2 Samuel 7 - Ohiatonhseratokénti

Ní꞉io Raoteriwaʼseronniátshera Skát꞉ne Ne Táwit

¹ Nón꞉wa nó꞉nenh ne ronnontí꞉io shiahátien ne raonónskon, tánon ne Roiá꞉ner shontaháwen natorisénhtshera tsi nòkwah ne ratikwé꞉kon ne ronwásons ne rahiatátʼton꞉tse,

² ne ronnontí꞉io wahawénhaʼse ne rotó꞉kense Nathan, “Skatkátho ó꞉nen, ní꞉i thóh kíteron tsi kanón꞉shote nonenhtakwénhte, ók ne raoneró꞉kwah nateriwaseronniátshera ne Ní꞉io atoserákon nenʼné꞉eh tká꞉ien.”

³ Ne Nathan wahawénhase ne ronontí꞉io, “Wáhs, thóh nátier akwé꞉kon tsi nitesanontón꞉nions; asèken ne Roiá꞉ner senikwé꞉kon kíʼ ní꞉se.”

⁴ Ók kwáh ne shosónhta ne raowénhnah ne Roiá꞉ner wahoiatórenhne ne Nathan:

⁵ Wáhs tánon tsró꞉ri nakenhá꞉tshera Táwit: Ráton ne Roiá꞉ner: Á꞉re í꞉se kén naskenonshón꞉nien tsi nón꞉we nakiterón꞉tahke?

⁶ Ní꞉i kwáh iáh kanónskon teketerónh꞉tahkwe tsi ná꞉he ne tewenhniserátekwe tethekheiaténha nonkweʼókons NʼIsraeró꞉nons ne Egypt nón꞉we tsi niió꞉re nón꞉wa wenhniseráte, ók kíʼ tewakanatakwenhá꞉tieskwe tsi niwatohserótons tsi nón꞉we nakathatíteron.

⁷ Tsi nonwéʼsons nahtewakatahwénhrie tsi ratiterón꞉tons ratikwé꞉kon nonkweʼó꞉kons NʼIsreronónke, nonwénhton kén nahonkewenhninekénʼen raotihén꞉ton ne sakotihenténhses ne ón꞉kak tsi nihotitsiókwas ne Israerʼronónke, tsi ronónha khená꞉on ne nasakonahtenhnikonrá꞉ren nakonkweʼtashón꞉ahs NÍsraerʼronónke, nahón꞉ken, “Ónh nontiéren tsi iáh ní꞉se teskwanonshonniénhni ne onenhthaʼkwenhtétshera nahó꞉ten akénhake?”

⁸ Nón꞉wa ne káti tsi nahó꞉ten entsró꞉ri nakenhá꞉tshera Táwit: Ratón꞉ne Sakoroniakerónons: Í꞉i iekonnónkon ne tsikonwatiterontákwah ne watenhenrowanénhke, tsi shenikonrahrátsieskwe teiotinakarontónha ne naseiatenontí꞉ioste nakonkwetashón꞉ahs Israerʼró꞉nons;

⁹ tánon ní꞉i kwáh tenikweʼkonhátsies tsi nón꞉we nienhénse, tánon kwáh khesén꞉nion ratikwéʼkon ne ieshá꞉sons ne sahén꞉ton rónhnes; tánon ní꞉i kwáh enkonsennówanahte, kwáh tsi nihotisenhnótens ne ratisennhowánens ne tsi ionwentsá꞉te.

¹⁰ Tánon ní꞉i enkheiatenatará꞉kwahse nakonkwetashón꞉ʼahs Israerʼró꞉nons tánon thóh nón꞉we nenhkheteron, ne káti thóh nón꞉we nenhatiʼterónhtake kwáh ronónha enhonakwenhkhónweke, tánon iáh shé꞉kon thatahonsahonwatiʼnikonráren; tánon ne ronhnonkwetahétkens kwáh iáh shé꞉kon nonwénhton tahonsahonwatiʼroniákente; tsi nitsiotónhne ne tsiotserénhton,

¹¹ kwáh shontakheiataráko nashakotihéntenhse nakonkweʼtashón꞉ʼahs Israerʼró꞉nons; tánon kwáh Í꞉i entkónhion nahishorisénhtane tsi nòkwah ne ieshá꞉sons. Sén꞉ha isiʼnónhwe ne Roiá꞉ner kwáh enhiawatsirowáhnate.

¹² Nó꞉nenh ensenhéionke tánon skát꞉ne enhiesaiatháta ne sheshotʼthonkonhkénʼen, kwáh saiá꞉ta ne entiénha enhinontí꞉ioste tánon kwáh enkeshaststénhseron ne raonakerásera.

¹³ Kwáh raón꞉ha enhakenonsónhnien nononsatokentiʼkówa, tánon kwáh oriwí꞉io enkónhni ne raonakerá꞉sera tsi nènhwe enkathá꞉tse.

¹⁴ Kwáh Í꞉i kaní꞉sera enkén꞉hake ne raonháke, tánon ne raón꞉ha kwáh nón꞉ne eh riién꞉ha enkén꞉hake nakonháke. Nó꞉nenh ne thènon tenhaterientawénrie, kwáh kíʼ enhiréwate ká꞉nia énkaste tsi kíʼ nihatiʼiéra nón꞉kwe, ne enhiientánion nahikaréwate tsi niieiéra nón꞉kwe.

¹⁵ Ók iáh kíʼ thahí꞉kwa ne aká꞉wenk iorihwatóken akenoronhkwáhtshera ne raonháke, tsi neh nihíkwen ne Saul, raonháke éhʼren wakhawíton ne sahén꞉ton.

