Deuteronomy 11 - Ohiatonhseratokénti

Ne Roiá꞉ner Raoshatstenhseraʼkó꞉wa

¹ “Tsenó꞉ronk ne Roiá꞉ner saNí꞉io tánon tió꞉konte akwé꞉kon satewénhnarakwak ne raoianerénhseras.

² Sehiárak nón꞉wa wenhniserá꞉te tsi nahó꞉ten waseweienʼtehtà꞉ne tsi nokwáh ne Roiá꞉ner tsi raonhà꞉ke nón꞉we nahesarihón꞉nien. Kwáh í꞉se, iáh ne ietsihioʼokónhas, wesewaié꞉na kí꞉ken karihonnienhní꞉tsheras. Wesewatkátho ne Roiá꞉ner tsi natehotenonhianì꞉ton, ne raoshatsténhsera, tánon tsi naʼtehotewehiá꞉te,

³ tánon ne raoriwanerakwaʼténions. Wesewatkátho tsi nahoiérase ne Egypt ronnonhtí꞉io tánon ó꞉ni tsi niwatenáskwa ne raonakeráhsera.

⁴ Wesewatkátho tsi ní꞉ioht ne Roiá꞉ner tsi kwáh washakothónte ne Egyptró꞉nons ronhterí꞉ios iáh ne shaiá꞉ta tshiaʼtesotahténron, skátke ne raotiʼtshenenó꞉kons koshá꞉tens ó꞉ni ne raotisereʼshón꞉as otsiónhkwas, tsi washakóskohte ne tsi kaniataratátie ne Red Sea ne sihonwásere.

⁵ Sewaterièn꞉tare ne Roiá꞉ner tsi nihoié꞉ren ne sewarihwà꞉ke nohénton ne kén꞉en iahonwenhtsathèn꞉ke sehséwawe.

⁶ Sahsewehiá꞉rak tsi nishakoié꞉raʼse ne Dathan tánon ne Abiram, né꞉ne Eliab sakohioʼokónhas né꞉ne Reuben rahotióhkwakon nihatihiátare. Kwáh akwé꞉kon akohénton nonhkweshón꞉as nohóntsa onhtenotón꞉ko tánon ianihiátenhne, skátke ne raotiwá꞉tsires, ne raonaʼtóhseras, ratikwé꞉kon ne raotináhtsheras ó꞉ni ne raotiʼtshenenó꞉kons.

⁷ Hen, í꞉se ne orihwakwé꞉kon sewatkaʼtóhserons kí꞉ken iorihowá꞉nens né꞉tho Roiá꞉ner tsi nihoieránion.

Ne Kahiaʼtateritsherá꞉ien Ne Wahrarátston Nonhóntsa

⁸ “Sewatewénhnarak orihwakwé꞉kon tsi nahoʼténhsons wakwahró꞉ri nón꞉wa wenhniserá꞉te. Ethò꞉ne ensewakwé꞉ni ne tahisewaniaʼtarihiáke tánon niahisewatié꞉nawatste nonhóntsa ne ó꞉nen thóhwa iahitionhontsárahne.

⁹ Tánon karí꞉wes entsónhnheke ne thóh nón꞉we ne ionhontsí꞉io né꞉tho Roiá꞉ner sakorahratstén꞉ni ne ietsisothonkonhkén꞉en ó꞉ni tsi wahatiwatsiratátie.

¹⁰ Ne thóh onhóntsa ne ó꞉nen thó꞉wa iahisewatié꞉nawatste iáh é꞉tho téhiot tsi nihiohontsò꞉tens ne Egypt nón꞉we, tsi nón꞉we tisewanakerè꞉kwe. Thóh nón꞉we, nó꞉nen ensewanatsaiéntho, waʼtisewanió꞉ten onhnaiá꞉wenhne naieʼtsinekanónhte ne sewaienʼthó꞉tsheras;

¹¹ ók nonhóntsa ne ó꞉nen thó꞉wa iahitsonhontsárahne ne thóh ionhontsá꞉ien né꞉ne ionontahrón꞉nions ó꞉ni ahonrahkwakónhsons í꞉ken ne tsi ionhontsá꞉ien ne nokenhnoré꞉sera ionekanónhtens.

¹² Ne Roiá꞉ner sewaNí꞉io tehásnie ki ionhontsá꞉ien tánon rahnikónhrare tsi nihióseres.

¹³ “É꞉tho káti, sewatewénhnarak kí꞉ken kariwatà꞉tsheras ne thakwawí꞉hon nón꞉wa wenhniserá꞉te; tsi sewanorónhkwak ne Roiá꞉ner sewaNí꞉io tánon seweriasakwé꞉kon tsi tsisewahiò꞉tens.

¹⁴ Tó꞉ka thóh nenhsewá꞉iere, enthateniéhte nokenhnoré꞉sehra ne tsonhontsá꞉kes nó꞉nen tenwatonhóntsowe, ne káti nahisewanatsaién꞉taʼne, ó꞉ni nonenharataʼsehontsherákeri, tánon ne iakenhiewátha kén꞉ie,

¹⁵ tánon entkahonʼtánio ne sewahentà꞉kes ne sewatshenenó꞉kons akónhneke. Kwáh tsi ní꞉kon tesewatonwenhtsóni ne káhkhwa tsi ensewaiéntake.

¹⁶ Tó꞉sa sewathóntat nahé꞉ren ahísewete ne Roiá꞉ner raiaʼtákta ne naietsisén꞉naien ó꞉ni ne taietsiriwásnieʼse nakorénhsons nihioʼokónhas.

