2 Timothy 2 - Ohiatonhseratokénti

Ne Rorihwatóken Rotherí꞉ioʼse Ne Kerístos Ié꞉sos

¹ Onk níse, koniénha, sesátsʼtek thoʼnónwe ne kenténron neh tsi I꞉i onhkwáwenk tsi tehionkwaterihwasóntere ne Kerístos Ié꞉sos.

² Iahásaf ne karihonniennítsera neh satʼthontéʼon wakatʼrórih akohénton ne iakotiokowánen ierihwanírats, tánon nasakonohesten ne iakorihwatóken, ronónha ó꞉ni enhatikwéni nasakotirihónnien nakorénsons.

³ Sahtiátaren ne karonhiakénsera, neh tsi niʼsariwahtóken tsi tiaʼtherí꞉iose ne Kerístos Ié꞉sos.

⁴ Ne ratherí꞉ios ne rotʼtsiotarónni tehotonwentióni nahontahonikonraiérithe ne rasennowánen tánon iáh tathehariwaiéstha ne óia nihiorihoténsons.

⁵ Ónhka ne tehatákwas tsi teharátʼtats neh tehonrèrons iáh tahónton ne tahaténtsa ne kahkarhiátsera tóhka iáh tahathewénnaraʼkwe tsi nikaianerenserótens.

⁶ Ne raiéntʼthos neh rohronhiakén꞉en tsi rohiotén꞉en tehiotonwentióʼon ne rahónha ahontahahénthe ahaiéna ne kaientʼwáhkwen.

⁷ Sanonthonniónko tsi nahóten kathónnions, tioríhwa ne Roiá꞉ner enʼiasniénion noriwahkwékon aisanikonraiéntaʼne.

⁸ Tiehiárak ne Ié꞉sos Kerístos, tsi sonwahkétskwen ne kenheiátʼne, Táwit nón nithotwahtsirínon, tsi nihionkwarihonniénnis ne kariwí꞉ios tsi nikaterihwanótʼtha.

⁹ Tsioríhwa tsi katerihwanótʼtha ne kariwí꞉ios, wahkeronhiáken tánon ó꞉ni kwáh oronkwása ìkneren tsi ní꞉ioht ne sohterihwatewáton. Onk ne Rawenni꞉io rahowénna iáh nèn꞉ne oronkwása tèken,

¹⁰ káti orihwaʼkwékon wahkatakastáton neh akoriwáhke tsi nihiákon ne Rawenni꞉io sakohiatarákwen, ehnahontáwe rohnónha ó꞉ni ahatiʼiéna ne kaiatakenáh꞉tsera tsi nítewes rahonháke ne Kerístos Ié꞉sos ó꞉ni ne ionhehónʼwe kahiatanerakwátsera.

¹¹ Ne kí꞉ken neh kwáh tóhkensʼke tsi nihiónton: “Tóhkaʼ skátke ionkwenhéion, kwáh káti ó꞉ni skátke tsi entsitiónnheʼke.

¹² Tóhkaʼ ienkakóntakwe nahionkwakátstehke, skátke káti ó꞉ni tsi entewatkórasthe. Tóhkaʼ entsiʼtewatonnhíhaʼse, rahónha ó꞉ni ensesonkwatonnhíhaʼse.

¹³ Tóhkaʼ iáh tehionkwariwatóken, iehiokontákwen neh tsi rohriwahtóken, tsioríwah tsi iáh neh tahónton ne rahónha ahatatonnhíhaʼse.”

Ne Rahiotenserí꞉io

¹⁴ Neh kí꞉ken seieiarákwen nonkwesónha, tánon ioriwahníronk tsi sehiaronkáten rahohénton ne Ní꞉io tóhsa tehatiriwahwénron tsi nókwa ne owennasónhas. Iáh nèn꞉ne thènen tekástha, onk kwáh nek khók iakokarónnis tsi nihiákon ne iakotahónsathe.

