Amos 1 - Ohiatonhseratokénti

¹ Ne raowennaʼó꞉kons ne Amos, ne ne teiotinakarontón꞉ʼa shakotiʼnikón꞉rare ratikwekonhátieʼskwe ne ne Tekoa nón꞉we. Ne tsi nahatkáhtho ne Israel aorihwá꞉ke ne ne tsi nihotenhniseraténionʼskwe ne Ronnontí꞉iohkwe Uzziah ne Judah nón꞉we neh nón꞉ne ó꞉ni tsi nihotenhniseraténionʼskwe ne Ronnontí꞉iohkwe Jeroboam ne roʼnihkénhen ne ne Jehoash ráonha ne Ronnontí꞉iohkwe Nʼisraelronón꞉ke, ne ne Teiohserá꞉ke ohén꞉ton shaʼtiaonhtsíshonhkwe neh nón꞉we.

² Tánon ne Amos wahén꞉ron: Ne Roiá꞉ner thawennotátieʼs tsi tionón꞉te ne Zion, tánon thotewennóntieʼs Jerusalem nitewéhtha; tánon ne tsi shakotiʼterontáhkhwah ne teiotinaʼkarontón꞉ʼahs natèn꞉rakon iáh oh thé꞉nen tetsókhware, tánon nonontakèn꞉iate ne Carmel akwé꞉kon nenhné꞉eh ionatekhwí꞉son.

³ Ne kí꞉ken aorihwá꞉ke ne Roiá꞉ner rá꞉ton: Aseʼkénh áhsen nieioterátston iorihwanéren ne Damascus, tánon ne kaieríhaton, kwáh kíʼ nenhné꞉eh iáh thahonsonkeʼnikónhren ne kahrewahtáhtshera; tiorí꞉wa waʼkonhwahwá꞉ʼekte ne Gilead ne wáhontsteʼ ne iehwaʼéktha ká꞉sere karístatsi nahó꞉ten ionniá꞉ton.

⁴ Ká꞉ti ó꞉tsire ienkaténniehte tsi thonónhsote ne Hazael, tánon kwáh enwátshaʼahte ne tsi roteʼèn꞉rote ne Benhadad.

⁵ Kwáh tenkhrihtánion ne tekaristahrenhwánions ne tsi iotenhenrakahrón꞉tonʼs ne Damascus, tánon kwáh enhinonhwariá꞉kon ne rakó꞉ra naonhráhkwakon ne Aven nón꞉we nihanákere, tánon tsi niká꞉ien ne raʼnhiénhawe ne rakó꞉ra ráoʼnhia ne Beth-eden nón꞉we; tánon nonkwehó꞉konʼs ne Aram nón꞉we kwáh nenʼneʼeh Kir nón꞉we ienhonwanaténniehte, rá꞉ton ne Roiá꞉ner.

⁶ Ne kí꞉ken aorihwá꞉ke Ne Roiá꞉ner rá꞉ton: Aseʼken áhsen nieioterátston iorihwanéren ne Gaza, tánon kí ne kaieríhaton naorihwaneraʼáktshera kwáh kí nenʼneʼeh iáh thaʼtaonsonkaterihwaténien ne kahrewahtáhtshera; tiorí꞉wa tsi wahonwatiié꞉na tsi wahonwananakerákwahte kwáh ratinakerahserakwé꞉kon, né niahonwanahtsakwahríhshien ne Edom nón꞉we.

⁷ Ká꞉ti kwáh ó꞉tsire ienkaténniehte tsi wateʼèn꞉rote ne tekanatahnákton ne kanatowanèn꞉ke ne Gaza, ó꞉tsire enwátshaʼahte nétho watenén꞉rote.

⁸ Kwáh enhinonhwariá꞉kon ne rakó꞉ra ne Ashdod, tánon tsi niká꞉ien ne raʼnhiénhawe ne rakó꞉ra raóʼnhia ne Ashkelon nón꞉we; kwáh enkré꞉wahte ne kanatowanèn꞉ke ne Ekron, tánon tsi nihá꞉ti ne Philistiaró꞉nons iaʼtenhonatatén꞉ronke tsi enhonníheie, rá꞉ton ne Roiá꞉ner Rawenni꞉io.

⁹ Ne kí꞉ken aorí꞉wa ne Roiá꞉ner rá꞉ton: Aseʼken áhsen nieioterátston iorihwanére ne Tyre, tánon ne kaieríhaton, kwáh ki nenʼneʼeh iáh thaʼtaonsonkaterihwaténien ne kahrewahtáhtshera; tiorí꞉wa tsi kwáh ratinakerahserakwé꞉kon tsi iehonwanahtsakwaríhshion ne Edom nón꞉we, tánon iáh teshonné꞉iahre naterihwahseronniáhtshera ne ateró꞉sera rotíhson.

¹⁰ Kwáh katíʼ ienkaténniehte nó꞉tsire ne tsi watenʼèn꞉rote ne tekanatahnákton ne Tyre, ó꞉tsire enwátshaʼahte ne watenʼèn꞉rote.

¹¹ Ne kí꞉ken aorí꞉wa Rá꞉ton ne Roiá꞉ner: Asè꞉ken áhsen nieioterátston iorihwanéren ne Edom, tánon ki ne kaieríhaton, kwáh ki nenʼneʼeh iáh thaʼtaonsonkaterihwaténien ne karewahtáhtshera; tiorí꞉wa tsi aʼshareʼkó꞉wa wáhonste tsi wahonwanató꞉rate ne rontatekoʼokón꞉as tánon akwé꞉kon wahatirihwáhtonʼteʼ natanitèn꞉ron; onterihwató꞉kenhste tsi wahatháwa ne raonaʼkwáhtshera tánon iáh nonwén꞉ton tshaʼtetsoientá꞉ʼon.

¹² Ká꞉ti kwáh ó꞉tsire ienkatenniéhten ne Teman, tánon ó꞉tsire enwátshaʼhte ne tsi watenʼenhró꞉tons ne tekanatahnáktons ne Bozrah.

¹³ Ne ká꞉ti aorí꞉wa Rá꞉ton ne Roiá꞉ner: Aseʼkénh áhsen nieioterátston iorihwanéren ne Ammonró꞉nons, tánon kí ne kaieríhaton, kwáh ki nenʼneʼeh iáh thaʼtaonsonkaterihwaténien ne kahrewahtáhtshera; tiorí꞉wa tsi thaʼkonwatiiaʼtaratsón꞉ko ne kontinekwenʼtàkeʼs ne konnón꞉kwe ne kontíhawe naiotiwiraièn꞉taʼne ne Gilead nón꞉we ne naón꞉ton ahatikó꞉wanahte ne raotinakeráhsera.

¹⁴ Kwáh katíʼ enkhtsiró꞉ten ne tsi wateʼèn꞉rote ne Rabbah, ó꞉tsire enwátshaʼahte tsi watenʼèn꞉rote ne tekanatahnákton, teniakohén꞉rehte ne wenhniserá꞉te nenionterí꞉io, ne nenkawerowanénhake né꞉tho enwenhniserá꞉te tsi tenkaweratá꞉se;

¹⁵ ethò꞉ne kiʼ ne ronwanontí꞉io kwáh enhanakerá꞉ko, raónha tánon skátne ne ronaterihón꞉tonʼs raonkwetashón꞉as, ráton ne Roiá꞉ner.