2 Samuel 16 - Ohiatonhseratokénti

Ne Táwit Ronwáshons

¹ Nó꞉nenh ne Táwit ostón꞉ʼa shiʼhononhtathíʼen noʼnhotoharakéniate, Ziba ne raonhátsera í꞉ken ne Mephibosheth wakʼiatátken, tohkàra nihá꞉ti tehonhóntes, ne roʼtirieniaketátsene tékeni tewenhniáwe nikanatará꞉kes kanátaro, énska tewenhniáwe níkon kanhokwahkwenón꞉ni onénhare káhik, énska tewenhniáwe níkons kanhokwahkwenónhni nakenhnakékha káhiks, tánon énska kanéhok káiare thitʼkáhere otsítsa onéka.

² Ne ronnontí꞉io wahawénhase ne Ziba, “Nontiéren tsi tashá꞉we kí꞉kens?” Ziba wathariwaserá꞉ko, “Ne tehonhóntes ne ne ronnontí꞉io raowátsires nahotisaténstakwe, ne kanátaro ó꞉ni nakenhnakékhas kahiksónhas ne ne kenʼnithotiʼiónsas nahón꞉neke, tánon notsítsa ienekirátha ne nenhné꞉e nahatinekíra ónhka ahiakononwaráton ne iahonwenhtsiatʼténhake.”

³ Ne ronnontí꞉io wahén꞉ron, “Tánon kaʼnón꞉we ní꞉res ne iahiatakweʼní꞉io roteréha?” Ne Ziba wahawénhase ne ronnontí꞉io, “Thóh thénteron Jerusalem; asèken rá꞉wen, ‘Ónwa wenhniseráte kwáh tentʼthá꞉kon ne rakshótha raonontiʼiótsera.’”

⁴ Ehʼthóhʼne ne ronnontí꞉io wahawénhase ne Ziba, “Akwé꞉kon nètho tsi nahowénhake ne Mephibosheth: Satkátho ó꞉nenh kaʼtíken í꞉se sáwenk ón꞉ton.” Ziba wahén꞉ron, “Kwáh entʼkwénienste; Thóh tiaʼtatérist ne sahén꞉ton, Natiá꞉ner ne ne ronnontí꞉io.”

Ne Shimei Wahoriwaiesáten Ne Táwit

⁵ Nó꞉nen ne Ronnontí꞉io iahá꞉re ne Bahurim, rónhkwe ne néh saotitá꞉ra ne Saul tahahiá꞉kenhne ne ne ronwáiats Shimei nènhʼne roiénha ne Gera; tsi tahaiákenhne ratewenhnhatsathánions.

⁶ Wahonenhióiaʼke ne Táwit ó꞉ni tsiaʼsakókwekʼte ne raonhatserashón꞉ahs ne Ronnontí꞉io Táwit; Ehʼthohʼsàne ne Táwit ne tehonwakwahtaséton ne rahonkweʼtashón꞉ahs ronterí꞉ios ó꞉ni ne ronwahiatanónhne.

⁷ Ne Shimei tehohenrètha tsi nikaʼrí꞉wes ratewenhnatsathánionskwe, “Shatsáken! Shatsáken! Sehiaséhtha! Satkonserákʼsen!

⁸ Ne Roiá꞉ner wahiaré꞉wate neh tsi nisenonwarhiakónhnion ne Saul raowátsires, roʼnón꞉ha raʼotinatʼtekénʼen tsi nón꞉we tsisatenonhtiʼióston; tánon ne Roiá꞉ner ne tethó꞉wi ne kaʼnontiʼiótsera ne eʼtsiénha Absalom. Satkátho, kariwahetkénhsera thontesahrhóroʼke; asèken ní꞉se kwáh sehiaséhtha nashiaʼtóten.”

⁹ Ehʼthóhʼne ne Abishai ne ne roiénha ne Zeruiah wahawénhase ne ronnontí꞉io, “Nontiéren kí꞉ken rawenhé꞉ion érhar ahokenrenserón꞉ni Natiá꞉ner ne ronnontí꞉io? Áhnion ehʼthóh niehé꞉ke tánon rinontsístsiat.”

¹⁰ Ók ne ronnontí꞉io wahén꞉ron, “Iáh neh othènon tesariwá꞉ke, í꞉se ne tsisewahiohʼokón꞉ahs ne Zeruiah? Tó꞉kaʼ ratewenhnatʼsathánions tsió꞉riwa tsi Roiá꞉ner wahawénhase, ‘Skenrenhserón꞉ni ne Táwit,’ onkàti ní꞉se nashí꞉ron, ‘Nontiéren tsi thóh náshiere?’”

