2 Samuel 20 - Ohiatonhseratokénti

Ne Rateriʼioseraʼnónwe Sheba (Saba)

¹ Nón꞉wa ne ne iáh othènon teharihwástha Sheba ronwáiats neh roʼiénha ne Bichri, ne ne Benjaminró꞉non, tahiotokéntane thóh nón꞉we níreskwe. Wahatá꞉tiste iehonrawátsta tánon wathohénrete, “Iáh othènen thateionkwateriwaʼshón꞉tere ne Táwit, iáh othènen ne sataʼionkwawenhkónwe ne Jesse roʼiénha! Sewakwé꞉kon tsitisewatohseróhton nionshá꞉sewe, Ó Israerʼró꞉nons!”

² Káti ratikwé꞉kon nʼIsraerʼró꞉nons wahonwatsiaʼtonhtákwase ne Táwit tánon Sheba sahonwateranéntatʼten ne roʼiéha ne Bichri; ók ne Judahró꞉nons ne ne ronwanonterátie ne raotiʼnontí꞉io ronatenikonraʼtokénston Jordan tsi niʼió꞉re ne Jerusalem.

³ Ne Táwit thóh ionsá꞉rawe tsi thonónshote thóh Jerusalem; tánon ne ronnontí꞉io iasakoiaténhawe ne oiéri nikónti ne tehatiʼiá꞉sehne tsi niká꞉ienh ne sakorihonthá꞉kwe nakontenhnikonrá꞉ren tsi kanónshoʼte, tánon kanónskon washakóteron enkonwanatenhnikonrá꞉ren, tánon tenhkonwatísniene, ók tó꞉sa ne naʼietsináwite. Káti wakonhwatinhó꞉ton kwáh tsi niʼió꞉re ienkonhníheie, tsi enkonhnónnheke kwáh thonenhiotónhake tsi ní꞉iot nahionatereʼónskon.

⁴ Ehʼthóhʼne ne ronnontí꞉io wahawénhase ne Amasa, “Iasénonk ne ronnónkwe ne Judah nón꞉we skátne ahiakwáton tsi niʼó꞉re nasénhaton nón꞉ta, tánon ní꞉se kénʼen shé꞉set.”

⁵ Káti ne Amasa iahá꞉re iasakonónkʼkon ne Judahró꞉nons; ók ne rahónha wahatenhnískwate tsi natonhtá꞉re iáh tèsro tsi nikahá꞉wi ronwaró꞉ri nahonsárawe.

⁶ Ne Táwit wahawénhase ne Abishai, “Nón꞉wa ne Sheba ne roiénha ne Bichri sénha rahónha enshonkwaʼkarónhni tsi ní꞉iot ne Absalom; iahetsiʼiaténhaf nakenhatseras tánon shaʼtsisewahiatiʼsák꞉kha, khék nontiérek kwáh enhatsénri ne tekanatanákton kanatowánen tánon enshonkwaʼniá꞉kenhse.”

⁷ Ne Joab raonkweʼtashón꞉ahs iahatiʼiákenhne wahonwahiatisák꞉kha, skátne ne Cherethites, ó꞉ni ne Pelethites, tánon ratikwé꞉kon ne ronterí꞉ios; thóh nón꞉we tahonténhti Jerusalem tsi wahonwásere ne Sheba ne roiénha ne Bichri.

⁸ Nó꞉nenh thóh nón꞉we sheʼhónhnes ne tsitkanenhiowánenh neh thóh nón꞉we Gibeon, Amasa thontaʼsakoterá꞉te. Nón꞉wa ne Joab ne rotieronhniá꞉ton ne ronteriʼiosthákwah tánon roʼtiatánenh etʼwasharóron tsi watetaʼhástha násare etʼhiotá꞉ron rahí꞉hiake; tsi niaháre onthasharótsi ohontsá꞉ke iakaién꞉tane.

⁹ Ne Joab wahawénhase ne Amasa, “Iohianeratséken ní꞉se, tiatatèken?” Tánon ne Joab saweientetákwen nahanenhtiáti tsi iahaiéna tsi teokonstón꞉ronhte ne Amasa tsi wathonoronhkwáʼhnion.

¹⁰ Ók ne Amasa iáh ne tehoktóken nasá꞉re ne Joab ratshanáke ráhawe; ne Joab ranekwentá꞉ke nón꞉we nahoién꞉te káti ne raokaróstha takaiá꞉kenhne ohontsá꞉ke iakaiéntaʼne, tánon warénheie. Iáh kíʼ teshoién꞉ton ne tekení꞉haton iahonshón꞉terastste. Ehʼthón꞉ne ne Joab tánon ne iathatekénʼen Abishai wahonwahiatiʼsák꞉kha ne Sheba ne roiénha ne Bichri.

¹¹ Tánon saiá꞉ta ne Joab raonkwé꞉ta thóh wathá꞉tane raiatákʼta ne Amasa, tánon wahénron, “Ónhka akén꞉hake neh thoʼrihwáhwase Joab, ahniónki ne roʼnonteratséson Joab.”

