Acts 14 - Ohiatonhseratokénti

Thóh Nón Néh Iconium

¹ Kwáh neh sáka tsi thóh naháwenʼne neh nón Iconium tsi nitsawén꞉en ne Antioch nehne Pisidia nónwe: ne Kór tánon ne Barnabas ononsatokentíke niaháne tánon kwáh tahiateweniénton tsi wahiatáti neh wakarihónni kwáh ronatsiokowánen ne Sitaeró꞉nons ó꞉ni ne iáh tehatiʼsitaeʼró꞉nons tahonnétakwe.

² Ne Sitaeró꞉nons tsi niháti ne iáh tethonetákwen wahsakothitsirónnien ne iáh tehatiʼsitaeʼró꞉nons tánon iasakonatsiatónti ne thonetákwen.

³ Ne iateriwanótʼtha kwáh karíhwes thoʼnónwe ieniteróntakwe, kwáh rotiriwaníron tsi Roiá꞉ner ronwatarákwen, raónha wasakoriwaníratʼtse tsi orihwí꞉io íken ne rahonateriwanothátsera ne kénteron neh tsi tasakáwen ne kasatsʼténsera ne éhʼtho naiawénseron ne ioriwanerakwathénions ó꞉ni ne ionerákwat.

⁴ Nonkwesónha ne kanátakon ratinakerénion wathatinenrakʼkhásion: ótsiake Sitaeró꞉non tahonwatiriwáhwase, ne ronátsiakhes iateriwanótʼtha ne tahonwatiríwahwaʼse.

⁵ Ótsiakes ó꞉ni nehne Iatehatiʼsitaeʼró꞉nons tánon ne Sitaeró꞉nons tahonwatiriwáhwase, skátke ne ohénton iehónnete, iathotiriwaiéntase nahonwanakʼkónten ne iateriwahnótha tánon ahonwathinenhióhiake.

⁶ Nónen ne iateriwanótʼtha wahiáronke nètho, tsi tkanatowánens non iahiatekwásen nehne Lystra ó꞉ni ne Derbe nehne Lycaonia nónwe ó꞉ni nakʼthón꞉tses tsi kanakeraseráien.

⁷ Thóh nónwe nahiateriwanóten ne kariwí꞉ios.

Thoʼnónwe Ne Lystra Óni Ne Derbe

⁸ Thóʼnon ne Lystra ne rónkwe nehne kwáh sontahanákerate sihohiatakenhéion tánon iáh nonwénton tehokwénion ne tahothekahákwen.

⁹ Thóh renskwáhe꞉re ó꞉ni rotahónsate ne Kór tsi nihótare. Kór wahátʼthoʼke tsi tawethákwen ó꞉ni ahónton nahonsahonwátsiente, sók kíʼ kwáh hiatotʼkáneren

¹⁰ tánon tahakwísron tsi wahatáti, “Téstann kwáh satʼtakwaríshi!” Ne rónkwe kwáh hiatanitiónkwakwe tánon tahatásawen wahatentiónko.

¹¹ Nónen nonkwesónha sahontʼkátho tsi naháiere ne Kór, wathotihénrete ne Lycaonian tsi nihonrenhtkhatsero꞉ten, “Ne ratiní꞉ios kwáh nehne ónkwe wahónton tánon ó꞉ni wahonkihhiatórenne!”

¹² Ne Barnabas Zeus wahonwanáthonkwe, nók ne Kór Hermes neh wahonwanáthonkwe, tsioríhwa tsi raónha ne ratʼretsárons.

¹³ Ne ratsihénstatsi neh roriwahwaséhakwe ne Zeus raní꞉io, neh rahononsatokénti thók átste ne kanátakon nónwe nikanonsóhtaʼkwe, tehotinákares ratítsinn tasakotiʼiaténhawe tánon notsitsiasónhas thóh ne tsi hiotenʼenrénton, Asèken neh raónha ó꞉ni nonkwesónhas tehonatonwentiónine ne katshénen akonwateskónten tsi ahonwatikwénienste ne ronteriwanhótas.

