Amos 4 - Ohiatonhseratokénti

¹ Sewatahónhsatat kí꞉ken owennaʼshón꞉ʼahs, í꞉se ne tiohnhónskwarons nisewaiaʼtó꞉tens ne Bashan nón꞉we ne ne tsi ionón꞉te ne Samaria nón꞉we ní꞉sewes, í꞉se ne teietshiionhnharíkhons ne iakotenhténions, í꞉se ne teietshinènhstiaʼks ne teiontkáriahs, ietshihró꞉ris ne sewaniákkhons, “Taskwahnekenhawíhten!”

² Ne Roiá꞉ner Rawenni꞉io tho nón꞉we nihorihwahnirá꞉ton tsi rotokènhti ne raónha í꞉ken: ne tsi nikawistá꞉ʼeks orihwiioʼón꞉we tsi ensaiaʼtó꞉renʼne, nó꞉nen ieniesaiaʼténhawe ohnió꞉kwa énhontste, shé꞉kon ne kwáh ohná꞉ken entiónniaʼte kéntsonʼk aó꞉ria énhontste.

³ Tsi teiohsontahrí꞉ʼon nón꞉we nenhsatóhetste, shatiiaʼtátshons thóh nón꞉we nenhontóhetste; tánon kwáh Harmon nón꞉we ieniesaiaʼtón꞉ti, rá꞉ton ne Roiá꞉ner.

⁴ Kats Bethel nontá꞉se—tánon serihwanéraʼk; eʼthó꞉ne Gilgal nionsá꞉se—kwáh tontasatnaʼnetárion tsi iaʼserihwanéraʼk; táshaf ne sarihwiiosehokón꞉as niaʼteiohrhonʼkehtserá꞉ke, tsi nentéhsheste tió꞉konte nenʼne ʼeh nahsénhaton niwenhniserakéhaton;

⁵ táshaf tsi naʼtenhsatenonhwerá꞉ton ne iottenʼkwá꞉on kaná꞉taro, tánon sathró꞉ri tsi kwáh thóh nisaʼnikonhró꞉ten tsi táhshieste, tesataterènhsaron; asè꞉ken thóh ní꞉ioht tsi senón꞉wes, O tsón꞉kwe NʼIsraelronón꞉ke! rá꞉ton ne Roiá꞉ner Rawenni꞉io.

NʼIsrael Iáh Teiothontá꞉ton Naonsakonwatakwaríhsi

⁶ Í꞉ʼi tewákha natonhkariá꞉kon akwé꞉kon tsi ní꞉kon sanataièn꞉tons, tánon wahsatekhókten akwé꞉kon tsi nón꞉we nisanakerahserá꞉ien, nek kiʼk shá꞉ka iáh akonhá꞉ke thaʼtetisé꞉non, rá꞉ton ne Roiá꞉ner.

⁷ Tánon káti ó꞉ni takónʼneke nokennoréhsera ne shonhá꞉ke nó꞉nen shé꞉kon áhsen niwenhní꞉take sitiotatèn꞉ron naieienthó꞉ko; skaná꞉ta khók tsi nón꞉we ienkaténniehte nokennoréhsera, tánon iáh ne ó꞉ia tkaná꞉taien; skahèn꞉tak khók tsi nón꞉we neniokèn꞉nore, tánon tsi nón꞉we ne iáh teiokennó꞉ron ionatáten nenhné꞉e;

⁸ káti tekaná꞉take khehs náhsen nikaná꞉take skaná꞉taʼk khok tsi nón꞉we niahón꞉ne niahatihnekí꞉ra, tánon kíʼ iáh tshiaʼtehotiieríhse; shé꞉kon kíʼ iáh akonhá꞉ke thaʼtetisé꞉non, rá꞉ton ne Roiá꞉ner.

⁹ Ne waʼkón꞉ienhte ne kahnratarinéhtshera tánon naiotitsiʼnón꞉waraʼne ne saienthóhseraʼs; waʼkonhehtaksá꞉ten tánon ne tsi saʼnenharaièn꞉tons; tsistá꞉rare wahontekhwísa ne sakwireʼshón꞉ʼas tionhnionwarontonhaʼkó꞉wa tánon ne iakeniewáhta sarontaʼshón꞉ʼas; shé꞉kon kiʼ iáh akonhá꞉ke thatetisé꞉non, rá꞉ton ne Roiá꞉ner.

¹⁰ Kahnratarinéhtsheras iaʼkwatenniéhten kwáh ne shá꞉ka tsi iekheiateniehtén꞉ni ne Egypt; khenonhwariá꞉kon ne kenʼnitotiión꞉sas tsonkweʼtaʼó꞉kons ashareʼkó꞉wa wakátston; é꞉ren kheiaʼtenhawíhton ne satshenenʼó꞉kons kohsá꞉tens tánon ne waʼkónniaʼte ne wenseráksen ne tsi satená꞉taien tsi tehseʼnionká꞉ronte aontahsatonriseratihéntho; shé꞉kon kíʼ iáh akonhá꞉ke thaʼtetisé꞉non, rá꞉ton ne Roiá꞉ner.

¹¹ Tohkára nihá꞉ti waʼkheiáhtonʼte, tsi kíʼ ní꞉ioht ne Rawenni꞉io tsi shakohtón꞉ton ne Sodom tánon ne Gomorrah, tánon tho nihshiaʼtó꞉ten tsi ní꞉ioht ne iotientátshon iótshon ne tsi iotékha; shé꞉kon kíʼ iáh akonhá꞉ke thaʼtetisé꞉non, rá꞉ton ne Roiá꞉ner.

¹² Eʼthó ká꞉ti ne aorí꞉wa Kwáh tho nenkónié꞉raʼse, O Israel; tsi kí꞉ken tho nenkonié꞉raʼse, satateweienèn꞉taʼn ne taetsatátken ne Saní꞉io, O Israel!

¹³ Asè꞉ken sewtkáhtho, tsi niká꞉ien ne ráhsaʼahs ne tsi ionontahrónnions, rawerón꞉nis kí nénhné꞉e, shakorihotahshièn꞉nis nonkwehó꞉kons; tethaʼkahraráhstha nohrhonʼké꞉ne nikahá꞉wi, tánon é꞉neken nihatohétstha ne tsi ionhontsá꞉te— né꞉ne Roiá꞉ner, ne Rawenni꞉io rotokénhti í꞉ken, ne ne raosèn꞉na!