2 Kings 8 - Ohiatonhseratokénti

Né Iónkwe Ne Shunemró꞉non Tontáwe

¹ Ó꞉nen ne Elisha raró꞉ri ne iónkwe ne Shunem nón꞉we nikanákerekwe, né naón꞉ha roʼiénha tsi sahonnhéton, nètho Roiá꞉ner tsi thaʼtenietháʼne natonkariá꞉kon ne tsi ionwénhtsaien, né꞉ne tsáta niʼioseráke nikaríhwes tsi enwatenatseranó꞉ronhne, tánon kíʼ tehiotonhontsóhon niaiakoiaténhawe nahowátsire tánon ákte nón꞉we niahonsahonhnákerate.

² Thóh kíʼ nakáiere tsi nahá꞉nane tánon ieiakoiaténha nahowátsire Philistia nón꞉we tsáta niʼioseráke iesatinákerekwe.

³ Tsi iahontók꞉ten ne tsáta niʼioseráke Israerʼró꞉nonke ionhsàwe tánon ronnontí꞉ioke niahá꞉he nahorihwanóntonse nètho aonónsa ó꞉ni nahohóntsa nahonsakaiéna.

⁴ Tsi wahoiatatʼtsénri ne ronontí꞉io Gehazi tehothítare, né꞉ne Elisha rahonhátsera íken; né ronnontí꞉io né nènhne tehotonhontsóni nahoteriéntaraʼne ne iorihwanerakwahthénions tsi nihaiéra ne Elisha.

⁵ Tsi nikaríhwes ne Gehazi rohroriá꞉nions ne ronnontí꞉io tsi ní꞉ioht ne Elisha tsi sahonnhéton ne raweheiónnhe, né iónkwe wahorihwanóntonse ne ronnontí꞉io. Né Gehazi wahawénhase, “Sanontí꞉io, né kí꞉ken ne iónkwe tánon ne roʼiénha tsi nikáien ne Elisha sahonnhéton!”

⁶ Tsi watonwarihwaserákwahse tsi niharihwanóntons ne ronnontí꞉io, wakarihwanírate ne Gehazi tsi nihatʼrioriánions, tánon ká꞉ti ne ronnontí꞉io iahó꞉nonke ne raonhátsera tánon wahoróri né tahontháron orihwaʼkwékon nahowenhkénʼen, thoʼká꞉rak tsi satèkena ne kaientʼthótseras nahohenthákes tsi nihiókwen ne tsáta niʼioseráke nikaríhweskwe tsi éhʼren iawétonhne.

Elisha Tánon Ne Ronnontí꞉io Benhadad Né꞉ne Syriaʼne Nónhwe

⁷ Né Elisha Damascus nonwe niahá꞉re eh siʼkaháwikwe né ronnontí꞉io Benhadad ne Syriahne rononwatʼthaníhakwe. Nó꞉nen sahonwaró꞉ri ne ronnontí꞉io né Elisha tsi thóh í꞉res,

⁸ Né ronnontí꞉io wahawénhase ne Hazael, né꞉ne saiáta rahonhátsera íken, “Iatiaʼwítas athatawítshera ne rotókenhse tánon tierihwanón꞉tons né tanithára ne Roiá꞉ner naharihwatʼtsénhri tóh꞉ka kén khés ne iáh tahonsakatʼkwahtháko.”

⁹ Ká꞉ti ne Hazael waʼsakorienakéthaʼte kaiéri niwásen niháti iotiniakwáheʼre né꞉ne kwáh tsit niaʼtekonsónhas né kwáh tsoiáneres né Damascus nónhwe nikasahá꞉nions tánon Elisha wahotkénhsera. Nó꞉nen ne Elisha sathiatátʼken, wahénron, “Né sanʼnhátsera Ronnontí꞉io Benhadad tahakatóri nakonriwanón꞉tonhse tóh꞉ka kén khés ne iáh thaʼtahonthahioiánerenhne tsi rononwákʼtani.”

¹⁰ Né Elisha watharihwaseráko, “Né Roiá꞉ner wahakerihothásien tsi enrénheʼie; ók wáhs kíʼ tánon tsró꞉ri tsi tentsoiánerenhne.”

¹¹ Éhthoh ne Elisha kwáh í꞉ken tsi waʼtotkaróten né tsotónʼnekt tsi nihakonsóhten tsi nió꞉re ne Hazael ó꞉ia naronhnó꞉tenhne. Thonʼtaiawénstsi ne Elisha tsatewaterané꞉kare tsi wathaséntʼtho.

¹² “Onʼnontiéren tsi tesaséntʼthos, sénshie?” ne Hazael waharihwanónton. “Tsioríhwa tsi wakateriéntare tsi niwahét꞉kens tsi nenhseiérase nonkweshónʼas Nisraeʼró꞉nonke,” ne Elisha watharihwaseráko. “Entsirotónhnion ne watenhenró꞉tons, enseiawenhthóʼseron ne kén nithotiʼiónsas, ensenonwenhserário ne sakotihiohokónhas tsi nióre ienhonhníheʼie, tánon ensehiataratsónko ne rahonathonwisenhtseraʼsónhas ne kontíhawe nahiotiwiraiéntaʼne.”

¹³ “Ónʼneʼnaiáwenhne né naʼkesastenserowanénhake?” ne Hazael Waharihwanónton. “Iáh ónka niʼtèken!” “Né Roiá꞉ner rakenesténhni tsi ensatenontí꞉ioste ne Syriaʼne nón꞉we,” ne Elisha watarihwaseráko.

