Deuteronomy 16 - Ohiatonhseratokénti

Ne Tehiontenonweratónkwa Ne Tsakoniakén꞉en

¹ “Skwénienst ne Roiá꞉ner saNí꞉io tsi tensatenonwerá꞉ton ne watohetsthá꞉kwa ne tsi niwenhnì꞉tare ne Abib; okarahsnéha shiʼkaháwiʼke kénhne ne shonsahianiákente ne Egypt nón꞉we.

² Tsi tionterenhnaientákwa niaháse tánon sahiawénhto ne teiotinakarontón꞉a tó꞉ka ó꞉ni tionónhskwaron né꞉ne watohetstákhwa ashekhwá꞉ren tsi akskwénienste ne Roiá꞉ner saNí꞉io.

³ Ne nó꞉nen enséhke kí꞉ken kákhwa, tó꞉sa ensenatará꞉ke ne ioshé꞉ratkenʼwatʼthenkwatha tekaiéston. Asè꞉ken tsáta nónhta nikarí꞉wes ne enshenaʼtará꞉ke ne iáh thatekaiéston ne iosheratkenʼwatthenkwátha, tsi ne nishaié꞉ren nó꞉nen tsi nathisasteríhen tsi tontashakén꞉ne ne Egypt nón꞉we. Sehnatárak kí꞉ken—ne enkonhwanatónkwake ne kanà꞉taro ne nehieronhiakéntha—kwáh tsi nikarì꞉wes enshón꞉nheke tsi enshehiá꞉rake ne wenhniserá꞉teʼkwe shathonthashiá꞉kenʼne ne Egypt nón꞉we, thóh nón꞉we ítken ne karonhiakénsera.

⁴ Asè꞉ken tsáta nónhta nikarí꞉wes iáh ónhka ne shonhontsá꞉ke tehiówenk nahiakoiéntake ne iosherátken waʼthenkwátha nakononskónhson; tánon noʼwà꞉ron ne konwarióston ne kaʼtshé꞉nen noʼkarasnéha ne tiotenhniseratsherénhton ó꞉nenk tsi ne sahokharásera enkaʼwarákonhke.

^5-6 “Ietsinonhwarià꞉kon ne watohetsthákwa ne konhtiʼtsé꞉nens ne tsi ionhterenhnaientákhwa nón꞉we—tánon iáh ne ákte nón꞉we thakénhake ne tsi ionwenhtsá꞉te né꞉tho Roiá꞉ner saNí꞉io nénthion. Tánon tsi nienkaráhkwenhne thóh ná꞉tser, thóh shikahá꞉wi thetishaténhtion ne Egypt nón꞉we.

⁷ Tesnekónhtiet noʼwá꞉ron tánon thóh ne tsi ionterenhnaientákhwa sewàrak; tánon tsi ientsórenhne shasahténti.

⁸ Asè꞉ken ne ken iotiéton iá꞉iak nónhta nikarì꞉wes ne ensehnaʼtárake ne iáh othé꞉nen thaʼtekaiéston ne ioʼsherátken waʼthenkwátha, tánon ne tsatákhaton niwenhniserakéhaton sewatiaʼtaró꞉rok naʼtsisewasénhnaien ne Roiá꞉ner sewaNí꞉io, tánon tó꞉sa othé꞉nen sewahiò꞉ten ne wenhniserá꞉te.

Ne Kaientwá꞉kwen Tehiontenonhweratónkwa

⁹ “Sehwá꞉set tsá꞉ta nihiaiaʼserá꞉ke nikarì꞉wes tsi náhe thisewasharó꞉ron ne ienatsihiákstha nahisewaientwá꞉ko nonátsa,

¹⁰ tánon ethò꞉ne sewateʼnikonhró꞉ri ne kaientwákwen tehiontenonhweronhkwátha, ne natsisewakwéniensthe ne Roiá꞉ner sewaNí꞉io, ne tsi kwáh ehnisewaʼnikonhró꞉ten tsi taʼtsisewahawí꞉ten tsi nakonhà꞉ke ne kahiataterí꞉tshera thetsisewá꞉wi.

¹¹ Sewatonhnarón꞉nion tsi nón꞉we nihénteron ne Roiá꞉ner, skátke ne ietsihienʼokónha, sewanatsheraó꞉kons, tánon ne levites, thihononhontsá꞉tes, tehionthonhnakárias, tánon ne ionateréhons ne sewaná꞉takons konhtiʼteróntons. Tsi ionhterenhnaientákhwa kí꞉ken thóh naʼsewá꞉ier.

