Deuteronomy 19 - Ohiatonhseratokénti

Ne Tsi Kanatowá꞉nens Nón꞉we Nihionteʼkwáhsens

¹ “Nó꞉nen ne Roiá꞉ner sewaNí꞉io sakothónton nonhkweshón꞉as tsi niká꞉ien ne rahononhóntsas tetshisewá꞉wi tánon nó꞉nen shisewaiéhnen ne rahotinatowá꞉nens ó꞉ni ne tsi rotinónhsotons tánon thóh nón꞉we nesewatená꞉taien,

^2-3 Áhsen naʼtesewáhiak ne kanakeráhsera, skà꞉tsons kanatowá꞉nens ionataiéntak né꞉ne ahontiesénhake niahiónhwe. Ethò꞉ne ónhka ne tsi nítson nahonsehsewateriwatéwahthe enwá꞉ton kak tsi nikaná꞉takes niahísewe nahontesewáhne.

⁴ Tó꞉ka iáh thashaʼnikonhrón꞉ni nahonshasateriwatéwahthe né꞉ne iáh thatetsatà꞉tions, enwá꞉ton kak tsi nikaná꞉take niaháse tánon ensehniá꞉kenhne.

⁵ Takeriʼwaráste, tó꞉ka tesenihiáse karáhkon niahísene nahishinihientaʼkóha tánon tó꞉ka, ónhkak ne tesenihiáse roronhtaká꞉ro naharonhtié꞉nenhte, wahotenekeretsoharáhkwen raotóken tánon wahononhwarià꞉kon ne shahiáta, enskwé꞉ni ne iaʼtasharáhtate kak niká꞉ien kí꞉ken áhsen nikaná꞉takes tánon enshatekwáhsen.

⁶ Tó꞉ka shí꞉ken skanátak kók akénhake, ne kwáh ken nió꞉re ahontakénhake nonhtié꞉renk shó꞉tsi ahí꞉non nió꞉re akénhake, tánon ne ronhtaténonhs tsi niká꞉ien ronaterihwaiénhni nahonsahatikharià꞉ke ne sewateriwateʼwáthon nonhtié꞉renk enhiesaié꞉na tánon kanakwatsherá꞉kon tsi enshakotinonwarià꞉kon ne iáh othé꞉nnen tehiakonʼníkonh. Kwáh ki ó꞉ni, iáh tesaʼnikonhrón꞉ni tsi ónhkak wasenonhwarià꞉kon né꞉ne iáh tatetsaténtsons.

⁷ Ne kí꞉ken aorì꞉wa konhnà꞉on ne áhsen nikaná꞉takes karakwénhak.

⁸ “Nó꞉nen ne Roiá꞉ner saNí꞉io enshakowanáhthe ne sanakeráhsera, tsi nishakohró꞉ri ne sesothonkonhkén꞉en tsi thóh nenhá꞉iere, tánon énthion nonhóntsas tsi nihorahrátston,

⁹ ethò꞉ne ki á꞉re shé꞉kon áhsen nikaná꞉takes ensehserá꞉ko. (Énthion kí꞉ken ohóntsa tó꞉ka orihwakwé꞉kon thóh nénhshiere tsi nikonhró꞉ris nón꞉wa wenhniserá꞉te tánon tó꞉ka tsenorónhkwa ne Roiá꞉ner saNí꞉io tánon tsi ensónnheke ne tsanénhaf ne raorihonhnienhní꞉tshera.)

¹⁰ Tokí꞉ken ná꞉tser, ne káti ne iáh othé꞉nen tehiakoní꞉kon nonhkweshón꞉a iáh thahiaiéheie tánon káti ní꞉se iáh tahishá꞉niʼke tsi ensenonhwarià꞉kon ne tsi ionwenhtsá꞉ien ne Roiá꞉ner nénthion.

¹¹ “Ók tó꞉ka shí꞉ken thesarihó꞉se wasthiá꞉sehte ne tetsiatà꞉tions ne iáh othé꞉nen tetsorihonhní꞉hon tánon ethò꞉ne iashatekwáhsen kak niká꞉ien ne kanatowá꞉nen nahonteshá꞉ne.

¹² Tsi thóh nikarihò꞉ten, ne ietsihéntenhse ne sewanatá꞉kons ahontaiesenhnónhksa tánon iahiesatsaʼkwaríshi tsi nokwáh ne raotiwá꞉tsire ne ronateriwaiénhni nahonshahatikharià꞉ke ne sewateriwatewáton, ne káti nahónton naieshanonhwarià꞉kon.

¹³ Nataniténron iáh taiesanatónhase. Sasesenhnaserón꞉ni nonhkweshón꞉a ne Israerʼró꞉nonke ne iáh othé꞉nen tehiakoní꞉kon tsi hionhthatenonhwarià꞉kon, ne káti nahónton orihwakwé꞉kon ahishaianerásten.

Noriwaká꞉ion Tsi Karistatátie Nonhóntsa

¹⁴ “Tó꞉sa é꞉ren shá꞉wit tsi karistatátie tsi rahontsá꞉ien ne tetsanonhsanéken, tsi nitkakwatákwen ne wahón꞉nise tkèn꞉ne ne ionhontsá꞉ien ne Roiá꞉ner saNí꞉io thiawì꞉re.

Ne Ieriwanírats Ó꞉nenk Tsi Orihwí꞉io Tsi Nahó꞉ten Enhontró꞉ri

¹⁵ “Ne saiáta iáh tsiaʼtekaié꞉ri nashakoriwénhte ne sewaterihwatewá꞉ton; ne kwáh nitkónha tehniʼiáse tehiotonhontsóha nanirihwaní꞉rate tsi iakohní꞉kon.

¹⁶ Tó꞉ka nónhkwe enhionteʼniénten nahiontatkaré꞉wahte nakó꞉ren ne iáh tò꞉kenske tè꞉kenh tsi enhiontaterihwà꞉ro né꞉tho nónhkwe iáh tehonwawenhnaráhkwa ne Rawenni꞉io,

¹⁷ tesenitsá꞉ron ki ó꞉nenk tsi tionhterenhnaientákhwa ienhénsene tánon rokhá꞉res tentsisenihiatoreʼtáse tánon ne ratirihwéntas ne ó꞉nen ronahterihóntons.

¹⁸ Ne ratirihwénhtas kwáh tokén꞉en tsi enhatirihwí꞉shake norí꞉wa; tánon tó꞉kaʼ sanowénhton tsi niserihwáros,

¹⁹ kwáh tonenhshié꞉na ne karewatà꞉tshera tsi nahoiená꞉onke ne ronhwarihwároskwe. Thóh ki ní꞉ioht ne sewentióhkwa tsi é꞉ren enhsewahá꞉wite ne karihwahétken.

²⁰ Ethò꞉ne kwáh onkweʼtakwé꞉kon tsi enhionrón꞉ke tsi nahá꞉wenhne; kwáh ki enhotiʼterónhne, tánon iáh shé꞉kon nonhwénton nónhka é꞉tho nahonsahiéiere ne karihwahétken.

²¹ Ne nahorihóten tó꞉sa othé꞉nen sewè꞉nest nataniténron; ne kariwatà꞉tshera atónnhets iaʼténskene natónnhets, oká꞉ra iaʼténskene nʼoká꞉ra, onawí꞉ra iaʼténskene nʼonawí꞉ra, oʼtsá꞉na iaʼténskene nʼotsá꞉na, tánon oshì꞉ta iaʼtéskene nʼoshì꞉ta.