Daniel 11 - Ohiatonhseratokénti

¹ Raónha rorì꞉waien ne ahatsniénon tánon ne aontahakénnhe.

² Tánon tsi nahò꞉ten ó꞉nen enkonhró꞉ri né ne orihwí꞉io.” Ne raronhiaʼkehró꞉non wahén꞉ron, “Shé꞉kon áhsen nikanontiioʼtsherà꞉ke enhsontiaʼtakwení꞉iohste ne Persia, entióhsere né ne kaieríhaton, sénha raónha enhokwáhtsheʼne tsi ní꞉ioht ne ronatiaʼké꞉shon. Né nó꞉nen kwáh enhaʼshátsteke ó꞉ni enhokwahtshéhake eʼthó꞉ne enhshakonenhróthaʼse tsi tkanontiioʼtsherá꞉ien ne Greece.

Ne Kanontiióʼtshera Ne Egypt Tánon Ne Syria

³ “Eʼthó꞉ne ne kwáh thoʼshatstenhserowá꞉nen ronnontí꞉io enhatotáhsi. Ionhontsowá꞉nen tsi nón꞉we nenhaiatakweʼniió꞉hake tánon tsi nenthaská꞉neke eʼtho nenhá꞉iere.

⁴ Ók kí nó꞉nen kwáh enthoʼshatstenhserowanénhake ne raonakeráhsera kaié꞉ri naʼtenkaià꞉konke. Ne rotinontí꞉io ne kwáh iáh oʼthé꞉nen tehontátenonhkwe né tenshonwanaktáhkwen ne enshontiaʼtakweʼní꞉iohste, nok iáh kiʼ nen né꞉ʼe eʼtho tehotiʼshatstenhserowá꞉nen tsi ní꞉ioht ne raónha.

⁵ “Ne ronnontí꞉io ne Egypt enhashátsteke. Shaiá꞉ta ne raonkwé꞉ta ne rahsennowá꞉nen, sénha raónha enhashátsteke ó꞉ni sénha kanontiioʼtsherowá꞉nen enhaiaʼtakweʼní꞉ioke.

⁶ Né nó꞉nen tóhkaraʼ niiohserá꞉ke eniotohétston ne ronnontí꞉io ne Egypt shaʼkarí꞉wa enhnón꞉ni ne ronnontí꞉io ne Syria tánon enhorí꞉hon ahotí꞉niaʼke ne shakoién꞉ʼa. Ók iáh thakarihwé꞉sonke tsi shahotirí꞉wa akénhake, tánon ne aónha, ó꞉ni ne ró꞉ne, ó꞉ni ne akoién꞉ʼa, tánon ne aonnhaʼtsheraʼó꞉kon tsi niká꞉ien ne wahontenroserón꞉ni kwáh ratikwé꞉kon enhonwatinonhwarià꞉khon.

⁷ Iáh thaiónnise ónhkaʼk tsi nihá꞉ti ne aohwà꞉tsire enshontenontí꞉iohste. Ienshakotiaʼtón꞉ti ne Syria ronnontí꞉io raotióhkwa ronterí꞉iohs, thontahanenhráiaʼkte tsi iashakonaʼtaká꞉ri, tánon enhshakoʼshén꞉ni.

⁸ Egypt iensháhawe ne káiaʼtonnihshón꞉ʼa né ne raotiní꞉io ronatatonniaʼtén꞉ni tánon tsi nahoténshon ne ohwistanó꞉ron tánon kahwistarà꞉ken ionniá꞉ton ne róntstha tsi konwahsénnaiens ne raotiní꞉io. Né ne tóhka niiohserá꞉ke iotohétston skén꞉nen thí꞉kenʼne.

⁹ Eʼthó꞉ne ne Syria ronnontí꞉io enhshakonenhrénhten ne Egypt, nok enhoniónnien aonsahákete.

¹⁰ “Ne Syria ronnontí꞉io shakoioʼokón꞉ʼa enhontatkwatá꞉ko ne ahonterí꞉io tánon enhanitiohkón꞉ni kanenhrowá꞉nen ne ronterí꞉iohs. Tánon eʼtho ní꞉ioht tsi ienshakonatiatón꞉ti ne tehontátswenhs raotiná꞉takon tsi ní꞉ioht ne awenhnó꞉ton.

