Deuteronomy 27 - Ohiatonhseratokénti

Ne Rawenni꞉io Raoianerénhseras Ostèn꞉rake Kahiatón꞉nions

¹ Ethò꞉ne ne Mahís, skátke ne sakotihéntenhse ne Israerʼró꞉nonke, washakawénhase nonhkweshón꞉a, “Sewatewénhnarak akwé꞉kon ne karihonhnienhní꞉tsheras ne tho takwahwí꞉hon nón꞉wa wenhniserá꞉te.

² Nenhtewenhniserá꞉teʼke nó꞉nen iatenhsewahiáiake ne Jordan Kaniataratátie tánon thóh nenhésewe ne tsi ionhontsá꞉ien né꞉tho Roiá꞉ner sewaNí꞉io thetsisewawì꞉re, kanenhiowá꞉nens sewakwahtakwenhá꞉ton, sewanawatstháro,

³ tánon thóh sewahiatón꞉nion akwé꞉kon kí꞉ken kaianerénhseras tánon ne karihonhnienhní꞉tsheras. Ne nó꞉nen iensewathonhontsórenhne ne iohontsarénhse ó꞉ni ne ionhontsí꞉io né꞉tho Roiá꞉ner shakoʼNí꞉io ne ietsisoʼthokonhkén꞉en, tsi sewarahratstén꞉ni,

⁴ tánon ní꞉se nakaniatharáti thísewes ne Jordan, sewanenhiotón꞉nion kí꞉ken osténras ne tsi ionónhte ne Ebal, tsi ki nikwahró꞉ris nón꞉wa wenhniserá꞉te, tánon sewanawatstháro.

⁵ Tho nón꞉we ietsienharáhkwa tsón꞉ni onénhia nahó꞉ten tsiónhniat né꞉ne kwáh iáh othé꞉nen ne karístatsi tewáston tsi akáhson,

⁶ tiorí꞉wa tsi ní꞉kon ne ietsienharáhkwa entshiʼtsiónhnien ne Roiá꞉ner sewaNí꞉io ó꞉nenk tsi ne enhionhnià꞉thonke ne iáh othé꞉nen tekanenhiakwè꞉tarons. Tho nón꞉we nenhsewanonwarià꞉kon ne kaʼtshé꞉nen nakonhwateskónten,

⁷ tánon tho nón꞉we nensewateskónten tánon nahisewahwárake tsi iensewatháte ne skén꞉non í꞉ken, ó꞉ni tesewatenonhwerathónsek rahohénton ne Roiá꞉ner sewaNí꞉io.

⁸ Nonénhias ne kanawastháron sewahiáton kwáh tsi niaʼtekawénhnakes wenesthónhak ne Rawenni꞉io raoianerénhseras.”

⁹ Ethò꞉ne ne Mahís, skátke ne Levitical rotikhá꞉res, washakawénhase onkweʼtakwé꞉kon ne Israerʼró꞉nonhke, “Thaʼtesewató꞉tat, tsónhkwe ne Israerʼró꞉nonhke, tánon takwahtahónsatat. Ón꞉wa wenhniserá꞉te ne Roiá꞉ner sewaNí꞉io rahonkweʼtashón꞉a wesewá꞉ton;

¹⁰ káti tsi sewawénhnarak ó꞉ni sewateweiénton akwé꞉kon ne raoianerénhseras ne tkwá꞉wis nón꞉wa wenhniserá꞉te.”

Ne Karewatà꞉tshera Ne Iáh Tehiontewenhnaráhkwa

¹¹ Ethò꞉ne ne Mahís washakawénhase nonhkweshón꞉as ne Israerʼró꞉nonke,

¹² “Ne nó꞉nen iatenhsewahiáiakon ne Jordan, ne ratiʼtaraiéntons tsi ionónte ne Gerizim niehón꞉ne tsi nió꞉re ne kahiataterí꞉tsheras enkarihowaná꞉tonhke tsi nokwáh nonhkweshón꞉a: Simeon, Levi, Judah, Issachar, Só꞉se, tánon ne Benjamin.

¹³ Tánon ne ratiʼtaraiéntons tsi tionónhte ne Ebal ienhón꞉ne tsi nió꞉re ne karewatà꞉tshera ienkarihowaná꞉tonhke: Reuben, Gad, Asher, Zebulun, Dan, tánon ne Naphtali.

