Daniel 6 - Ohiatonhseratokénti

Daniel Iehaiá꞉ti Tsi Tionatshónwaien Ne Kèn꞉riʼks

¹ Ne shahonontí꞉ioʼne, ne Darius iaʼthoriwaién꞉taʼse énska tewenʼniáwe tánon tewáhsen, tsi ní꞉ioht tsi waʼthenhnárihte tsi niwatenáhskwa ne raonakeráhsera, énska ó꞉ni tewenʼniáwe tánon tewáhsen niionkwè꞉take wahshakorihónten ne ahontkorahserón꞉ni ne raonakerahserá꞉kon.

² Tánon ó꞉ni iahawénhtate, Daniel tánon ó꞉ia tehniiáhshe wahshakoiaʼtará꞉ko ne ahonwanatenʼnikonhrahsontérhahse ne ratikoráhshon ó꞉ni ne ahontenʼnikónraren ne ronnontí꞉io raorihwaʼshón꞉ʼa.

³ Daniel kenʼk nikarí꞉wes sók wahrènehste tsi sénha raónha raioʼtenhserí꞉io tsi ní꞉ioht né ronatiaʼkèshon ne ronttókha tánon ne ratikoráhshon. Né tsi sénha raónha rateʼnikonhrattókha, ne ronnontí꞉io waʼthaiaʼtó꞉rehte raónha ohén꞉ton iaʼtahótahste kwáh tsi nihonontiióʼtshera.

⁴ Eʼthó꞉ne ne ronatiaʼkéhshon né ronttókhas tánon né ratikoráhshon wahonteʼniénten ne ahonwarihwatshénriaʼse ne Daniel tsi ní꞉ioht tsi roterihwahtentiatonhátie tsi kanontiioʼtsherá꞉ien, nok iáh tehotirihwahtshénrion, ne tsi nihorihwató꞉ken ne Daniel ó꞉ni iáh thahó꞉ten thaʼtehoterientawénrie kehs ne ahoʼnikonhráhton.

⁵ Eʼthó꞉ne waʼthontaténhase kí ronnón꞉kwe, “Iáh thahóten thaeʼtewatshén꞉ri ne ahtshitewarihwárho ne Daniel, kwáh né khók enkakwé꞉ni ne tahaterienʼtawénrie raohén꞉ton ne ronnontí꞉iowe tsi nihotienawáhston ne raorihwiiohstóntshera.”

⁶ Sók kiʼ atahsehtòn꞉ke tsi wahonterihwahserón꞉ni, ronnontí꞉io ahonwatkenʼsé꞉rah, tánon shiahónnewe wahonní꞉ron, “Ó Sanontí꞉io Darius aiónnise ahsónnheke!

⁷ Iakwakwé꞉kon ne ionkwaióʼte ne sanontiioʼtsherá꞉kon, né ne shakonatenʼnikonhrahsonterá꞉nis, né ratikoráhshon, tánon né ieshonwatiiátanonhne, ó꞉ni né ronatiaʼkéhshon ronaterihónton, iaʼtionkwarihwaién꞉taʼse, Sanontí꞉io teiotonhontsóhon né ahshiatonhserón꞉ni tánon kwáh aiorihwahnirónhake. Kwáh í꞉tsaʼk né ne áhsen niwáhsen niwenhniserá꞉ke kwáh tóhsa ónhka aiakoianerenhseraiéntake né thé꞉nen ne aionterénnaien tsi nokwá ne thikaniiohserá꞉te non naontá꞉we tókaʼ ó꞉ni ne onkwehshón꞉ʼa nokwá naontá꞉we, nok kwak nek khók né sanontiióhne nokwá꞉ti naontá꞉we. Onk ónhka entsontèwahte kí kaianerénhsera, tsi tionatshónwaien ne kèn꞉reks ieniontatiaʼtón꞉ti.

⁸ Kí shiatonhserón꞉ni ne karihwenhtáhtshera O Sanontí꞉io, tánon satatshén꞉naren. Eʼtho naioianerenhserahnirón꞉hake né ne iáh thaʼtetewateríhsions tsi ní꞉ioht ne otiaʼkéshon ne Medes tánon ne Persiaró꞉nons raotiianerénhsera iáh ki thaʼtaonté꞉ni.”

⁹ Sók kí ne ronnontí꞉io wahatatshén꞉naren ne kaianerénhsera.

