Daniel 5 - Ohiatonhseratokénti

Belshazzar Wahatennióten

¹ Énska á꞉re nen né꞉ʼe Belshazzar shihonontí꞉io oʼkarahsnéha wahshakohónkaron né tewenʼniaweʼehtsheráhshen nihá꞉ti ratihsennowá꞉nenʼs, né ne kowá꞉nen wahontekhwá꞉ren, tánon ó꞉ni ratikwé꞉kon otsì꞉tsa wahatihnekí꞉ra.

² Tsi náhe rotihnekí꞉ren, Belshazzar wahshakóhnhaʼne naontahatíhawe nohwistanó꞉rons tánon né kahwistarà꞉kens katsheʼshón꞉ʼa, né ne roʼnikénhen Nebuchadnezzar thonontí꞉iohkwe ne thóha ne ononhsatokenhtiʼkowáhne ne Jerusalem. Né aorì꞉wa ne Ronnontí꞉io iahá꞉ko né ne raónha tánon ne raonkweʼtaʼshón꞉ʼa ne ratihsennowá꞉nens, ó꞉ni ne raónha rotiniáʼkhon, tánon ne raohskareʼshón꞉ʼa naón꞉ton ne áʼhontste nahatihnekí꞉raʼte.

³ Kwáh òksaʼk tahatí꞉ionʼte ne ohwistanó꞉ron katstsheʼshón꞉ʼa ó꞉ni nakehraʼshón꞉ʼa, tánon né wáhontste tsi wahatihnekí꞉ra notsì꞉tsa.

⁴ Tánon waʼkonwatihsénnaien ne kaiaʼtonniʼshón꞉ʼa nohwistanó꞉ron ionniá꞉ton, kahwistarà꞉ken, kahwistárhon otsí꞉nekwahr karistá꞉tsi, ó꞉iente, tánon ne onén꞉ia.

⁵ Thontaiawénstsi osnónhsa waʼokè꞉tohte ó꞉ni tontáhsawen tsi kanawatstárhon nahshonhtà꞉ke onthiá꞉ton, tsi nón꞉we naʼteiaʼóien ne kahahseró꞉ton kwáh í꞉ken tsi teiohswáthe. Tánon ne ronnontí꞉io wahatkáhtho tsi onthiá꞉ton.

⁶ Nó꞉nen ne ronnontí꞉io shahatkáhtho waʼthatskennentónten ó꞉ni kwáh í꞉ken tsi wahoteronhiénhten kwáh waʼthosiníshonkwe.

⁷ Waʼthohénrehte né ónhkaʼk aontahonwatiiaʼténhawe ne rontaʼénnarahs, niaʼtehotirì꞉wake, ronttsistohkwatkénse, né shontahontáweiaʼte, né ronnontí꞉io wahshakawénhahse, “Nónhka eniekwé꞉ni naiewennahnò꞉ten ki nahò꞉ten kahiá꞉ton ó꞉ni nenionkró꞉ri nahò꞉ten kéntonhs né enshontsherònniaʼte né kwáh kanó꞉ron waʼkóhses né ne arihwawaʼkonhnéha niwahsohkó꞉ten, enhaníhtiake nohwistanó꞉ron né ne kakwenienstáhtshera, tánon ó꞉ni ahsénhaton nienhátake tsi kanontiioʼtsherá꞉ien tsi enhoterihóntake.”

⁸ Eʼthó꞉ne ne kanontiióʼtshera aonkweʼtaʼshón꞉ʼa ne ronteʼnikonhrattókhaʼs ahshonhtákta niahónne, iáh ónhka tehotikwénion nahotiwennahnó꞉take tánon ó꞉ni nahonwahró꞉rike ne ronnontí꞉io tsi nahò꞉ten kéntonhs.

⁹ Wahoteronhiénhten ne Ronnontí꞉io Belshazzar ó꞉nen sénha waʼthatskennentónten, tánon ne raonkweʼtaʼshón꞉ʼa ne ratihsennowá꞉nens iáh thé꞉nen teshonaterién꞉tare onhnaonsahatí꞉iere.

¹⁰ Ne ronnontí꞉io roʼnisténha waʼakothón꞉teʼne tsi nihonaterakarehráhston ne ronnontí꞉io tánon ne raonkweʼtaʼshón꞉ʼa sók iaontáweiaʼte tsi tkakhwáhere. Waʼéron, “Aiónnise Sanontí꞉io ahsónhnheke! Ahsathontátsheke tóhsa sateronhiénhten ó꞉ni eʼtho niió꞉re tsi tahsatskennentónten.

