Daniel 7 - Ohiatonhseratokénti

Daniel Wahaʼnikonhraiéntahte ne Raotetshénhsera (7.1–12.13) Daniel Wahshakotétshen Ne Kaié꞉ri Nihá꞉ti Karioʼtowá꞉nens

¹ Shontontohseratiérenhte ne eʼtho Belshazzar shahonontíioʼne ne Babylonia, onkatétshen ó꞉ni tsi nahò꞉ten onkatahsatárhase ne tsi niwahsón꞉tes. Waʼkhiá꞉ton ne atetshénhsera, tánon né kí꞉ken ne kahiatónhkwen

² tsi nahò꞉ten waʼkatkátho ne thó ne wahsontátehkwe: Kwáh tsik nonwéhshon nitiowerénha ó꞉ni kwáh í꞉ken tsi ionontowá꞉nens ionontakwarontóntieʼs ne kaniataraʼkehkó꞉wa.

³ Kaié꞉ri nikónti ne kwáh karioʼtowá꞉nens waʼkonteʼskó꞉ko ne kaniataraʼkehkó꞉wa, kwáh iáh thé꞉nen thaʼteskontié꞉rens.

⁴ Ne takáhente eʼtho nikaiaʼtó꞉ten tsi ní꞉ioht ne kèn꞉reks, nok tekanerahóntshontons tsi ní꞉ioht ne à꞉kweks. Tsi nikarí꞉wes tehiká꞉nere, ne onerahóntsha tsi ní꞉ioht ne ónhkak wahakótion. Thí꞉ken karioʼtowá꞉nen waʼhonwaiaʼtakarátate tánon wahoniónnien tahá꞉taʼne tánon ahattakwaríhsi tsi ní꞉ioht ne rón꞉kwe. Tánon eʼthó꞉ne ó꞉nen ón꞉kwe akoʼnikónra tahónnion.

⁵ Ne tekeníhaton karioʼtowá꞉nen ohkwá꞉ri neʼ teshiatié꞉ren ne nó꞉nen í꞉rate. Tsi naʼtehanawirátere áhsen nikanaʼáhtake ioienawá꞉kon, tánon iaʼkonwatewennóntienʼse, “Wà꞉s, seʼwà꞉rak kwáh tsi ní꞉kon enhskwé꞉ni.”

⁶ Tsi nikarí꞉wes wakateró꞉ron, ktikarió꞉tate saiokétohte. Ne nenʼné꞉ʼe teshiatié꞉ren ne takoʼskó꞉wa ne iorahkwarónnion, nok ki ne rahshón꞉ne kaié꞉ri naʼtehanerahóntshonte, tsi ní꞉ioht notsiʼtén꞉ʼa tekanerahónstate, tánon ó꞉ni kaié꞉ri nihonontsístonte kwáh eʼtho nihaiaʼtó꞉ten ne ahoʼshatstenhseraiéntake.

⁷ Tsi nikarí꞉wes wakateró꞉ron, kaieríhaton ne karioʼtowá꞉nens sahatotáhsi kwáh í꞉ken tsi raʼshátste, tiotónʼnek tsi ní꞉ioht tsi nonwátteron. Tsi nikowá꞉nens karístatsi ranoʼtsó꞉ton teshakonénstiaʼks né ieshakotiaʼtónties, tánon teshakohskwaʼserónkwas. Iáh thaʼteshontié꞉ren ne ronátiaʼke karioʼtowá꞉nens, kí꞉ken oié꞉ri naʼtehoná꞉karonte.

⁸ Tsi náhe tekkà꞉nere ne onaʼkareʼshón꞉ʼa, waʼkatkátho kenʼnikanaʼkarásaʼ taiotikétohte aktóntie ne otiaʼkéshon tsi teiotinà꞉karonte. Áhsen nikanaʼkará꞉ke wahrotsi né ne kanaʼkarowá꞉nens. Énska ne kaná꞉kare tekakahratárion tsi ní꞉ioht ne ón꞉kwe ó꞉ni kahshaká꞉ronte kwáh í꞉ken tsi kaná꞉ie tsi naʼteiotaterénhsharon.