¹⁶ Ne tsi waswatsiratátie ó꞉ni ne sanakerásera kwáh oriwí꞉io enhionhníhake ne ne tsi nènhwe nakʼkénton; sahén꞉ton ne sanontiʼiótsera kwáh enkáthake ne tsi nènhwe enkén꞉hake.

¹⁷ Thóh entsioianénhawe skát꞉ne akwé꞉kon kí꞉ken owenhnasón꞉ahs ó꞉ni skát꞉ne akwé꞉kon kí꞉ken tsi nonterihotaʼshión꞉ko, ne Nathan wahoró꞉ri ne Táwit.

Táwit Raoterénhnaʼien

¹⁸ Ehʼthóhʼne ne Ronnontí꞉io Táwit iahatáweiaʼte tánon thóh wahanitskwáren raohénton ne Roiá꞉ner, tánon wahén꞉ron, “Ón꞉ka ní꞉i, Ó Saiá꞉ner, natwátsire, nètho ní꞉se tastsiaʼténhawe ne kén niió꞉re?

¹⁹ Tánon iekaníhare kí꞉ken tsi ken niiorihwá꞉a tsi nateská꞉nere, O Saiá꞉ner Ní꞉io; ní꞉se kwáh ó꞉ni shetahrákwen natwá꞉tsire ne ne kwáh ahí꞉non ít꞉ken neh naiá꞉wenhne. Aiá꞉wenhs kíʼ neh kí꞉ken aotirihón꞉nien nonkweʼó꞉kons, O Saiá꞉ner Ní꞉io!

²⁰ Tánon tóh shé꞉kon sén꞉ha nahakwéʼni ne Táwit nahiaró꞉ri? Asèken tatsienʼtéri, O Saiá꞉ner Ní꞉io!

²¹ Tsioríhwa tsi nisararátston, tánon ne tsioianénha ne sé꞉ri, í꞉se sarihwakanonhníhon akwé꞉kon kí꞉kens iorihowánenhs, káti nètho ahónton nahonkateriéntarane.

²² Asèken oriwiʼiohónwe ní꞉se tsi tiennowáhnen, O Saiá꞉ner Ní꞉io; asèken iáh ónka naonsaiesaiérenhke, tánon oriwiʼiohónwe tsi shonháhak khók ne Ní꞉io í꞉ken, ne taioiawénhawe akwé꞉kon tsi nihionkwarón꞉ken ne karihwanírats.

²³ Ónka nahonsahonwatiʼiéren ne shonkwetashónʼahs, tsi ní꞉ioht Israerʼronónke? Ónka kén nakóren akénhake nón꞉kwe ne tsi ionwenhtsá꞉te tsi niká꞉ien ne Ní꞉io sakohiatanónsthaton ne raonkwetashón꞉ha ahónton, tánon ní꞉se atsenhná꞉tatse, ioriowáhnen tsi nishé꞉ra ó꞉ni ioriwanerakwahténions ne raotirihwáhke, ne tsi shaseiatínekenwe raotihénton ne shonkwetaʼshón꞉ʼahs,

²⁴ Tánon ní꞉se seriwasehronniénhni ne shonkwetashón꞉ahs Israerʼró꞉nons ne iateshiá꞉ti ne shonkwetashón꞉ʼahs akénhake; tánon í꞉se, Ó Saiá꞉ner, washá꞉ton ne raotí꞉ni꞉io akénhake.

²⁵ Tánon ó꞉nenh Saiá꞉ner Ní꞉io, ne nowénhna ne thishatahtíhon nakerihawáhke ó꞉ni natwáhtsireh, serihwanírat ne ne tsi nènhwe akénhake; thóh ná꞉tier tsi kíʼ nisararátston.

²⁶ Ne kíʼ aoríhwa ne shasénhna tsi enkasenhnowahnénhke tsi nénhwe enhonnónheʼke, ‘Ne Sakoiá꞉ner ne ratironhiakerónons ne sakoNí꞉io tsiokwékton NÍsraerʼronónke’; tánon ne natwátsireh Táwit tsi enkariwakwathákwenke ne sahén꞉ton.

²⁷ Asèken ní꞉se, Ó Sheiá꞉ner ne ratironhiakeró꞉nons, ne sheʼNí꞉io NÍsraerʼronónke, washón꞉ni kíken naskerihotháshiaʼse, satón꞉nions, ‘Kwáh í꞉i enkonhnonsónhnien’; ne kíʼ aoríhwa ne í꞉i ne sanhá꞉tsera waketshénri ne kanikonranirát꞉tsera ne iaterénhnaient ne shonháke.

²⁸ Tánon nón꞉wa, O Saiá꞉ner Ní꞉io, í꞉se ne Ní꞉io í꞉ken, tánon ne sawenhnaʼókons tsi oriwí꞉io í꞉ken, tánon takarahratsténhni kí꞉ken ioiá꞉neres rakonhá꞉ke;

²⁹ nón꞉wa ne kíʼ aoríhwa aiá꞉wenhs ahonteshanikonrí꞉ione nasheiathatériste ne raowáhtsires ne sanhá꞉tsera, ne káti aiá꞉wens iakakóntakwe ne tsi nènhwe akénhake ne sahén꞉ton; asèken í꞉se, Ó Saiá꞉ner Ní꞉io, sathatíhon, tánon ne ne saiathaterítsera rononhá꞉ke natwáhtsire ne tsi enhotiiathaterístonke ne tsi nénhwe enkénhake.”