì꞉re, tánon tsiotʼtes ne tekenstó꞉rote ne teshanathanaʼtons né꞉ne seniahésen enkareniénhne.

⁵³ “Nó꞉nen ne ieshá꞉sons rotiʼienahónhatie ne sanathashónshas, thóh nió꞉re tsi enshakhwanorónsten iekaníhare ensehwá꞉rake ne ratikshaokón꞉as ne Roiá꞉ner saNí꞉io thiá꞉wi.

^54-55 Iekaníhare ne kwáh rothonkwetatkwéniens ó꞉ni thoriwaié꞉ri tsi ní꞉ioht tsi rawenhnakerá꞉ton tho nió꞉re tsi enhaʼnikonhrókten tsi nikarì꞉wes tehonwatiná꞉thanen kwáh otià꞉ke ne sakohioʼokón꞉as enshakowárake tiorì꞉wa tsi iáh thahó꞉ten teshokhwáien. Akwé꞉kon iáh tahahohétsthase ne iathateʼkénha tó꞉ka ó꞉ni ne kwáh sakonorónhkwa ró꞉ne tó꞉ka ó꞉ni tsi nihá꞉ti iateshonathaténron ne sakohioʼokón꞉a.

^56-57 Iekaníhare ne iakónhkwe kwáh iakothonkwetatkwéniens ó꞉ni tiakoriwaié꞉ri tsi ní꞉ioht tsi iakawenhnakerá꞉ton, tho nió꞉re tsi iakokwátshe kwáh iáh nonhwénton káneka tiehiakawè꞉non ne takhéson niáhien, kwáh nónhne thóh nenhiéhiere. Nó꞉nen ne tehontà꞉tsons tenhshakotinathánake, tho nió꞉re tsi enhiakhokwahnorónsten kwáh athashetonhkéha tsi enhionthatewárake ne honhthatsiénha nónhwak kók iakawenhnakerá꞉ton. Kwáh iáh thatahiathón꞉te ne ró꞉ne ne ronwanorónhkwa tó꞉ka ó꞉ni nónhkak ne akohiohokón꞉a.

⁵⁸ “Tó꞉ka iáh orihwakwé꞉kon tahioriwatokénhake tsi ashatewénhnaraʼkwe ne Rawenni꞉io rahorihonhnienhní꞉tsheras tsi nikahiatón꞉nion ne kén꞉en kahiatonhserá꞉kon tánon tó꞉ka iáh tathasherénhsaron ne ionerákwat ó꞉ni iorá꞉se raoshén꞉na ne Roiá꞉ner saNí꞉io,

⁵⁹ kwáh ki enthiateniéntase ó꞉ni tsi niensatwatsirì꞉ne ne iáh tetieiewénhtas kannratarihnétsheras ó꞉ni ne tehiotenonhianì꞉ton kannratarihnétsheras né꞉ne iáh nonhwénton thaónton takatástonke.

⁶⁰ Kwáh shé꞉kon énska ienseraterátsthe tenʼthaténiehte ne shonhà꞉ke ne iotenhrátʼtherons ne sariwaienteráhon ne Egypt nón꞉we, tánon iáh nonhwénton tahonshashiewénhtane.

⁶¹ Kwáh ó꞉ni enʼthaténiehte niatekannroténhsons ó꞉ni ne kannratarihnétsheras né꞉ne kén꞉en watró꞉ris kahiatonhserá꞉kon ne Rawenni꞉io raoianerénhseras ó꞉ni rahorihonhnienhní꞉tsheras, tánon kwáh ki enieshathón꞉te.

⁶² Ethosà꞉ne et nensewenhtiohkowá꞉nenke tsi ní꞉ioht ne tsi iotsistohkwarón꞉nions ne tsi karonhiá꞉te, kenk ki ní꞉tson iatenhtsiwathare, ne tsi iáh thetsisewawenhnaráhkwen ne Roiá꞉ner sewaNí꞉io.

⁶³ Kwáh ki tsi ní꞉ioht ne Roiá꞉ner tsi wahawerientí꞉io tsi natsisewakwatsésten tánon tsi watsisewenhtiohkowá꞉nahthe, káti kwáh et nenhawereientí꞉io natsisewathón꞉te tánon nahontaháhawe ne karihwaieshátsheras ne tionháke. Etren enieʼtsihiatenhá꞉wite ne tsi ionhontsá꞉ien ne ó꞉nen thó꞉wa iahisewatiaʼtakwehní꞉ioste.

⁶⁴ “Ne Roiá꞉ner kwáh tenhtsisewaréniate tsi ienakerénion nonhkweshón꞉as, ne tsi iehiotonhontioktaníhons, tánon tho nón꞉we nenieʼtsiió꞉tenhse ne nihiohokón꞉as né꞉ne oiénte tánon onénhia ionhniátons, né꞉ne nihiohokón꞉as ní꞉se tánon ne ietsisoʼthonkonhkén꞉en iáh nonhwénton tethiʼtsishén꞉naien.

⁶⁵ Kwáh iáh okáneka tahisehwaktshén꞉ri ne skén꞉non, iáh káneka nahisewanahthónkwen í꞉se sehwáwenk; ne Roiá꞉ner kwáh ne enthiaró꞉rokte ne tahisonhnaríhkon, iáh thé꞉nen tahonshasehrihwástonhke, tánon enshewaʼnikonrók꞉ten.

⁶⁶ Ne tsi sónhne tiotkonhónwe enhioʼtheronhthónheke. Nenhtsékene ó꞉ni noʼkarasnéha ne enshatanáhnonke nahishaterónhseke, tánon tió꞉konte ne entiokonhthákwen naseʼtianíhseke ne kenhé꞉ion.

⁶⁷ Tenhseweriasisónhkwe tsi nisewatérons tsi nahoʼténhsons sewatkatóhserons. Iatehioronhketserá꞉ke ensehwaskanékseke noʼkarasnéha akénhake; niatehiokaratserá꞉ke ne ensewaskanéksehke noronhkè꞉ne akénhake.

⁶⁸ Ne Roiá꞉ner kahonweiátke tsi ienshiaténiehte ne Egypt, iawerohátien tsi ne rá꞉wenh tsi iáh nonhwénton shé꞉kon é꞉tho tiahonshá꞉se. Thóh nón꞉we enshateʼnién꞉ten ne iasathatenhní꞉non rononhà꞉ke ne tesehwatà꞉tsons naieshatenaskonhniáthe, ók iáh ki ónhka thaiénre naieshatiaʼtaní꞉non.”