Daniel Raotetsénhsera Né Tsi Niká꞉ien Ne Ronnheʼón꞉we

⁹ Tsi náhe tekkà꞉nere, ne ontanitskwahraʼtsherotónnion ne wanitskwahraʼtsheranó꞉rons. Raónha tsi niká꞉ien ne shironnheʼón꞉we ó꞉ni tsi nén꞉we enhrónnheke, sewanitskwahràhtsera tsi nón꞉we nahá꞉tien. Né raoʼtsherónnia eʼtho nikarà꞉ken tsi ní꞉ioht ne ó꞉niehte, tánon ne raonónhkwis ne shá꞉ka tsi ní꞉ioht ne aʼóskon ononwéhron. Ne raonitskwà꞉ra, ne iokahkwenʼtontáhkwen né ótsire, kwáh kenʼtonhkowá꞉nen tsi iotéʼkha.

¹⁰ Ó꞉ni kwáh í꞉ken tsi ioʼtónhkwes iotsirakétote tsi eʼtho nón꞉we nontá꞉we. Kwáh tóka niaʼtewenʼniáwe ehtsheráhsen niionkwè꞉take tehonwarihwahsnié꞉se, tánon meriien niionkwè꞉take raohén꞉ton rónnete. Né teieiaʼtorehtáhkwa tahontáhsawen wahatitsénhaien, tánon waʼthatikhási ne kahiatónhsera.

¹¹ Kwáh thiaʼtewakkahrotá꞉on, shé꞉kon niwakathón꞉te ne eʼtho nikanaʼkará꞉ʼa teiotaterénhsaron. Tsi wakateró꞉ron, ne kaieríhaton karioʼtowá꞉nen wahonwanonwariákhon, tánon ne raoieròn꞉ta tsi tiotéʼkha iaoná꞉ti tánon onterihwáhton.

¹² Ne ronatiaʼkéshon ne karioʼtowá꞉nens wahonwatiʼshatstenhseráhkhwa, nok wahonwatiríhon shé꞉kon kwáh tókenʼk tsi nikarí꞉wes aonsahonnónnheke.

¹³ Tsi ní꞉ioht tsi waʼkatkahthóseron ne tsi niwahsón꞉tes, kwáh né ne ón꞉kwe teskaieróntare tsi wahíken. Tsi nón꞉we ní꞉keʼs nontahawenonhátie teiotshátare ne raiaʼtákta, tánon eʼtho niaháre tsi niká꞉ien ne wahónnise shihrónnhe tánon waʼthonwatenròseron.

¹⁴ Kaʼshatsténhsera tahónion, kakwenienstátshera, ó꞉ni ne kanontiióʼtshera aoʼshatsténhsrera, ne káti kwáh tsi niaʼteienekwénhsake ne ón꞉kwe, tsi niionhsohkó꞉tenʼs, tánon tsi niiewennó꞉tens ne ahonterihwahtsterístaʼse. Ne raoʼshatsténhsera tsi nén꞉we, enkátake, tánon ne raonakeráhsera iáh nonwén꞉ton thiaontókten.

Ne Atetshénhsera Kaʼnikonhraientáhston

¹⁵ Tsi nahoʼténshons wakatkahthóhseron tonkwatonnékten, tánon kwáh í꞉ken tsi waʼtewakeʼnikonrháren.

¹⁶ Raiaʼtákta niahá꞉ke tsi niká꞉ien ne eʼtho rátahkwe tánon wahiriʼwanóntonhse kwáh akwé꞉kon ahakeʼnikonhraientáhten. Kí wahakró꞉ri tsi nikéntonhs.

¹⁷ Wahén꞉ron, “Kí kaié꞉ri nihá꞉ti karioʼtowá꞉nenʼs ne tekarihwakentónhkwen ne kaié꞉ri nikanontiioʼtsherá꞉ke tenthatí꞉taʼne ó꞉ni enhatiʼshátstenʼne ne tsi ionhwentsià꞉te.

¹⁸ Eʼthó꞉ne ne raonkweʼtaʼshón꞉ʼa ne Roʼshatstenhsherowá꞉nen Rawenni꞉io enhatiié꞉na ne kanontiióʼtshera aoʼshatsténhsera ó꞉ni tsi nén꞉we enhonatienawaʼáhston.”

¹⁹ Eʼthó꞉ne sénha ísiʼ nón꞉we naʼkahská꞉neke ne kwáh ahiientérhaʼne nʼetho kaieríhaton karioʼtowá꞉nen, ne kwáh iáh thé꞉nen thaʼteshontié꞉rens ne ronatiaʼkéshon ne tsi ní꞉ioht tsi nonwátteron tsi tehshakonénstiaʼks nen sakoié꞉na ne rátstha ne kwénis naʼkaristó꞉ten tehaeʼtón꞉ton ó꞉ni karístatsi tehanawirón꞉ton eʼthó꞉ne tenhshakohskwaʼserónkwahte.

