Acts 4 - Ohiatonhseratokénti

Tiér Tánon Ne Sawátis Wahonwathiʼiéna Tánon Wahonwathiʼriwáhro Ohénton Tsi Katsiénhaien

¹ Tiér shékon shiʼsakoretiárons nonkwesónha, tánon ne Sawátis rahiatákʼta írate, khareʼhónen tohkàra niháti ne ratiʼtsihénstatsis neh ronteriwatsʼterístha nononsatokentíʼke ó꞉ni tohkàra niháti ne Sadducees wahónʼnewe.

² Wahothiriwaʼientáten tsioríhwa kí꞉ken teniʼiáhse sakonateriwanothaníhaʼkwe nonkwesónhas nètho Ié꞉sos sotʼkétskwen ne kenheiátʼke, neh kariwanírats ne hiakawehéion tsi entiontʼkétsko nahonsahiakónʼnheʼke.

³ Sók kíʼ wahonwatiʼiéna tánon wahonwathinóton tsi nióre nó꞉ia sahiórenʼne, neh tsi sóhtsi ónen sahthetiókarasʼkwe.

⁴ Nók hiakotiokowánen ne wahakothónʼteʼne nateriwanothátsera tahiakétaʼkwe; tánon wahakotiokowána kákʼnon ne wísk tewenʼniawehetserásen.

⁵ Nóʼia sahiórenʼne nohénton iehonʼnéton ne Sitaeró꞉non, ne rotistenhokónhas, ó꞉ni ne sakotirihonʼniénʼnis ne kaianerénsera Jerusalem nonnahontiataróhroʼke.

⁶ Wathontátʼken ne kwáh ratsihenstowánen Annas ó꞉ni ne Caiaphas, Sawátis, Alexander, tánon ne ronátsiakes ne Ratsihenstowánen rahotiókwas.

⁷ Wahonwenʼnónnien ne ratikweʼkónʼne rahothihénton watnítaʼne tánon wahonwatiriwanóntonʼse, “Onh ní꞉ioht kíʼ tsi éntho nisení꞉iere? Onh nakasastenseróten seníʼien, thòka ó꞉ni ónhka rahosénna tsiáststha?”

⁸ Tiér, kwáh rahiatanáʼnon ne Ronikonratokénti, waʼtesakoriwaserákwaʼse, “Ne ietʼtsihéntense nonkwesónha ó꞉ni ne rotikstenʼokónhas:

⁹ thòka síken ne iontiateriwanontón꞉nis nónwa wenʼniseráte tsi nitʼkariwaiéri tsi niʼiawénʼen raonháke ne rohiathakenhéionʼne tánon tsi ní꞉ioht tsi sohiewentáʼon,

¹⁰ nekàti tehiothonwentióʼon ne sewakwékon aʼisewateriéntaraʼne, tánon kwáh onʼkwetaʼkwékon ne Israeronónke tehiothonwentióʼon nahonateriéntaraʼne, kí꞉ken rónkwe sewahénton írate nónwa, kwáh thóh kén꞉en shoʼiewentáʼon thóh kasastenserákon ne rahosénʼna ne Ié꞉sos Kerístos Nazarethrónon—tsi nikáien ne tetsisewahiásonte tánon tsi nikáien ne Rawení꞉io sohkétskwen ne kenheiátʼne.

¹¹ Ié꞉sos rahónwa noriwatokénti rohtarákwen, ‘Nonénhia ne ratinonsónhnis rotikenronhníhon né kanenhiakwení꞉io iahónton ne tsi tekahiósaien.’

¹² Ne kaʼiatakeʼnhátsera raonháke khók non nen kahtsénrion; kwa tsi nihiohóntsia kwáh iáh ónka nakóren ne Rawení꞉io tethesakówi naʼiekwéni ahonsahionʼkhiniákente.”

¹³ Ne ronaterihónthon ne Ratitsiénhaiens wahotineráko tsi nihotinikonrhatʼtshá꞉ni ne Tiér tánon ne Sán tsi nahotitókense kwáh thinonkwé꞉a iáh tehonatʼthiaʼtonseraweiénston. Ónenʼki wahonateriéntaraʼne tsi Ié꞉sos ratikwekonhátieskwe.

