2 Kings 9 - Ohiatonhseratokénti

Jehu Waʼonwaiatará꞉ko Nahatenontí꞉ioste Nisraeʼró꞉nonke

¹ Ethòne ne rotó꞉kense Elisha iahó꞉nonke kentithoiónha rotó꞉kense tánon wahawénhase, “Sathateweienéntan tánon Ramoth Gilead nón꞉we niaháse. Iahá꞉saf kí꞉ken kát꞉tse ne iakeniewátha kénʼie í꞉kare,

² tánon nó꞉nen iénsewe né nón꞉we Jehu tsiatí꞉sak, né roʼníha ne Jehoshaphat tánon ne roshót꞉tha ne Nimshi. Iaʼtetsiasontí꞉iat tsi nón꞉we ne senonwákok akénhake,

³ tánon ranontsíne tasáweron kí꞉ken kèn꞉ie, tánon ensí꞉ron, ‘Né Roiá꞉ner rá꞉ton waʼiaienáro né naisanontí꞉ioke Nisraeʼró꞉nonke.’ Ethòne kwáh tsi niiostó꞉re éhʼren thontáset né nón꞉we.”

⁴ Ká꞉ti ne kén tithoiónha Ramoth nón꞉we niahá꞉re,

⁵ thonónʼwe nahoiatatʼtsénhri ne ronterí꞉ios raʼonnonkwéta rasenhnowánen rotkenhníson. Wahén꞉ron, “Shén꞉shie, kerihwenháwi ne sarihwá꞉ke.” Jehu waharihwanón꞉ton, “Ónʼka tsi nihiá꞉tion takwahtharáni?” “Í꞉se, Shén꞉shie,” tsi watharihwaseráko.

⁶ Ethòne kí꞉ken teniʼiáse kanóns꞉kon niahá꞉ne, tánon né kentithoiónha rotó꞉kense taʼreienáweron ne iakeniewátha ne Jehu ranontsíne tánon wahawénhase, “Né Roiá꞉ner, ne Shakó꞉ní꞉io Nisraeʼró꞉nonke, rá꞉ton: ‘Wakonʼienáro naʼsheiatenonʼtí꞉ioste nakonkwetaʼsónhas Nisraeʼró꞉nonke.

⁷ Ó꞉nenk tsi entsenonwariákon ne iánas ronnontí꞉io, né꞉ne Ahab roʼiénha, né ká꞉ti nahónton natréwate Jezebel tsi iakosé꞉ton nakonkweʼtashón꞉ʼas rotitokenséhakwe tánon nó꞉ia nakenatserahókons.

⁸ Ratikwékon ne Ahab rahowátsires tánon tsi nitotwatsirínon tsi enhonní꞉heie; kwáh kíʼ enkheʼiáthonte ratikwékon ne rotiskenrakéte ne rahowatsirákon, kén nahontahotí꞉ionke khés nahotiksténhake akénhake.

⁹ Thóh nenhkheiérase ne rahowátsire tsi kíʼ niʼkheiérase ne Ronnontí꞉io Jeroboam rahowátsire Nisraeʼró꞉nonke nón꞉we ó꞉ni ne Ronnontí꞉io kwe Baasha Nisraeʼró꞉nonke.

¹⁰ Né Jezebel iáh kíʼ nènhne takonwaiatátha; nahoierónhta érhar nén꞉ne enhónnheke né꞉ne tsi kanakeraseráien ne Jezreel nón꞉we.’” Nó꞉nen ne kíʼ sahénron, ne kentithoʼiónha rotó꞉kense sahaiákenʼne tánon sahatèko.

¹¹ Né Jehu tsitʼthónʼnes ne skát꞉ke ronaterihóntons ratisenhnowánens nionsáre, wahonwarihwanóntonse, “Akwé꞉kon kén skén꞉nonk tí꞉ken? Náhó꞉ten tí꞉ken thotónʼnokʼte tehiatonhontsóniʼne?” “Saterientaréken nahó꞉ten ré꞉rakwe,” ne Jehu watharihwaseráko.

¹² “Iáh teʼionkwahteriéntare!” tsi wathatirihwaseráko. “Thakwahróri tsi nahó꞉ten wahén꞉ron!” “Waʼhakróri ne thóh Roiá꞉ner rá꞉ton: ‘Wakonienókawe naisanontí꞉ioke Nisraeʼró꞉nonke.’”

¹³ Kwáh ók꞉sak ne Jehu rontenroshónʼas ne ratisenhnowánens wahathitakwéntaro ne rahonatewé꞉iaras é꞉neken tsi ierentʼtensthákwa né꞉ne Jehu thóh nón꞉we natahá꞉tane, wahatihonráwate, tánon wathotihénrete, “Jehu seh Ronnón꞉tiio í꞉ken!”