²⁰ Tánon waʼtewakatonhontsóhse naʼonkaterién꞉taraʼne oh nontié꞉ren tsi oié꞉ri naʼtehoná꞉karonte ne ranontsì꞉ne, tánon shé꞉kon ó꞉ia saiokétohte ó꞉ni wakakwé꞉ni ne áhsen nikanaʼkará꞉ke tón꞉senʼne. Kwáh tekakahratárion ó꞉ni kahshaká꞉ronte ó꞉ni kwáh kaná꞉ie tsi naʼteiotaterénhsaron. Sénha né iotteronʼón꞉we tsi ní꞉ioht notiaʼkéshon.

²¹ Tsi nikarí꞉wes wakateró꞉ron, ne kí꞉ken onákara wahonterí꞉io ne Rawenni꞉io raotióhkwa tánon waʼakoʼsén꞉ni.

²² Nok tsi niká꞉ien ne Ronheʼón꞉we, tánon waharí꞉wenhte, ne tahshakóhnhe ne Roʼshatstenhserowá꞉nen Rawenni꞉io raotióhkwa. Ó꞉nen iaʼkáhewe ne Rawenni꞉io raotióhkwa nahatiié꞉na ne kanontiióʼtshera aoʼshatsténhsera.

²³ Ne kí꞉ken ne tekarihwathé꞉ton taión꞉kon: Thí꞉ken kaieríhaton karioʼtowá꞉nen né ne kaieríhaton nikanontiioʼtsherá꞉ke nonhontsaʼkéhkha ó꞉ni kwáh iáh thé꞉nen thaʼtaonsakaierón꞉taraʼke ne ronatiaʼkéshon rotinontí꞉ios. Kwáh tsi niiohóntsa tsi tenshakonénhstiaʼke ó꞉ni tenshakohskwáseren.

²⁴ Thí oié꞉ri nikanaʼkará꞉ke né ne oié꞉ri nihá꞉ti rotinontí꞉ios ronnónha enthatiniarotárhoke ne tsi kanontiioʼtsherá꞉ien. Eʼthó꞉ne thiháte ronnontí꞉io enshatotáhsi; kwáh ne í꞉ken tsi thiháte tsi ní꞉ioht ne thotihén꞉ton, tánon enhshakoʼshén꞉ni ne áhsen nikanontíioʼtsherá꞉ke.

²⁵ Kwáh enhoriwá꞉roʼse ne Roʼshatstenhserowá꞉nen Rawenni꞉io ó꞉ni tenhshakoʼnikonhkáriakte ne Rawenni꞉io raonkweʼtaʼshón꞉ʼa. Enhateʼniénten ne tahatá꞉ton tsi nikaianerenhseró꞉ten ne raotirihwiiohstónhtshera ó꞉ni tsi ní꞉ioht tsi tehontenónwerons, tánon ne Rawenni꞉io raonkweʼtaʼshón꞉a raónha raoʼshatsténhsera enthotiʼniarotárhoke né ne áhsen shaʼtsewahsén꞉non niiohserá꞉ke nenkarihwéshon.

²⁶ Eʼthó꞉ne ne karonhiá꞉ke tethatiiaʼtorehtáhkhwa enhóntien tsi enhatirí꞉wenhte, enhonwákhwa ne raoʼshatsténhsera, ó꞉ni kwáh ieiokontáhkwen tsi enhonwá꞉tonʼte.

²⁷ Ne kaʼshatsténhseras ó꞉ni ne iorihowá꞉nens kwáh tsi niaʼtekanakerahserá꞉kes né tsiionhontsá꞉te ne entiontá꞉ton ne Roʼshatstenhserowá꞉nen Rawenni꞉io raonkweʼtaʼshón꞉a. Raotinontiióʼtshera raoʼshatsténhsera iáh nonwén꞉ton thiaontókten, tánon ratikwé꞉kon ne ratikoráhshons ne tsi ionhontsá꞉te enhonwarí꞉wawaʼse ó꞉ni enhonwawén꞉narahkwe.

²⁸ Né kí né tsi ieió꞉toʼkte norihwaʼshón꞉a. Eʼtho niió꞉re tsi ónkteronʼne kwáh watkatskennennaʼtón꞉ten, ó꞉ni kwáh orihwakwé꞉kon akonhá꞉ke waʼkateweiénton.