Acts 25 - Ohiatonhseratokénti

Kór Wahoriwanóntonse Ne Rahkoraʼkówa

¹ Áhsen nónta onakènke ne Festus iaháraʼwe tsi wathonwéntsiaien, Caesarea nontáre tánon Jerusalem niaháre,

² Ehʼnónwe ne rathitsihenstowánens tánon ne Sitaeró꞉nons wahonʼnotashión꞉ko tsi nihonwariwáros ne Kór. Wahonwanéken ne Festus

³ nahontasakonikonraiérite, Jerusalem nahontahonwaiaténhawe ne Kór, neh tsi ronatenikonríshon tsi nihioháhes enhonwanonwariákʼkon.

⁴ Festus watariwaseráko, “Kór Caesarea nónwe tanóton, tánon kwáh iosthóre thóh nónwe sáhke.

⁵ Ietʼtsiríhon ne ietʼtsihéntense skátʼke nietiákwe ne Caesarea tánon ehʼtsisewariwárho tóhkaʼ thènen tahoterientawenriéʼon.”

⁶ Festus kákʼnon ne satékon tóhkaʼ ó꞉ni oiéri nónta skátʼke rónneskwe etʼthóhne Caesarea niaháre. Tsi óia sahiórenʼne teiehiatoretákwa iahátien tánon wahaténnaʼne nahontahonwaiaténhawe ne Kór.

⁷ Sáhrawe ne Kór, ne Sitaeró꞉nons ne Jerusalem nithoʼnénon tahontásawen kwáh íken tsi iorihowánens tsi níhiot tsi wahonwatriwárho, nehne iáh tehothikwénion nahothiriwaniráton.

⁸ Nók ne Kór tahatáteʼnhe: “Kwáh iáh thènen tatewakaterientawénrie tsi nihothiʼianerenseróten ne Sitaeró꞉nons iáh ó꞉ni tsi nókwa nononsatokénti iáh ó꞉ni tsi nókwa ne Roman Rakorakówa.”

⁹ Nók kíʼ ne Festus rérahkwe nahontasakonikonraiérite ne Sitaeró꞉nons, sók kíʼ wahoriwanóntonse ne Kór, “Ahsenonwenéken ne Jerusalem nónwe niáhse tánon thóh nónwe akʼkénton taiesaiatórete kíʼ ken nahorihótens?”

¹⁰ Wahénron ne Kór, “Kwáh rahohénton ìkete ne Rakorahkówa tsi tehaiatorethákwa, thóh non natehiothonwentióhon tahiontiatórete. Iáh thènen tekhekaronníʼon ne Sitaeró꞉nons, kwáh í꞉se sateriéntare.

¹¹ Tóhka tewatiákon ne kaianerénsersa tánon kniwakatiéren neh tsi tahonkaténtion ne kenhéiat, iáh tekeriwanóntʼtha nakeniákenne neh kenheiát꞉ne. Nók tóhkaʼ iáh thènen tekáien nakariwaniráton tsi nihionkeriwáros, iáh ónhka taiekwéni ne iahionkátʼkaʼwe ne ronónhake. Caesar enhinéken.”

¹² Ehʼthóhʼne ne Festus, sathatitháren ne ronwatenikonráwis, waʼtarihwaseráko, “Caesar entseriwanóntonse, Caesar káti nienhénse.”

Kór Rahothihénton Ne Agrippa Tánon Bernice Niahonwaiaténhaʼwe

¹³ Kwáh ken náhe siʼtsiothohétston ne Ronʼnontí꞉io Agrippa tánon ne Bernice Caesarea nónwe iahánewe neh tsi Festus sakohonkaráwi.

¹⁴ Nónen tóhka nónta thóh shènes, ne Festus wahonikonraientháten ne Ronnonti꞉io ne Kór rahoriwasónhas: “Rónkwe kénʼen íres nehne Felix ronóton;

¹⁵ tánon ne Jerusalem siaháke, ne Sitaeró꞉nons rathitsihenstakweʼní꞉ios ó꞉ni ne rothikstenʼokónhas wahonwariwárho tánon wahonkeriwanóntonse nahiréwate.

