Amos 3 - Ohiatonhseratokénti

Israel Aohnhíhtshera Tánon Aohrewahtátshera

¹ Sewatahónhsatat kí꞉ken owennáʼshón꞉ʼahs ne ne tsi nihotatí꞉ʼon ne Roiá꞉ner tsi nokwáh ní꞉se, O tsón꞉kwe NʼIsraelronón꞉ke, kwáh iehwatsirakwé꞉kon tsi tetkwaiaʼtinekénhen tsi tiohontsá꞉ien ne Egypt:

² Tsonhá꞉ʼa khok kwaienterí꞉ne ne tsi niiehwatsí꞉ra tsi ionhontsá꞉te; kwáh ká꞉ti enkwahré꞉wahte tho í꞉kare akwé꞉kon ne sarihwaneraʼáktsheras.

³ Skát꞉ne kenʼh iahténtieʼs ne tehniiáhse nek tó꞉kaʼ kenh thonaterihwahserón꞉ni?

⁴ Ne kèn꞉reks ratonrá꞉iens kenh ne kahrhahkonhkó꞉wa, nó꞉nen iáh oh thé꞉nen tehorió꞉taien? Ne kenʼnithotiión꞉ha kèn꞉reks thaiá꞉kenʼs kenh ne tsi rèn꞉teron ne tahohén꞉rehte, tó꞉ka iáh oh thé꞉nen teharioʼtaié꞉nen?

⁵ Notsiʼtén꞉ʼa tho ónhte kenh niehréhtha tsi waterístaien nohontsá꞉ke, nó꞉nen iátekaristotáhrhon ne karístatsi? Ne tsi waterístaien tetiottákwas kenh nonhontsá꞉ke, nó꞉nen iáh oh thé꞉nen tehahié꞉nen?

⁶ Rontatístha kenh ne iehonrawátstha ne kanatowanén꞉ke, tánon nonkwehó꞉konʼs iáh thaiakóhteronʼne? Ne karihwaiesáhtshera kaièn꞉tas kenh ne tsi kanatowanén꞉ke, nek khok tó꞉kaʼ ne Roiá꞉ner thóh nenháhsa?

⁷ Oriwiioʼón꞉we ne Roiá꞉ner tsi iáh oh thé꞉nen thahá꞉iere, ne iáh ohén꞉ton thahshakorihotahshienní꞉re ne karihwahséhton ne raonkweʼtaʼshón꞉ʼahs rotitokénhse.

⁸ Ne kèn꞉reks wahatonrá꞉ien; ónhka ne iáh thaiakóhteronʼne? Ne Roiá꞉ner Rawenni꞉io rotatí꞉ʼon; ónhka aiekwé꞉ni nek khok kíʼ niaierí꞉wake?

⁹ Ietshirihowanáhten tsi niiá꞉kon ne Rotinontiió꞉sons raotinónhskonʼs ieʼterón꞉ton ne Ashdod, tánon ne tsi kanonhsó꞉tonʼs ne tsi ionhontsá꞉ien ne Egypt, tánon sewén꞉ron, “Sewanitiohkwaró꞉rok ne tsi ionhniahrónnion aktóntieʼs ne Samaria, tánon sewatkáhtho tsi niiorí꞉tstare ne nón꞉we, tánon ne sewaterihwateʼwáhton niioterihwahténtion neh nón꞉we.”

¹⁰ Iáh tehonaterién꞉tare oh ní꞉ioht tsi ahotiriwatokénhake, rá꞉ton ne Roiá꞉ner, tsi niiá꞉kon ne ne iakoteweienʼtónties ne kaianerenhseráksens tánon kanenhskwáhtsera ne raotinonhskónhsons.

¹¹ Né katíʼ aorí꞉wa ráton ne Roiá꞉ner Rawenni꞉io: ne rotswèntskon kwáh tenhahwáhnhake ne tsi iohʼhontsá꞉ien, tánon enhiaʼshatstenhseráhkhwah; tánon ne sewanonhskónhsons enkanenhskwenhá꞉tonke.

¹² Né katíʼ aorí꞉wa rá꞉ton ne Roiá꞉ner: tsi ní꞉ioht ne teiotinaʼkarontón꞉ʼa rá꞉nonhne tekahsí꞉nake khok enshahnhontá꞉ko ne kèn꞉reks tsi iawé꞉kon khehs sewahònhtaʼ khok ne kenʼk nísewa, ne katíʼ nonkwehó꞉konʼs Israerʼró꞉nons tsi nihá꞉ti iehatinákere ne Samaria tsi enshonwatiʼniá꞉kenhte, enkenikwekonhátie ne teionitskwahraʼtsherahrí꞉ʼon tánon ne kenʼ ná꞉ʼonske ká꞉nakte.

¹³ Sewathón꞉tek, tánon ietshiiahronká꞉ten tsi ronónhsote ne Jacob, rá꞉ton ne Roiá꞉ner Rawenni꞉io, ne ne Rawenni꞉io roiaʼtatokénhti:

¹⁴ Nentewenhniserá꞉teke nó꞉nen enkhehré꞉wahte ne Israerʼró꞉nons ne ne raotirihwaneraʼáktshera entkarihón꞉ni, kwáh enkerihwáhtonʼte ne ietsenhahráhkhwaʼs ne Bethel, kwáh tsi ní꞉kon tekahiohsaké꞉ronʼs akwé꞉kon ne ietsenhahráhkhwa kwáh kiʼenkaiá꞉khonke tánon kwáh ohontsá꞉ke ienkaièn꞉taʼne.

¹⁵ Kwáh Enkerihwenthóhseron ne kohseraʼkéhkhas ó꞉ni ne akenhnhaʼkéhkhaʼs kanonhsó꞉tonʼs; Ne kanonhsaʼshón꞉ʼahs tsi ne karaʼsestánions ne kanaʼkareʼhó꞉konʼs tsi kwáh enkarihwénkthonke, tánon ne kanonhsowá꞉nenʼs kwáh kíʼ enwató꞉kten, ráton ne Roiá꞉ner.