Daniel 8 - Ohiatonhseratokénti

Daniel Wahshakotétshen Né Teiotinaʼkarontón꞉ʼa Rátsinn Tánon Ne Kaiaʼtákerahs

¹ Ne ahsénhaton niiohserá꞉ke ne Belshazzar sihonnontí꞉io, ó꞉ia sonkatétshen.

² Eʼthóʼne tsi wakatkáhto thontaiawénstsi tsi tekanátannhen né Susa né tsi watonhwentsá꞉ien ne Elam í꞉kes, kaniatarákta ne Ulai eh ík꞉tahkwe.

³ Tanon eʼtho kaniatarákta teiotinaʼkarontón꞉ʼa rátsinn wahíken, tékeni tehonà꞉karonte ó꞉ni tehonà꞉kares, skáti sénha tehonà꞉kares ó꞉ni sénha onakará꞉se tsi ní꞉ioht né skáti.

⁴ Wahiiateró꞉roke thi teiotinaʼkarontón꞉ʼa rátsinn ratenaʼkaraienhtaniónʼne tsik nonwéshon niahá꞉re tsi iaʼtewatshéntos, tánon othorè꞉ke, ó꞉ni entiéʼne niahá꞉re. Kwáh iáh thaʼkatsiʼnonió꞉ten thakakwé꞉ni né tahonwátahste, tóka ó꞉ni né aonsaieʼniá꞉kenʼne tsi nokwá ne raoʼshatsténshera. Eh nenhá꞉iere tsi nenthaskáneke né raweriá꞉ne tánon kwáh í꞉ken tsi rotatkowanáhton.

⁵ Tsi náhe kanonhtonniónkwahskwe, ohnahó꞉ten ki kéntonhs, kaiaʼtákerahs rátsinn tsi iaʼtewatshénthos nokwá nontahatáʼkhe, eʼtho niió꞉re tsi ioʼsháste tsi í꞉re akwé꞉kon iáh thiesharátaʼs nonhontsà꞉ke. Énska ionaʼkaraké꞉tote tsi naʼtehatkahrátere.

⁶ Tsi í꞉treʼs ne teiotinaʼkarontón꞉ʼa rátsinn iaʼthatókenhte tsi niká꞉ien ne rí꞉ken atsaktákta í꞉reskwe, nok kwáh tsi nihoʼshatsténhsera iaʼthoráhtate.

⁷ Wahiiaterò꞉roke iahotiaʼtón꞉ti thi teiotinaʼkarontón꞉ʼa rátsinn. Eʼtho niió꞉re tsi ronakhwén꞉en né iaʼthoiaʼtóiaʼke tánon tetsá꞉ron waʼthonaʼkarà꞉riʼse. Né teiotinaʼtkarontón꞉ʼa rátsinn iáh thiaʼtekaié꞉ri tsi nihaʼsátsteʼkwe ne aontahotatennhè꞉on. Waʼthaonhontsó꞉ienʼte ó꞉ni wahoratatiéhshon, tánon iáh ónhka teiotetshénrion naontahonwannhè꞉on.

⁸ Ne kaiaʼtákerahs ó꞉nen sénha waʼhatatkówanahte, ók nó꞉nen né kwáh shihaʼsháste waʼthotenaʼkáriaʼkse. Né tonsaioʼnaktáhkwen kí kaié꞉ri ní꞉kon á꞉se tonsahonaʼkarón꞉taʼne, kenʼk nenʼ né ne thieiotieraʼtá꞉nion.

⁹ Énska kí꞉ken ne kaié꞉ri nikanaʼkará꞉ke, ó꞉ia kenʼniwá꞉ʼa tonsahonaʼkarón꞉taʼne, né raoʼshatsténhsera iakaníharaʼne ne entiè꞉ne, tánon né tsi tkarahkwínekenʼs, ó꞉ni tsi nón꞉we nikarharátston nonhwéntsa.