¹⁵ Kwáh iatesatatʼtiáhat nahónton nahiariwahníratʼtse ne Rawenni꞉io, tsi nisahiotenseróten iáh tesathéhens, tsi nikáien ne kwáh taiérits sakorihonniénni ne Rawenni꞉io rahotheriwahthotátsera noriwí꞉io.

¹⁶ Satiatatískwat ne kariwaiesátshera ó꞉ni ne tehiotenonwahroríthonʼthe tsi ní꞉ioht tsi rontátis, kwáh nèn꞉ne nek khók sénha ahéren iakoiatenhawítha tsi nókwa ne Rawenní꞉ioke.

¹⁷ Neh ní꞉ioht ne karihonniennítsera kwáh neh꞉ne takwaháson énwahke nowáhron. Tenihiáse thóh ní꞉ioht tsi sakotirihonniénni neh꞉ne Hymenaeus tánon ne Philetus.

¹⁸ Rohnatewenthéton tsi nòkwa norihwí꞉io tánon sakotinikonraʼtsátha ótsakes ne tiakawetákwen ne tsi rónton ónenk tetsionkwakʼkétskwen ne kenheiát꞉ne.

¹⁹ Nók ne ioníron thekenstenrotákwen nètho ne Rawenni꞉io rohkéron iáh tahónton ne tahiowéntonwe; tánon thóh ken nikawennótens kahiáton: “Ne Roiá꞉ner rohtheriéntare ónhka ne rahonkwetaʼsónhas” tánon “tsi nihiákon ne iónton Roiá꞉ner rahonkwéta íken ónenk tsi tentionkʼkarathéni tsi nihiontiéra ne iáh tetkaiéri.”

²⁰ Kànon ne kanonsowáhnen kwáh niaʼtekákʼsakes thóh nón nikáiens: ótsakes kawistarákens tánon owistanórons nahóten ionniáton, ótsakes óiente tánon ionawastakarí꞉io; ótsakes kwáh kaksahtokenhátons, ótsakes thiʼkawenní꞉io tsi nikaksótens.

²¹ Tsi nihiákon ne iaʼtheiehiáti entiontatonnakaʼnónnien tsi nòkwa ne iáh tehiotkwéniens, ehʼthóhʼne kíʼ rahónha ne káksas enkénhake nahónston ne iotkwéniens, karihwatokentíston ó꞉ni kástha nárasthe ne ranonsakweʼní꞉io, kaweiennentáʼon naioʼhióten tsík nahóten ne kahiotenserí꞉io.

²² Satiatatískwak ne rahononweséntseras ne kenʼnihthotihiónsas, onk neh saskèna ne karihwahkwarishióntsheras, tewetákwen, kanoronkwátsera, ó꞉ni ne skénnon, skátke tsi niháti ne ronʼneriaʼsí꞉ios iehonwanátons ne Roiá꞉ner nasakoiénawaʼse.

²³ Nók satatiathotàro tsi nòkwa ne ononwahrorítha ó꞉ni takariwahwénron; sateriéntare tsi neh iewahtihénthos ne aterihotarókʼtseras.

²⁴ Tsi Roiá꞉ner rahonhátsera, iáh thehiówenk ne taseriwahkèna. Saterihwaiénni kwáh akwékon tsi ahontesarihwaiérihke, ionkweʼtí꞉io ó꞉ni ronikonkásthe sakorihonniénni,

²⁵ tsi thoriwaiéri tsi nensetakwaríshion ne iesáswens, tóhkaʼ nónwa ne Rawenni꞉io sakotehsennáwis nahonsahontatʼréwathe ó꞉ni nahathiʼientéraʼne ne oriwiʼhioʼónwe.

²⁶ Tanon ehʼthóhʼne entsóntʼthoke tánon ensathiniákenʼne tsi roterístaien ne ótkon, tsi sakoiénen tánon tesakonontónni nahonwahwénnaraʼkwe.