¹¹ Raonaʼkwenhtsherákon ne Egypt ronnontí꞉io enhiaterí꞉io ne Syria ronnontí꞉io, tánon ronatiohkowá꞉nen ne ronterí꞉iohs tánon kwáh ratikwé꞉kon wahshakoié꞉na.

¹² Kwáh í꞉ken tsi enhatatón꞉niʼne tsi rotkwénion tánon tsi nihonatiohkowá꞉nen ne ronterí꞉iohs shakoʼwénthon, nok iáh kiʼ tiahatahshónteren ne tió꞉konte ahotkwénionke.

¹³ “Ne ronnontí꞉io ne Syria ensháhkete nok sénha kanenrowá꞉nen enshanitiohkón꞉ni ne ronterí꞉iohs tsi nitiohtònne. Nó꞉nen ienskáhewe, eʼtho iénsre enhotiohkowanenhátie tánon kwáh í꞉ken tsi enhonatateweiennentaónʼhake ne raotióhkwa ronterí꞉iohs.

¹⁴ Eʼthó꞉ne iakotiohkowá꞉nen enhonwatkónten ne Egypt ronnontí꞉io. Ó꞉ni ó꞉tiaʼke ne ratihseró꞉henʼs sanakerahserá꞉kon non nenthónne, Daniel, enhonwatkónten ne Ronnontí꞉io né tsi nahò꞉ten ronatkáhthon natetshenhserákon, nok kiʼ enhonwatiʼshén꞉ni.

¹⁵ Eʼthó꞉ne ne ronnontí꞉io ne Syria oʼkénra enhatenontonniánion nahsonhtaktóntie ne tekanatanhákton né nahontiesénhake iatahontawènrate ne ronterí꞉iohs raonkweʼtaʼshón꞉ʼa tánon enhatiaʼtakweʼní꞉iohste. Ne Egypt aonkweʼtaʼshón꞉ʼa ronterí꞉iohs iáh thiahontahshónteren ne ahonterí꞉io; shé꞉kon ne kwáh thonnonkweʼtí꞉ios iáh ki thiatekaié꞉ri tsi naonsahatiʼshátsteke.

¹⁶ Ne Syrian ronnontí꞉io ne ranenhréntha eʼtho nenshakoié꞉raʼse kwáh tsi nenthanón꞉weʼne, kwáh iáh ónhka thahonwaióʼtatshe. Eʼtho nón꞉we nenhatená꞉taien tsi nón꞉we ne kwáh tiohontsáhskats tsi ne ronwanarharatstén꞉ni, tánon kwáh iaʼtehaiá꞉ti ó꞉ni tsi enhaiaʼtakwení꞉ioke raoʼshatstenhserà꞉kon nón꞉we neniotaténronke.

¹⁷ “Ne ronnontí꞉io ne Syria enhateʼnikonhrón꞉ni ne tahatháhahkwe, kanenhrakwé꞉kon ne raonkweʼtaʼshón꞉ʼa ne ronterí꞉iohs enhón꞉ne. Eʼthó꞉ne, tsi ní꞉ioht ne tahárihte ne rohsaʼánion raonakerahserá꞉kon, tánon tsítsho rotatón꞉ni tsi wahotenroʼserónnien tsi enhótatshe nashakoniákten ne shakoién꞉ʼa; nok tsi nihoteʼnikonhríson iáh eʼtho thaiá꞉wenʼne.

¹⁸ Ne ohnaʼkénkha kaniataraʼkehkó꞉wa nonkwá néntre tsi ienshakotiaʼtón꞉ti ne tehontonhontsanekhánion tánon ronatiohkowá꞉nen enshakoʼshén꞉ni. Nok thiháte rakó꞉ra enhoʼshén꞉ni tánon tenhótahste ne tsi nihoianerenhseráksen; kwáh ónhte ne kaierónhsera raónha ne Syria ronnontí꞉io enshó꞉raʼne.

¹⁹ Ne ronnontí꞉io eʼtho niénsre tsi nón꞉we thoʼshatstenhseraiéntakwe né ne raonhontsà꞉ke, nok kí enhonwaʼshén꞉ni, tánon enhonwáhtonʼte.