¹⁰ Kwáh iaʼtekaié꞉ri tsi wakasátsteʼne né iaiaʼkotiaʼtón꞉ti ne Rawenni꞉io raonhatsheraʼó꞉kon ne karonhiaʼkékha ó꞉ni né kwáh tsi ioʼtsistóhkwarónnion tánon ó꞉tiaʼke watiakaʼonhontsó꞉ienhte tánon waʼtiakohskwaʼserónkwahte.

¹¹ Kwáh ó꞉ni wahonenhró꞉thaʼse ne thentiohkwakweʼní꞉io ne karonhiá꞉ke né ne Rawenni꞉io, waʼthátaste naterennaientátsera ó꞉ni tsi konwatiaʼtatsaʼáhtha ne katshé꞉nen né ronwatienʼkwaronniaténnihskwe né Rawenni꞉io, ne niaʼtewenhniserá꞉ke, ó꞉ni kwáh eʼtho tsi naʼhentáksahte ne tsi ionterennaientáhkhwa.

¹² Ne onkwehshón꞉ʼa tsi ní꞉ioht né aterennaienthatserá꞉kon tsi akonwatiaʼtátsaʼahte ne katshé꞉nen nahontienkwarónniate tsi nihotirenʼnaʼòn꞉nen niaʼtewenhniserá꞉ke, kek tho nón꞉we nihsatirihwanérakskwe, tánon nʼetho onà꞉kare ehtà꞉ke wahó꞉ti ne kwáh orihwiioʼón꞉we né karihwiióhston. Ne onà꞉kare kwáh thiewakwé꞉kon tsi ioianerahsténniskwe tsi naʼká꞉iere.

¹³ Eʼthó꞉ne onkwathón꞉teʼne tehniiáhshe tehnironhiaʼkehró꞉non tehotíhthare tánon ne shaiá꞉ta raronhiaʼkehró꞉non wahoriʼwahnóntonhse ne ó꞉ia raronhiaʼkehró꞉nón, “Tó nikarí꞉wes kí꞉ken tsi nahoténshons né weʼnehstánion né kaserénhtakon ne eh naiohtonhátie? Tó nikarí꞉wes ne karihwanerenʼáktshera tenionaktahkwenníheke naterennaientátshera ó꞉ni tsi konwatiaʼtatshaʼáhtha ne katshé꞉nen tsi né iontienkwaronniaʼtáhkhwa ne niaʼtewenhniserá꞉ke? Tó nikarí꞉wes ne karonhiá꞉ke tkentióhkwaien ó꞉ni ne ononhsatokénhti tenhonwanahskwaʼseronkwá꞉take?”

¹⁴ Onkwathón꞉teʼne ne ó꞉ia raronhiaʼkehró꞉non waʼthorihwaserá꞉kwaʼse, “Eʼtho neniohtónhake tsi niió꞉re ne tékeni tewenʼniaweʼehtsheráhsen tánon áhsen tewenʼniáwe niiokárahtsherá꞉ke ó꞉ni niiorhonʼkehtsherá꞉ke, iáh thaonsahontienʼkwaronniáthake. Eʼthó꞉ne né ononhsahtokénhti enskakwatákwen.”

Ne Raronhiaʼkehró꞉non Kabriér Wahaʼnikonhraiéntahte Natetshénhsera

¹⁵ Í꞉i Daniel kateniénthakwe naonkenikonraién꞉taʼne tsi nahò꞉ten kéntonhs neʼtho atetshénsera, ók thontaiawénstsi ónhkaʼk akhén꞉ton waʼtié꞉taʼne, kwáh ne teskaieróntare ne ron꞉kwe.

¹⁶ Onkahonhsón꞉kohte thónatónnionhs í꞉se nakaniatará꞉ti ne Ulai nón nontá꞉we, “Kabriér tieʼnikonhraientáhten ne Daniel tsi nahò꞉ten kéntonhs tsi nahò꞉ten rotkáhthon.”

¹⁷ Ne Kabriér ákta nontà꞉re tánon tiaʼtákta waʼthá꞉taʼne, eʼtho niió꞉re tsi onkateronhiénhten onhontsà꞉ke watiaʼtaién꞉taʼne. Wahakénhahse, “Rón꞉kwe iaʼiénha, saʼnikonhraiéntaʼn tsi nikéntonhs. Thi atetshénsera né iewatihénthos nó꞉nen ienkáhewe tsi ienwatonhontsaríhsi.”

