Acts 17 - Ohiatonhseratokénti

Ne Thessalonica Nónwe

¹ Kór tánon ne Silas wathatáwenre tsi iahiathó꞉hetste ne Amphipolis ó꞉ni ne Apollonia tánon hiahánewe ne Thessalonica, neh thóh nónwe nikanonshótakwe ne Sitaeró꞉nons ronterennaientákwa.

² Tsi nihiótha tsi nihaweiennóten Kór Ononsatokentíke wárehte. Éhʼthoh nónwe áhsen niwentatokentiʼtseráke nikaríwes wahtathiriwathironthónko nonkwesónhas, Oiatonseratokentíke tathákwasʼkwe

³ tánon ranikonraientáthakwe Nʼoriwatokéntis, ó꞉ni rariwahníratsʼkwe nètho Kerístos ónenk tsi enharonhiáken tánon tentʼtatkétsko ne kenhéʼiatne. “Neh Kí꞉ken Ié꞉sos tsi nikáien kwatharakwénni,” Kór wahénron, “raónha ne Kerístos.”

⁴ Ótiake taʼiakétakwe tánon wahonwanatsiátaraʼse ne Kór tánon ne Silas; neh nònʼne sháka ne iakotihentenhse tionatʼthonwísens ó꞉ni ronatiokowánen ne Greeks tsi niháti ronwasénnaiens ne Rawenni꞉io.

⁵ Nók ótiakes ne Sitaeró꞉nons oʼianontahonatiéraʼse tánon wahsakotihiataróhroke ne iáh thènen tehatiriwásthas taróhtaros ne kanatakónsons tánon wahonʼnitiokónni ne kentiokwákʼsen. Kwáh kanatakwékon tsi wahathinatakári ó꞉ni hiathonwanoharíten ne rónkwe Jason ronwáiatsʼkwe, neh tsi ronwatihiatísakʼskwe ne Kór tánon ne Silas nehne tsi ionkwéne niahonwathihiaténhawe.

⁶ Nók tsi iáh tehonwathihiatatʼtsénrion, wahonwahiathí꞉sere ne Jason ó꞉ni tóhkaʼ niháti nakorénson ne thonetákwen rahothihénton ne kanáta konwatsenhaiénseh niaʼhonwathihiaténhaʼwe ó꞉ni tehothihenréta, “Ki꞉ken roʼnónkwe kwáh tsikʼnonwéson tsi tehathinikónrare! Tánon ónen onkwanátakon nontahónne,

⁷ tánon neh Jason rahonónskon sakoteweiéntonkwe. Kwáh rathikwékon tehatíʼiaks ne Rakorakó꞉wa rahoʼianerénsera, ronthónnions ó꞉ia sehsékon káien ne rononti꞉io, nehne Ié꞉sos ronwáʼiats.”

⁸ Kí꞉ken owennasónhas neh wakarihónni tehiotenonʼianíthon tsi nahakotsirónnien nonkwesónhas ó꞉ni tsi nontahothinákwen ne kanáta konwatsienhaiénni.

⁹ Neh rathitsiénhaiens wahonhión꞉nien ne Jason ó꞉ni ne ronatsiakhésons owísta enhathikáriake tsi ahonsahonwanátʼkaʼwe, tánon thóʼnek sahonwanátʼkaʼwe.

Ne Berea Nónwe

¹⁰ Kwáh tsi niʼiostóre tahiokáraʼwe, neh rohthiriwiʼióstons iahonwanahténieʼte Kór tánon ne Silas nehne Berea nonniá꞉ne. Shahánewe, Ononsatokentíke niaháne.

¹¹ Neh nónwe, nonkwesónhas sénha ne rontenikonrakthókhas tsi ní꞉ioht ne Thessalonica. Kwáh thoʼthinikonrakontákwen tsi rontahónsahtats nateriwanothátsera, tánon kwáh niaʼtewenniseráke tsi ronteweiénstha noiatonseratokénti neh nahothithókenʼse tóhka kén thóʼkenske tsi nahóten ráton ne Kór.

