Acts 1 - Ohiatonhseratokénti

¹ Tekanóhron Theophilus: Ne tiotʼthiathonseraʼtserénton nakhiatónsera neh wakʼkhiáton noriwakwékon tsi nihoʼieránion ne Ié꞉sos ó꞉ni tsi nisahkorihonʼnién꞉ni neh kwáh sonʼtahathásawen ne rahohioténsera

² tsi nióre siakáheʼwe karonhiáke nionʼsahatʼthaʼrátate. Nohénton sonsaʼhatʼtharátaʼte, rahosatsʼtenserákon ne Ronikonratokénti tsi wasakorihonthónʼnion neh ronnónkwe ne sakohiatarákwenʼne nehne skát꞉ke ratikweʼkónʼne.

³ Kaiériʼniwenʼniseráhsen shiʼtiotohétston tsi náhe tawenhéionʼne wéso ioriwáke shesakothoʼthashiénʼni neh nakariwaníraʼte neh tóhsa thènen tahonthaiakonikonrakéhaʼke tsi srón꞉ne. Ronwá꞉ken, tánon neh wasakotharáse ne Rawenni꞉io rahonakerásera.

⁴ Tánon nònen skát꞉ne shionsahónton, ken nasakotsiawénratʼse: “Tóhsa sewanakeráko ne Jerusalem, nók neh sewateráhrat nahthatawítsera tsi nikwaróhri, neh nathatawítsera tsi nihorahrátsʼton ne Rakeʼníha.

⁵ Ne Sawátis onékanos sakonekwahétsʼtakwe, nók tsi nióre ne thoʼkára nen wenʼniseráteʼke neh ensewatenekwahétsʼtakwe ne Rahonikonraʼtokentísera ne Ronokonriʼióston.”

Ié꞉sos Karonhiáke Nionsahatʼtharátaʼte

⁶ Nónen neh ratikweʼkón꞉ne skátne thonʼsahontátʼken ne Ié꞉sos, wahonwariwanóntonse, “Saiá꞉ner, neh kén꞉en tsi iowistahehátie tenthesheʼión꞉ken neh Israerʼró꞉non ne kanakerásera?”

⁷ Wahsakawénhase ne Ié꞉sos, “Ne tsi nikawistáhes ó꞉ni tsi nihiawénserons neh kahkwatakwáton ne Rakeʼníha rahosatsʼténsera, tánon iáh í꞉se tesewariwáke nahisewatheriéntarake nónen thoʼnenʼiáwen꞉ne.

⁸ Nók nónen ne Ronikonriʼióston entsisewahiatórenʼne, kwáh ensewahiatanánonʼne ne kasatsʼténsera, tánon í꞉se enskwariwaníratʼtse ne Jerusalem nónwe, kwáh kanakeraserakwékon ne Judea ó꞉ni ne Samaria, tánon ó꞉ni ne tsi iehiotonwentiokʼtaní꞉on.”

⁹ Ne nónen saharihókten sahatʼtarátate Karonhiáke nionsáre tsi tiaʼtehonwakánere, tánon notsìkera tahoróhroke neh wahonatʼrenhósten.

¹⁰ Tiaʼtehotikarohtáhon ne karonhiáte kwáh tionsahonówirethe, kharehónen tenihiáse tenónkwe karakenseróskon ronhatieronʼniáton thontahiawénstsi rathihiatákta watʼthítaʼne

¹¹ tánon waníron, “Galileeronons, nontiéren tsi thóh ísewaʼte karonhiáke hiatesewakánere? Kíʼ Ié꞉sos, tsi thonʼsehsewatetʼkhási Karonhiáke nionʼsáre, kwáh thóh ní꞉ioht tsi tètʼre tsi ni꞉íoht tsi watsísewake Karonhiáke nionsáre.”

Ne Judas Theshonakʼthakwén꞉ni

¹² Ehʼthóhʼne ne rathikweʼkónʼne sahthontahonʼnontáts꞉nenʼte tsi tionónte ne Olives Jerusalem nionsahón꞉ne, ne neh kákʼnon ne satewatheniententserí꞉en nihioháhes tsi nióre tkanátaien.