¹⁸ Tsi nikarí꞉wes ró꞉thare, waʼtiaʼtié꞉nenʼne kwáh iewakenikonratónton. Nok iahatié꞉na, tánon tonsaháktahste,

¹⁹ tánon wahén꞉ron, “Konnaʼtón꞉nihs tsi niiá꞉wens né nó꞉nen ne Rawenni꞉io enhotenaʼkwawénratshe. Naʼtetshénsera né iewatihénthos ne tsi ieiótoʼkte.

²⁰ “Ne teiotinaʼkarontón꞉a rátsinn ne wáhtsken né tékeni tehonà꞉karonte ne iakóton ne Media tánon ne Persia raotinakeráhseras.

²¹ Ne kaiaʼtákerahs né ne iakotatiá꞉se né Greece raotikó꞉ra, tánon ne teiotokénhton nénska kowá꞉nen tehonà꞉karonte tsi naʼtehatkahrátere né ne tiotierénhton ronnontí꞉io.

²² Ne kaié꞉ri nikanaʼkará꞉ke ne tetiohnió꞉on ne sontontiérenhte shaʼtewátiaʼke, né iakó꞉ton neʼtho ratinákere tsi kaié꞉ri nikanakerahserà꞉ke tsi ní꞉ioht tsi tenhonnitióhkwiiaʼke tánon iáh ki ehtahatishátsteke tsi ní꞉ioht ne tiotierénhton kanakeráhsera.

²³ “Ne nó꞉nen ákta én꞉we ne iahontókten ne tho tsi kanakerahseraké꞉ron tánon eʼtho niió꞉re tsi rotirihwanerenʼákskon kwáh káti ioterihwíson nahonwatihréwahte, kwáh káti eʼtho tsi nenhokonsaníronke, enronkweʼtaksénhake, enhanikonhràtake ne ronnontí꞉io.

²⁴ Enhaʼshátstenʼne, nok iáh ki raonháʼak raoʼshatsténhsera thakénhake. Tenhatenónianihʼte tsi enshakokaronniánion nonkwehshón꞉ʼa ó꞉ni kwáh enhoianeráhsten tsi nahoʼténshon enhaterihwahténtiaʼte. Enshakoʼwéntho ne ronnonkweʼtowá꞉nenʼs ó꞉ni ne kwáh Rawenni꞉io raonkweʼtaʼshón꞉a.

²⁵ Ne tsi nihatsítsho, raweienáksen kwáh ki enhoterihwahténtiaʼse. Enhatatonníheke ó꞉ni iakotiohkowá꞉nen enshakoʼwéntho ne kwáh iáh oʼthé꞉nen thaontontró꞉ri. Kwáh ó꞉ni enhonenhróthase ne kwáh thaʼshátste ronnontí꞉io, né ne Rawenni꞉io. Rawenni꞉io kiʼ ne enhóhtonte né ne kwáh iaʼtenhoiáʼtihste.

²⁶ Ki atetshénsera tsi nokwá ne orhonʼkè꞉ne ó꞉ni ne oʼkarahsnéha iáh thaón꞉ton naterennaienthatserá꞉kon tsi aonsakowatiaʼtátshaʼahate ne katshé꞉nen tsi né iontienʼkwaronniaʼtáhkhwa, tsi niiesaʼnikonhraientahtén꞉ni eh neniá꞉wenʼne. Nok seriʼwáhseht nón꞉wa, áseʼken eniónnise ne iakáhewe ne eh naiá꞉wenʼne.”

²⁷ Í꞉i Daniel kwáh wakaʼnikonhrókten ó꞉ni tóhka nón꞉ta onkenonhwákten. Eʼthó꞉ne tonsáktaʼne ionsakatahshónteren sontióʼten tsi nihakenhá꞉on ne ronnontí꞉io, nok wakaterihwakwé꞉ki tsi ní꞉ioht tsi wakatetshén꞉en tánon iáh tewá꞉tons naonkeʼnikonhraién꞉taʼne.