¹² Hiakotiokowánen neh nónwe tahiakétaʼkwe; tánon ionatiokowánen neh iothikwatsénions tionatʼthonʼwísens ne Greek nakontihiatótens ó꞉ni rohnatiokowánen ne ronnónkwes tahonnétakwe.

¹³ Nók ne Sitaeró꞉nons neh Thessalonica nónwe nihatinákere sahatiriwáronke ne Kór tsi roteriwanóte ó꞉ni ne Rawenni꞉io rahowénna ne Berea nónwe, thóh wahónʼnete tánon tahontásawen wathonwanahnonwarawénriaʼte ó꞉ni wahonwatitsiʼriónnien ne onkwesónhas nehne ahonnitsionʼkónni ne kenʼtiokwák꞉sen.

¹⁴ Kwákh óksaʼk ne rothiriwiʼióstons kaniatarakekówaʼne ionsahonwatóri ne Kór tánon tòkah niháti wahonteróhsen; nók ne tenihiáse ne Silas tánon ne Timothy Berea neh nónwe nennéhseʼke.

¹⁵ Ne roʼnónkwe ne wahonwarískote ne Kór tsi wahontʼtsiróten, tsi nióre ne Athens, sók neh Berea nionʼsahón꞉ne ne Kór ionsahsakoriwánieʼte, ne Silas ó꞉ni ne Timothy kwáh tsi niʼiostóre nahónton tsi skátʼke ahonsahónton.

Ne Athens Nónwe

¹⁶ Tsi nikaríwes ne Kór Athens nónwe thesakórare ne Silas tánon ne Timothy, kwáh íken tsi tahanikonrén꞉ne sahatʼkátho tsi titʼkahiathonniserá꞉here neh non nikanátaien.

¹⁷ Sók kíʼ ononsatokentíke non wahtathitarónnion ne Sitaeró꞉nons skátʼke ne iáh tehatiʼsitaeʼró꞉nons tsi nikáien ne ronwasénnaiens ne Rawenni꞉io, ó꞉ni kwáh niaʼtewenniseráke neh tsi iontʼkerontákwas nónwe tsi nihiákon neh nónwe néntsien.

¹⁸ Tóhka niháti ne Epicurean ó꞉ni ne Stoic sakothirihonniénnis ronónha ó꞉ni watathiriwatirónten. Tóhkarah niháti wahatiriwanónton, “Ki꞉ken tekásʼtsias rotheriéntare kén tsi nahóten ráhton?” Ótsiake wahtatiriwaseráko, “Thóh ní꞉ioht tsi wéh꞉ne knakariwiʼiosthontseróten rotaráhkwen.” Neh aoríhwa neh wahonníron neh tsi Kór roteriwanóten tsi nòkwa ne Ié꞉sos tánon tsi sotʼkhétskwen.

¹⁹ Sók kíʼ wahonwahónkaron rahothihénton ne rathitsiénhaiens niáre tsi nihontʼkenniʼsáhas thóhʼnon ne Areopagus, tánon wahonníron, “Ahiakwanónwehʼne nahionkwathókense nahóten kí꞉ken á꞉se karihonnienʼnhí꞉tsera satarákwen.

²⁰ Tsi nahoténsons sathónʼnions iáh nonwénton théʼtsionkwarónken, tánon káti tehionkwaʼthonwentióni nahionkwathókense nahóten kéntons.” (

²¹ Asèken tsi niʼiákon neh non niʼiakawennakeráton ne kanátakon ne Athens ó꞉ni ne kénk thiʼtsiakawénon wahathinónweʼne ne tahonʼtatrohriánion neh kwáh oríhwaʼse.)

²² Kór rahothiʼhénton ne rathitsiénhaiens wahthá꞉taʼne tánon wahénron, “Kwáh tsík nitiotseráton tsi katʼkáthos níse ne Athenró꞉nonhs kwáh íken tsi sewariwiʼióstons.