Né Ronnontí꞉io Joram Nisraeʼró꞉nonke Wahonwanonwariákon

^14-15 Ethòne ne Jehu wahatinikonrónhni tsi nahoiérase ne Ronnontí꞉io Joram, Jezreel né nón꞉we iéreskwe, thóh nón꞉we niehawénon niahonsahaiewénhtaʼne tsi nihotkarewáton ne tsi waterí꞉io né Ramoth tsi iehonwatsiatóntion ne Ronnontí꞉io Hazael ne Syria nón꞉we. Ká꞉ti ne Jehu washakawénhase ne rontenrosónhas ne ratisenhnowánens, “Tóh꞉ka tewakwékon í꞉ken, kwáh orihwí꞉io tsiónhni tóh꞉sa ónhka naʼieiákenʼne ne Ramoth tánon nahonwanaronkatenhníra nonkweshónhas ne Jezreel nón꞉we.”

¹⁶ Ethòne rahoseréthakon notsónkwah wahatítha tánon Jezreel niahá꞉re. Né Joram arèko teshoiewenhtáhon, tánon ne Ronnonʼtí꞉io Ahaziah né Judah nón꞉we thóh í꞉reskwe, ronatarenáwi.

¹⁷ Né ranikónrare ne tsi tehatinenraienthákwah ne tsi kanikátote né Jezreel nón꞉we wahó꞉ken ne Jehu tánon ne rahonkweʼtashón꞉ʼas tahónʼne. “Khèkense ronhnón꞉kwe tahotishátenhtse ákta nontahonenonhátie!” iathohénrete. Né Joram watharihwaseráko, “Iatsaténiet ne roshátens nahatkénsera tóh꞉ka kén onhkwahténro khés thetewatátʼtions í꞉ken.”

¹⁸ Né rarihwakarénies thóh niahóse iathóterate ne Jehu tánon wahawénhase, “Né ronnontí꞉io tehotonhontsóni nahoteriéntarane tsi tá꞉se tóh꞉ka kén ateró꞉sera í꞉ken.” “Iáh né othènen tesarihwáke!” ne Jehu watharihwaseráko. “Aknaken nón꞉we nonshasashá꞉ten.” Né ranikónhrare ne tsi tehatinenraienthákwah kanikató꞉te tsi wahakróri nètho rarihwakarénies tsi iathontátken nètho kentsiókwah ók iáh kíʼ nènhne thatontáre.

¹⁹ Thí꞉hate rarihwakarénies ionsahonwató꞉ro, kwáh né sahó꞉rihwa tsi wahorihwanóntonse ne Jehu. Shé꞉kon kíʼ ne Jehu tonsaharihwaseráko, “Kwáh ne iáh othènen tesarihwáke! Aknaken nónwe nonshasashá꞉ten.”

²⁰ Shé꞉kon énska ionsónteratsʼte ne ranikónrare tsi sahatróri nètho rarihwakarénies tsi iahá꞉rawe tsi nontahothitsiókwine ók iáh nenné꞉e thaʼthontáre. Tánon iahá꞉ieste, “Né ranenhrakweʼní꞉io tsi thahohonwísere notsónkwah tsi ní꞉ioht ne thontónhnók꞉te, kwáh tsi ní꞉ioht ne Jehu!”

²¹ “Sewaweienéntan nakésere notsónkwah,” Né Ronnontí꞉io Joram wahaténhnane. Thóh kíʼ nahatí꞉iere, tánon rahón꞉a ó꞉ni ne Ronnontí꞉io Ahaziah, skaseretátʼtions tsi niahotihonwísere ne rahotíseres notsónkwah ne tahontátʼken ne Jehu. Kahentáke nónhwe nathontátken né꞉ne Naboth rahohentháke.

²² “Skénʼnon kén shá꞉wi tsi wá꞉sewe?” ne Joram wahorihwanóntonse. “Onʼní꞉ioht tsi skénnen akénhake,” ne Jehu watarihwaseráko, “tsi shé꞉kon akwé꞉kon ionkwatienawástons natahennarátseras ó꞉ni ne kaiatonhnisónhas nètho sanisténha Jezebel tsotásawen?”

²³ “Kwáh kanikonrá꞉ton, Ahaziah!” ne Joram tsi watohénrete, tánon tonsahakaraténi notsónkwah tánon sahatèko.