¹⁴ Nók kwáh kíʼ iáh thèʼnen tehioiéntaʼkwe ne thèʼnen hahonʼníron, neh tsi ronwákens ne rónkwe ne sonwatsiénton thóh rátakwe skátʼke ne Tiér tánon ne Sawátis.

¹⁵ Sók kíʼ wahonwatiróri nahonsanihiákenʼne ne tsi ietsienhaientákwa, ehʼthóhʼne ónen tsi natehóntere khókʼwahatitsiénhaien

¹⁶ “Onʼnhaietʼthiiéraʼse kí꞉ken tenónkwe” wahtontateriwanóntonse. “Kwáh onkwetakwékon ne Jerusalem hiakoterientaráʼon kí꞉ken kwáh ísiʼnon tsi nihioriwanerákwat tsi nihotiʼiéren neh ronónha, tánon iáh taʼitewakwéni naʼitewathónniʼien.

¹⁷ Neh kíʼ neh tóhsa sénha isiʼnónwe naʼtahonteriwaréni nonkwéʼnes, ánion iethironkáten kí꞉ken tenónkwe kwáh tóhsa óhnka ahonshasakothitarákwen thóh rahosénʼnakon ne Ié꞉sos.”

¹⁸ Sók kíʼ ionsahonwatínonke tánon wahonwatiróri kwáh iáh othènen tewatsʼterístha nahóten akénhake tóhsa tiatʼretiáron tókaʼ ó꞉ni aietʼtsirihónʼnien ne rahosénʼnakon ne Ié꞉sos.

¹⁹ Nók ne Tiér tánon ne Sán wathowatiriwaserákwaʼse, “Í꞉se tionhá꞉a tesewaʼiatóret nahóten ne tkaʼriwaiéri rahohénton ne Rawení꞉io—tóhkaʼ kén í꞉se akwawénnaraʼkwe káton kén Rawení꞉io ensakeniwénʼnaraʼkwe.

²⁰ Asèken iáh tahiakenikwéni nahiatiátʼkaʼwe tsi hionkenitharákwen ne hiatehiakenihiáti hionʼtiatʼkáton ó꞉ni hiontiatʼthontéʼon.”

²¹ Sók kíʼ ne ratitsiénhaiens ónen sénha iosátste tsi wahonwathiróri tánon sahonwanátʼkaʼwe. Wahóntʼthoʼke tsi tsehioriwákon ne ahonwatiréwaʼthe, tsioríhwa nonkwesónhas tehonwanonwerónnions ne Rawení꞉io tsi niʼiawénʼen.

²² Ne kíʼ rónkwe thóh raonháke niʼiawénʼen kí꞉ken ioriwanerákwat tsi sohʼiewentáʼon, ísiʼnon ne kaieriniwásen nihioseráke natehaʼhoseriʼiákon

Ne Thoʼnethákwen Wahonterénʼnaien Nahotinikonratʼtsanitónhaʼke

²³ Kwáh tsi niʼiostóre ne Tiér tánon ne Sawátis sahonwanátʼkaʼwe, raotiʼtiókwakon nionsáʼne tánon wasakotiróri tsi nahóten ne ratiʼtsihenstowánens ó꞉ni ne rotikstenhokónhas wahonníron.

²⁴ Nónen ne thonetákwens sahatiriwáronʼke, kwáh rathikwékon hiathónʼtiesʼte skátʼke tsi wahonterénʼnaien rahohénton ne Rawení꞉ioʼke: “Sewenní꞉io ó꞉ni sahsahánion tsi karonhiáte, ó꞉ni tsi ionwentsiáte, tánon ne kaniatarakhekówa, tánon ó꞉ni nohiáson nahótens akénhaʼke ó꞉ni neh thóhnon nihonónʼnhes!

