Amos 7 - Ohiatonhseratokénti

Ne Amos Tsistá꞉rare Wahshakotétsen

¹ Ken kí nahóten ne Roiá꞉ner Rawenni꞉io wahakenatónhase: sakohiatonhniá꞉nions tsistá꞉rare ó꞉nen sihonekerihià꞉kon ne ronnontí꞉io shé꞉kon kí thonkakahontánio.

² Nahkesherentákon wahkhéken ne tsistá꞉rare kwáh akwé꞉kon wahatihóntahke ne tsi ionhontsá꞉te, tánon ethò꞉ne wahkí꞉ron, “O Saiá꞉ner, shashenikónrens konhianithéntase! Onhní꞉ioht tsi hahatiniá꞉kenhne ne Israerʼró꞉nons? Tsi nió꞉re tsi kenhnihónnas!”

³ Ne Roiá꞉ner tonshahoteriwahthénien né꞉ne aorihwà꞉ke tánon wahèn꞉ron, “Tsi nahó꞉ten wahsatʼkátho iáh é꞉tho tahiá꞉wenhne.”

Ótsire Sahotéttsen

⁴ Ken kí nahó꞉ten ne Roiá꞉ner Rawenni꞉io wahakenatonhase: ne Roiá꞉ner Rawenni꞉io ótsire iehénnonks né꞉ne ahonttsiraténi, tánon né ontsáhate ne nà꞉kon ionhontsá꞉te ne kaniatarakeʼkowáhne tánon ne thontasawákwe onhtsáhate tsi ionhontsá꞉te.

⁵ Ethò꞉ne wahkí꞉ron, “O Saiá꞉ner! Sáswat, konhianithéntase! Onhní꞉ioht tsi ahatiniá꞉kenhne ne Israerʼró꞉nons kenk nihónnas!”

⁶ Ne Roiá꞉ner shé꞉kon tonshahoteriwathénien tánon wahèn꞉ron, “Iáh nonhné꞉e kí꞉ken é꞉tho tahiá꞉wenhne.”

Natetʼtsénsera Né꞉ne Ieserihiethenthákwa

⁷ Ken kí꞉ken nahó꞉ten wahakenatónhase: ne Roiá꞉ner ashón꞉tatʼta í꞉rahte tsi wahshonthón꞉ni ieserihiethentháhkwa wátsthon, tánon ieserihiethenthákwa raháwe.

⁸ Tánon ne Roiá꞉ner wahakénhase, “Amos, onhnahó꞉ten satʼkáthos?” Tánon waʼkí꞉ron, “Ieserihiethenthákwa,” Ethò꞉ne wahèn꞉ron, “Satkáto éntsen ne ieseriiethentáhkwa raotinenhrí꞉hen nakonkweʼtashón꞉as Israerʼró꞉nons; kwáh iáh nonhwén꞉ton shé꞉kon thahonsakhenikonhrénhse;

⁹ Ne tsi ionhnontarónhnions tsi nón꞉we ne Isaac raowá꞉tsires nihonterenhnaientáhkwa kwáh ki enkarihwentʼtonhke, tánon ne raotinonsatokentikowátʼtions nʼIsraerʼró꞉nons kwáh ki eʼtake enwatiónke, tánon kwáh kí iekehiatsiatónhti ne rahonkweʼtashón꞉as ne Jeroboam asareʼkó꞉wa én꞉katste.”

Ne Amos Ronnontí꞉io Iahorihwakatátʼtse

¹⁰ Ethò꞉ne ne Amaziah, ne ratsihénstatsi kénhne ne Bethel nón꞉we, iahoterihwaniétase ne Ronnontí꞉io Jeroboam ne Israerró꞉nonhke, ratónhnions, “Ne Amos roteʼnikonronníhaties ne kariwahetkénhsera tsi nokwáh ní꞉se kwáh raotinenhrí꞉hen nonkweshón꞉as Nisraeró꞉nonke; nonkweshón꞉as iáh taiekwé꞉ni nahonwarihwáiakse tsi niwé꞉so ne raowenhnashón꞉as kwáh kí enkanakeraserénto.

¹¹ Asè꞉ken ne kí꞉ken aorihwa ne Amos tsi niháwen, ‘Ne Jeroboam asareʼkó꞉wa enhononwarià꞉kon, tánon ne nʼIsraerʼró꞉nons enhonwanakerákwahte é꞉ren enhónhnete ne kén꞉en ionhontsá꞉ien.’”

¹² É꞉tho ne Amaziah wahawénhase ne Amos, “O Satokénhse, wás, sashá꞉teko thóh nionhsáhse tsi tiohontsá꞉ien ne Judah, thóh nón꞉we iatesathéntsa ne sátkwah, tánon thóh nón꞉we iaserihwakénhset.

¹³ Ók tóh꞉sa shé꞉kon nonhwén꞉ton niahonsaserihwáken ne Bethel nón꞉we, asè꞉ken Ronnonhtí꞉io raononsatokentihkó꞉wa í꞉ken, tánon ne nahonhnonsatokentihkó꞉wa ne tsi kanakeráhsera.”

¹⁴ Ethò꞉ne ne Amos watoriwahsehrá꞉kwase ne Amaziah, “Ní꞉i kaʼtsé꞉nen kheʼnikónhrane, tánon katkwiráhserons ne Sycamore karontaʼshón꞉as,

¹⁵ Ók Roiá꞉ner kí é꞉ren wahatsathenhá꞉wite tsi kenikonhrárahkwe ne kontitshé꞉nens, tánon ne Roiá꞉ner wahakénhase, ‘Wás, iasehrihwákens nakonkweʼtashón꞉as nʼIsraerʼró꞉nons.’

¹⁶ Káti ó꞉nen satahónsahtat ne raowenhnaó꞉kons ne Roiá꞉ner. Sáton, ‘Tó꞉sa iaserihwákens nʼIsraerʼró꞉nons, tánon tó꞉sa sehiaterihwanót꞉tas nonkweshón꞉as Nisraeró꞉nonke.’

¹⁷ Ne káti aorò꞉wa rá꞉ton ne Roiá꞉ner: ‘Né tesenitéron tsotakwahkaré꞉ni enhiónton ne kanatowanénhke, tánon ne sanekenteronhtserashón꞉as ó꞉ni ne saiatasetserashón꞉as asareʼkó꞉wa enhotirió꞉te, tánon ne sonhóntsa enwasehrihiethénton tsi thenkenhnarihtónhke; ní꞉se iateshiá꞉ti thóh nón꞉we nenhsí꞉heie ne iáh tehiotonhontsiatkwé꞉niens, tánon nʼIsraerʼró꞉nons orihwiiohón꞉we tsi enhonhnakerá꞉ko ne raononhontsá꞉ke.’”