²³ Asèken tsi natʼkatawénrie ne sewanátakon tánon katʼkáthos tsi nónweh nisehwaterénnaiens, énskat waketsénri ne iehtsienharáhkwa thóh kahiáton, ‘Ne Iáh Tehonwaientéri Rawenni꞉io.’ Nètho tsi nahóten ne sewasénnaiens, nekáti, iahwerohátsien tsi iáh tesewatheriéntare, ónen káti ken nahóten Enkwaróri.

²⁴ Rawenni꞉io, raónha róhson tsi ionwentsiáte ó꞉ni kwáh tsik nahoténsons, rahónha ne Roiá꞉ner tsi karonhiáte ó꞉ni nonwentsiáke tánon iáh ononsatokentíke nónhwe tehénteron tsi naʼkanonsonʼniáton ne ónkwe akosnónsas.

²⁵ Iáh ó꞉ni thènen tatehothonwentióni ne thènen nahonthatsíʼtsion tsi ahtsitewahiótense, ne tsi kwáh rahonhatsíwa tatháwas natónnhets ó꞉ni nahonhnísera tánon kwáh tsi nathahiakotonwentioníhake ne tiehiatátʼtion.

²⁶ Tsi thoʼhiatíson ne saiátat rónkwe thóh nitsiaʼwénon tsi niaʼteienekwénsakes nónkwe tánon kwáh tsiknonwéson ne tsi ionwentsiáte nisakóteron. Kwáh rahonhatsíwa ohénton thóh kwahʼtákwen tsi nienkáhewe tsi ni kawistáheks ó꞉ni kwáh kathóʼkenk tsi nónweh nahathinákereke.

²⁷ Né aoríhwa thóh nihoiéren ne nahonwaiatísake nonkwesónha, tánon nonhtiérenk enhonwahiatatʼtsénri ne tsi rontʼthókas rahiatákʼtha rónnhes. Tánon kíʼ ó꞉ni ne Rawenni꞉io iáh aínonʼnióre tétres tsi nónwe nítewes;

²⁸ tsi nahóten nónkak iakáwen, ‘Rahiatátʼtha nonʼnihionkwataténron ó꞉ni tsi niʼhionkwatenniseraténions ó꞉ni tsi nitsionʼnhétie.’ Kwáh tsi nihónen ne tionkwetaʼsónhas ne rathihiátons, ‘I꞉i seh ó꞉ni sonkwaienokónhas.’

²⁹ Tsi Rawenni꞉io sonkwaienʼokónha, tóhsa tewérek ne raónha thóken nihahiathóʼten tsi ní꞉iot ne owistanóron tóhka ó꞉ni kawistaráken thóka ó꞉ni nonén꞉ia, thóh nahontahiakorennahónhake nónkwe aiakohiathonniserónnike.

³⁰ Ne Rawenni꞉io thatesakokánerakwe tsi náhe ne ónkwe iáh tehonwaienterí꞉ne, nók kíʼ nónwa ónen roriwíson kwáh ratikwékon tsik ʼnonwésons ne tahonsahontʼkaraténi tsi nihatiweienʼnák꞉sens.

³¹ Asèken rawenniseraráhkwen tsi kwáh niaʼtehionkwétake ne tsi ionwentsiáte tsi tensakohiatórete kariwakwarishiontserákon tsi nihohiatarákwen nètho rónkwe neh tehahiatórete. Neh kí꞉ken sakonesténni kwáh tsi niaʼtehionkwétake tsi nishokétskwe nètho rónkwe ne kenheiátʼne!”

³² Sahonatʼthóntene ne Kór rotharákwen tsi tentsiontʼkétsko ne kenheiát꞉ne, ótsiake tahonwaiéron, nók ótsiake wahéron, “Séhkon tehionkwatonwentióni neh ahonsasthárakwe.”

³³ Tánon kíʼ ne Kór ahéren sáreʼte tsi ronatiataróhronne.

³⁴ Ótsiake ne roʼnónkwe wahonwatiátaraʼse tánon tahonnétakwe, thóh rahiátaʼre ne Dionysius, nehne ratsiénhaiens; tieʼhiáta ó꞉ni tsiakothonwísen Damaris iontáʼtiats, séhkon tòkah niháti.