¹⁷ Tó꞉ka thóh nenhsewá꞉iere, ne Roiá꞉ner entsisewanáhkwase. Iáh tahakenhnó꞉retste, tánon ne tsohontsà꞉kes shó꞉tsi enwastatʼten ne sewaienʼtótsheras nahontakhánio. Ethò꞉ne ki kwáh iostó꞉re thóh nón꞉we nenhsewénheie, iawerohatiénhak tsi nihiohontsí꞉io tetsisewá꞉wis.

¹⁸ “Sewehiárak kí꞉ken kariwatà꞉tsheras tánon tsónhnet. Sewatenentshanerénktat tánon tesewatenonhwaráhnak ne nahisewehiarakwenhní꞉hake.

¹⁹ Ietshihienʼokónhas ietsirihonnienhní꞉tak. Sewatharákwak nó꞉nen sewanonskónhsons sewenhterón꞉ton tánon nó꞉nen sewahiakén꞉en, nó꞉nen sewatorí꞉shen tánon nó꞉nen sewahioʼténion.

²⁰ Tsi sewathonhnonhkaróntons sewahiatón꞉nions ó꞉ni tsi sewatenhenrakaróntons.

²¹ Ethò꞉ne ki ní꞉se tánon ne ietshihienʼokónhas entsonhésonke ne tsi ionhontsá꞉ien ne Roiá꞉ner sewaNí꞉io shakorahratstén꞉ni ne ietsisoʼthonkonhkén꞉en enteshaká꞉wen. Thóh ensewanakerè꞉ke kwáh tsi nikarì꞉wes enkaronhiá꞉teke ne è꞉neken ne tsi ionhwentsá꞉te.

²² “Sewatewénhnarak tsi taseweʼtahkwénhak orihwakwé꞉kon tsi nakwahró꞉ri: Tsi sewanorónhkwak ne Roiá꞉ner sewaNí꞉io, thóh naʼsewá꞉iere tsi nihá꞉ton, tánon sewariwató꞉kenk tsi nokwáh ne raónha.

²³ Ethò꞉ne ratikwé꞉kon enshakohiaʼtínekenhwe thí꞉ken onhkweshón꞉as tsi nienhénsewe, tánon ensewatié꞉nawatste ne rahononhontsaʼshón꞉as né꞉ne sénha ratiʼshátstes tsi ní꞉se ní꞉ioht.

²⁴ Akwé꞉kon nonhontsà꞉ke tsi nón꞉we niensewenhnèn꞉rine í꞉se sewáwenhk enwá꞉ton. Ne sewanakeráhsera entiè꞉ne nokwáti ne iahonwentsathèn꞉ke entewatáhsawen né꞉ne tsi ionontahrón꞉nions ne Lebanon nothorè꞉ke nokwá꞉tis ienhénwe, tánon né꞉ne nà꞉kon nokwá꞉ti ne Euphrates kaniataratátie entewatáhsawen iénwahwe ne tsi iaʼtewatshénthos nokwá꞉ti ne Mediterranean kaniatarakheʼkó꞉wa.

²⁵ Kwáh tsikʼnonwéhson nienhénsewe nonhontsá꞉kes, ne Roiá꞉ner sewaNí꞉io ensakahón꞉nien nonhkweshón꞉as naietsitsaʼníseke, kwáh ki tsi nihorahrátston, tánon kwáh iáh ónhka tahatikwé꞉ni ne taietshitáste.

²⁶ “Ón꞉wa wenhniseráte tkwá꞉wis nahisewataterákwahse kakʼniká꞉ien né꞉ne kaiataterí꞉tshera tó꞉ka ó꞉ni karewatátshera—

²⁷ ne kahiataterí꞉tshera, tó꞉ka ensewatewénhnaraʼkwe tsi nihatón꞉nions ne Roiá꞉ner sewaNí꞉io né꞉tho tkwá꞉wis nón꞉wa wenhniserá꞉te;

²⁸ ók ne karewatà꞉tshera, tó꞉ka iáh tahisewatewénhnaraʼkwe kí꞉ken kariwatà꞉tsheras tánon tahisewatkahraté꞉ni ne ahisewasén꞉naien ne ó꞉ia nihioʼokón꞉as tsi niká꞉ien ne iáh nonhwénton tetisewasénhnaien ne tiotierénhton.

²⁹ Nó꞉nen ne Roiá꞉ner ientsisewahiaʼténhawe ne tsi tiohontsá꞉ien niahisewatié꞉nawatsʼte, tsi ensewatró꞉ri ne kaiataterí꞉tshera tsi nitiawé꞉non tsi tionónhte ne Gerizim tánon ne karewatáhtshera tsi ne nitiawé꞉non ne tsi tionónhte ne Ebal. (

³⁰ Kí꞉ken teionónhtakes né꞉ne tsi iaʼtewatshén꞉thos iotohetstáhkwen ne Jordan Kaniataratátie né꞉ne Canaanites rahotinakerahserá꞉kon ne thóh ratinákere ahonráhkwakon ne Jordan. Tsi iaʼtewatshénthos iehiotsieráton, iáh ahínonh tè꞉ken tsi tkaronhtóton ne ioronhtatokénhtis ne Moreh né꞉ne ákta ne tsi kaná꞉taien ne Gilgal.)

³¹ Ó꞉nen thó꞉wa tahisewaiá꞉iake ne Jordan Kaniataratátie tánon ne iahisewatiaʼtakwehní꞉ioste ne ohóntsa né꞉tho Roiá꞉ner sewaNí꞉io tsi sewawì꞉re. Nó꞉nen ensewaié꞉na tánon thóh iensewanátaien,

³² iorihwihióhak tsi sewatewénhnarak akwé꞉kon ne kaianerénhseras né꞉tho tkwawì꞉re nón꞉wa wenhniserá꞉te.