2 Samuel 11 - Ohiatonhseratokénti

Ne Táwit Wahatenakwaʼiésaʼte Skát꞉ne Ne Bathsheba

¹ Ne shiʼkokwiténe ne ne shiʼioseráte, thóh nikaháwi ne rontinontí꞉ios ateriʼioserá꞉ke niehonhnétha, ne Táwit iahoténiete Joab néh ahónhne ronaterihóntons tánon ratikwé꞉kon Israerʼronónke raónha ahónhne; washakonátonhte ne Ammonró꞉nons, tánon wahonwaiéna ne Rabbah. Ók ne Táwit thóh Jerusalem ít꞉res.

² Thóh neh kíʼ eʼnahá꞉wenhne ne shiʼiokárah iotohetstenʼnénhtie, nó꞉nenh ne Táwit shathátane ne raonitskwára ne wanitskwará꞉tseres tánon waʼhatentiónko thóh ne raoronhkweʼná꞉kes ne ronnontí꞉io tsi rononshó꞉te, éhʼtho karonhkweʼnáke ehʼtá꞉ke iahatkátho tánon tsiontonwísen wahá꞉ken watá꞉wenhs; ne tsiotonhwísen kwáh í꞉ken tsi watkathotserí꞉io.

³ Ne Táwit ón꞉kak iasakotóri naieriwisákha tsi nòkwah nètho tsiontonwísen. Tsi nonsahonwaró꞉ri, “Ne ne Bathsheba akoién꞉ha Eliam, ne ró꞉ne ne ne Uriah ne ne Hitró꞉non.”

⁴ Káti ne Táwit iasakoténiete ratiriwakaré꞉nies nakonwenhnónk꞉sa, tánon tá꞉we kíʼ ne raonhá꞉ke, tánon skát꞉ne wahiá꞉rate. (Nón꞉wa ne aónha sewatonnhakanónhnisʼkwe tsi iotenhnitará꞉niʼkwe.) Ehʼthó꞉hʼne tsi tsionónshote nionsáwe.

⁵ Ne tsiontonwísen ontháwah naiowiraién꞉taʼne; tánon iahoterihwaniéten ne Táwit, “Wakewiraientásereh.”

⁶ Káti ne Táwit iahoterihwaniéthase ne Joab, “Tatsiatóri ne Uriah neh Hitró꞉non.” Tánon ne Joab iahoténiete ne Uriah raonhá꞉ke ne Táwit.

⁷ Nó꞉nenh ne Uriah wahoiatórenhne, Ne Táwit wahariwanónton onhnihiotonʼhátie ne Joab tánon ne onkweʼshón꞉ahs, tánon onhnihiotonhátie tsi nòkwah nateriʼiósera.

⁸ Ehʼthóhʼne ne Táwit wahawénhase ne Uriah, “Thóh nionsáhse tsi tisanónshoʼte, tánon sarashitóhare.” Ne Uriah iahahiá꞉kenʼne tsi ronónshoʼte ne ronnontí꞉io, tánon ne rononteratiétaʼne athatawítsera ne rotenietonhátsie ronnontí꞉io.

⁹ Ók ne Uriah iáh teshoténtion thóh wahó꞉tawe tsi ieiontawehiatákwah ne ronnontí꞉io raonónskon skátʼne ne raonhatserashón꞉ʼahs ne ronnontí꞉io,

¹⁰ Nó꞉nenh sahonwaró꞉ri ne Táwit, “Ne Uriah iáh tsesawénon ne tsi thonónshoʼte,” Ne Táwit wahawénhaʼse ne Uriah, “Ní꞉se onwákhok tsiʼsho tsi naʼtesastikafʼfanónhne. Nontsiéren tsi iáh tsi tisanónshoʼte tsi tsishénon?”

¹¹ Ne Uriah wahawénhase ne Táwit, “Ne ateriwaseronniátshera tánon NʼIsraeró꞉nons ó꞉ni ne Judah thóh ratiteróntons ne thiʼwaskwakarénhren; ne rateriʼioserakweʼní꞉io Joab ó꞉ni ne raonhatseraókons thóh ronaná꞉taien ne kénk nón꞉we thí꞉ken kahentá꞉ke; ónhní꞉iot tsi ahónton thóh niahonsáke tsi tewakenónsoʼte, ne takatská꞉on ó꞉ni natnekíra, tánon skát꞉ne aiatiá꞉rate ne ketsténha? Ní꞉se tsi nishón꞉nhe, tánon ne satón꞉nhets tsi nihiónnhe, Ní꞉i kwáh iáh èhʼthoh thátiere neh nikariʼóten.”

¹² Ehʼthóhʼne ne Táwit wahawénhaʼse ne Uriah, “Kénʼen kíʼ tsiterón꞉tak nón꞉wa wenhniserá꞉te, tánon enhió꞉renhne ienskoniaténiete.” Káti ne Uriah thóh renhterón꞉takwe Jerusalem nètho wenhniserá꞉tekwe. Ó꞉ni nó꞉iah ientsó꞉renhne,

¹³ Ne Táwit wahohónkaron ne tahiá꞉tonte ó꞉ni aninekíra skátne tánon wahononwaráthonʼte; tánon neh shitsiokará꞉on iahahiákenʼne thahanitskarakwentá꞉ro skátne ne raonhatseraó꞉kons ne rateriʼioserakweʼní꞉io, ók iáh kíʼ tieshawénon ne tsi thonónshote.