²⁵ Tsi nithóha ne Ronikonratokénti tsi nisatatíʼon raonháke ne sakwasotʼkén꞉en Táwit, ne sanatserakénʼen, nónen sahénron, ‘Nontseren ne iáh tehatishitahero꞉nons waʼthonteriatitʼkon; nontseren nonkweshonhas waʼhonnonhnianion ne iáh othé꞉nen tekariwasthas waʼhonteristakeron?

²⁶ Ne Rontinontí꞉ios ne tsi ionwentsiáte wahontateweienéntaʼne, tánon ne ratikoráhsons skátʼke wahthontátʼken nahontateweienéntaʼne nahonwatkónten ne Roiá꞉ner Rawení꞉io tánon ne Kerístos.’

²⁷ Asèken ne Herod tánon ne Pontius Pilate skátʼke tehonatátʼken ne kén꞉en kanátakon ratikwékon ne iáh tehatiʼsitaerónons ó꞉ni ne Israerʼró꞉nons nahonwatʼkónten ne Ié꞉sos, ne Rohiatathokénʼti sanátsera, tsi nikáien neh Kerístos tiónʼni.

²⁸ Tsi wahonteróhroʼke neh꞉ne kwáh oriwakwékon thóh nahatíʼiere tsi nòkwa ne sahsatsténsera ó꞉ni tisanonwéʼon tsi ónenk iatesariwaiéntaʼse tsi thóh neniáwenʼne.

²⁹ Tánon nónwa, Saiáner, satahónsatat tsi nahonráhrasthe, tánon takwaríhon, I꞉i ne sonkwetaʼsónhas, nahiakwatʼróri ne sateriwahʼnothátsera ne kwáh aionkwanikonrahníronke.

³⁰ Hiatesanenktsiátat naséhʼtsienʼte, ó꞉ni sahtóntat nètho ionerákwat ó꞉ni ioriwanerákwat ahónton nakahioténʼen ne rahosénʼnakon ne rohiatatokén꞉ti sahnhátsera Ié꞉sos.”

³¹ Nónen sahatísa tsi ronaterenʼnaiénthaʼkwe, tsi nónwe nihonatʼkennisehónʼne tehiowisʼshónkwa. Kwáh rathikwékon wahatihiatánaʼne ne Ronikonratokénti ó꞉ni tahontásawen nahontróri ne Rawení꞉io rahoteriwahnothátsera kwáh rotinikonrahníron.

Ne Thoʼnetákwens Wahatiʼiákon Tsi Nihothiʼiéntaʼkwe

³² Ne kentiókwa ne thonetákwen skanikónrat iéken ó꞉ni seweriásak íken. Iáh ónka tehiáwen tsi nihotiʼiéntakwe kwáh hiatehatihiáti rahonáwenk, nók akwékon wahʼthatihiákons tsi nihotiʼiéntakwe.

³³ Kwáh rotisatstenserowánen ne ratikweʼkónʼne tsi wahatiriwanírate tsi sotʼkhétskwen ne Roiá꞉ner Ié꞉sos, ó꞉ni ne Rawení꞉io iókwats tsi nasakohiatanóronsʼte ne kahiataterítsera kwáh ratikwékon.

³⁴ Kwáh iáh ónka ne raotiʼtiókwakon ne thénen taʼiakotonwentióniʼke. Ónka ne rononhóntsiaiens tókaʼ ó꞉ni rotinonshótons enhontenʼnínon, entʼthatíhaʼwe nowísta ne rohtiʼiénen tsi nahoténsons ne ronatenʼníkons,

³⁵ tánon entʼthonwénnon ne ratikweʼkónʼne; tánon nowísta tenwareʼniáton neh entewanónton tsi naʼtehiakotonwentió꞉ni nonkwesónha.

³⁶ Nekáti raónha ne Só꞉se, neh꞉ne Levite Cyprus nón thoʼnakeráton, neh꞉ne ratikweʼkónʼne Barnabas ronwanatónhkwaʼwe (neh꞉ne kéntons “Sakonikonranírats”)

³⁷ Wahatontsianínon ne raónha raonhóntsia, taháʼawe nowísta, tánon ratikweʼkónʼne tasakáwen.