¹⁰ Ó꞉nen káti shahotókenhse ne Daniel ne ronnontí꞉io tsi rotatshén꞉nare ne kaianerénhsera ne kiʼk shá꞉ka ionsaharáthen tsi thanonhwéhtstha nionsáre, tánon ne ionahstonhkwakáronte kwáh teiotitokénhton ne Jerusalem. Eʼtho nón꞉we, tió꞉konte tsi nihaiérhakwe, tenhatentshó꞉ten onahstonhkwákta ó꞉ni ienhaterénnaien ne Rawenniió꞉ke, né ne áhsen nienká꞉iente ne sewenhnísera.

¹¹ Shahonwá꞉ken ne ronwáhshons ne Daniel tsi iehoterénnaien ne Rawenniió꞉ke,

¹² kwáh ratikwé꞉kon wahontenrò꞉shen Ronontiió꞉ke niahónne né ahonwarihwárho ne Daniel. Wahonnì꞉ron, “Sanontí꞉io, satatshén꞉nare ne kaianerénhsera né ne ahsen niwáhsen niwenhniserá꞉ke ne ónhka ne thé꞉nen ienieriʼwanónton ne Rawenniió꞉ke, tókaʼ ó꞉ni onkwéʼne, tókaʼ iáh ne isé꞉ke nonkwa꞉ti thaieriʼwanón꞉ton, tsi tkontí꞉teron ne kèn꞉reks ieniontatiaʼtón꞉ti.” Ne ronnontí꞉io waʼtharihwaserá꞉ko, “Hen, ne eʼtho kwáh í꞉ken tsi ioianerenhserahní꞉ron, né ne Medes tánon ne Persiaró꞉nons, raotiianerénhsera, né ne iáh thaʼtaonsakaténionke.”

¹³ Eʼthó꞉ne wahonwahró꞉ri ne ronnontí꞉io, “Daniel tsi niká꞉ien ne thonwarekwáhton ne Judah, iáh tehiakweniénstha Sanontí꞉io iáh ó꞉ni teharihwakweniénhstha ne saianerenhseríhson. Kwáh iorihwató꞉ken ne áhsen nienwá꞉teratste raterénnaiens né sewénhnisera.”

¹⁴ Ne shaharihwà꞉ronke né ronnontí꞉io kwáh í꞉ken tsi tahaʼnikòn꞉renʼne, wahateʼnikonhrí꞉sake oh nahá꞉iere nahonónhstate ne Daniel, kwak thiaʼtewatshéntho tsi né ranonhtonniónkwahs.

¹⁵ Ók ne ronwáhshons ne Daniel ronontiió꞉ke nionsahón꞉ne sahonwehiahráhkwen né ronnontí꞉io, “Tsi nihotiianerenhserò꞉tenʼs ne Medes tánon ne Persiaró꞉nons wá꞉ton tsi nahoʼténshon ne kaianerénhsera ne ronnontí꞉io rohsaʼánion iáh thahó꞉ten thataonsakaténionʼke.”

¹⁶ Sók kí ne ronnontí꞉io washakónhaʼne ne raonnhaʼtsheraʼshón꞉a, iehonwaiaʼténhawh ne Daniel tánon tsi tkontì꞉teron né kèn꞉reks iehonwaiaʼtón꞉ti. Nok wahawénhase ne Daniel, “Aiá꞉wens né Saní꞉io, tsi niká꞉ien ne tsi nisarihwató꞉ken tsi ehtíoʼténhse, ne aonsahiaʼniákenhte.”

¹⁷ Onén꞉ia wahatinóntekʼte tsi ionattsónhwaien né kèn꞉reks, tánon ne ronnontí꞉io ne wahatsíkwenhte né raonontiióʼtshera aoteʼnienténhtshera, nok ó꞉ni né raonateʼnienténhtshera né ratihsennowá꞉nenʼs raonkweʼtaʼshón꞉a, né aorì꞉wa eʼtho nahá꞉iere né ne tóhsa ónhka aonsahonwaʼniáʼkenhte ne Daniel.

¹⁸ Eʼthó꞉ne né ronnontí꞉io tsi tkanonhsowá꞉nen nionsáre nok ahsontakwé꞉kon iáh tewá꞉tons ne ahó꞉taʼwe, kwáh iáh thé꞉nen tehawé꞉kon iáh ó꞉ni thé꞉nen tehotenʼnikonhró꞉ri.