²⁰ “Ó꞉ia enshonontí꞉ioʼne, sók ne raonkwè꞉ta ienhotó꞉ri ne tahshakoʼnikonhkáriaʼte ne tsienshakokarahérhase nonkwehshón꞉ʼa ohnaiá꞉wenʼne ne sénha ahokwáhtsheʼne tsi ronontiioʼtsheráhere. Kenʼk nikarí꞉wes sók ne tho ronnontí꞉io enhonwanonhwariàkhon, iáh ne tsi ionkwé꞉ne iáh ó꞉ni ateriiohserá꞉ke eh thaiá꞉wenʼne.”

Ne Ranontiioʼtsheráksen Ne Syria Nón꞉we

²¹ Iahatahshónteren ne raronhiaʼkehró꞉non tsi wahaʼnikonhraiéntahte: “Ne ó꞉ia enshatenontí꞉iohste ne Syria enronkweʼtaksénhake né ne kwáh iáh oʼthé꞉nen thaʼteiotonhontsóhon ne raónha ahonontiióhake, ók kwáh thentiawénhstsi enhoké꞉tohte tánon enhaʼnikónrahte tsi enhaié꞉na ne kashatsténhsera.

²² Ne ónhka enhonwaióʼtatshe, kwáh enhshakaʼónhewe ó꞉ni kwáh iáh thé꞉nen thaonsakaierón꞉nike, shé꞉kon ne kwáh è꞉neken thótte ratsihenhstowá꞉nen ne Rawenni꞉io raonkwè꞉ta.

²³ Tsi enhaterihwahseronniánion enhshakoʼnikonhrhá꞉ten ne tehontonhontsanekhánion, tánon sénha enhashátstenʼne, iaweronhátien tsi kenʼk nihaonhóntsa tsi nón꞉we nihotkoráhston.

²⁴ Kwáh iáh oʼthé꞉nen thashakohronkà꞉ten tsi enhshakonenhrénhten ne kwáh tiokwáhtshe tho nón tkanakerahserá꞉ien, ó꞉ni niaʼtékon tsi nenhaieránion né ne iáh nonwén꞉ton ne raohsótshera eʼtho tehotiié꞉ren. Eʼthó꞉ne tenshakoiaʼkhónhase ne raonkweʼtaʼshón꞉ʼa ne tsi niiontsthaʼshón꞉ʼa ó꞉ni ne onhontsaʼshón꞉a ne roiená꞉on shiwaterí꞉io. Enhateʼnikonhronniánion ne ienhatiaʼtón꞉ti ne tsi tekanatannhákton ne kashatsténshera, nok ki kwáh iohstó꞉re enhotenhniseróktahse.

²⁵ “Roʼnikonhrahní꞉ron tsi ní꞉ioht tsi enhanitiohkón꞉ni ne ronterí꞉iohs ne iahotiaʼtón꞉ti ne ronnontí꞉io ne Egypt, rotateweiennentá꞉on naontahataténhe ó꞉ni kanenhrowá꞉nen tánon ratiʼshátste ne rahonkweʼtaʼshón꞉ʼa ronterí꞉iohs. Ók ne Egypt ronnontí꞉io enhonwaʼnikonrhà꞉ten tánon iáh thahoterihwahténtiaʼse.

²⁶ Ne kwáh ákta ronwateʼnikonhrá꞉wis enhonwahetkénhten. Ronaʼtiohkowá꞉nen ne ronterí꞉iohs enhonwatí꞉rio, tánon ne ronterí꞉iohs kwáh iáh oʼthé꞉nen thaonsahatiierón꞉nike.

²⁷ Eʼthó꞉ne ki tehninontiioʼtsherá꞉ke skátne enhiátien ne atekhwahraʼtsherákta ne tahiatskáhon, ók tsi niwahétken tsi nahò꞉ten iateʼnikonhrón꞉ni, ó꞉ni tenhiatatenowénhten. Iáh thahniié꞉na tsi nahò꞉ten tehonatonhontsó꞉ni, ne tsi iáh ároʼkhok thieióhe ne eʼtho naiá꞉wenʼne.

²⁸ Ne Syria ronnontí꞉io enshahtén꞉ti akwé꞉kon ienhá꞉hawe tsi nahó꞉ten rotatienawáʼse, kwáh iaʼtehoʼnikonhrakontáhkwen ne ahátonte ne raotirihwiiohstónhtshera ne Rawenni꞉io raonkwetaʼshón꞉ʼa. Kwáh tsi nithonikonhriió꞉on tsi eʼtho nenháiere, eʼthó꞉ne enshahtén꞉ti.