¹⁴ Né꞉ne Levites enhontáti kí꞉ken owenhnaʼshón꞉as kwáh enʼthonkwísron:

¹⁵ “‘Rawenni꞉io enshakoré꞉wahte nónhka eniehiatonhniserón꞉ni nonénhia, oiénte, tó꞉ka ó꞉ni karístatsi tánon athasetonhkéha enkonhwashén꞉naien; ne Roiá꞉ner rásons ne kahiatonhniʼshon꞉as.’ “Tánon onkweʼtakwé꞉kon kwáh teieriwaʼserá꞉ko, ‘É꞉tho niʼiáwen!’

¹⁶ “‘Rawenni꞉io shakorewá꞉tha nónhka iáh thashakotikwénienste ne ronwatihioʼokón꞉as.’ “Tánon kwáh onkweʼtakwé꞉kon tsi tenhieriwaʼserá꞉ko, ‘É꞉tho niʼiáwen!’

¹⁷ “‘Rawenni꞉io shakorewátha nónhka tahionhnatakwáhthe ne tehonhnonsanéken tsi roteristatátie.’ “Tánon onkweʼtakwé꞉kon tenieriwaʼserá꞉ko, ‘É꞉tho niʼiá:wen!’

¹⁸ “‘Rawenni꞉io shakorewátha nónhka enhonwanaʼthaharakwáhthe ne teieronhwékon.’ “Tánon onkweʼtakwé꞉kon tenieriwaʼserá꞉ko, ‘É꞉tho niʼiáwen!’

¹⁹ “‘Rawenni꞉io shakorewátha nónhka enhonwatiʼnikonhráten ne thihononhontsá꞉tes, tehontonhnakárias, ó꞉ni ne ionateréhons ne raotiʼianerénhseras.’ “Tánon onkweʼtakwé꞉kon tenieriwaʼserá꞉ko, ‘É꞉tho niʼiá:wen!’

²⁰ “‘Rawenni꞉io shakorewátha nónhka enhoteháthe ne roʼní꞉ha tsi enhiatenonhwaró꞉risthe kák tsi nikónti ne roʼní꞉ha rotinià꞉kons.’ “Tánon onkweʼtakwé꞉kon teieriwaʼserá꞉ko, ‘É꞉tho niʼiáwen!’

²¹ “‘Rawenni꞉io shakorewátha nónhka kenhiashakoiére ne konhtiʼtshé꞉nens nahatenonhwarorístakwe.’ “Tánon onkweʼtakwé꞉kon teieriwaʼserá꞉ko, ‘É꞉tho niʼiá:wen!’

²² “‘Rawenni꞉io shakorewátha nónhka ahiatenonhwaró꞉riste ne iatenosénha tó꞉ka ó꞉ni nasénhnonk nihiatenosénha.’ “Tánon onkweʼtakwé꞉kon teieriwaʼserá꞉ko, ‘É꞉tho niʼiá:wen!’

²³ “‘Rawenni꞉io shakorewátha nónhka enhiatenonhwaró꞉riste ne ronhwenónhsa.’ “Tánon onkweʼtakwé꞉kon tenieriwaʼserá꞉ko. ‘É꞉tho niʼiá:wen!’

²⁴ “‘Rawenni꞉io shakorewátha nónhka nataséhtonhke ahiontathásete.’ “Tánon onkweʼtakwé꞉kon teieriwaʼserá꞉ko, ‘É꞉tho niʼiá:wen!’

²⁵ “‘Rawenni꞉io shakorewátha nónhka ahieiéna noʼwísta nahiontathásehte ne iahothé꞉nen tehiakoní꞉kon.’ “Tánon onkweʼtakwé꞉kon teieriwaʼserá꞉ko, ‘É꞉tho niʼiá:wen!’

²⁶ “‘Rawenni꞉io shakorewátha nónhka ne iáh orihwakwé꞉kon tehiontewenhnaráhkwa ne Rawenni꞉io raoianerénhseras ó꞉ni ne rahorihonhnienʼní꞉tsheras.’ “Tánon onkweʼtakwé꞉kon teieriwaʼserá꞉ko, ‘É꞉tho niʼiá:wen!’