¹⁴ Ne Hazael Benhadad tsiténteron nionsáre, né ronnontí꞉io wahorihwanóntonse, “Nahó꞉ten ne Elisha ráton?” “Wahatróri tsi kwáh orihwí꞉io tsi ensesatwatháko,” ne Hazael watarihwaseráko.

¹⁵ Ók kíʼ nó꞉ia saiórenhne ne Hazael oniataráha iahá꞉hawe, awènhke iahàroʼwe, tánon né wá꞉raste tsi wahokonwaróktste ne ronhnontí꞉io tsi nió꞉re iarénheie. Tánon ne Hazael né thonsahonakʼthákwen ne Benhadad tsi sahatenontí꞉ioste ne Syriahne.

Né Jehoram Né Ronnontí꞉io í꞉ken Ne Judah Nónwe

¹⁶ Né wísk siʼioserakéhaton né sihonontí꞉iokwe ne Joram né꞉ne roʼiénha ne Ahab, né꞉ne ronnontí꞉iokwe ne Israerʼró꞉nonke, né Jehoram né꞉ne roʼníha né Jehoshaphat né꞉ne ronnontí꞉iokwe ne Judah nón꞉we

¹⁷ náhsen-niwásen-ásen-tékeni satehahoseriʼiákon, tánon né rakórakwe ne Jerusalem né꞉ne shatékon niʼioseráke nikaríhweskwe.

¹⁸ Né ró꞉ne né꞉ne Ahab sakoiénha í꞉ken, kwáh kíʼ tsi ní꞉ioht ne Ahab rahowátsire né wahá꞉sere tsi nihatiweienáksenʼne ne rontinontí꞉iokwe Nisraeʼró꞉nonke. Waharihwánerake tsi nòkwah ne Roiá꞉ner,

¹⁹ ók kíʼ ne Roiá꞉ner iáh thóh tehonikonroténʼne naharihwátonhte ne Judah, tsioríhwa tsi rorarasténhni ne rahonhátsera Táwit tsi nienhatwatsírihne tsi tiotʼkonhónwe enhatikórake.

²⁰ Tsi ná꞉he ronnontí꞉iokwe ne Jehoram ne Edom wahakonatakári ne Judah tánon iatewathatsátiste tsi kanontiʼiotseráien.

²¹ Sók kíʼ ne Jehoram iahaiákenʼne akwé꞉kon iahá꞉hawe ne rahoseresónhas notsónkwas tánon Zair niahá꞉re, thóh nón꞉we ne Edomró꞉nons ronterí꞉ios wathonwatihonwarónhni. Tsi niwasóntes raónha tánon ne otsónkwas ronateriwasterístons wahatikwéni wahatiniákenʼne tánon wahontèko, tánon ne raonkwetashón꞉as ronterí꞉ios tsi tkanonshó꞉tons iathonréni.

²² Ká꞉ti ne Edom kwáh kíʼ ahonhatsíwakok tíken tsi nòkwah ne Judah né꞉ne thóh tiotásawe. Kwáh thóh nikaháwi ne kanatowanénke ne Libnah ó꞉ni wakanatakári.

²³ Kwáh ó꞉ni nó꞉ia nahorihoténsons nètho Jehoram tsi nahotiérenhke thóh nón꞉we nikaiatónhnions Tsi Nihonwatikáratons ne Ronhtinontí꞉ios ne Judah Nónhwe.

²⁴ Né Jehoram warénheie tánon thóh nón꞉we nihonwaiatháten ne kanontiʼiótseras tsi ronwatiʼiathatahástha ne Táwit raoná꞉takon, tánon ne roʼiénha Ahaziah tonsahonakʼthákwen tsi ronnontí꞉iokwe.

Né Ronnontí꞉io Ahaziah Ne Judah Nón꞉we

²⁵ Né tékeni-iawénre siʼioserakéhaton sihonontí꞉iokwe ne Joram né꞉ne roʼníha ne Ahab né ronnontiiokwe ne Israerʼró꞉nonke, Ahaziah né꞉ne ronikénhen ne Jehoram né꞉ne sahatenontí꞉ioste ne Judah nón꞉we

²⁶ tewasentékeni satehahoseriʼiákon, tánon raónha wahatkórasʼte ne Jerusalem tsósera nikaríwes. Né ronisténha né꞉ne Athaliah, né sakoiénha ne Ronnontí꞉io Ahab tánon né sakoterénhakwe ne Ronnontí꞉iokwe Omri né Israerʼró꞉nonke.

²⁷ Né Ahaziah kaniakʼtserákon tsi ní꞉ioht tsi iathátenonkwe ne Ronnón꞉tiio Ahab, waharihwánerake tsi nòkwah ne Roiá꞉ner, kwáh kíʼ tsi nihotiʼiéren ne Ahab rahowátsire.

²⁸ Né Ronnón꞉tiio Ahaziah iatiátieste ne Ronnón꞉tiio Joram ne Israerʼró꞉nonke nahonterí꞉io ne Ronnón꞉tiio Hazael ne Syriaró꞉non. Ne ronterí꞉ios Ramoth né꞉ne Gilead nón꞉we nathónteraʼne, tánon ne Joram wahokaréwate tsi ronaterí꞉io.

²⁹ Thóh nionsáre tsitkanatowánen ne Jezreel né꞉ne tahontahioiánerenhne tsi nihokarewáton, tánon ne Ahaziah thóh wàrethe wahonatharénsera.