Daniel 12 - Ohiatonhseratokénti

Tsi Nienkáhewe Ne Ienwatókten

¹ Ne raronhiaʼkehró꞉non ne rotsheronniá꞉ton ne kwáh kaniaʼtarí꞉io wahén꞉ron, “Tsi nienkáhewe ne kwáh thonwakowá꞉nen raronhiaʼkehró꞉non Wíshe, tsi niká꞉ien ne shakoʼnikón꞉rare ne sonkwè꞉ta enhatotáhsi. Thó ne ó꞉nen ienkáhewe ne taionʼnikonrhá꞉ren, iáh nonwén꞉ton eʼtho tetiawén꞉en tsi náhe tiakonakerá꞉ton ne onkwehshón꞉ʼa. Né nó꞉nen ienkáhewe, ratikwé꞉kon ne sentióhkwa tsi nihá꞉ti enhatihsénnarake ne Rawenni꞉io raohiatonhserá꞉kon enhatiʼniá꞉kenʼne.

² Ronatiohkowá꞉nen ne ó꞉nen ronenhé꞉ion shé꞉kon enshontónnhete: ó꞉tiaʼke tsi nén꞉we enhonatonnhárake, ó꞉tiaʼke tsi né nén꞉we enhonatehénʼen.

³ Tánon tsi nihá꞉ti ne ronteʼnikonhrattókhas tenhotiswátheʼne tsi ní꞉ioht ne tsi karonhiá꞉te, tánon tsi nihá꞉ti ne shakotirihonnién꞉ni ne onkwehshón꞉ʼa ne tkarihwaié꞉ri, kwáh tsi nén꞉we tenhotihswátheke tsi ní꞉ioht ne tsi iotsistohkwarónnion.”

⁴ Wahakénhase, “Ó꞉nen ki, Daniel, sasennhó꞉ton neʼtho kahiatónhsera tánon senerahkenʼtó꞉ren tsi niió꞉re iensewatonwentsaríhsi. Tsi neniohtonhátie, iakotiohkowá꞉nen ne raotiioʼténhsera enkaiésha ronteʼnién꞉tha ne ahotiʼnikonhraién꞉taʼne tsi neniohtonhátie.”

⁵ Eʼthó꞉ne wakhé꞉ken tehniiáhse tehnironhiaʼkehró꞉non tehotiniá꞉tara.

⁶ Shaiá꞉ta wahoriʼwanóntonhse ne ó꞉ia raronhiaʼkehró꞉non tsi niká꞉ien ne ostónha í꞉si niió꞉re sénha iérate ne kaniatarákta, “Thoʼnikarí꞉wes ienkáhewe ki iorihwanehrakwahténions watotahshiónkwahs ne iaontókten?”

⁷ Ne raronhiaʼkehró꞉non tetsá꞉ron tsi wahanentshakétsko tánon karonhiá꞉ke niahaié꞉raʼte tánon kwáh orihwiioʼón꞉we waharháratste eʼtho raosén꞉nakon ne ronhnheʼón꞉we Rawenni꞉io. Onkathón꞉teʼne tsi wahén꞉ron, “Áhsen niiohserá꞉ke tánon tsiaʼtewasén꞉nen. Né nó꞉nen ienwatókten tsi nihonwatironhiakéntha ne Rawenni꞉io raotióhkwa, kwáh kiʼ orihwakwé꞉kon ó꞉nenk tsi tho neniá꞉wenʼne.”

⁸ Onkathón꞉teʼne tsi nahò꞉ten wahén꞉ron, nok iáh tewakeʼnikonhraientá꞉on, sók kiʼ waʼkeriʼwanónton, “Nok rawénhshe, oh ní꞉ioht ne orihwakwé꞉kon tsi ienwatókten?”

⁹ Waʼtharihwaʼseráko, “Daniel ó꞉nenk tsi aʼéren énhsehte, áseʼken ki owennaʼshón꞉ʼa ó꞉nenk tsi enkariʼwahséhtonke tánon enwasehtánionke tsi niió꞉re ienwatókten.

¹⁰ Iakotiohkowá꞉nen ensehshakoʼnikonhrahserón꞉ni. Tsi nihá꞉ti ne rotirihwané꞉ren iáh thahotiʼnikonhraién꞉taʼne nok ienhontahshónteren ne raotirihwanerenʼaktsherá꞉kon; né khók ne ronteʼnikonhrattókha enhotiʼnikonhraién꞉taʼne.

¹¹ “Nó꞉nen ienká꞉hewe ne tenkatáhston naterennaientahsherá꞉kon tsi konwatiaʼtatshaʼáhta ne katshé꞉nen ó꞉ni tho ní꞉ioht tsi ronwahsénnaienhskwe ne Rawenni꞉io ne tsi entewatáhsawen ne kwáh teiotenonhianíhton karihwahétken, énska niwenʼniaweʼehtsheráhsen tánon tékeni tewenʼniáwe niwenhniserá꞉ke enwatóheste.

¹² Iakotáhska tsi niiá꞉kon iehotikontáhkwen rotirihwató꞉ken tsi niió꞉re énska niwenʼniaweʼehtsheráhsen tánon áhsen tewenʼniáwe áhsen wísk niwenhniserá꞉ke ienwateweiennén꞉taʼne!

¹³ “Tánonʼ ní꞉se, Daniel, sarihwatokénhak kwáh tsi niió꞉re ne tsi ieió꞉tokte. Eʼthó꞉ne enhsíheie, nok tentehsatkétsko ne ahsié꞉na ne satshennonniátshera ne tsi ieióto꞉kte.”