Deuteronomy 1 - Ohiatonhseratokénti

Tsi Niiawénhen Ne Horeb Sewehiaraʼon

¹ Né kén꞉en kahiatónhsera né rowenhnasónhas ne Mahís shakotharáhni nonkweʼshón꞉a ne Israerʼró꞉nonhke nó꞉nen ionwenhtsiathèn꞉ke shehónhnes né꞉ne tsitkarahkwí꞉nekens nokwá꞉ti ne Jordan kaniatarahtátie. Ahonráhkwakon ne Jordan ákta ne Suph rónhneskwe, tsi naʼtetiátere ne tsi kanátaien ne Paran né꞉ne skáti nó꞉kwah ne tsi kanátaien ne Tophel, Laban, Hazeroth, tánon ne Dizahab né nakʼtenókwah. (

² Énska iawénhre niwenhniserá꞉ke nihiohá꞉hes né꞉ne tsi Tionónhte ne Sinai nón꞉we nonhtahónhne tsi nió꞉re ne Kadesh Barnea nieiawénon ne tsi iononhtaʼrónhnion ne Edom kanakerahseráien.)

³ Ne tsiotenhniseraʼtserénhton né꞉ne énska-iawénhre shiwenhniʼtakéhaton né꞉ne kaiéri-niwáshen shihioserakéhate ne nó꞉nen shatetonahténhtion ne Egypt, Mahís washakohró꞉ri nonhkweʼshón꞉a orihwakwé꞉kon tsi nihonà꞉on ne Roiá꞉ner nashakohró꞉ri.

⁴ Ne kí꞉ken nó꞉nen ne Roiá꞉ner shihosénhnion ne Ronhnonhtí꞉io Sihon né꞉ne Amorʼró꞉nons nahotaró꞉ten, raónha rakó꞉rahkwe ne tsi kaná꞉taien ne Heshbon, tánon ne Ronhnonhtí꞉io Og né Bashan, raónha ne rakó꞉rahkwe ne tsi kaná꞉taien ne Ashtaroth ó꞉ni ne Edrei.

⁵ Né꞉ne tsi náhe nonhkweʼshón꞉a tsitkarahkwí꞉nekens nokwá꞉ti ne Jordan iehónhneskwe né꞉ne Moab ahontonhontsà꞉ke né Mahís tahatáshawen nahaʼnikonhraiéntate ne Rawenni꞉io raoianerénsehras ó꞉ni ne raorihonhnienhní꞉tsheras. Wahénron,

⁶ “Né꞉ne tsi tionónhte ne Sinai shititewéskwe, ne Roiá꞉ner onkwahʼNí꞉io washonhkwénhase, ‘Thóh tsi nikarí꞉wes ó꞉nenh kén꞉en tsi ionónhthe shisehwénhteron.

⁷ Thonshasewanáhtak tánon sesewahténhti. Wás tsi tsionhniarónhnion ne Amorʼró꞉nons rahononhontsà꞉ke niahá꞉sewe tánon akwé꞉kon ne tehiokwahtasèhton ne kanahkerásehras—tsi nió꞉re ne Jordan ahonráhkwakon, ne tsi tionhniarónhnions ó꞉ni ne ahonráhkwakonhs, tsi nió꞉re ne entiè꞉ne kanakerahseraké꞉rons, tánon tsi nió꞉re ne Mediterranean kaniatarakʼtóntie—tsi tiohontsá꞉ien ne Canaan niahásewe tánon iasehwató꞉hets ne tsi ionnonhtaʼrónhnions ne Lebanon kwáh tsi nió꞉re ne tkaniatarowá꞉nen Euphrates.

⁸ Akwé꞉kon ne kí꞉ken nohóntsa ne Í꞉i, ne Watiá꞉ner, wakarahrátston tsi entekhéion ne sewasótsheras, Abraham, Isaac, tánon ne Jacob, tánon tsi nienhontwatsirì꞉ne. Wás tánon iaʼsewaná꞉taien.’”

Mahís Washakohiaʼtarahkwenhá꞉ton Ne Ratiriwénhthas

⁹ Mahís washakawénhase nonhkweʼshón꞉a, “Tsi shé꞉kon tsi tionónhte ne Sinai shititewéskwe, waʼkwahró꞉ri, ‘Iáh tatkwéni ne iathahontiaʼtíste nakateriwakè꞉tate tsi akwahenténse shótsi wé꞉so nakeriwà꞉ke.