¹² Kwáh ioriwihióhak tsi sewatewénhnarak kí꞉ken kariwatà꞉tsheras; tó꞉sa sewaʼnikónhren tsi sewanáskwa kén꞉en ne Egypt nón꞉we.

Ne Tehiontenonhweraʼtónkwa Ne Tsi Waskwakarénre

¹³ “Ne nó꞉nen akwé꞉kon sawahékshion ne sanátsas tánon akwé꞉kon sanekinekénhen ne sanenharaʼsónhas, sateʼnikonhró꞉ri ne tehontenonhweraʼthónkwa tsi waskwakarénre né꞉ne tsá꞉ta nónhta nikarì꞉wes.

¹⁴ Sewaʼtsenhnónhniat skátke ne ieʼtsihienʼokón꞉a, ne sewanatsheraó꞉kons, tánon ne Levites, ne thihononhontsá꞉tes, ne tehontonhnaká꞉ris, tánon ne ionateréhons ne sewaná꞉takons konhtiʼterónton.

¹⁵ Skwénienst ne Roiá꞉ner saNí꞉io tsi ensateʼnikonhró꞉ri kí꞉ken tehiontenonweratónkwa né꞉ne tsá꞉ta nónhta nikarì꞉wes ne nénskak tsi nón꞉we nihionterenhnaientákhwa. Sathonhnárak, tiorì꞉wa ne Roiá꞉ner tsi rohiatateríston ne saientwá꞉kwen ó꞉ni ne sahioʼténhsera.

¹⁶ “Ratikwé꞉kon ne ronhnónhkwe ne sewenhtiókwakons tsi enʼtónhne nahonwasénhnaien ne Roiá꞉ner áhsen nihiorì꞉wake ne tsósehra né꞉ne tsi nón꞉we ne énskak kók tsi nón꞉we nihionterenhnaientákhwa: ne tsi nieskáhes ne watohetstákhwa, tsi nihieientwákwas ne thahonhtenonhwerá꞉ton, tánon ne tehiontenonhweraʼthónkwa ne tsi waskwakarénre. Ne satihiaʼtátsons ó꞉nenk tsi enthatíhawe natatawí꞉tshera

¹⁷ tsi nenhokwénionhke, tsík ní꞉kon ne rohiaʼtateríston ne Roiá꞉ner saNí꞉io ne thó꞉wi.

Ne Mahís Washakohró꞉ri Nonhkweshón꞉as Tsi Nahiothónhake Ne Kariwakwarishóntshera Tsi Ahionteriwaʼténtiahte

¹⁸ “Ietsihiatarakwenhá꞉ton ratiriwénhthas ó꞉ni ne ronatià꞉kes nahonterihontón꞉nion ne niaʼtekaná꞉takes né꞉tho Roiá꞉ner entetsítson. Kí꞉ken ronhnónkwe kwáh tó꞉sa káneka ahontahotiriwaré꞉kwen tsi tensakothihiaʼtó꞉rete.

¹⁹ Tó꞉sa rothiʼiéntak ne iáh tehioteriwakwaríshon tó꞉ka ó꞉ni nahonhnè꞉neste tsi thotiriwarèhkwen tsi nokwáh ne rahotihiaʼtoretátshera; tánon iáh tehiówenk nahatiʼié꞉na ne thé꞉nen tahonwatitsikhethá꞉roʼse, nathatawí꞉tsheras tehiakorónhweks ne ronhteʼnikonhraʼtókhas ó꞉ni ne thonhonkweʼthaié꞉ris, tánon iakahonhnién꞉nis wahétken tsi ní꞉ioht tsi tahatihiaʼtó꞉rehte.

²⁰ Tió꞉konte tkariwaié꞉rik tánon ioʼtakwarisiónhak, ne káti nahónton nahisewatié꞉nawatste ne watonhontsáien né꞉tho Roiá꞉ner sewaNí꞉io thetsisewawì꞉re ne káti ne iahisewakónhtaʼkwe thóh nón꞉we nahisewenhteróntake.

²¹ “Ne nó꞉nen entsiʼtsónhnien ne ietsenharáhkwa ne Roiá꞉ner sewaNí꞉io, tó꞉sa othé꞉nen ákta ahisewanawahaʼtó꞉ten ne kahiatón꞉ni Asherah aorì꞉wake.

²² Tánon tó꞉sa othé꞉nen nahisewanenhióten nakonhwasén꞉naien ne kahiaʼtón꞉ni; ne Roiá꞉ner kwáh í꞉ken tsi ráshons ne thóh ní꞉ioht.