Ne Táwit Wahariwaserónhni Ne Uriah Nahonwanonwarhiá꞉khon

¹⁴ Ne shiʼioronhkéne ne Táwit iahohiátonhse ne Joab, tsi iahaténiete Uriah iahá꞉hawe.

¹⁵ Ne kahiatón꞉sera tsi nahaʼhiá꞉ton, “Thóh tétsʼtats ne Uriah ne kwáh ohénton ne tsi waterí꞉io, raonhá꞉khok thóh réhset, ne káti nahónton tahonwakwá꞉te tánon arénheʼie.”

¹⁶ Ne Joab tsi natehahonwarónhni ne kanatowánen, thóh nón꞉we nathó꞉taste ne Uriah tsi nón꞉we nihónhnes ne kwáh tkanenhrá꞉shastste ronterí꞉ios.

¹⁷ Ne konwaterí꞉iose kanatowanénhke tahatiʼiákenhne tánon wahonterí꞉io Joab; tánon ótiakes ne raonhatseraʼshón꞉ahs ne Táwit rahonkwetaʼshón꞉ahs ne ronaterióntons wahonwatinonwarhiákon, Uriah ne ne Hitró꞉non thóh wahaiátarane.

¹⁸ Ehʼthóhʼne ne Joab ionsahateriwániete nahonwaró꞉ri Táwit akwé꞉kon noriwá꞉se tsi niwaterí꞉io;

¹⁹ tánon tsi nahó꞉nahne ne rariwakarénies, “Nó꞉nen enhtiáh tsi nitsroránions akwé꞉kon noríhwase ne ronnontí꞉io tsi niwaterí꞉io,

²⁰ ehʼthóhʼne, tó꞉ka ne ronnontí꞉io raonhaʼkwá꞉tsera enwatharátate, tánon tó꞉ka ní꞉se eniénhase, ‘Nontiéren ní꞉se tsi kwáh kanaták꞉ta niahá꞉se nashaterí꞉io? Iáh kén tesateriéntaraʼkwe nètho tsi nenhtonrónhthate tsi tewasón꞉tote nón꞉we?

²¹ Ónka ronhwanonhwarhiákhon ne Abimelech ne ne Jerubbaal roién꞉a? Iáh kén tsiotonhwísen tsi tewasón꞉tote tahionenhiónti kanenhiowánenh thóh rahiatáke, káti nètho iarénheʼie Thebez nón꞉we? Onhnontiéren tsi thóh niaháse asonhták꞉ta?’ ehʼthóhʼne kíʼ ní꞉se kwáh enshí꞉ron, ‘Ne sanhá꞉tsera Uriah ne ne Hitró꞉non rawehé꞉ion nonʼné꞉e.’”

²² Káti ne rariwakaʼré꞉nies iahá꞉re, tánon iahá꞉rawe wahoró꞉ri ne Táwit akwé꞉kon nètho Joab tsi niehoteniéton nahatró꞉ri.

²³ Ne rariwakaʼré꞉nies wahawénhaʼse ne Táwit, “Ne teionkwarí꞉wate ronterí꞉ios wahonatesenhní꞉iose, tánon tahatiʼiákenhne tahionkhiʼiatsiatónhti thóh kahentá꞉ke; ók kíʼ sahiakiʼiátʼthate thóh nionsahón꞉ne tsi ieiontawehiatákwa tsi iotenhenrakáronhte.

²⁴ Ehʼthóhʼne ne ronhenhnénhawes wahonwarónhthate ne sanhatseraókons asontáke nontáwe; ótsiakes ne ronnontí꞉io raonhatseraókons wahonníheʼie; tánon ne sanhá꞉tsera Uriah ne Hitró꞉non waʼrénheʼie nonʼné꞉e.”

²⁵ Ne Táwit wahawénhase ne rariwakaréhnies, “Tiakariwakénhniaʼte ní꞉se kwáh entshenhá꞉se ne Joab, ‘Tó꞉sa ní꞉se tesathatenikonrá꞉ren noriwashón꞉ahs, asèken nasarekówa kwáh iáh tatekaiestá꞉tsions ónhka aiakononhwarhiá꞉khon; iasát꞉rek iashiatiatónhti ne kanatowanénhke, tánon serihwéntʼtho.’ Tánon tienikonranírat.”

²⁶ Nó꞉nen ne Uriah ró꞉ne sakariwáronhke ne ró꞉ne tsi rawenhé꞉ion, nahón꞉ha wahotiónhnionse.

²⁷ Shontóhetste tsi nihiotsiónhnionkwe, ne Táwit iahateriwaniéten nahontakonwahiaténhawe tsi roʼnónshoʼte, tánon ne ró꞉ne shón꞉ton, tánon wahonakerátsten roskenrakéte. Ók tsi nahá꞉iere ne Táwit iáh tehaʼwerentiʼióʼon ne Roiá꞉ner,