²⁴ Né Jehu wahaienkwiró꞉tsi, né꞉ne kwáh rahoshastsʼtenserakwékon tsi iaharónthate tánon rasónhne ne Joram nón꞉we nathókwahte tánon iathaweriasáweheste. Né Joram rahoseréthakon notsónkwah warénheie,

²⁵ tánon ne Jehu wahawénhase ne roiénawase Bidkar, “Iahá꞉saf ne rahoierónhta tánon kahentáke iasáti né Naboth rahohentáke. Shaʼseiárann né shatetiatítakwe sihionkenihonwísere rahonàken ne Joram roʼníha Ahab, ne Roiá꞉ner tahawenhnínekenʼne tsi nahotkónten ne Ahab:

²⁶ ‘Wakatkátho tsi nahonwásete ne Naboth tánon ne roʼiénha né theténre. Tánon kíʼ wakaráratsʼte tsi kwáh kénʼen né sakahénta nón꞉we nenhkonréwate.’ Ká꞉ti iahásaf ne Joram rahoierónhta,” ne Jehu wahó꞉nahne ne roiénawase, “tánon kahentàke iasáti né꞉ne Naboth rahohentáke, né꞉ne akaná꞉ne né Roiá꞉ner tsi nihorarátston.”

Né Ronnontí꞉io Ahaziah Ne Judah Nón꞉we Wahonwanonwariákon

²⁷ Né Ronnontí꞉io Ahaziah wahatkáto tsi nahá꞉wenhne, sók kíʼ rahoseréthakon otsónkwah wahatítha tánon tsit kanatowánen ne Beth Haggan niaháre, Jehu roserèhne. “Wahononwariákon nón꞉neʼe!” Jehu wasakónaʼne ne rahonkwetashón꞉a, tánon wahonwakaréwaʼte; tsi niahonhonwísere ne rahó꞉sere otsónkwah tsi niehiothahí꞉non ne Gur, né nákta tsi kanátaien ne Ibleam. Ók wahakwé꞉niʼkiʼ iahakónthaʼkwe thóh niahá꞉re tsit kanátaien ne Megiddo, thóh nón꞉we iarénheʼie.

²⁸ Né rahonhatserasónhas Jerusalem nionsahatíhaʼwe ne rahoierónhta otsónkwahkon sahonnèta tánon kanontiʼiotserákon tsi ronwatihiatatahástha nón꞉we nahonwaiathá꞉ta né꞉ne Táwit raoná꞉thakon.

²⁹ Ne Ahaziah rahónha wahonontí꞉ioʼne ne Judah nón꞉we né꞉ne enskaiawénhre siʼioserakéhaton nètho Joram né꞉ne roʼníha ne Ahab né ronnontí꞉ioʼkwe Nisraeʼró꞉nonke.

Né Ionnontí꞉io Jezebel Wakonwanonwariákon

³⁰ Né Jehu Jezreel nón꞉we iaháraʼwe. Né Jezebel wakarihwáronhke tsi nahá꞉wenhne, watewatenawashóʼkaʼwe, sontʼkhotsaʼserónhni, tánon thóh nón꞉we natʼkátaʼne tsi iononsthonkwahkáronte ne kanontiʼiotserákon kanónskon.

³¹ Né Jehu tsi nonhtahatáweiaʼte ne tsi iotenhenrakáronhte, iatsohénrete, “Í꞉se Zimri! Né tsiashéton ne iahiatakweʼní꞉io, nontsiéren tsi kénʼen í꞉ses?”

³² Né Jehu wahatharakétsko tánon wathohénreʼte, “Ónhʼka ne thaʼkeriwáwahse?” Tenihiáse khés náhsen niháti ne kanontiʼiótsera ahonkwetaʼshón꞉as tsi iononsthonkwahkáronhte tahontʼkéthoʼte tsi wathonwatkáneren,

³³ tánon ne Jehu washakawénhase, “Tasehwahiátent!” Thakonwahiátentʼte ká꞉ti, tánon nahonekwénhsa asonhthàke watewatstharóko ó꞉ni ne kosáhtens ratiʼiathákes. Né Jehu thók kahiatháke thok tsahohonwísera notsónkwah,

³⁴ iahatáweiate ne kanontiʼiotserákon, tánon wataskáʼon. Tánon ethòne ó꞉nen wahén꞉ron, “Iasewahiaténha thí꞉ken konwarewáton iónkwe tánon sewahiathá꞉ta, ethosàne, ronnontí꞉io sakoiénha í꞉ken.”

³⁵ Ók kíʼ ne rónkwe ne iahahiákenʼne nahahiatháta; iáh tahó꞉then tesotʼtshénrion né khók nonóntsi tánon ostsiensónhas ne kanentsákes ó꞉ni ne wasitákes.

³⁶ Né sonsahonwaró꞉ri ne Jehu, wahénron, “Né kí꞉ken ne kwáh thóh ní꞉ioht tsi rotʼró꞉ri ne Roiá꞉ner tsi thóh neniáwenhne, né nó꞉nen rahonháke ne rahonhátsera Elijah nón꞉we nihotróri: ‘Erhar enkónʼneʼke nahoierónhta ne Jezebel né꞉ne tsi kanakeraseráien ne Jezreel.

³⁷ Né iatehiothaténron nahoierónhta tsi ní꞉ioht nó꞉ta tsi tenwareniátonhke, né ká꞉ti ne tóh꞉sa ónka aiekwéni nakonwaiénterene.’”