¹⁴ Nónen ne Barnabas tánon ne Kór wahonatʼthóntene tsi nahóten rónnere tsi nahatí꞉iere, wahniratsiónko ne rahonatʼtseronnísa tánon kanenrákon nianitátke, tehotihenréhtaʼne,

¹⁵ “Onhnontiéren tsi éhʼtho naisewáiere? Í꞉i kwáh thóh naʼtehiakénonwe tsi kíʼ niseni꞉ióht! Kén꞉en hiákenes nahiakenirihówanaʼte ne kariwí꞉ios, nehne tahonsakwakaraténi tsi nisewasénnaiens ne iáh thènen tekariwástas nók kíʼ neh nahónton neh ahonsahtsisewasénnaien ne ronnhehónwe Ní꞉io, tsi nikáien ne rosahánion ne tsi karonhiátes ó꞉ni tsi ionwentsiáte, kaniatarakekówa, tánon kwáh tsi nahoténsons neh non nikonónnhes.

¹⁶ Ne tiothohétston sakoriwáwi nonkwesónha ne kwáh tsík tiahatiʼieránion.

¹⁷ Nók kíʼ tiókonte rawenestonhátie tsi thóh ítres neh tsi niʼiohiáneres tsi nisakotiéraʼse nonkwesónhas: tsi karonhiátes non tatheniétas nokennorésera ó꞉ni tsi niʼieientwákwas; hiakwhanóntens ó꞉ni neh ranahnónktha ne seriáne natʼtsennonniátseras.”

¹⁸ Sékon khisʼnònne kí꞉ken owennasónhas iáh tehiokwénion ne tahonwathitáston nónkwe tsi ahonwanateskóntʼthaʼse.

¹⁹ Ótsiakes ne Sitaeró꞉nons Antioch tánon Pisidia ó꞉ni Iconium nonhnontahónne; tánon watesakothinikonrakénni nonkwesónhas nahonwanatsiátharaʼse, wahonwanenhió꞉iake ne Kór tánon wahonwahiathísere tsi sahonwarékwate ne kanátakon, thóh nihothinikonróten tsi warénheie.

²⁰ Nók nónen ne rotiriwiʼióston wathonwatsiatáton, thonsahátaʼne tánon kanátakon nionsáre. Nóhia sahiórenne raónha tánon ne Barnabas Derbe niaháne

Tsi Nionsáne Ne Antioch Thóh Nónwe Ne Syria

²¹ Ne Kór tánon ne Barnabas wahʼhiateriwanóten ne kariwí꞉ios neh nónwe ne Derbe ó꞉ni thóh nontáwe iakotiokowánen tahonweta꞉kwe ne Ié꞉sos. Ethò꞉ne Lystra, tánon Iconium, ó꞉ni ne Antioch thón nónwe ne Pisidia nionsáne.

²² Wahsakothisatsténseron ne iakoriwiʼióstons ó꞉ni wasakothinikonráreke naʼiontsénawasthe ne tewethákwen. Tsi wahsakothirihónnien “Kwáh iawethowánen tsi ní꞉ioht tsi thetewathohesthánions ne karonhiakénseras niaʼitewatáwehiate ne Rawení꞉io rahonakeraserákon.”

²³ Kwáh skanonsátʼtions tsi ionterennaientakwaʼnónwe tsi wahsakothihiataráko ne rontʼretsiárons, ó꞉ni tsi wahonterénnaien tánon wahonnentóntiete, ó꞉ni tsi tahonʼnétakwe rahonháke kíʼ ne Roiá꞉ner.

²⁴ Tsi wathonʼhontsíʼiake ne Pisidia, Pamphylia hiahánewe.

²⁵ Thóh nónwe ne Perga hionsahiateriwanóten ehʼthóhʼne Attalia nionsáhne,

²⁶ tánon thóh nónwe thontahiaténti sahiatʼtsiróten Antioch nionsáhne, tsi nónwe thonwathiríhonte tánon ó꞉ni neh wahotinónstate ne Rawenni꞉io rahoténrat tsi nikahiotenseróten tsi ónen waníh꞉sa.

²⁷ Hiahánewe ne Antioch, wasakothihiataróhroke nonkwesónha nononsatokentíke tánon wasakotiróhri tsi nahoténsons ne Rawenni꞉io wahsakohioténseron nahothihióten tánon ó꞉ni tsi nasakohahónnien ne iáh tehatiʼsitaeʼró꞉nons onhnaʼiáwenne nahontahonʼnétakwe.

²⁸ Tánon kwáh karíhwes thóh nónwe skátʼke rathinákerekwe ne rotiriwiʼióstons.