2 Samuel 9 - Ohiatonhseratokénti

Ne Táwit Tsi Nitorihwaié꞉rikwe Raohén꞉ton Ne Mephibosheth

¹ Táwit waharihwanónton, “Shé꞉kon kén ón꞉kak iatetsakotaténhron tsi rawatsiratátsie ne Saul ne rononháke nahón꞉ton akéneste nathanitenhrá꞉tshera ne Jonathan raorihwáke?”

² Nón꞉wa rotinhatseraién꞉takwe ne raowáhtsire ne Saul Ziba ronwáiatsʼkwe, tánon thóh iahonwató꞉ri tsi thénhteron ne Táwit. Ne Ronnontí꞉io wahawénhaʼse, “Í꞉se kén ne Ziba?” Tánon wahén꞉ron, “Tenkonrihwásniehse!”

³ Ne ronnontí꞉io wahén꞉ron, “Ónka kén iastetsakothaténhron tsi rawahtsíraien ne Saul ne nahón꞉ton akéneste ne raothanitenhráhtshera ne Ní꞉io?” Ne Ziba wahawénhase ne ronnontí꞉io, “Ne iateothaténron ne Jonathan roiénha; ne raónha roshitakenhéion.”

⁴ Ne ronnontí꞉io wahoriwanóntonhse, “Kaʼnón꞉we ní꞉res?” Ziba wahawénhase ne ronnontí꞉io, “Tho thénteron tsi thohʼnón꞉shote ne Machir ne ne roní꞉ha ne Ammiel, thóh nón꞉we Lo-debar.”

⁵ Ehʼthóhʼne ne Ronnontí꞉io Táwit iahateriwániete nahontahonwaiathénhaʼwe ne Ziba.

⁶ Ne Mephibosheth ne ne roní꞉ha ne Jonathan tánon ne ne roteréha ne Saul iahá꞉reh raohénton ne Táwit, tánon tsahakonshótane tsi wahathatsiaʼtsénenhte ne naréhneste kakweniensthéntsera. Ne Táwit wahénron, “Mephibosheth,” tánon ne raón꞉ha wathariwaseráko, “Thenkonriwásniese, shénshion.”

⁷ Ne Táwit wahawénhase ne raón꞉ha, “Tó꞉sa sateronníhak, asèken enkonhnatón꞉hase ne kenténhrat ne raoriwá꞉ke ne ianíha Jonathan; Ní꞉i kwáh tentʼkónhion akwé꞉kon ne raohontsakénʼen ne iashothkénʼen Saul, tánon ní꞉se iateshiá꞉ti khók tenshatskáon nakatekwáhraʼne tiotkonhón꞉we.”

⁸ Ne Mephibosheth tonsahatentʼtsóten shé꞉kon tánon wahén꞉ron, “Í꞉i iáh sénha tewatiá꞉nere tsi ní꞉iot ne rawenhé꞉ion érhar kwáh tsi ní꞉iot ní꞉i?”

⁹ Ehʼthóhʼne ne ronnontí꞉io iahó꞉nonke ne Saul raonhátshera Ziba, tánon wahawénhase, “Akwé꞉kon tsi nahoién꞉take ne Saul tánon akwé꞉kon tsi rononshó꞉te ne riʼiá꞉wi ne ianáskwe roteré꞉ʼa.

¹⁰ Í꞉se tánon ne sanekenteronhtserashón꞉ahs tánon sanhatseraókons kwáh tentsitsatonhontsaʼríten, tánon entesewá꞉hawe ne kaientwáhkwen, ne káti ne iánhas roteré꞉ha nahokwaién꞉take nahronhnékwen; ók ne iánhas roteré꞉ha Mephibosheth kwáh nenʼné꞉e tiókonte tsi tenhoskáhonʼke nakhwatekhwárane.” Nón꞉wa ne Ziba wísk neiawénhre nionekenteronhtseraien꞉takwe tánon tewáhsen nihátikwe ronhatseraién꞉takwe.

¹¹ Ehʼthóhʼne ne Ziba wahawénhase ne ronnontí꞉io, “Tsi nentioianénhaʼwe nètho natiá꞉ner ne ronnontí꞉io tsi nihonháon ne raonhátshera, káti ne sanhátshera thóh kíʼ nenhá꞉iere.” Ne Mephibosheth iatatskáon Táwit raotekhwárane, kwáh thóh ní꞉iot tsi shí꞉ken ní꞉iot ne saiáta ronnontí꞉io roién꞉ha akénhake.

¹² Ne Mephibosheth nithoʼiónha ronekenteronhtseraʼién꞉takwe tsi nihosenhnóten ne ne Mica. Tánon ratikwé꞉kon ne thóh nón꞉we nihatiterónhtakwe ne Zibaʼs raonónskon ne waonterihónten ne Mephibosheth raonhátsera wahón꞉te.

¹³ Ne Mephibosheth Jerusalem ne nón꞉we nihaná꞉kerehkwe, asèken ne raónha kwáh tiókonte thóh tehoskáonkwe ronnontí꞉io raotekhwárane. Ónenh kíʼ ne raónha iotakenhéion tetsá꞉ronkwe ne rashitákes.