Deuteronomy 22 - Ohiatonhseratokénti

¹ “Tó꞉ka énsken ne Israerʼró꞉non rahotsé꞉nen tionhnónskwaron tó꞉ka ó꞉ni teiotinaʼkaronhtón꞉a iotihiakénhen natenhenrá꞉kon, tó꞉sa nek kók ne taskaʼnérake. Ionshatiaténhaf tsi nón꞉we tiotihiakén꞉en.

² Onk tó꞉ka ne rahotsé꞉nen ahinonhnió꞉re thénhteron khés ne iáh theshaterièn꞉tare ónhka akotshé꞉nens, ethò꞉ne ki ionshasehiaténhaf tsi thishì꞉teron. Nó꞉nen ne rahotshé꞉nen éntre tsi shakohiaʼtisakonháties, iesehsakohiaténhaf.

³ Thóh nónhne ná꞉tser tó꞉ka tewahòn꞉tes ensehnaskwaktshénri, ó꞉ni ne kenhnahónske atsherón꞉niat, kóhni noiáhsons nahorihoʼténhsons né꞉ne Israerʼró꞉nons ahonaʼtón꞉nike.

⁴ “Tó꞉ka ne Israerʼró꞉nons rahotiʼtshénens tewahòn꞉tes khés ne tionhnónskwaron ioiatienénhen, tó꞉sa shataʼrónhti; sniénon ne tahonsaká꞉taʼne.

⁵ “Ne konhnónkwe iáh tehiówenk ne rónhkwe rahotsherón꞉niat ákonhste, tánon ne ronhnónkwe iáh nónhne tehiówenk ne konhnónkwe ahonaʼtserónhniat áratste; Ne Roiá꞉ner saNí꞉io shakósons nónhkwe ne nihieweienhnó꞉tens.

⁶ “Tó꞉ka enseʼtshénri ne otsiʼtén꞉a ahotsiʼná꞉kwa ne karonhtà꞉ke tó꞉ka ó꞉ni ne ohontsà꞉ke ne kaʼnisténhsera otsiʼtén꞉a ononhsà꞉ke kénskote tó꞉ka ó꞉ni iakonónhna nakohioʼokón꞉a, kwáh tó꞉sa ienshaʼténhawe ne kaʼnisténhsera.

⁷ Ahónton ne iasehiaʼténhaf ne owiraʼsónhas, ók shasátkaf nén꞉ne ne konhwaʼnisténha, ne káti nahónton nahión꞉nise asónhnheke tánon ahiokwástonke.

⁸ “Nó꞉nen á꞉se ensehsaʼtenonhsón꞉ni, iorihwihióhak nashatenhrá꞉ren ne tsi iehioteronhkwè꞉nate. Ethò꞉ne kwáh iáh í꞉se tahishateriwahéste tó꞉ka ónhka iahieiá꞉tenhne tánon wahakononhwarià꞉kon.

⁹ “Tó꞉sa othé꞉nen tsenʼtósehron ne sahentà꞉kes skátke ne sanenharaʼsónhas; tó꞉ka tonénhshiere, kwáh ki ieshatiawenhrátis ne thé꞉nen áshatste khés ne onénhare tó꞉ka ó꞉ni ne oiáhsons ne kaienʼtwákwens.

¹⁰ “Tó꞉sa skátke sehiatanihiónten ne tehionà꞉kares khés ne tewahòn꞉tes nanitararahratʼtho.

¹¹ “Tó꞉sa ne sewatsherón꞉niat ne tewaserieʼthá꞉ron okénha tánon ne oniaʼtára iaʼtekaiéston.

¹² “Sehwaniʼkón꞉nion ne iohserihietenʼtón꞉nions ne kaié꞉ri níkons ne kanenhtsakékons ne sehwaʼtsheronhniás.

Nó꞉nen Ne Rónhkwe Tkahó꞉tent Enshakorihwáro Ne Ró꞉ne

¹³ “Tó꞉ka shí꞉ken ne rónhkwe nitiakohiónha wahatateniá꞉ten tánon ishiʼnonwéha iáh thorihwaiéntaʼse iáh thateseshakotonhontsóni.

¹⁴ Sók ki iaʼtékon tsi ní꞉ioht tsi wahatkaronhniánion nakaonhà꞉ke, washakorihwáro iáh tehiená꞉wiʼkwe ne shahotinià꞉ke.

¹⁵ “Tó꞉ka ki thóh nenhiá꞉wenhne, ne nitiakohiónha nonhtatiénha ienhníhawe tsi iohrákware nakonekwénhsa ne iontenaktoróktha ne enkarihwaní꞉rate tsi iená꞉wikwe, tánon tsi tehiehiatoreʼtákhwa ienhníhawe ienhonwatinaʼtónhase ne rotikstenhokónhas.

¹⁶ Ne ronhwaʼní꞉ha enshakawénhase, ‘iekhehiátkawenh ne kheiénha nahotiniáke kí꞉ken rónhkwe, tánon ó꞉nen iáh thatesheshakotonhontsó꞉ni.

¹⁷ Iaʼtékon tsi ní꞉ioht tsi washakorihwaró꞉sehron, rá꞉ton iáh tehiená꞉wiʼkwe ne sahothinià꞉ke. Ók ki kén꞉en kariwaní꞉rats ne kheiénha tsi hiená꞉wiʼkwe; sewakenhénhion nonekwénhsa iohrákware ne ionhtenaktorókta!’