¹³ Hiahatinatáraʼne tánon hionsahathirátʼten ne tsi tionákʼthaien tsi nónwe nihathitheróntaʼkwe neh꞉ne Tiér, Sán, Sák, tánon ne Andrè, Philip tánon ne Atónwa, Bartholomew tánon ne Wátio, Sák Alphaeus ne roiénha, Simon Rahontsanónstats, tánon ne Jude neh꞉ne Sák roiénha.

¹⁴ Hiotʼkáte skátne ienhónton nahonterén꞉naien, skát꞉ke ne tsionatʼthonwésens ó꞉ni ne Onwári neh꞉ne Ié꞉sos ronisténha ó꞉ni skát꞉ke ne ronthatekénhas.

¹⁵ Tohkára nónta onakènʼke wahontʼkenʼnísa ne thoʼnethákwens, kakʼnon ne énskat tewenʼniáwe tánon tewásen nihátikwe, tánon ne Tiér wahthátaʼne nahatáti.

¹⁶ “Tewatenrosónhas,” wahénron, “Noriwathokén꞉ti teʼiohthonʼwentióhonʼne niaʼkariwaiérite neh tsi nihoriwakanón꞉ni ne Ronikonriʼióston tsi nihothatíʼon raonháke ne Táwit, ohénton thot꞉róri ne Sitas raonháke, rahónha iesakosahrínon tsi ronwaienáhon ne Ié꞉sos.

¹⁷ Judas rahiatarákwe nonkwentiókwakon, asèken ronwahiatarákwenʼne nahosniénonʼke nonkwahioténsera.”

¹⁸ Nówista ne Judas roienáʼon tsi nihoteweienaksáthon wahahethaní꞉nonthe, thohʼnónwe hiahahiatsénenʼne tsi wahrénheʼie; wahthatenekwenʼtanékare tánon akwékon ne rahiátakon takonthihiáken꞉ne.

¹⁹ Akwékon nonkweʼsónha ne Jerusalem nónwe niʼienákere waheriwáronʼke tsi nahawen꞉ne, kwa káti tsi nihonronkhatsero꞉ten ne꞉tho kahentáke neh wahathináthon꞉kwe ne Akeldama, tsi nikéntons “Ionekwénsare ne kahentáke.”

²⁰ “Tsi nikahiáton ne kahiatonserákon ne Teieriwakwáthas, ‘Aiáwens ne tsi ronónshote ononsóskon ahónton; aiáwens tóhsa ónka thóh ahonsahión꞉tsien.’ Kwáh ó꞉ni kahiáton, ‘Aiáwens ónkak tahonsahonwanakʼtákwen tsi nihohiotenserótenʼne.’

^21-22 “Ehʼthohʼká꞉ti, ónen tsikʼónkak entionkhihiatsiátaraʼse nahathiriwanírate tsi nisohthonʼnhéton ne Roiá꞉ner Ié꞉sos. Ónenk tsi neh nónkak ne rónkwe ne skátʼke tsi ní꞉ioht tsi tehionkwathawén꞉rie ne Roiá꞉ner Ié꞉sos, thóh tiotásaʼwe ne Sawátis sahatheriwanóten naʼtenekwahéston tsi nióre sathonsethewatetʼkháshon ne Ié꞉sos karonhiá꞉ke nionsáre.”

²³ Sók kíʼ tenihiáse wahonwathináton: Só꞉se, nehʼne Barsabbas ronwanathónkwa (neh꞉ne Justus tsi ronwaientéri), tánon ne Matthias.

²⁴ Ehʼthóhʼne wahonterénnaien, “Saiáner, í꞉se akwé꞉kon senikonraientéri, káti takwanatónhas ónka kí꞉ken tenihiáse ne sehiatarákwen

²⁵ neh ahohióten nahateriwanóten tsi tensohnakʼthákwen ne Sitas, neh thóh nónwe nieʼhawénon tsi nónwe thóh nákʼthe.”

²⁶ Ehʼthóhʼne owaste wahonste wahathiwasthótsion nónka kí꞉ken tenihiáse ahonwahiataráko, tánon nehʼne Matthias wahonwahiataráko, neh sahsakotiátharaʼse ne énskat-iawénre niháti ratikweʼkón꞉ne.