2 Sawátis 1 - Ohiatonhseratokénti

¹ Ratretsárons— Kih iesakohiatonhni ne iontatsatarakwen iakónkwe tanon né akohioʼokónha, tsi niká꞉ien ne kwáh tokén꞉en khenorónhkwa. Tanon iáh oni tewakonhákok tèken, nok ó꞉ni tsi niká꞉ien ne ronaterièn꞉tare ne tkariwaié꞉ri iesanorónhkwa nónhne

² asè꞉ken ne kariwakwarishóntsera i꞉ih iakwáhawe tanon ó꞉ni tsi nén꞉we eniakwaháwake.

³ Aiá꞉wens ne Rawenni꞉io ne Kaʼní꞉sera ó꞉ni ne Ié꞉sos Kerístos, ne Kaʼní꞉sera roiénha, ahontashóntsion ne kenténrat ó꞉ni ne skén꞉nen; aiá꞉wens i꞉i ahionkwawénhake ne tkariwaié꞉ri oni ne kanoronkwáhtsera.

Tkariwaié꞉ri Tanon Kanoronkwáhtsera

⁴ Tsi nahkaʼtsennónni tsi wakheiatatʼtsénri otià꞉ke ne ieʼtsiienokónha tkariwaié꞉rike non nionnonnhétie, kwáh tsi nishonkwariwanontón꞉nis ne Kaʼní꞉sera.

⁵ Ne káti konriwanontónnis, Iksa: ánion akwékon thetewathatenorónkwak. Iáh kih á꞉se tèken tsi nahóten iakoniatónse; kih ken kaianerénhsera kwa tsi tiotáhsawe sihionkwaterièn꞉tare.

⁶ Kí꞉ken kanoronkwáhtsera wakʼtharákwen ne kén꞉tons ó꞉nenk tsi entewatewennárakwe ne Rawenni꞉io rahotiawenrátsera. Natsawenrátsera, tsi sewakwé꞉kon sewahthonteʼon tsi tiotáhsawe, kwáh ó꞉nenk tsi kanoronkwatserá꞉kon nó꞉nen tiónnheke.

⁷ Ronatiohkowá꞉nen ne rathinikonrátha tehonarénion tsi ionwentsiáte, ónka ne iontonhniha ne Ié꞉sos Kerístos thóh niʼioht tsi tawé꞉non tsi ní꞉ioht nónkwe. Ne nihionkwethóten kwáh ienikonrátha tánon ronwatkónte ne Kerístos.

⁸ Tasathate꞉ne, káti, ne tóhsa aihsathónse tsi ní꞉kon ionkwaiotén꞉en, nok kwáh enkanánon tensateriwaserákwase.

⁹ Nónhka ne iáh teiésere ne Kerístos rahorionhnienní꞉tsera, nok ienhiontóhetste, iáh tenikwé꞉kon ne Rawenni꞉io. Nok nónhka ahiontié꞉nawatste ne karihonnienní꞉tsera tenitiáron kih ne Kaʼní꞉sera ó꞉ni ne Roiénha enhatikwekónhake.

¹⁰ Ne káti, nónkak taiesaiatónko ne iáh tehathihá꞉wi kí꞉ken karihonniennítsera, tóhsa iahetsiʼiathíniont ne sewanónskon; akwé꞉kon tohsa sewénron “Senikwekónhak ne Skén꞉nen.”

¹¹ Nónhka kí꞉ken nen onwanateraswiʼiosten wasakonatiatháhrase tsi niontié꞉ra ne kariwatʼsen.

Nohnakénka Nowensasónhas

¹² É꞉so wakeriwá꞉ien nakwaró꞉ri, nok neh tkerákwas ne tóhsa ne kahiatónhsera tanon ne ieiathónkwa oné꞉ka ahkaste; kek, kaskáneks ne iakwanatarénase kwáh nénhne tentewatháren, kwáh kih tokén꞉en ahionkwatsennonní꞉hake.

¹³ Ne iontatsatarakwen satsí꞉ha akoienokónha iahitsiʼiatheniéthase ne rahotinonwerathóntsera.