Deuteronomy 18 - Ohiatonhseratokénti

Mahís Washakohró꞉ri Nonhkweshón꞉a Tsi Nahoʼténhsons Ne Rotikhá꞉res Ahonwanawíhon

¹ “Tsi nihatitsihenstanónhwe ne tsi ratiʼtá꞉raien ne Levi iáh nénhne thé꞉nen tahotihiaʼtáhesthe nohóntsa ne Israerʼró꞉nonhke nón꞉we; khé:khók, ne enhonhnonhnè꞉kwen tsi niwateró꞉roks ó꞉ni nohiásons nihiotánion ne kariwihiosehokónhas ne Roiá꞉ner ronhwawíhon.

² Iáh tehiówenk ne thé꞉nnen ahononhontsaiéntake, tsi ne ní꞉ioht ne ronatià꞉kes kentióhkwas; ne rahonáwenk né꞉nenhne rahotihiathakenhátshera tsi Roiá꞉ner rahotsihenstaʼshón꞉as í꞉ken, tsi ki nihorahrátston ne Roiá꞉ner.

³ “Né꞉ne kátkek ne tionhnónskwarons tó꞉ka ó꞉ni teiotinakaronhtón꞉a akonhwanatheskónhten, roʼkhá꞉res enhónhion ne oronhkwè꞉na, norióh꞉tsa, ó꞉ni nonekwénhta.

⁴ Ronónha enʼthontié꞉renhte enhatiʼié꞉na ne kaientwákwen nonátsa, onenharataʼsehontsherákeri, iakeniewátha kén꞉ie, tánon nonónhweron.

⁵ Ne Roiá꞉ner shakohiaʼtarakwenhá꞉ton ratikwé꞉kon tsi sewenhtará꞉ien ne tsi ratiʼtá꞉raien ne Levi ne nahonwaiò꞉tenhse tsi rotikhá꞉res akénhake tsi nénhwe.

⁶ “Tsik ónhka ne Levi nihaiaʼtó꞉ten ne raskáneks enwá꞉ton nahontáre ne kwáh tsiknonhwéson nón꞉we nikanataiéntons nahontahaterenhnaién꞉na nʼIsraerʼronónke nón꞉we

⁷ tánon enwá꞉ton ne nón꞉we nahoiò꞉tenhse ne Roiá꞉ner Raoní꞉io, kwáh ki tsi ní꞉ioht ne ronatià꞉kes ne Levites ne nón꞉we nihotihiò꞉te.

⁸ Kwáh ki satéhiot tsi enhatiʼié꞉na ne kákhwa tsi ki ní꞉ioht ne ronatià꞉kes rotikhá꞉res, tánon enwá꞉ton nahatié꞉nawatste noʼwísta tsi nahó꞉ten ne rahowá꞉tsire thonwatenienhtén꞉nis.

Iontaronrakatenhni Tsi Nokwa Ne Ataharenhnhatsera

⁹ “Nó꞉nen iénsewe tsi nón꞉we nihionhontsá꞉ien né꞉tho Roiá꞉ner thiawì꞉re, tó꞉sa iʼtser ne ioteriʼwatéhas tsi nihatiʼieránions nonhkweshón꞉as né꞉tho nón꞉we nihatinákere.

¹⁰ Tó꞉sa sehiateskónten ne sheienʼokónhas ne tsi iotè꞉kha ne tsi tsenharáhkwas; tánon tó꞉sa seríhon nonhkweshón꞉a ne ken niahatí꞉iere ne iótkons tó꞉ka ó꞉ni nahonhnésake nataharenhnátsheras tó꞉ka ó꞉ni ne rónhstha nónhkak tashakotihierón꞉nion

¹¹ tó꞉ka ó꞉ni atenhenhnarátsheras, tánon tó꞉sa seríhon ne tahatì꞉taren ne iakawenhé꞉ion.

