2 Timothy 3 - Ohiatonhseratokénti

Nonàken Entewenniserathénionke

¹ Sehiárak kwáh enwenthoráhtseke tsi nenwenniseroténseke nonàken tewenniserathénions.

² Nónkwe ahkahónwakʼkhok enhiontathehiárake, enhiakotetʼtséntahʼke, tenhiontatenrénsaron, ó꞉ni enhiontathónnike; kwáh ó꞉ni ensakotinikonratsáthake, iáh thasakotiwennarákwaʼke ne ronwahtiʼiénha, iáh thènen karihwatakénhake, iáh tahotiriwiʼiostónhake;

³ iáh tahontahotirihwaiériʼke, enhoneriasaníronke, enhotihianerenseraksénhake, enhonnonkwetaʼtsénhake, enhatiniakátsʼtheke; enhatisónʼsheke ne ioiánere;

⁴ kwáh enhonnonkwetaʼhetkéntake, iáh tiatahonnonthónnionwe, kwáh enhontathonníheʼke; enhatinorónkwahke natenikonroriátsera tsi ní꞉ioht ne Rawenni꞉io.

⁵ Kénk tsienhatiʼiérate nonkwariwiʼiostóntsera, nók enhatikénron ne kwáh kasatsʼténsera íken. Sehiatiatontákwas neh nihionkweʼtóten.

⁶ Ótiakes tsi iakonnonshó꞉ton nienhónne tánon entesahkohnanóntonse ne iotiʼtsihióhas tionatʼthonwísens neh iotikéthe tsi niskontateriwástani tsi nihiotirihwánerens tánon neh iotíreh tsi natekonsónhas naskanéktseras,

⁷ iónkwe neh tiókonte ne wateniéntʼtha nakaweientéthaʼne onk iáh nonwénton takakwéni nahioteriéntaraʼne noriwí꞉io.

⁸ Tsi kíʼ ní꞉ioht ne Jannes ó꞉ni ne Jambres ronwáhsonskwe ne Mahís, tohkáʼti nònneh ní꞉ioht kí꞉ken onkwesónhas ratíshons noriwí꞉io—nonkwesónha neh iáh tetkaiéri tsi ronnontónnions tánon ronónha seh rotirihwanórons ne tewetákwen.

⁹ Nók kwáh kíʼ iáh ainonʼtiáhonʼne, tioríhwa tsi onkwetaʼkwékon enhiontkátho tsi nitonatónnokʼthe. Neh꞉ne kwáh éhʼthoh nihiotihiatawén꞉en ne Jannes tánon ne Jambres.

Onakènkha Ne Karihonniennítsera

¹⁰ Nók níse wátiereh nakerihhonniennítsera, tsi nikeweienʼnóten, tánon tsi nikatiérah ne tsi kónnhe; satkáton naketakwátsera, tsi wahkenikonrí꞉io, nakenoronkwátsera, tsi wahkenikonkátsthe,

¹¹ tsi nihionkʼkenronníʼon, tánon nakeronhiakénseras. Sateriéntareh akwékon kíʼ éhʼthoh niwahtiatawén꞉en thóh nonwe ne Antioch, Iconium, ó꞉ni ne Lystra, neh ioronhiakenseratʼtsani wahkatakátsʼtaton! Nók kíʼ Roiá꞉ner tiókonte sakeniakénton.

¹² Kwáh onkwetaʼkwékon ónhka nénʼienreh ahiakoriwiʼiostóntahke tsi tenhonterihwasónteren ne Kerístos Ié꞉sos tsi enhiontateronhiákenthe;

¹³ tánon ne ionkwetahétken tánon ne tesakhorenkénnies kwáh sénha enhotihetkénten, sakotinikonraténnis nakorénsons tánon ó꞉ni ronwahtinikonraténnis nón꞉ne ne ronónha.

¹⁴ Nók níse, iasatasónteren ne kariwahkwarishióntsera iesarihonniénni tánon kwáh ioriwaníron tsi tisetákwen. Sateriéntare ónhka ne iesarihonniénni,

¹⁵ tánon iehiárak kwáh siseksáhak, sisateriéntare ne Orihwatokéntis, neh kakwénies tisáwis natʼthokát꞉tseras tsi nithewétha ne kahiatakenátsera ne tewetákwen rahonháke ne Kerístos Ié꞉sos.

¹⁶ Akwékon norihwatokentísons Rawenni꞉io rónnhets tánon kwáh kariwástha náhionsthe nahiakorihónnien, iakorístha ne thènen tahionterientawénrie, tánon skakwatákwas naʼterientawenrhétseras, tánon iakorihonniénnis nahontakarihwaiérihke tsi ahiakónnheke,

¹⁷ nekáti néhʼthoh nón꞉kwe ne Rawenni꞉io ronwahiótense ne kwáh aierihwaienthérihʼke ó꞉ni ahiakotatheweiennentáʼon kwáh tsík nakahiotenseróthe aiakohióten ne kahiotenserí꞉io.