2 Tiér 1 - Ohiatonhseratokénti

¹ Simon Tiér nón kíʼ nitiothawiton, rohiótense ó꞉ni roteriwanotáni ne Ié꞉sos Kerístos— Tsi niháti ne thonʼwanáwi né teskaieróntare ne iorihowánen tewetákwen sateionkwahrihwáhke ne tsi nitóhrihwaiéri ne Rawenni꞉io tánon ne Sonkwaiatákwas Ié꞉sos Kerístos.

² Ne kenténrat ó꞉ni ne skénnon aisewawénhake kwá akanánonke tsi nitiohawiton ne satʼthotʼkhátshera ne Ni꞉ioʼne ó꞉ni ne Ié꞉sos Sonkwaiáner.

Rawenni꞉io Sakonáthon Ó꞉ni Sakoiatarákwen

³ Ne ionnheʼónwe rahosatsʼténsera Rawenni꞉io tesonkwáwi neh꞉ne kwá tsi nahóten tahionkwatonwentiónike tsi aitiónnheke ne oriwiʼioʼónwe kariwiʼiostóntsera ne tsi tesonkwáwi nonkwatʼthotʼkhátshera tsi nikáien ne iesonkwanáton naitewatiátaren ne rahohiatanerakwatserákon ó꞉ni tsi nihohiánere.

⁴ Kén kíʼ ní꞉ioht tsi tesonkwáwi ne kwá kowánen ó꞉ni iorihowáhnen natathawítseras ne rohrarátston, nekáti tsi nikéntons kí꞉ken ahtathawítsheras nahónton ahonsaseniákenʼne tsi nòkwa ne iakokaronniátha ne iakonikonrotákwas ne tsi ionwentsiáte, tánon nahónton asísewatiátarase rahónha ne ronnheʼónwe.

⁵ Asèken neh kíʼ ne kwá akarihónni iatesewatatʼtiahat iasewáieste ne ioiánere tsi nitisewetákwen; tsi nókwa ne sewaianeréhʼtsera iasewáieste natʼtokhátsera;

⁶ tsi nókwa ne sewatʼthotkhátshera iasewáiest ne tionháʼhak khók ahontesewathateniarotárohke; tsi nókwa ne ahontesewathateniaróhtaroke iasewáiest ne taisewawisʼsástheke; tsi nókwa tsi tesewawissaste iasewáiest kariwiʼióston;

⁷ ne sewariwiʼiosthóntshera iasewáiest tsi nitiakoriwaiéri ne iakoriwiʼióston; tsi nókwa tsi nitiakoriwaiéri ne iakoriwiʼióston iasewáiest kanoronkwátshera.

⁸ Neh kí꞉ken naorihoténsons tesewatonwentióni, tánon tóhka kwá ne sewenhʼtiokwa weso tsi nihsewáien, kwá entiónʼnien naisewahióten tánon kwá enkariwastháton ne sewatʼthotkhátshera tsi nòkwa ne Sonkwaiáner Ié꞉sos Kerístos.

⁹ Nók tóhka iáh tesewáien, tsi nióre tsi sewakaráksen iáh tesewakwénies naisewatʼkáto tánon sewanikonrén꞉en kwá tsi sehwatonnakanonníʼon tsi nitiothohestanion ne sewariwaneraháktseras.

¹⁰ Kwá káti, onkwatenrohsónhas, nahiotónʼon sénha sewahtheniénten sewakwísron ne tsi Rawenni꞉io tsi sewanáton ó꞉ni tsi sewaiatarákwen kwá iahiokontákwen aisewariwaienteríhake; tóhka thoʼnensewáiere, iáh nonwénton taisewatewénthete ne sewetakwéntshera.

¹¹ Kén kíʼ ní꞉ioht entietsíhion ne kwá aisewahianerenseraiéntake niaʼisewatáwehiate ne ionnheʼónwe Rahonakeraserákon ne Sonkwaiáner ó꞉ni Sonkwaiatákwen Ié꞉sos Kerístos.

¹² Tánon káti tiotʼkonhónwe enkweiarakwenʼníhake kíʼ nahorihoténsons, iawerohátsien tsi ónenk sewahriwaientéri tánon kwá oriwiʼioʼónwe teiahonkóton ne kariwakwarishióntsera sewaienáʼon.

¹³ Í꞉i kere nek khók tkariwaiéri nakeriwáke ne takawénrie ne sewehiaratsheras kí꞉ken nahorihoténsons tsík sénhak sékon nikónʼnhe.

¹⁴ Wakateriéntare kwá iostóre enkastháshion kí꞉ken oierónta ne kenhéions, tsi nithoʼteweiénton rakróri ne Sonkwaiáner Ié꞉sos Kerístos.

¹⁵ Kwá entkateweiénton, káti, nakwahkwatákwahse naiseweiárake kí꞉ken nahorihoténsons kwák tsík nakaháwike nónen enwakihéion.

Ne Rohnatʼkáton Ne Kerístos Rahohiataʼnherakwahtsera

¹⁶ Iáh neh teiakwaniahésenʼne ne watkaríson nakwaronkáten ne rosatsʼtenserowánen táreh neh꞉ne Sonkwaiáner Ié꞉sos Kerístos. Kwá í꞉i iakwakaráke hionkwakʼkáton tsi nihosastenserowáhnen.

¹⁷ Thóh iákweskwe neh Rawenni꞉io neh Kanísera sontaháwen ne kakwenienstátsera ó꞉ni kahiatanerakwátsera, sahoʼiatórenne nowénna Ní꞉io꞉ne nónwe nontáwe ne Rohiatanerákwat, Watónnions, “Neh kí꞉ken ne kwá Í꞉i rinoronkwaʼónwe riʼiénha, rahonháke nónwe niwakatonnáhere!”

¹⁸ Iatehiakwaiátik ionkathontéʼon kí꞉ken owénna ne karonhiáke nontáwe, neh skát꞉ne sihiakwakwékon ne tsi tionontáhere ne ionontatokénti.

¹⁹ Ne káti ónen sénha ísinon nihionkwanikonraníron nateriwanothátshera tsi nihotirihowanháton ne rohtitokenséhakwe. Kwá íken tsi ensaianerásten thóka kwá ákta tsi ahsatennikonráren, tioríwa tsi kwá neh꞉ne kahásera teioswatʼthéton tsi tetiókaras tsi nióre iatenioswátʼthene noronké꞉ne tánon ne teioswátʼte noronkeʼnéha otsísto iateioswátteton ne seweriánes.

²⁰ Noiásons nahorihoténsons, tsi nahiotónhake, seweiárak kwá iáh nonkwatiakhésons taitewakwéni naitewanikonraiéntathe tsi niekariwákens ne oriwatokénti.

²¹ Asèken iáh nonwénton ne iekariwáken nateriwanotátsera ne ónkwe ehnaiakonontonniónʼon, nók kíʼ nónkwe Ronikonriʼióston tesakoniarotarónʼne tsi nahonteriwanóten tsi nontáwe ne Niʼió꞉ne.