¹⁸ Ethò꞉ne ne rotikstenhokónha ienhonwahiaʼténhawe ne rónhkwe tánon enhonwanonhwenhserário.

¹⁹ Tánon kwáh enhonwakaraiénhase énska tewenhniáwe nikahwístake kawistará꞉ken tánon ne enthónhion ne nitiakohiónha ronhwaʼníha, tiorí꞉wa ne rónhkwe washakotéhate ne ken nitiakohiónha Israerʼró꞉non. Sénha ishiʼnónhwe, ienhtionhtasónhteren tsi thaniʼterónhtake ne shakosténha, tánon iáh nonhwénton thahohianerenhseraiéntaʼne ne thahiateʼkháshion tsi nikarì꞉wes enhiakónhnheke.

²⁰ “Ók tsi nahó꞉ten shakorihwároskwe tó꞉ka tó꞉kenske tó꞉ní꞉ioht tánon iáh orihwí꞉io tehioterihwaʼtshénrion tsi hienáwiʼkwe,

²¹ ethò꞉ne ki ienhshakotihiaʼténhawe tsi hiehiontawehiaʼtákhwa ne ronhwaʼní꞉ha tsi ronónhsote, thóh nón꞉we ne rotikstenhokónhas ne akoná꞉takon enhshakotinenhióhiaʼke tsi nió꞉re iaʼtenhatikónhten. Wahtehenhsehrowá꞉nen tsi nahéiere tsi nokwáh nontionhkweʼtashón꞉as tsi iakotenonwarohríston nohénton wahakonià꞉ke, tsi shé꞉kon ronhwaʼní꞉ha rahonónhskon hieʼterón꞉taʼkwe. Thóh ki ní꞉ioht tsi étren enhsewahá꞉wite ne karihwahetkénhsera.

²² “Tó꞉ka ne rónhkwe enhonwahá꞉rase ronatenonhwaroríston ne ó꞉ia rónhkwe ró꞉ne, tenhitsá꞉ron ki enhonwatinonhwarià꞉kon. Thóh ki ní꞉ioht tsi étren ensewahá꞉wite ne karihwahetkénhsera.

²³ “Tó꞉ka shí꞉ken ne rónhkwe wahonwahárase kaná꞉takon ronatenonhwaroríston kenhnitiakoniónha né꞉ne ó꞉nen ónhkak ronateriwahserón꞉ni nahotinià꞉ke.

²⁴ Iaheʼtsihiaténhaf káti átste nakanátati tánon ietsinenhióhiak tsi nió꞉re iatenhsewakónten. Ó꞉nenk tsi enhkénheie tiorì꞉wa tsi iáh thaʼtehiohénreton nakonhwaié꞉nawaʼse, iawerohátien tsi thóh kaná꞉takon í꞉weskwe, thóh nón꞉we ahiotón꞉honke akonhwathónton. Tánon ki ne rónhkwe ó꞉nenk tsi enhrénheie tiorì꞉wa tsi wahiatenonhwaró꞉riste nónhkak ó꞉nenh iakoteriwasehrón꞉ni nahiakóniake. Thóh ki ní꞉ioht tsi étren ensehwahá꞉wite ne karihwahétken.

²⁵ “Tó꞉ka shí꞉ken ne rónhkwe kaheʼtá꞉ke nón꞉we tontashakonónhtonse ne ken nitiakohiónha né꞉ne ó꞉nen iakoteriwasehrón꞉ni nahiakonià꞉ke nónhkak akó꞉ren. Ethò꞉ne ki rónhkwe kók enhonwanonhwarià꞉kon;

²⁶ Tó꞉sa othé꞉nen nikonhwaiéras ne iónhkwe, tiorì꞉wa tsi iáh othé꞉nen tehioriwáneren ne satakésnake nakonhwanonhwarià꞉kon. Kí꞉ken orí꞉wa kwáh neshà꞉ka tsi ní꞉ioht nó꞉nen ne rónhkwe iahotiaʼtón꞉ni nó꞉ia rónhkwe tánon wahó꞉sehte.

²⁷ Ne rónhkwe tonhtashakonónhtonhse ne ó꞉nen iakoteriwasehrón꞉ni nahiakonià꞉ke ne kaheʼtà꞉ke nón꞉we, tánon iawerohátien tsi watiakohénrehte nahiontatié꞉nawatste, iáh ki ónhka tehioteʼtséron nahiontatié꞉nawatse.

²⁸ “Tó꞉ka shí꞉ken ne rónhkwe wahonwaháraʼse titeshakononhtón꞉nis ne ken nitiakohiónha ne iáh arè꞉ko tehiakoteriwaʼserón꞉ni nahiakonià꞉ke.

²⁹ Ó꞉nenk tsi enhokáriakʼse ne ronhwaʼní꞉ha saʼtakenáske ne kanákwa né꞉ne wísk-nikahwístakes kawistará꞉kens, tánon ne ró꞉ne enhiónton, tiorì꞉wa tsi tonhtashakonónhtonʼse nahiatenonhwaró꞉riste. Iáh ki nonhwénton thaónton ne tahonshahiateʼkhási né꞉ne kwáh tsi nirónhnes.

³⁰ “Iáh ónhka ne rónhkwe tahonwateháte ne roʼníha né꞉ne tahontakonwananónhtonhse tsi nikón꞉ti rotiniákons ne raónha.