²⁹ “Í꞉siʼ nonwéha sók àreʼ ensehshakonenhrénhten ne Egyptró꞉non, nok iáh kiʼ eʼtho thahoianeráhsten tsi ní꞉ioht ne tiotierénhton.

³⁰ Kahonweiátne nenthón꞉ne ne Romans ó꞉ni enhonwaióʼtatshe, tánon kwáh í꞉ken tsi enhoteronhiénhten. “Eʼthó꞉ne ateriahtikhontsherà꞉kon tsi niénsre tánon enhateʼnién꞉ten naháhtonʼte ne raotirihwiiohstónhtshera ne Rawenni꞉io raotióhkwa. Ne enshakotahónhsatate tsi nihá꞉ti ronahtsakwaríhsion ne eʼtho karihwiiohstónhtshera.

³¹ Ó꞉tiaʼke ne raonkweʼtaʼshón꞉ʼa ronterí꞉iohs kwáh enhatihétkenhte tsi iotokénhti ne ononhsatokénhti. Waʼteshakotítaste nonkwehshón꞉ʼa tsi ronwanatiatatshaʼáhtha ne katshé꞉nen eʼtho nihatiweiennoténʼne tsi ronwasén꞉naienhskwe ne Rawenni꞉io. Enhonwennónnien ne iáh teiotokénhti tánon né enskonwasénnaien. Tsik thiahatiieránion tánon iáh tsiewanonhtonniónhon, tsi nateiotenonhianíhton ne wahétken ne enskonwasénnaien.

³² Ne ronnontí꞉io tsi nenhaʼnikónrhaʼte enthonwahswanòn꞉na tsi nihá꞉ti ó꞉nen ronahtsakwaríhsion ne raotirihwiiohstónhtshera, nok tsi nihá꞉ti ne shé꞉kon Rawenni꞉io ronwahnonterátieʼs tenthotinàkhwen.

³³ Ne ronteʼnikonhrattókhaʼs ne shakotihentén꞉se ne onkwehshón꞉ʼa iatenhonteʼnikónraiehste ne raonattokháhtshera nahotiʼnikonhraién꞉taʼne tsi niiawénhserons. Ók kwak kenʼk nikarí꞉wes kí꞉ken ronteʼnikonhrattókas ó꞉tiaʼke enhonwatí꞉rio ne tsi waterí꞉io tóka ni ó꞉ni enhonwanatiaʼtátshaʼahte tsi niió꞉re ienhonní꞉heie, tánon ó꞉tiaʼke ó꞉ni enhonwatinenhskwenháton tánon enhonwatinnhó꞉ton.

³⁴ Tsi nikarí꞉wes ronwanaʼwénthos ne Rawenni꞉io raotióhkwa, enwatetshén꞉ri ohstónha enhonwatiié꞉nawaʼse, tánon ronatiohkowá꞉nen éhthoh ratiiá꞉tare, tsi enhontiá꞉taren ne tsi rononhastsí꞉wa khók rontatè꞉hiare.

³⁵ Tóhka nihá꞉ti ne ronteʼnikonhrattókhas ne ohén꞉ton iehónneton enhonwatí꞉rio, nok né kiʼ enkarihón꞉ni ne Rawenni꞉io ensehshakoʼnikonhrahsehrón꞉ni nonkwehshón꞉ʼa. Eʼtho neniohtonhátie tsi niió꞉re ienkáhewe ne tsi ieiótoʼkte ne tsi nihokwatákwen ne Rawenni꞉io.

³⁶ “Ne Syria ronnontí꞉io kwáh tsi nenthanón꞉weʼne eʼtho nenhá꞉iere. Tenhataterénhsaron tsi sénha raónha tehotenonhianíhton tsi ní꞉ioht ne akó꞉ren ní꞉io tánon sénha í꞉rehre raónha è꞉neken thótte tsi ní꞉ioht ne kwáh thaʼsátste Rawenni꞉io. Enhoterihwahténtiaʼse eʼtho neniohtonhátie tsi niió꞉re ienkáhewe ne Rawenni꞉io enhohréwahte. Ne Rawenni꞉io kwáh orihwiioʼón꞉we eʼtho nenhá꞉iere tsi nihoteʼnikonhrón꞉ni.

