3 Sawátis 1 - Ohiatonhseratokénti

¹ Ratretsárons— Kih iehihiatonhni rinorónkwa Gaius, tsi niká꞉ien ne kwáh riʼnorónkwa.

² Tekanó꞉ron ontiaténro, wahkaterén꞉naien ne oriwakwé꞉kon ahisaianeráse tánon ahisatakarí꞉teke—tsi wakaterièn꞉tare tsi kwáh iotakarite ne satónnhets.

³ Tsi nakaʼtsenhnón꞉ni otià꞉kes ne rothiriwiʼióstons wahónnewe tanon waonkró꞉ri tsi nió꞉re tsi sariwató꞉ken tsi nokwáh ne tkariwaié꞉ri—kwáh tsi tió꞉konte thóh nonnishonnheʼtie ne tkariwaié꞉ri.

⁴ Iáh sénha nó꞉ia tewakaʼtsennonniaténnis nakáronke ne keienokónha thóh non niʼonnonnhetie ne tkariwaié꞉ri.

Gaius Wathonwarensáron

⁵ Tekanó꞉ron ontiaténro, tsi nisariwató꞉ken tsi sehioténse nakorénsons ne rothiriwiʼiostons, iawerohátien ne kenk naonthaoné꞉non.

⁶ Kén꞉en kih ionterennaientháhkwa wahathitharákwe ne sanoronkwáhtsera. Ahsatʼthontátseke seienáwas niahontasónteren tsi ronthahí꞉ne ne nahónton naonthatsenikonraié꞉rite ne Rawenni꞉io.

⁷ Tsi tonatáhsawen tehonatʼthahákwen né꞉ne Kerístos ahonwahiò꞉tense kwa iáh tahóten tehothiienaʼon ne kaienawasétsera ne iáh tethonethákwe non nahontaiawénon.

⁸ Kih ionkwariwiʼiostons, ónenk káti tsi enieʼthiié꞉nawase né꞉tho ronhnónkwe, né꞉ne tahitewaiéna ne rahothihioténsera né tkariwaié꞉ri.

Diotrephes Tánon Ne Demetrius

⁹ Nihionsa iakheiatónse tsi tionterennaientáhkwa; nok Diotrephes, ranónwes nohénton akénhake, kwáh iáh thé꞉nen tehothononsatáton tsi niká꞉ton.

¹⁰ Nó꞉nen ienkéwe, eʼthò꞉ne, akwé꞉kon enkakerákwe tsinihotieránion; tsi níshon kwénni ne wahétkens ó꞉ni tsi nihonó꞉wens! Nok iáh kih neh tsatehoié꞉rise; iáh thatesakoróthons ne rotiriwiʼiostons nó꞉nen tenʼonthátken, kwáh ó꞉ni sakorístha nónhka aiénre tahonwanaróthon ne tánon ó꞉ni ratheniéntha ne tahontasakoiatinekénwe ne tsi ionterennaientháhkwa!

¹¹ Tekanó꞉ron ontiaténro, tóhsa senakéren nahóten ne wahétken, nok neh sehnakéren ne ioiánere. Ónhka ne ioiánere tsi neniéhiere neh tsi Rawenni꞉io rahonkwéta íken; ónhka ne ken nieniehiére ne wahétken neh kih tsi iáh tehonwáken ne Rawenni꞉io.

¹² Onhkwetaʼkwékon tehonwarensárons ne Demetrius; né꞉ne kwáh thariwaié꞉ri tsi ní꞉ioht tsi ronwatatiáse. Tánon thóh wahakwáren nonkwariwaniratʼtsera, tanon saterièn꞉tare tsi nahóten eniakwénron né꞉ne norihwí꞉io.

Ó꞉nen Tesesakononwéron

¹³ Tsi niwé꞉so wátsien nakonhró꞉ri, nok iáh kih téhkere nohiathónkwa tánon ne iehiathónkwa oné꞉ka ahkaste.

¹⁴ Aiá꞉wens kwáh iostó꞉re ahonsakónken, eʼthò꞉ne kwáh iatheteniʼiati tsi entenikará꞉ton.

¹⁵ Senikwekónha ne skén꞉nen. Rathikwé꞉kon ne sateroserashónhas teiesanonwerátons. Kwáh iatesháti tsi enséken nonkwatéros.