¹² Ne Amasa thóh raiá꞉taien roʼtiaʼtakarateʼniá꞉ton raonekwenhsáke thóh iohahowánenhne, tánon ne rónkwe wahatʼkátho nètho tsi onkweʼtakwé꞉kon thóh teiétas, hiahohiaténhawe ne Amasa éhren wahohiatenháwite ne iohahowanénhne kahentáke niahohiaténhawe, tánon áhshiʼre wahoʼróhroke.

¹³ Tsi ó꞉nenh éhren wahahá꞉wite ne raoierónhta ne iohahowánenhke, onkwetaʼkwékon wahonwásere Joab ne nahonwahiatisák꞉kha Sheba ne roiénha ne Bichri.

¹⁴ Ne Sheba waktronhontsiʼiá꞉khon akwé꞉kon ne tsi ratiʼtsiokwaién꞉tons ne Israerʼronónke tsi niʼió꞉re ne Abel ó꞉ni ne Beth-maacah; tánon akwé꞉kon ne Bichrites wahonnitsiokwaróhroʼke tánon wahonwanonteratsiéshon thóh kanatakónsons.

¹⁵ Ne Joab raotsió꞉kwas ronterí꞉ios wahón꞉newe tánon wahthonwahonwaʼrónhni thóh nón꞉we Abel ne ne Beth-maacah; wahonkenratstokó꞉ten nasontʼtakʼtóntsies ne ratiʼrentʼtenstákwas wahonhnón꞉niate tsi iakonwatsatónhti ne kanatowanénke, Ne Joab raotsió꞉kwa ronterí꞉ios wathatishontaritánion neh nahhononshontsénenhne.

¹⁶ Ehʼthóhʼne watenikonratʼthókha iónkwe thontahiohénrete ne kanatowanénhke, “Sewatahónsatat! Sewatahónsatat! Tsisewaró꞉ri ne Joab, ‘kén꞉en nítre, Tewakatonhontsóni tahiaʼkenithá꞉ren.’”

¹⁷ Kahiaták꞉ta niahá꞉re, tánon ne iónkwe wakénʼron, “Í꞉se kén ne Joab?” Wathariwaserá꞉kwase, “Í꞉i.” Ehʼthóhʼne wahawénhase, “Satahónsatat ne ahowenhnahókons ne sanhátshera.” Wathariwaseráko, “Wakataʼhón꞉sate.”

¹⁸ Ehʼthóhʼne sakénron, “Rontón꞉nioʼses ne wahón꞉nise tkènʼne, ‘Áhnion thóh nón꞉we ratirihwisákʼkha Abel’; tánon káti iatenkanonwahiewénhtane norihwaʼshón꞉ahs.

¹⁹ Í꞉i ne énska ne sakʼthíken tánon wakerihwatóken ne Israerʼronónke; ní꞉se í꞉sehre nashenatént꞉tho ne kanatowanénhke ne ne konwanisténha í꞉ken Israerʼronónke; nontsiéren ní꞉se tsi asheriwèntho ne raowenhkhónwe ne Roiá꞉ner?”

²⁰ Ne Joab watharihwaseráko, “Ahí꞉non ít꞉ken nakerihwá꞉ke, nètho ní꞉i ne kwáh akeriwèntho tánon nakatón꞉te!

²¹ Iáh tokensketé꞉ken! Ók rón꞉kwe ne tsi tionhniarónhnion stitʼkanakeraseráien ne Ephraim, ne ronwáiats Sheba ne roiénha ne Bichri, tahothorhianehrónhase ne ronnontí꞉io Táwit; ionsattsiátʼkaf rahonháhakʼkhok, tánon éhren enskéte ne kanatowanénhke.” Ne iónkwe wahawénhase ne Joab, “Ne rahonʼnón꞉tsi thóh ienwátsionke í꞉si nonshontáti tsi thèses.”

²² Ehʼthóhʼne ne iónkwe thóh niahá꞉he onhkwéʼne ne iaká꞉hawe ne aówenk tsi niiotenikonrón꞉ni. Tánon wahonwanontsístsiake ne Sheba ne roiénha ne Bichri, tánon thóh iahó꞉ti tsítʼres ne Joab. Káti ne raónha wahahonráwate ne iehonrawátsta, tánon éhren sahónhnete ne kanatowanénke, tánon ratikwé꞉kon tsi thotinonshó꞉tons nionsahónhne, ók ne Joab Jerusalem neh nionsá꞉re.

²³ Nón꞉wa ne Joab rahónha tesakoniaró꞉taron ratikwé꞉kon ne ronterí꞉ios NIsraerʼronónke; Benaiah ne ne roiénh ne Jehoiada rahónha ne tesakoniaró꞉taron ne Cherethites ó꞉ni ne Pelethites;

²⁴ Ne Adoram ne ne tesakoniaró꞉taron ne ratinhá꞉tseras; ne Jehoshaphat ne ne roiénha ne Ahilud rahónha ne rahiátonskwe;

²⁵ Ne Sheva ne ne sakohiatónhniskwe; Zadok ó꞉ni Abiathar ne tenitsihénstatsi í꞉ken;

²⁶ tánon ne Ira ne ne Jairʼró꞉non rahónha ne Táwit rahotsihénstatsi í꞉ken.