¹² Ne Roiá꞉ner saNí꞉io shakósons nónhkwe nónhka ne nihieié꞉ra ki ioteriwaʼtéhas, tánon ne aorì꞉wa shakohiaʼtinekenhenhátie nonhklweshón꞉as ne tsi ionhontsá꞉iens tsi niahisewenonhátie.

¹³ Kwáh iehiokontaʼkwénhak sewariwatokénhak raonhà꞉ke ne Roiá꞉ner.”

Ne Wahrarátston Tsi Enthonwaténiehte Ne Rotokénhse

¹⁴ Ethò꞉ne ne Mahís wahèn꞉ron, “Ne tsi ionhontsá꞉ien ne ó꞉nen thóhwa ahisewatié꞉nawatste, nonhkweshón꞉a ne ratí꞉sehre tsi nishakonaʼtenikonhrá꞉wis tsi nihiákon né꞉ne rotihiò꞉te ne kenhehiónhsera tánon ne ronhnésaks natenharenhnátsheras, ók ki ne Roiá꞉ner saNí꞉io iáh tehiariwá꞉wis ne thóh nashá꞉tiere.

¹⁵ Khékok, enthoténiehte ne rotokénhse tsi ní꞉i ní꞉ioht ne kwáh ne sehsewahià꞉ta, tánon ki kwáh entsisewawénhnaraʼkwe.

¹⁶ “Ne tewenhniserá꞉tehkwe ne shisewatiaʼtaró꞉ronhne ne tsi tionónhte ne Sinai, wesewaʼnéken ne tó꞉sa shé꞉kon ahonsahtsisewawenhnà꞉ronke ne Roiá꞉ner tó꞉ka ó꞉ni ne tó꞉sa shé꞉kon nonhwénton ahonsehsewatkátho ne raonakwahtserowanáhtshera, tiorì꞉wa tsi sewateronskwe nontiérenk ensewénheie.

¹⁷ Káti ne Roiá꞉ner wahakénhase, ‘Kwáh thatiʼiérits tsi nahoʼténhsons ronatatí꞉hon.

¹⁸ Kwáh iekheiaʼteniéhtase ne rotokénse tsi ní꞉se ní꞉ioht ne kwáh ne sahatihiá꞉ta enkénhake; kwáh enhiró꞉ri tsi nahoʼténson enhenrón꞉nion, tánon kwáh orihwakwé꞉kon enshakohró꞉ri nonhkweshón꞉as tsi niwá꞉ken.

¹⁹ Kwáh aksénhnakon tsi enhatá꞉ti, tánon kwáh enkherewáthe nónhka enhionterahiá꞉takwe nahonwawénhnaraʼkwe.

²⁰ Ók nónhka ne rotokéhnse ná꞉rehreke aksén꞉nakon tsi ahateriwanó꞉ten nó꞉nen iáh tehiró꞉ri ne thóh nahá꞉iere, káti ó꞉nenk tsi enrenhé꞉iate, tánon káti ó꞉ni thóh nónhne nenhoià꞉tawen nónhka ne rotokénhse ahotisén꞉nakon ne ó꞉ia nihioʼokón꞉as tsi ahatá꞉ti.’

²¹ “Ahónton nahisanerá꞉ko onhní꞉ioht tsi askwéni nasatró꞉ri nó꞉nen ne rotokénhse rahoteriwanotátshera iáh Roiá꞉ner nón꞉we tetiawè꞉non.

²² Tó꞉ka ne rotokénhse raosénhnakon ne Roiá꞉ner tsi ratá꞉tis tánon tsi nahó꞉ten ráton iáh é꞉tho tahiáwenhne, é꞉tho káti iáh Roiá꞉ner tehoteriwanotátshera. Né꞉tho roʼrokéhnse hiatehaiá꞉ti rahoshatstenhserá꞉kon tsi wahatá꞉ti, tánon tó꞉sa ki tsi sewaʼtshà꞉nik.