¹⁰ Ne Roiá꞉ner sewaNí꞉io watsisehwenhtioʼkó꞉wanahte tsi ní꞉ioht ne tsi iotsistohkwarónhnions ne tsi karonhiá꞉te.

¹¹ Aiáwenhs ne Roiá꞉ner, ne Raoní꞉io ne sewahsoʼtsheraokonhkén꞉en, tewenhniaweheʼtsherásen nihiorì꞉wake sénha atsisewenhtioʼkowanáhte tánon atsisewakwahtiésten, tsi kíʼ nihorahrátston!

¹² Ók káti ní꞉ioht tsi haʼkwéni ne iathahontiaʼtíste tsi nihióste noriwaʼsónhas nakakwatàkwenke tsi naʼtesewariʼwáhras?

¹³ Ietsihiaʼtará꞉ko ne ronhteʼnikonrahtó꞉kha, rontinikonhraientátskon, tánon ne ronaterièn꞉tare né nikarihó꞉ten né꞉ne skenʼtarátions non nahontahón꞉ne, tánon ronhnónha enkherihónten naietshihiatenʼnikónhraren.’

¹⁴ Tánon sewariwanónhwes tsi ioiánere ki ne nakaiéren.

¹⁵ Káti iaʼkhénonhke ne ronteʼnikonhratókhas ó꞉ni ne ronaterièn꞉tare ne shakotihenténhse ní꞉se ieʼtsihiataráhkwen né꞉ne skentaraʼtsions nonh nithoné꞉non, tánon wakherihónten naietsihiateriwaʼshónhteraʼse. Otià꞉kes tsi wakerihonʼtónhnion ne nashakonateriwaʼshónteraʼse ne tewenhniaweheʼtsherásen nihionkweʼtáke, otià꞉kes ne énska tewenhniáwe nihionkweʼtáke, otià꞉kes ne wísk-niwáhsen nihionkweʼtákes, otià꞉kes ne oié꞉ri nihionkweʼtákes. Káti ó꞉ni shé꞉kon otià꞉kes ne ratisenhnowá꞉nens wakherihontónhnion ne tsi ratiʼtarahiéntons.

¹⁶ “Ethò꞉ne wakè꞉nahne, ‘Sewatahónsatat ne tekariwakénen tsi nenhiokétote tsi naʼtehónhtere ne tionhkweʼtashón꞉a. Kwáh tkariwaié꞉rik tsi tesewahiató꞉ret ne tekariwakenákston, né꞉ne tó꞉ka ken í꞉se kók tionhkweʼtashón꞉as akénhake tó꞉ka ó꞉ni né꞉ne tihononhontsátes ne skátke sewanákere.

¹⁷ Tó꞉sa sewè꞉nest nahontesewarihwarè꞉kwen tsi tensewahiató꞉rehte; tsi teieʼtsihiatorè꞉tase kwáh akwé꞉kon ne shakaʼnónhkwa akénhake, iáh tewatsterístha ónhka akénhake. Tó꞉sa ónhka ietsitsaʼnísek, asè꞉ken ne sewahiatoreʼtá꞉tshera Rawenní꞉ioke nitewétha. Ne thé꞉nen shótsi ahioriwaní꞉ronhke ne sewariwà꞉ke, akónhake nonhtasewáhaf, tánon í꞉i tetiaʼtó꞉rehte.’

¹⁸ Ethò꞉ne ó꞉ni waʼkwahrihontónhnion noiá꞉sons nahorihoʼténsons nahisewahiò꞉ten.

Ne Ronteriwatórats Kadesh Barnea Nón꞉we Nonhtahón꞉ne

¹⁹ “Kwáh tonahakwá꞉hiere tsi ki nahó꞉ten shonkwahró꞉ri ne Roiá꞉ner Onhkwaní꞉io. Tahiakwaʼténhti ne tsi tionónhte ne Sinai tánon thóh niahákwe ne tehiotenonhianì꞉ton ó꞉ni ioʼteronhkó꞉wa iahonwenhtià꞉tenhke ne tsi nieiothahí꞉non ne tsi tionontahrón꞉nions ne Amorʼró꞉nons raotinakerahserá꞉kon. Shahá꞉kwawe ne Kadeshke Barnea,

^20-21 Kwahró꞉ri, ‘Ó꞉nen wesewáhwe ne tsi ionontahrón꞉nions ne Amorʼró꞉nons raononhontsà꞉kes, ne tsi niká꞉ien ne Roiá꞉ner Onhkwaní꞉io, ne Raotiní꞉io nonkwasoʼtsheraó꞉kons, shonkwáwis. Sewatkátho, thóh ká꞉ien. Wás tánon sewatié꞉nawast tsi ki nihotró꞉ri. Tó꞉sa tesewarihò꞉rok tó꞉ka ó꞉ni ahiesewatiaʼnísheke.’