¹¹ Shaiá꞉ta rón꞉kwe rén꞉teron ne sanakerahserá꞉kon nikwé꞉kon ne roʼnikonhratokénhti ne Roiaʼtatokénhti Rawenni꞉io. Shihonontí꞉io né iaʼníha, ki rón꞉kwe wahrotáhsi tsi nikéntonhs né kaiatorehtahtsherí꞉io, nattokhátshera, kaʼnikonhraientáhtshera tsi ní꞉ioht né raotíʼnikonhraientáhtshera ne raotiní꞉ioʼs. Tánon ó꞉ni ne ronontíiohkwe Nebuchadnezzar, iaʼníha, raónha ohén꞉ton iaʼthótahste né ronwanathiatonhseratkénse, rontenʼénnarahs, tehontierónnions, tánon ne ronttsistohkwakkénse.

¹² Kwáh shónhtek thí꞉io tsi nihateʼnikonhrattókha ó꞉ni roʼnikonhrowá꞉nen tánon rorennháon nahaʼnikonhraiéntahte natetshénseras, tahaniʼtonníahsi ó꞉ni nahaʼnikonraiéntahte ne ioteriʼwahséhton; káti iaʼtshínonk ki rón꞉kwe Daniel, né ne ronnontí꞉io rohsenná꞉wi ne Belteshazzar, tánon raónha akwé꞉kon enhiahró꞉ri nahò꞉ten thi kahiá꞉ton nahshonhtà꞉ke ó꞉ni tsi ni kéntonhs.”

Daniel Wahaʼnikonhraiéntahte Nahò꞉ten Kahiá꞉ton

¹³ Kwáh óksaʼk né Daniel tahonwaiaʼténhawe raohén꞉ton ne ronnontí꞉io, tánon né ronnontí꞉io wahoriʼwanóntonhse, “Í꞉seʼken né Daniel né eʼtho nón꞉we Judah ne Sitaeró꞉non thonwennanakerakwáhton tsi niká꞉ien né rakeʼníha ronnontí꞉iohkwe ken tehshakoiaʼténha?

¹⁴ Wakahrónken né raoʼnikòn꞉ra ne Rotokénhti Rawenni꞉io tsi senikwé꞉kon tánon ó꞉ni sarennhà꞉onʼ ó꞉ni íhshawe ne attokháhtshera ó꞉ni ne kaʼnikonhraientáhtshera.

¹⁵ Né shakonatenʼnikonhráwihs ó꞉ni ne niaʼtehotirì꞉wake iehonwatihnonkón꞉ne ne ahatiwennahnó꞉ten ki nahò꞉ten kahiá꞉ton tánon aionkhihró꞉ri nahò꞉ten kéntonhs, ók iáh tehotikwénion ne iahotíhe nahò꞉ten kéntonhs.

¹⁶ Ó꞉nen wakerihwá꞉roke tsi skwénieʼs ne ahserihotáhsi tsi nikéntonhs ó꞉ni ne ahsheʼnikonhraiéntahten ne ioteriʼwahséhton. Tó꞉kaʼ enhskwé꞉ni nahsewennahnó꞉ten ki kahiá꞉ton tánon enhsekró꞉ri nahò꞉ten kéntonhs, ne enhshié꞉na ne kwáh è꞉neken tiótte ne kakwenienhsthátshera tánon ne ensehsatsherónniaʼte ne waʼkóhses ne arihwawaʼkonhnéha niwahsohkó꞉ten, ohwistanó꞉ron enhsaníhtiake, tánon ne tsi kanakerahserá꞉ien ahsénhaton niénhstake tsi ensaterihóntake.”

¹⁷ Daniel waʼtharihwaʼserá꞉ko, “Í꞉se satateweienʼtónhahs ne sakweniáhtshera tókaʼ ó꞉ni ónhkaʼk akò꞉ren shé꞉ion, ók enkonwennahnóthahse Sanontí꞉ioʼ tsi nahò꞉ten kahiá꞉ton tánon tsi nikéntonhs.

¹⁸ “Ne Roʼshatstenhserowá꞉nen Rawenni꞉io taháon ne iaʼníha Nebuchadnezzar ki kanakeráhsera tshiewakwé꞉kon naoʼshatsténhsera ó꞉ni ne kaiaʼtanehrakwáhtshera tánon ne nahahsennowánnha.

¹⁹ Eʼtho niió꞉re tsi ronkweʼtowanén꞉nen kwáh tsi niaʼteiakaonhwentsià꞉ke nón꞉kwe, tánon tsi niaʼtehatinekwénhsake ó꞉ni tsi naiewennoʼténhake kwáh ronwatshániskwe ó꞉ni rotiiaʼtontawè꞉ton. Enhshakononwariákon tsik ónhka nénrehre nashakóhtonʼte. Enshakonónhstate tsi nenthanón꞉weʼne. Enshakokwénienste tókaʼ ó꞉ni enshakotéhaʼte tsi nénrehre.