¹⁶ Nók wakeróri ne Romeʼró꞉nons nitewahiathótens iáh thóh tehionkwarennáʼon ne ónhka iaiethihiátʼkaʼwe neh thènen ahiakoteriwatewáthon nohénton kwáh tahontatʼkonsakáneren ne ronwathiriwáros tánon ó꞉ni ahonatesennaiéntaʼne nahontahontáteʼne tsi nihonwateriwáros.

¹⁷ Nók neh ken sahónnewe, kwáh káti, iáh thènen tewakatenniskwáton, kwáh tsi óia sahiórenʼne wakátsien ne tsi teiehiatorethákwa tánon wakaténnaʼne nahontahonwahiathínionte ne thóh rónkwe.

¹⁸ Ne ronwariwárhos wahthatítane, nók iáh kíʼ thènen tehonwariwárho neh sewateriwathewáthon tsi nikérakwe.

¹⁹ Thóh khók níkon wahthathiriwatirónten ne raónha tsi nókwa ne rahothiriwiʼiosthóntsera tánon tsi nókwa ne rónkwe Ié꞉sos ronwáiats, neh rawenhéion; nók Kór ratʼróris srónʼnhe.

²⁰ Iáh tiatewakeriwaiéntase onh ní꞉ioht tsi akeriwísake kí꞉ken nahorihoténsons, sók kíʼ wahiriwanónthonse ne Kór tohkàʼken raskáneks ne Jerusalem nòkwa niakáha thóh nónwe theʼtathihiatóret.

²¹ Nók Kór wahariwanónton; nahonwatennikonráren tánon ó꞉ni nehne Rakorakówa tehohiatorétas neh rahoriwasónhas. Sók kíʼ wakaténnaʼne nahonwatennikonráhren tsi nióre ienhihiathénieʼte rahonháke ne Rakorahkówa.”

²² Agrippa wahawénhase ne Festus, “Akenónwene neh kwáh í꞉i ahihiatʼthóntene kí꞉ken rónkwe.” “Tsi wathariwaseráko ne Festus enhiórenne entsiá꞉ronke.”

²³ Nóia sahiórenʼne Agrippa tánon ne Bernice tsi natekarénsaron ó꞉ni rothinenraserónni tahontáwehiate ne tsi hiotʼkennisahákwa rathikwekonhátiene ne ronterihioserakweʼní꞉ios tánon ne rathisennowánens ne kanátakon. Festus wahaténnane, tánon tahonwahiatíhionte ne Kór.

²⁴ Festus wahénron, “Sanontí꞉io Agrippa tánon tsi niháti ne tewakwékon: Ískens kí꞉ken rónkwe kwáh kahnenrakwékon ne Sitaeró꞉nons, neh kén꞉en tánon ne Jerusalem, wahonkerihókʼtase. Tehothihenrétha iáh thatehiothonwentióʼon nahonsarónʼnheke.

²⁵ Nók iáh thènen tewaketʼtsénrion tsi natahoténtion narénheie. Tánon tsi raónha wahoriwanóntonse ne Rakorakówa, iatewakeriwaiéntase ne iahihiaténiete.

²⁶ Nók iáh thènen tewátsien ne kwáh tahiotonhontióʼon ne iahihiátonse ne Rakorakówa. Sók kíʼ kén꞉en sahénton nontahihiaténhawe—tánon kwáh í꞉se sahénton, Sanontí꞉io Agrippa!—nekáti, nónen enseriwísahke ne rahoriwasónha, tóhkaʼ nónwa thóʼne knahótenk enkhiáton.

²⁷ Kwáh iáh tetʼkariwaiéri nakeriwáke nahinóton tóhkaʼ iáh teiawenéʼon tsi nahóten ronwariwárhos.”