¹¹ Ne Táwit wahawénhase ne Abishai ó꞉ni ratikwé꞉kon ne raʼonhatseraókons, “Neh kwáh í꞉i riʼiénha teotonhontsóni nahakenonwarhiákon; Tó꞉sa othènon tsiatstérists, tánon tserí꞉on nahatewenhnát꞉sathanion; asèken Roiá꞉ner roʼrihwáhwi.

¹² Nontiérenk sèh ne Roiá꞉ner enhatkátho nakeriwahetkénsera, kwáh neh tensakeriwaserá꞉kwase ne ioiá꞉nere tsi niʼionkeriwaieshaténhni nón꞉wa wenhniserá꞉te.”

¹³ Káti ne Táwit tánon ne raokwetaʼshón꞉a iahonthahítha, tsi ne nikaʼríweskwe ne Shimei thóh niehawénon onhnontatʼtónhtse ákte nokwáti tsi nón꞉we níreskwe ne raónha tánon ratewenhnatsatánions tsi niahawenonhátie, tánon tesakonenhióiaks tánon tesakoienkwaróiaks tsi niahawenonhá꞉tie.

¹⁴ Ne ronnontí꞉io ó꞉ni ratikwé꞉kon nonkweʼókons ne ratikweʼkonhá꞉tiene iostó꞉re iahónhnewe tsi kaniatará꞉tatse ne Jordan tánon thóh nón꞉we neh nonsahatorísen.

Tsi Nahonwatenikónron Ne Ahithophel

¹⁵ Nón꞉wa ne Absalom ó꞉ni ratikwé꞉kon nʼIsraerʼró꞉nons iahónneʼwe Jerusalem; Ahithophel ne nikweʼkonhátie ne raónha.

¹⁶ Nó꞉nenh ne Hushai ne ne Archró꞉non, Táwit roʼnatén꞉ro, wahoiatórenhne Absalom, Ne Hushai wahawénhase ne Absalom, “Ronhnhesón꞉ak ne ronnontí꞉io! Ronhnnhesón꞉hak ne ronnontí꞉io!”

¹⁷ Ne Absalom wahawénhase ne Hushai, “Neh kén kí꞉ken ne sariwatokentítsera roʼnonháke ne sewatenroshónʼahs? Onhniʼiotiéren tsi iáh tesené꞉non ne tiaténro?”

¹⁸ Ne Hushai wahawénhase ne Absalom, “Iáh; ók tsi niká꞉iens ne Roiá꞉ner ó꞉ni nonkweʼókons sakoiatarákwen ó꞉ni ratikwé꞉kon nʼIsraerʼró꞉nons tsi sakoiatarákwen, iáh kíʼ ní꞉i, tánon raónha kíʼ kwáh skát꞉ne enhiakéneseke.

¹⁹ Sénha ishiʼnónwe, ónka akheiótenhse? Iáh ontèken roiénha thakénhake? Kwáh tsi nihiʼhiótenhse ne ianíha, káti í꞉se enkonhiótense.”

²⁰ Ehʼthóhʼne ne Absalom wahawénhaʼse ne Ahithophel, “Takwahtenikonrasónhteras; onhnaʼiakwáhiere?”

²¹ Ne Ahithophel wahawénhase ne Absalom, “Wáhs ne sewanáhwit ne ianíha tehatiʼiásehne, tsi niká꞉iens sakotieténhni nakontenhnikonrá꞉ren tsi roʼnónshoʼte; tánon ratikwé꞉kon NIsraerʼronónke enhónronke nètho ní꞉se tsi nashón꞉ni ne kariwahét꞉kenh rahonhá꞉ke ne ianí꞉ha, tsi thóh kíʼ nénhsere kwáh kíʼ sénha enhatisháststenhne ne iesanonterá꞉ties.”

²² Káti wahonhwatoserók꞉thase ne Absalom thóh karonhkwená꞉ke tánon kíʼ ne Absalom wahotináwihne ne roní꞉ha tehatihiásehne thóh raotihénton ratikwé꞉kon nʼIsraerʼró꞉nons.

²³ Nón꞉wa nèhʼthoh shiʼtewenhniseraténionskwe tsi nisakotenikonrá꞉wiskwe ne Ahithophel thóh ní꞉iot tsi shí꞉ken kwáh kíʼ Ní꞉io raowénhna í꞉ken; káti akwé꞉kon tsi nisakotenikonráwiskwe ne Ahithophel ninorónstakwe tenitsá꞉ron ne Táwit ó꞉ni ne Absalom.