²⁰ Oʼk ne tsi wahatatón꞉niʼne, wahatenontsistáksaʼte, ó꞉ni wahateʼniakátstate, Rawenni꞉io eʼtho nahá꞉sa, tsi nontahaiá꞉tenʼne ne raorenhsarónhtshera kwáh ehk thónhton.

²¹ Rawenni꞉io wahorékwahte tsi nón꞉we nihatí꞉teron ne onkweʼshón꞉a, tánon eʼtho nahoʼnikonhró꞉tenʼne tsi ní꞉ioht ne kontírio. Skátne wahóntien ne ratirhakonhró꞉non ne tewahónhtes, ó꞉ni eʼtho ní꞉ioht tsi wahahóntake tsi ní꞉ioht ne tiohnhónskwaron teiotiná꞉kares, ó꞉ni átste raonwéhstakwe tánon tsi iáh thé꞉nen thahoiatanónhstate tsi ne ahoʼáweiaste tsi nón꞉we nihanonhwétsthakwe. Tsi niió꞉re iahoʼnikonhraién꞉taʼne tsi né seʼ ne Roʼshatstenhserowá꞉nen Rawenni꞉io tehshakoniarotárhon ne onkweʼshón꞉a ne tsi nonwéhshon niʼienakerénion tánon rokwénion ne aontahshakáon ne kanontiióʼtsheras ne kwáh tsik ónhka nen shakohiaʼtará꞉ko.

²² “Í꞉se ne iaièn꞉ʼa, tanon orihwakwé꞉kon sateriéntarahkwe. Nok iáh ehtà꞉ke tesatatón꞉ni.

²³ Wahsatathará꞉tate tsi nonkwá꞉ti ne Roiá꞉ner Rawenni꞉io ne karonhiá꞉ke thén꞉teron tánon táhsionʼte ne kátshe ó꞉ni ne akehraʼshón꞉a ne thotíha ne raononhsatokenhtiʼkowáhne. Í꞉se tánon ne sonkweʼtaʼshón꞉ʼa ne ratihsennowá꞉nens, sewaniákhons, sahskareʼó꞉kon, ne wésewatste tsi wesewahnekí꞉ra ne notsì꞉tsa ó꞉ni wesewahsénnaien ne kaiaʼtón꞉ni ne ionniá꞉ton ne ohwistanó꞉ron, kahwistará꞉ken, ne kahwistárhon ne otsì꞉nekwar nikaristó꞉ten, karístatsi, ó꞉iente, tánon ne onén꞉ia—kaiaʼtón꞉nis ne iáh tekontí꞉ken tánon iáh teionathón꞉te iáh ó꞉ni thé꞉nen teionaterién꞉tare. Nok iáh tehtskweniénhston ne Rawenni꞉io tsi niká꞉ien thoniarotárhon ne tsi sónnhe ó꞉ni tsi satónrie ó꞉ni kwáh tsi ní꞉ioht tsi satoriá꞉nerons.

²⁴ Ne katiʼ aorì꞉wa né Rawenni꞉io thotenniéhton ki osnónhsa ne akahiatónhake kí owennaʼshón꞉ʼa.

²⁵ “Ne kí tsi nahò꞉ten kahiatónhkwen: ‘Ionhshétstha, ionhshétstha, tsi niiókste, tekakhahsiónkwen.’

²⁶ Tánon né ki tsi nikéntonhs: ionhshétstha, Rawenni꞉io rohshé꞉ton tsi niwenhniserá꞉ke enkátake né sanakeráhsera, nok ki iahesatóktahse.

²⁷ Tsi niiókste, Rawenni꞉io wahiakonʼtsherihá꞉ren, tánon wahatshén꞉ri iáh tshieʼkaié꞉ri tsi nisaiaʼtákste.

²⁸ Tekakhahsiónkwen, Rawenni꞉io waʼthakháhsi ne sanakeráhsera, tánon Medes ó꞉ni ne Persiaró꞉nons tahshaká꞉on.”

²⁹ Kwáh óʼksaʼk ne Belshazzar wahshakóhnhaʼne ne raonhaʼtsheraʼó꞉kon né ne kwáh è꞉neken tiiótte ne kakwenienstáhtshera tsi ahonwakwénienste ne Daniel né ahonwaiá꞉tawiʼte ne arihwawaʼkonhnéha waʼkóhses ó꞉ni né ahonwénhtiake ohwistanó꞉ron oronkwáhsa ó꞉ni ahsénhaton niaʼthótahste tsi wahorihónten ne tsi kanakerahserá꞉ien.

³⁰ Kwáh né shaoʼkaráhtshera ne Belshazzar, ronnontí꞉io ne Babylonia, wahonwáhsehte;

³¹ tánon ne Darius né ne Mede, ó꞉nen iá꞉iaʼk niwáhsen tékeni shaʼtehaohseriiá꞉kon, wahatatiatakweʼní꞉iohste tsi kanontiioʼtsherá꞉ien.