²² “Ók waskwahiaʼtó꞉renhne tánon wesehwèn꞉ron, ‘Á꞉nion ronhnónkwe ohén꞉ton ieieʼthihiaténiet nahatonhontiatkenʼséhra, ne nahónton nahiontkiró꞉ri ne kwáh iohahí꞉io tsi niahí꞉tewe tánon ohnikanaʼtó꞉tens ne thóh nónhwe.’

²³ “Tsi ní꞉ioht noianeré꞉hake ne nakaiérenhke, sók ki tekeniʼiawénhre nihá꞉ti wakhehiaʼtará꞉ko, shahià꞉ta ne skenʼtarà꞉tions tsi wakhehiaʼtará꞉ko.

²⁴ Tsi tiononhtaʼrónhnions niahón꞉ne tsi nió꞉re ne tsiostéhon kaniataratátie ne Eshcol Ahonráhkwakon tsi wathontawénhrie.

²⁵ Kahiksónhas tonthahiontkihawíten ne nónhwe iahatiʼtshénri, tánon sahiontkiró꞉ri tsi niká꞉ien nonhóntsa ne Roiá꞉ner Onhkwaní꞉io sonhkwawì꞉re tsi kwáh í꞉ken ionhontsí꞉io.

²⁶ “Ók wesewaterahiàthakwe tsi ní꞉ioht tsi rotró꞉ri ne Roiá꞉ner sewaNí꞉io, tánon iáh étho tiesewénonh ne tsi tiohontsá꞉ien.

²⁷ Wesehwathateriwakátatste: ‘Ne Roiá꞉ner shonkwásons. Thontashonhkwahiaʼtínekenhwe ne Egypt né꞉ne kwáh kók iasonhkwahtiaʼkwaríshi rononhà꞉ke ne Amorʼró꞉nons, ne káti naionkhinonhwariaʼkhón꞉nion.

²⁸ Nonhtiéren tsi étho iahiákwe? Hionhkwaterónhni. Ne ronhnónkwe ne ieiethiʼiatoriónhne wahonkhiró꞉ri nétho nonhkweʼshón꞉a tsi sénha ratishátstes ó꞉ni ratinenhiésons tsi ní꞉ioht nonhkwahtsiákes, tánon tsi kanatowánens nónhwe nihatiʼterónhtons ne tekanatanáktons tsi tekensténrotes iéwas ne tsi tsotsikerarónhnions. Kwahiken tsi ratikowá꞉nenskwe thóh nónhwe iahonwathíken!’

²⁹ “Ók ki wakwahró꞉ri, ‘Tó꞉sa ietsitsaʼnísek thí꞉ken ronhnónkwes.

³⁰ Ne Roiá꞉ner sewaNí꞉io entsisewahéntenhse, tánon raónha entsisewaterí꞉iose, kwáh ki tsi ní꞉ioht tsi eʼtsisewá꞉ken tsi nihoié꞉ren ne Egypt

³¹ tánon ne iahonwentsathèn꞉ken nónhwe. Waʼtsisewá꞉ken tsi ní꞉ioht tsi skén꞉nonk watsisewaiaʼtí꞉we ne kénh nónhwe, kwáh ki tsi ní꞉ioht ne kanísera tsi enhoiaʼténhawe ne roiénha.’

³² Iawerohatiénhak tsi nahó꞉ten wá꞉ken, shé꞉kon ki iáh thahontatsisewéthakwe ne Roiá꞉ner,

³³ ethosàne tsi tiókonhte raónha ohénton niehawé꞉non nahtsisewanaktatsénhriaʼse kaʼnónhwe nahisewanáhtaien. Naʼtsisewanahtónhase tsi niehiothahí꞉non, sewahénton íhre tsi nihiotsiro꞉te noʼkarasnéha ók ne tsi niwenhníseres ahé꞉ren nénhne nihiotsikero꞉te.