¹⁹ Kwáh né khók shahéntenʼne né ronnontí꞉io wahatkétsko tánon waʼthosteríhen tsi tiohshónwaien wárehte.

²⁰ Shiahárawe né eʼtho, kwáh thotónʼne iahoná꞉ton, “Daniel, raonátshera ne rónhnheʼón꞉we Rawenni꞉io! Átskwi ne Rawenni꞉io ne iorihwató꞉ken thioʼténhse, wahoteʼsennaién꞉taʼne ken ne ahiaiaʼtanónhstate tsi nón꞉we nikónnheʼs né kèn꞉reks?”

²¹ Daniel tontaharihwaserá꞉ko, “Aiá꞉wens Sanontí꞉io aiónniseʼ ahsónhnheke!

²² Ne Rawenni꞉io né rihsénnaiens, tahotó꞉ri né raronhiaʼkehró꞉non né ahshakóhskweke né kèn꞉reks né ne tóhsa akatkaréwahte. Né aorì꞉wa eʼtho nahá꞉iere né tsi roterién꞉tare tsi iáh tewakennhìkon tánon ó꞉ni iáh thé꞉nen tekonʼnikonrhaʼtén꞉ni, Sanóntí꞉io.”

²³ Iáh thiaierihwáhewe tsi nahatshennón꞉ni ne ronnontí꞉io tánon washakóhnhaʼne né raohnhaʼtsheraʼó꞉kon né aonsahonwaiaʼtitáhko ne Daniel né ohshónwakon. Sók kíʼ sahonwaiaʼtitáhko, tánon wahontkáhtho tsi kwáh iáh thé꞉nen tehotkarewáhton, né tsi Rawenni꞉io roniahé꞉sen.

²⁴ Eʼthó꞉ne kátiʼ ne ronnontí꞉io wahaténhnhaʼne ahonwatiié꞉na ratikwé꞉kon né ronwarihwárhoskwe né Daniel, ó꞉ni wahshakaónnien né iahonwatiiaʼtón꞉ti, thiahatikwé꞉kon ne rotiniá꞉khon ó꞉ni ne shakotiioʼokón꞉ʼa, né tsi tionatshónwaien ne kèn꞉reks. Né ohén꞉ton shiahón꞉newe ne tsi tkaʼnónhkwaien, okná꞉ʼa ne kèn꞉reks iaʼakonatiaʼtón꞉ti ó꞉ni iaʼakonatiaʼtahnéhkwane.

²⁵ Shonteweienén꞉taʼne né ronnontí꞉io iashakohiá꞉tonʼse kwáh tsi niaʼteiakaʼonhontsà꞉ke ne onkwehshón꞉ʼa, tsi naienekwenhsó꞉ten, ó꞉ni tsi naiewennoʼténhake ne onhwentsià꞉ke: “Wé꞉so taontnaʼné꞉ta skén꞉nen né tsonhà꞉ke!

²⁶ Waʼtianerenhserón꞉ni kwáh tsik nonwéhshon né akeʼshatsténshera iekaníharaʼs tánon né tiaʼtakweʼní꞉io kwáh ioterihwí꞉son tsi niaʼteionkwè꞉take ahonwakwenién꞉stake ó꞉ni tahonwarenhsarónhsheke ne Daniel Raoʼní꞉io. Raónha ne Rawenni꞉io né ronhnheʼónʼwe, iáh ó꞉ni nonwén꞉ton thiaontókten. Iáh nonhka nonwén꞉ton thaiekwé꞉ni né aiónhtonʼte né raonakeráhsera, tánon iáh ó꞉ni nonwén꞉ton ne raoʼshatsténhsera thiaonʼtókten.

²⁷ Shakonónhstats tánon shakoʼniakénhtha; né roióʼtens né iorihwanehrákwa tánon né iorihwanehrakwahténions, né karonhià꞉ke ó꞉ni onhwentsià꞉ke. Sahoniá꞉kenhte ne Daniel, né kèn꞉reks ahonwaiaʼtaratsónkwen.”

²⁸ Né Daniel kwáh í꞉ken tsi kaʼshatstenhserowá꞉nen tsi ní꞉ioht tsi roterihóntahkwe tsi nikarí꞉wes rotinontiióhne ne Darius tanon ne Cyrus ne Persiaró꞉non.