³⁷ Ne ronnontí꞉io enhakén꞉ron ne thiʼkaniiohtsherá꞉tes tsi niká꞉ien ne shakosothokonkénhen ratisénnaienhskwe, ó꞉ni ne konnón꞉kwe tsi niká꞉ien ne kontinorónhkhwakwe. Tánon kiʼ ó꞉ni kwáh tsi niaʼtekaniiohsherà꞉ke tsi enhshakokén꞉ron, né tsi í꞉rehre sénha raónha è꞉neken enthótteke tsi ní꞉ioht ne ronatiaʼkéshon.

³⁸ Ne aonaktá꞉ke, ne enhokwénienhste ne thikaniiohtsherá꞉te ne thánnhehs ne notsténra tekanatannhákton. Ohwistanó꞉ron, kahwistarà꞉ken, niaʼtekahwistanoronʼtsherá꞉ke, tánon oiá꞉shon nihiohtánion ne kakweniáhtshera enhótatshe ne thikaniiohtsherá꞉te í꞉ken né ne shakohsothokonkénhen iáh nonwén꞉ton tetkonwahsénnaien.

³⁹ Ne aontahánhe ne otstén꞉ra tekanatannhákton, ne enhshakoniáhese nón꞉kwe né ne ratihsénnaiens ne thikaniiohsherá꞉te. Kwáh í꞉ken tsi enhshakokwénienhste tó꞉kaʼ enhonwaién꞉tereʼne tsi raónha rakó꞉ra, tiotenáktate tsi nón꞉we nenshakorihónten, tánon tsi tehshakorihwaʼserákwase enhshakaonhóntson.

⁴⁰ “Né nó꞉nen ne Syria ronnontí꞉io skanóronks iahotenhniseróktahse, ne Egypt ronnontí꞉io ienhotiaʼtón꞉ti, nok ne ronnontí꞉io ne Syria tenthonàkwen kwáh tsi nihoʼshatsténhsera, né én꞉ratste ne tékeni teionkahʼkwèn꞉tonte oʼtshónhkwa ne kohsá꞉tenhs kontiiaʼtaniiontáhkhwa, ne ó꞉tiaʼke enhotihsá꞉ten nen né꞉ʼe, tánon wé꞉so ne kahonweiaʼkó꞉wa konterí꞉ios énhontste. Wé꞉so tsi kanakerahseraké꞉ron ienhshakotiaʼtón꞉ti, tsi ní꞉ioht ne awenhnó꞉ton.

⁴¹ Kwáh ó꞉ni thienhshakotiaʼtón꞉ti ne kwáh iohontsáskats ronwanararhahstén꞉ni tánon ó꞉ni tóhka tewenʼniaweʼehtsheráhsen enshakoʼwéntho, nok né tsi kanakerahseraké꞉ron ne Edom, Moab, tánon tsik ní꞉kon tsotatén꞉ron tsi iohontsá꞉te ne Ammon iáh nenʼné꞉e kenʼ thiashakó꞉iere.

⁴² Nó꞉nen akwé꞉kon ienshakotiaʼtón꞉ti ne aktéshon nón꞉we nikanakerahseraké꞉ron, akwé꞉kon ne Egypt iáh thaonsakaʼniá꞉kenʼne.

⁴³ Enhshakóhkhwa ne Egypt aotsohkowáhtsheras eʼtho enkarátie ne ohwistanó꞉ron ó꞉ni kahwistarà꞉ken ó꞉ni ne oià꞉shons kanorónshons. Enhshakoʼshén꞉ni ne Libya ó꞉ni Ethiopia.

⁴⁴ Nenharihwá꞉ronke tsi nenthonwateriʼwaniéhten ne tsi tkarahkwínekenʼs ó꞉ni othoré꞉ke tsi nenhóhteronʼne enhonà꞉kwen, tánon ó꞉nen sénha enhateriiohserówanahte, iakotiohkowá꞉nen enshakoʼwéntho.

⁴⁵ Ne ronnontí꞉io enhaʼtohserotónnion ne kwáh waʼtohserowá꞉nens tsi nón꞉we nenhatatì꞉teron, ne tsi naʼtetiá꞉tere ne kaniataraʼkehkó꞉wa tánon tsi ionónte tsi nón꞉we nikanónhsote ne ionterennaientáhkhwa. Nok enhrénheie, iáh ónhka eʼtho thaiénsheke ne ahonwahiaʼtakénnha.”