Ne Roiá꞉ner Waharé꞉waʼte Ne Israel

³⁴ “Ne Roiá꞉ner wahothónhteʼne ne sewariwakaʼténtsheras tánon wahotenakwaʼtsherónhnien, tánon kwáh oriwiʼiohónwe tsi wahatró꞉ri,

³⁵ ‘Iáh ne sahià꞉ta ne kén꞉en kawatsiraksénhskwa tiahontawehià꞉te ne tsi tiohontsí꞉io ne khehiarahratstén꞉ni ne sewasoʼtsheraokonhkén꞉en.

³⁶ Ne kók ne Caleb né꞉ne roiénha ne Jephunneh ienhataweià꞉te. Roteriwatokénhston nakonhà꞉ke, tánon enʼthí꞉ion tánon tsi nienhatwatsì꞉rine tsi nónhwe natehotawénhrie.’

³⁷ Í꞉se wesewarihón꞉ni ne Roiá꞉ner tsi wahakenáhkwase tánon wahèn꞉ron, ‘Akwé꞉kon iáh nonhní꞉se, Mahís, tiashatawehià꞉te tsi tiohontsá꞉ien.

³⁸ Ók tieshatsténseron tsi tehahiaʼtorétha ne iaienahwà꞉se, Joshua né꞉ne roiénha ne Nun. Ne enshakohéntenhse Israerʼró꞉nons tsi enhatiʼié꞉na nonhóntsa.’

³⁹ “Ethò꞉ne ne Roiá꞉ner tewakwé꞉kon tsi washonkwénhase, ‘Ne ietshihienʼokónha, sóhtsi shé꞉kon ken nithotihiónha nahonateriénhtarake tsi natetiaʼtíhen ne tkariwaié꞉ri tánon ne wahétken, iehontawehià꞉te tsi tionhontsá꞉ien—ne ratiksaʼokónhas sewá꞉ton né꞉ne tesewatà꞉tsons enhonwatihié꞉na. Ronónha enkhehionhóntson, tánon ienhatinahkerè꞉ke.

⁴⁰ Ók ki ní꞉se tsónhkwe, thonshasewatʼkahraténi ionhontsiathèn꞉ke nionhshá꞉sewe tsi niehioʼthahí꞉non ne tsi tkanétsker ne Aqaba.’

⁴¹ “Waʼtisewariwaʼsehrá꞉ko, ‘Mahís, ionkwahriwáneren tsi nokwáh ne Roiá꞉ner. Ók ki ó꞉nen ieiakhihiatiaʼtónti, kwáh ki tsi nishonkwahró꞉ri ne Roiá꞉ner Onhkwaní꞉io.’ Ethò꞉ne káti kwáh tiakwahiaʼtà꞉tsions wahakwahtateweiehnénhtaʼne naiakwahterí꞉io, iakwáh nontónhnions watié꞉senhse naiakwanénrenʼte ne tsi tionontaʼrónhnions.

⁴² “Ók ne Roiá꞉ner wahakénhase, ‘Sehiaronhkáhten tó꞉sa ieshakonatiaʼtónti, asè꞉ken iáh thaiakwakwekónhake, tánon káti ne tehontà꞉tsons enhonwatiʼsénhni.’

⁴³ Waʼkwahró꞉ri tsi nahó꞉ten ne Roiá꞉ner wahèn꞉ron, ók iáh tesewatahonshatá꞉ton. Waʼtsisehwatswaténien, tsi nisewataʼtonkwehtowanáhton iahisewanonhtárahne ne tsi tiononhtaʼrónhnion.

⁴⁴ Ethò꞉ne ne Amorʼró꞉nons ne nónhwe nihatinahkerè꞉kwe ne tsi iononhtaʼrónhnion taietsihiatiaʼtónhti tsi ní꞉ioht ne otsinahkontaʼkwáhne iohonwarahrátie. Wahitsísehre tsi nió꞉re ne Hormah tánon wahitsiʼsénhni thóh ne tsi iononhtaʼrónhnions ne Edom.

⁴⁵ Sotkáti raonhà꞉ke ne Roiá꞉ner iathisewahénrehte natsisewahiaʼthakè꞉na, ók iáh ki tetsisewatahonshatá꞉ton iáh ó꞉ni tethetsisewariwasniése.

NʼIsraerʼró꞉nons Wathonthahà꞉kwe Kadesh Tahonʼténhti Né꞉ne Tsi Nió꞉re Ne Arnon Tkaniataratátie.

⁴⁶ “Ethò꞉ne káti, nó꞉nen karí꞉wes Kadesh nónhwe nihiakwenhteróntaʼkwe,